Koj kawm tau txog Yehauvas los ntawm kev nyeem phau Vajlugkub. Puag thaum ub Vajtswv tau xaiv tej tug tibneeg los sau tseg nws tej kev xav. Tej lus sau tseg cia ntawd hu ua phau Vajlugkub. Niaj hnub no peb kawm txog Vajtswv los ntawm kev nyeem phau Vajlugkub. Rau qhov phau Vajlugkub muaj Yehauvas txojlus, lossis txoj xov, peb thiaj muab phau Vajlugkub hu ua Vajtswv Txojlus. Peb ntseeg tau phau Vajlugkub rau qhov Yehauvas yeej tsis dag li. “Vajtswv tsis txawj dag.” (Henplais 6:18) Vajtswv Txojlus muaj qhov tseeb.​—Yauhas 17:17.

Phau Vajlugkub yog ib qho khoom pub muaj nqes heev uas Vajtswv muab rau peb. Nws zoo li ib tsab ntawv uas leej txiv tau xa rau nws cov menyuam uas nws hlub. Phau Vajlugkub qhia txog Vajtswv lo lus cog tseg tias yuav muab lub ntiajteb no hloov ua ib qho chaw kom zoo nkauj heev rau tibneeg nyob​—ua ib lub vaj kaj siab. Nws qhia peb txog tej yam uas Vajtswv tau ua yav tas los, tej yam uas Vajtswv ua tamsim no, thiab tej yam uas Vajtswv yuav ua yav tom ntej rau nws cov menyuam uas muab siab npuab nws. Phau Vajlugkub kuj pab peb daws peb tej teeb meem thiab nrhiav tau txojkev zoo siab.​—2 Timaute 3:16, 17.

 Yehauvas Cov Timkhawv yog Vajtswv cov phoojywg; lawv yuav pab koj to taub tej uas phau Vajlugkub qhia. Cia li qhia rau lawv paub tias koj xav kawm Vajlugkub. Lawv tsis sau nqe rau txojkev kawm no. (Mathai 10:8) Tsis tas li ntawd xwb, koj yeej mus koom tau cov Khixatia tej kev sib txoos. Lawv tej kev sib txoos muaj nyob rau hauv qhov chaw pe hawm Vajtswv hu ua lub Tsev Nceeg Vaj. Yog tias koj mus koom cov Khixatia tej kev sib txoos no, koj yuav paub Vajtswv sai dua.

Koj kawm tau txog Vajtswv los ntawm tej yam nws tau tsim. Piv txwv li no, phau Vajlugkub hais tias: “Vajtswv tsim lub ntuj thiab lub ntiajteb.” (Chiv Keeb 1:1) Thaum Yehauvas tsim tau “lub ntuj,” nws ua tau lub hnub. Qhov no qhia peb li cas txog Vajtswv? Nws qhia peb tias Yehauvas muaj hwjchim loj kawg nkaus. Tsuas yog Yehauvas tib leeg xwb thiaj tsim tau tej yam uas muaj zog npaum li lub hnub. Nws kuj qhia peb tias Yehauvas muaj tswvyim, rau qhov yuav tsum muaj tswvyim thiaj tsim tau lub hnub, uas ua tau tshav ntuj ci sov tuaj rau peb thiab tsis txawj tuag li.

Tej yam Yehauvas tsim qhia tau tias nws hlub peb. Xav txog txhua hom txiv hmab txiv ntoo hauv ntiajteb no. Yog tias Yehauvas tsuas tsim ib hom txiv ntoo rau peb xwb, los yog tsis tsim hlo li los yeej tau. Tiamsis, Yehauvas tau pub ntau hom txiv hmab txiv ntoo rau peb, cov loj cov me, cov liab cov ntsuab, thiab cov qab cov qaub huvsi. Qhov no qhia tias Yehauvas tsis yog ib tug Vajtswv uas muaj kev hlub xwb, tiamsis nws muaj lub siab dav, lub siab zoo, thiab nws txawj xav.​—Ntawv Nkauj 104:24.