Yexus Khetos yog Yehauvas tus Tub thiab yog nws tus phoojywg zoo tshaj. Ua ntej Yexus los ua tibneeg nyob hauv ntiajteb, nws yog ib tug plig uas muaj hwjchim loj heev nyob saum ntuj ceeb tsheej. (Yauhas 17:5) Ces tom qab ntawd, nws los rau hauv ntiajteb los qhia qhov tseeb txog Vajtswv rau tibneeg. (Yauhas 18:37) Yexus kuj muab nws txojsia los cawm cov neeg mloog lus kom dim txojkev txhaum thiab kev tuag. (Loos 6:23) Tamsim no Yexus yog tus Vajntxwv ntawm Vajtswv lub Nceeg Vaj, uas yog lub tseem fwv saum ntuj ceeb tsheej uas yuav muab lub ntiajteb no hloov ua ib lub Vaj Kaj Siab.​—Qhia Tshwm 19:16.

Cov tubtxib saum ntuj los kuj yog Vajtswv cov phoojywg. Cov tubtxib saum ntuj tsis tau xub ua neeg nyob hauv ntiajteb no dua. Vajtswv twb xub tsim lawv rau saum ntuj ceeb tsheej ua ntej nws tsim lub ntiajteb. (Yauj 38:4-7) Muaj ntau plhom tus tubtxib saum ntuj. (Daniyee 7:10) Vajtswv cov phoojywg uas nyob saum ntuj ceeb tsheej xav kom tibneeg kawm qhov tseeb txog Yehauvas.​—Qhia Tshwm 14:6, 7.

Vajtswv kuj muaj ib co phoojywg hauv ntiajteb no; nws muab lawv hu ua nws cov timkhawv. Ib tug timkhawv hauv tsev tu plaub yuav ua pov thawj txog tej uas nws tau pom lossis paub. Yehauvas Cov Timkhawv qhia tej uas lawv paub txog Yehauvas thiab nws lub hom phiaj rau lwm tus. (Yaxaya 43:10) Zoo tib yam li cov tubtxib saum ntuj, cov Timkhawv xav pab koj kawm qhov tseeb txog Yehauvas. Lawv xav kom koj ua Vajtswv tus phoojywg thiab.