1, 2. (1) Ib txhia xav li cas txog Vajtswv lub koom haum? (2) Peb yuav kawm txog dabtsi hauv zaj no?

IB TXHIA hais tias: “Tsis tas yuav muaj ib lub koom haum los coj peb. Tsuav peb tau nrog Vajtswv sib raug zoo xwb ces txaus lawm.” Puas muaj tseeb li ntawd tiag?

² Hauv zaj no, peb yuav kawm tias Yehauvas yog ib tug Vajtswv uas xav kom txhua yam muaj chaw txawb chaw rau. Nws cob nws cov tibneeg kom coj raws kab raws kev. Tsis tas li ntawd xwb, peb yuav kawm seb tsim nyog peb coj li cas thaum Yehauvas lub koom haum taw qhia peb. (1 Khaulee 14:33, 40) Nyob thawj 100 xyoo, cov Khixatia ua raws nraim li Vajtswv Txojlus qhia, lawv tes haujlwm thiaj mus raws kab raws kev. Lawv thiaj tshaj txoj xov zoo mus deb heev. Niaj hnub no, phau Vajlugkub tseem pab tau peb li ntawd thiab. Vim peb mloog Vajtswv Txojlus thiab ua raws li Nws lub koom haum taw qhia, peb thiaj tshaj txoj xov zoo mus thoob qab ntuj khwb. Tsis tas li ntawd xwb, pab tau lub koom txoos coj dawb huv, nyob sib haum xeeb, thiab koom tau ib lub siab.

3. Ua cas peb thiaj paub tias Yehauvas xav kom txhua yam muaj chaw txawb chaw rau?

³ Thaum peb saib tej uas Yehauvas tau tsim tseg peb pom tias nws yog ib tug Vajtswv uas xav kom txhua yam muaj chaw txawb chaw rau tiag.  Phau Vajlugkub hais tias Yehauvas “siv tswvyim tsim ntiajteb, thiab siv kev nkag siab nthuav lub ntuj.” (Paj Lug 3:19) Tibneeg niaj hnub tshawb nrhiav tej uas Yehauvas tau tsim tiamsis tseem tshuav ntau yam uas lawv tsis nkag siab. Phau Vajlugkub thiaj hais tias neeg tsuas hnov txog Yehauvas zoo li ‘lub suab ntxhi’ xwb. (Yauj 26:14) Tej uas neeg tau tshawb pom yeej ua pov thawj tias txhua yam uas Vajtswv tsim muaj chaw txawb chaw rau tiag. (Ntawv Nkauj 8:3, 4) Xws li tej hnub qub saum nruab ntug, muaj qas txhiab qas vam ntsaus hnub qub, tiamsis txhua lub nyias kiv raws nyias txoj kab tsis sib tsoo li. Tsis tas li ntawd xwb, muaj ib lub zog rub kom cov ntiajteb kiv puag ncig lub hnub, nyias kiv raws nyias kab. Ua cas thiaj muaj tau li no? Vim Yehauvas yog tus teeb tej ntawd. Thaum peb pom tias Yehauvas siv “tswvyim tsim” lub ntuj lub teb zoo li no, yeej ua rau peb xav qhuas thiab pe hawm nws, puas yog? Yeej ua rau peb xav muab siab npuab Yehauvas mus li.​—Ntawv Nkauj 136:1, 5-9.

4. Ua cas cov neeg tshawb txujci ho tsis paub teb tej lus nug tseem ceeb?

⁴ Cov neeg tshawb txujci kawm tau ntau tsav ntau yam txog lub qab ntuj khwb no. Lawv thiaj txawj tsim tej twj tshiab los pab tibneeg lub neej. Tiamsis tseem tshuav ntau yam uas lawv paub tsis tau txog. Zoo li cov neeg uas kawm txog tej hnub qub, lawv tsis paub tias ib puas tsav yam rhawv los li cas. Lawv kuj tsis paub tias yog vim li cas ho muaj tibneeg, tsiaj txhu, thiab nroj tsuag nyob hauv lub ntiajteb. Lawv kuj tsis paub tias vim li cas tibneeg ho muaj lub siab ntshaw nyob mus ib txhis. (Laj Lim Tswvyim 3:11.) Coob leej tsis paub txog tej no vim cov neeg tshawb txujci hais tias tsis muaj Vajtswv. Lawv xav kom sawvdaws ntseeg tias ib puas tsav yam yog txia los xwb. Tiamsis phau Vajlugkub uas yog Vajtswv Txojlus teb tau cov lus nug no huvsi.

5. Muaj tej kevcai twg los tswj ib puas tsav yam puag ncig peb?

⁵ Yehauvas yog tus tsa kevcai los kav ib puas tsav yam hauv qab ntuj khwb. Nws tsa tej kevcai zoo li cas? Muaj tej kevcai los tswj peb tej roj ntsha kom txhua tus neeg tej siab tej ntsws tej plab tej hnyuv xeeb txawm nyias nyob muaj nyias kis hauv nrog cev. Twb yog vim li ntawd tej kws kho mob thiaj paub tias neeg lub nrog cev zoo li cas. Yehauvas kuj tau tsa txoj cai gravity [nka·va·tis] los kav lub ntiajteb. Txoj cai ntawd zoo li lub hlau nplaum uas rub txhua yam los rau hauv pem teb. Vim muaj lub zog ntawd, yog peb lam caws qia saum ru tsev los ces peb yuav tsum raug mob xwb. Muaj tej kevcai zoo li no nyob puag ncig peb. Tsis muaj leejtwg yuav hloov tau tej kevcai ntawd. Tej kws hluavtaws xob, kws kho ciav dej, kws tooj kws hlau, kws phais mob thiab cov neeg tsav dav hlau puavleej paub tej kevcai no lawv thiaj ua tau lawv tes haujlwm.

6. Ua cas peb thiaj paub tias Yehauvas xav kom peb pe hawm nws raws kab raws kev?

⁶ Yehauvas tsim lub qab ntuj khwb no zoo kawg nkaus, txhua yam muaj chaw txawb chaw rau thiab mus raws kab raws kev. Nws xav kom nws cov tibneeg teev tiam nws raws kab raws kev thiab. Nws thiaj npaj phau Vajlugkub los taw qhia tibneeg. Yog peb xav tau lub neej zoo, peb yuav tsum coj raws li phau Vajlugkub tej lus qhia thiab mloog Vajtswv lub koom haum lus.

7. Vajtswv tau npaj phau Vajlugkub li cas?

⁷ Vajtswv yog tus pub phau Vajlugkub rau peb. Tiamsis cov neeg kawm ntawv siab ib txhia hais tias phau Vajlugkub tsuas yog tibneeg lam muab cov Yudai thiab cov Khixatia tej ntaub ntawv los tso ua ke xwb. Yeej tsis muaj tseeb li lawv hais ntawd. Vajtswv yog tus xaiv cov neeg uas sau phau Vajlugkub. Nws yog tus qhia tias lawv yuav sau rau lub sijhawm twg thiab sau txog dabtsi. Twb yog vim li ntawd, phau Vajlugkub thiaj muaj tib lub ntsiab thoob plaws. Phau Chiv Keeb mus txog phau Qhia Tshwm, qhia txog tus “caj ces” lossis tus xeeb ntxwv uas yuav kho kom lub ntiajteb rov ua ib lub vaj kaj siab dua. Tus xeeb ntxwv ntawd yog Yexus Khetos thiab nws lub Nceeg Vaj yuav ua rau sawvdaws pom tias Vajtswv muaj cai kav ib puas tsav yam.​—Nyeem Chiv Keeb 3:15; Mathai 6:10; Qhia Tshwm 11:15.

8. Cov Yixayee ua tau txhua yam raws kab raws kev li cas?

 ⁸ Cov Yixayee coj raws nraim li Vajtswv txoj Kevcai uas nws tau pub rau lawv, lawv thiaj ua tau raws kab raws kev. Txoj Kevcai qhia seb lawv yuav tshais chaw thiab txo lub tsev ntaub sib ntsib li cas. Txhua tus nyias kuj muaj nyias ib teg haujlwm ua. Phau Vajlugkub qhia tias muaj ib co “pojniam ua [Yehauvas] li haujlwm ntawm lub qhov rooj tsev ntaub sib ntsib.” (Khiav Dim 38:8) Puag tom qab no, Vajntxwv Davi kuj faib haujlwm rau cov pov thawj thiab cov Levi ua hauv Yehauvas lub tsev thiab. (1 Vaj Keeb Kwm 23:1-6; 24:1-3) Thaum cov Yixayee coj raws li Yehauvas tau hais, Nws foom koob hmoov rau lawv. Lawv muaj kev sib haum xeeb. Lawv koom tau ib lub siab coj raws kab raws kev.​—Kevcai 11:26, 27; 28:1-14.

9. Cov koom txoos nyob thawj 100 xyoo tau ua txhua yam raws kab raws kev li cas?

⁹ Cov koom txoos nyob thawj 100 xyoo los kuj ua txhua yam raws kab raws kev thiab. Lub caij ntawd muaj ib co kwvtij ua pab uas ntaus thawj. Lawv sau ntawv mus cob qhia cov koom txoos. Thaum ntej, pab uas ntaus thawj ntawd tsuas yog cov tubtxib xwb. Tiamsis tom qab no, lwm cov txwj laus kuj los pab tuav tes haujlwm ntawd thiab. (Tubtxib Tes Haujlwm 6:1-6; 15:6) Yehauvas cob kom cov kwvtij ntawd txawj sau ntawv mus qhuab ntuas thiab qhuab qhia cov koom txoos. (1 Timaute 3:1-13; Titau 1:5-9) Thaum cov koom txoos mloog cov kwvtij ntawd lus, pab tau lawv li cas xwb?

10. Thaum cov koom txoos nyob thawj 100 xyoo ua raws li pab uas ntaus thawj tau hais, tau muaj li cas xwb? (Saib daim duab ntawm sab 12.)

¹⁰ Nyeem Tubtxib Tes Haujlwm 16:4, 5. Nyob thawj 100 xyoo, pab uas ntaus thawj yog “cov tubtxib thiab cov saib xyuas pawg ntseeg hauv lub nroog Yeluxalees.” Thaum lawv sab laj thiab txiav txim siab txog tej haujlwm tseem ceeb, lawv mam txib ib co kwvtij mus qhia cov koom txoos paub. Thaum cov koom txoos ua raws li pab uas ntaus thawj tau hais, ua rau lawv “muaj zog thiab cov xov dawb niaj hnub tsav ntxiv coob zuj zus tuaj” xwb. Niaj hnub nimno, peb yuav xyaum tus qauv no li cas hauv lub koom txoos?

11. Cov txwj laus thiab cov tub leg num yuav tsum coj li cas thaum Vajtswv lub koom haum hais kom cov koom txoos ua ib yam dabtsi twg?

¹¹ Cov kwvtij uas saib xyuas tej ceg, cov kwvtij uas saib xyuas thaj tsam, thiab cov txwj laus yuav tsum mloog Vajtswv lub koom haum lus. Vajtswv Txojlus qhia kom peb sawvdaws mloog cov uas coj thiab saib xyuas peb. (Kevcai 30:16; Henplais 13:7, 17) Cov uas muab siab npuab Yehauvas yeej tsis yws lossis ua cov nyom cov kwvtij uas saib xyuas lub koom txoos. Lawv tsis xyaum li Di-autefe uas tsis mloog cov kwvtij hais. (Nyeem 3 Yauhas 9, 10.) Yog peb mloog lus, yuav pab tau lub koom txoos koom tau ib lub siab thiab nyob sib haum xeeb. Peb yuav tsum xav txog cov lus nug no: ‘Kuv puas txhawb kuv cov kwvtij nkauj muam kom muab siab npuab Yehauvas? Thaum Vajtswv lub koom haum hais kom ua ib yam dabtsi, kuv puas ua tamsid?’

12. Yuav tsa cov txwj laus thiab cov tub leg num li cas?

¹² Tsis ntev dhau los no, Pab Uas Ntaus Thawj tau txiav txim tias yuav tsis tsa cov txwj laus thiab cov tub leg num li yav tas los lawd. Hauv Phau Tsom Faj Askiv lub 11 Hlis tim 15 xyoo 2014, hauv zaj “Tej Uas Peb Xav Paub” qhia tias nyob rau thawj 100 xyoo, pab uas ntaus thawj tau hais kom cov kwvtij uas ncig xyuas cov koom txoos ua cov uas tsa cov txwj laus thiab cov tub leg num. Yog li ntawd, txij lub 9 Hlis xyoo 2014, cov uas saib xyuas thaj tsam thiaj pib tsa cov txwj laus thiab cov tub leg num. Thaum cov txwj laus pom tias tsim nyog tsa ib tug kwvtij twg hauv lub koom txoos, tej zaum tus saib xyuas thaj tsam yuav siv sijhawm nrog tus ntawd thiab nws tsev neeg ua ke kom nws paub lawv zoo. (1 Timaute 3:4, 5) Tom qab ntawd, tus kwvtij uas saib xyuas thaj tsam thiab cov txwj laus mam sab laj ua ke, seb tus kwvtij ntawd puas coj lub neej raws li phau Vajlugkub tau hais txog cov txwj laus thiab cov tub leg num.  Yog tsim nyog ces tus uas saib xyuas thaj tsam mam li tsa tus kwvtij ntawd los tuav haujlwm.​—1 Timaute 3:1-10, 12, 13; 1 Petus 5:1-3.

13. Peb yuav coj li cas thiaj qhia tias peb mloog cov txwj laus lus?

¹³ Cov txwj laus muab Vajlugkub los qhuab qhia peb vim lawv tiv thaiv thiab saib xyuas lub koom txoos. Peb yuav tsum mloog lawv hais rau qhov lawv tsuas xav kom peb tau zoo xwb. (1 Timaute 6:3) Nyob rau thawj 100 xyoo, muaj ib txhia “tub nkeeg tsis ua haujlwm dabtsi li tiamsis mus tab kaum lwm tus.” Cov txwj laus ntuas lawv tiamsis lawv tsis kam mloog. Povlauj thiaj qhia kom lub koom txoos ua li no: “Cia li cim tus ntawd cia, tsis txhob nrog nws ua ke.” Tsis yog lub koom txoos cia li ua yeeb ncuab rau nws, tiamsis kuj tsis zoo rau lub koom txoos nrog nws ua ke thiab. (2 Thexalaunika 3:11-15) Niaj hnub no, cov txwj laus tseem nrhiav kev los pab cov uas coj li ntawd. Xws li cov uas txhob txwm hla Yehauvas tej kevcai mus tham ib tug uas tsis ntseeg Yehauvas. (1 Khaulee 7:39) Yog tus ntawd tsis kam hloov li, tej zaum cov txwj laus yuav tau cev ib zaj lus ceeb toom tias tus cwj pwm ntawd yuav ua rau luag thuam lub koom txoos. Yog cov txwj laus cev ib zaj lus qhia zoo li ntawd hauv lub koom txoos, koj puas yuav mloog? Yog koj paub tus uas coj tus cwj pwm phem ntawd, koj puas tseem nrog nws ua ke thiab? Nco ntsoov tias yog koj mloog lus, yuav pab kom tus kwvtij ntawd hloov siab, kom nws pom tias tsis zoo rau nws coj tus cwj pwm zoo li ntawd. ^[1]​—Saib cov lus qhia rau zaj no.

14. Peb yuav pab kom lub koom txoos dawb huv li cas?

¹⁴ Vajtswv Txojlus qhia tias peb txhua tus muaj feem pab kom lub koom txoos dawb huv. Xav txog lub koom txoos Khaulee thaum ub. Povlauj hlub cov kwvtij nkauj muam hauv lub koom txoos ntawd heev. Nws yog tus uas pab lawv coob tus los paub qhov tseeb. (1 Khaulee 1:1, 2) Xav seb thaum Povlauj hnov xov tias muaj ib tug hauv lub koom txoos ua txhaum kev nkauj kev nraug, tiamsis lawv tseem cia nws nyob hauv lub koom txoos, mob Povlauj siab npaum li cas. Povlauj thiaj hais kom cov txwj laus “cia li muab tus ntawd cob rau Xatas,” uas yog muab nws rho tawm hauv lub koom txoos mus. (1 Khaulee 5:1, 5-7, 12) Niaj hnub no, yog muaj ib tug hauv lub koom txoos ua txhaum loj heev tiamsis nws tsis kam ntxeev dua siab tshiab, cov txwj laus yuav tsum muab nws rho tawm. Thaum muaj li ntawd, peb puas ua raws li phau Vajlugkub hais, es txhob nrog nws ua ke? Yog peb coj li ntawd, yuav pab tau lub koom txoos dawb huv. Tej zaum tseem yuav pab tau tus ua yuam kev ntxeev dua siab tshiab thiab tig rov los cuag Yehauvas.

15. Yuav ua li cas lub koom txoos thiaj sib haum xeeb?

¹⁵ Lub koom txoos Khaulee rov muaj dua ib qho teeb meem thiab. Ib txhia pheej coj lawv cov kwvtij mus kom tom tsev tu plaub. Povlauj thiaj nug lawv tias: “Ua li cas nej tsis ua tus swb?” (1 Khaulee 6:1-8, TMZ) Niaj hnub nimno, ib txhia hauv lub koom txoos tseem ua plaub ua ntug li ntawd thiab. Muaj ib txhia kwvtij koom kev lag kev luam ua ke. Thaum kawg ib txhia poob peev lossis sib chim tias ib tug ntxo ib tug. Lawv thiaj coj lawv cov kwvtij mus kom hauv tsev tu plaub. Tej no yuav ua rau lwm tus thuam Yehauvas thiab nws cov tibneeg. Tseem yuav muab lub koom txoos cais ua pab ua  pawg los kuj muaj thiab. Vajtswv Txojlus thiaj qhia tias txawm peb yuav poob peev los xij, peb yuav tsum sib zam kom lub koom txoos nyob sib haum xeeb. ^[2] (Saib cov lus qhia rau zaj no.) Yexus twb qhia lawm tias peb yuav tu tej teeb meem no li cas. (Nyeem Mathai 5:23, 24; 18:15-17.) Yog peb ua raws li Yexus qhia ces yuav pab tau lub koom txoos koom ib lub siab thiab nyob sib haum xeeb.

16. Vajtswv cov tibneeg koom tau ib lub siab li cas?

¹⁶ Yehauvas Txojlus qhia tias: “Qhov uas kwvtij nyob ua ke sib [haum] xeeb mas kuj yog qhov zoo thiab kaj siab kawg li.” (Ntawv Nkauj 133:1) Thaum cov Yixayee mloog Yehauvas lus, lawv ua tau txhua yam raws kab raws kev thiab koom tau ib lub siab. Vajtswv twb hais ua ntej txog nws haiv neeg li no: “Kuv yuav sau lawv los ua ke yam li tej yaj nyob hauv lub nkuaj.” (Mikha 2:12) Yehauvas kuj hais tias: “Kuv yuav muab ib tsoom neeg tus nplaig hloov kom lawv tau tus nplaig dawb nplaig huv, kom sawvdaws thiaj li txawj hu thov [Yehauvas] lub npe thiab txawj ua ib lub siab ua koom tu nws.” (Xefaniya 3:9) Yog li ntawd, Yehauvas haiv neeg yuav kawm nws Txojlus thiab yuav koom siab teev tiam nws. Peb zoo siab kawg li uas peb tau nrog Yehauvas haiv neeg koom ib lub siab pe hawm nws!

17. Yog ib tug hauv lub koom txoos ua txhaum loj, cov txwj laus yuav tsum ua li cas?

¹⁷ Yog muaj ib tug twg ua txhaum loj, cov txwj laus yuav tsum ua zoo ntuas nws tamsid. Cov txwj laus paub tias Yehauvas xav kom lawv tiv thaiv lub koom txoos, txhob pub tej kev phem txuam yuaj. Qhov no yuav pab kom lub koom txoos dawb huv thiab koom ib lub siab. (Paj Lug 15:3) Povlauj mob siab cov kwvtij hauv Khaulee heev, thaum lawv ua yuam kev nws thiaj sau ntawv mus ntuas lawv. Thaum cov txwj laus hauv Khaulee tau txais Povlauj tsab ntawv, lawv maj nroos ua raws li nws tau hais. Ob peb lub hlis tom qab, Povlauj sau dua ib tsab ntawv mus qhuas lawv vim lawv mloog nws lus. Yog li ntawd, yog cov txwj laus “pom leejtwg ua txhaum” ces lawv yuav tsum ua siab ntev ntuas nws.​—Kalatia 6:1.

18. (1) Vajtswv Txojlus pab tau lub koom txoos nyob thawj 100 xyoo li cas? (2) Lwm zaj peb yuav kawm txog dabtsi?

¹⁸ Raws li peb twb kawm lawd, thaum cov Khixatia nyob thawj 100 xyoo coj raws li Vajtswv Txojlus qhia, pab tau lub koom txoos dawb huv, nyob sib haum xeeb, thiab koom tau ib lub siab. (1 Khaulee 1:10; Efexau 4:11-13; 1 Petus 3:8) Thaum kawg, cov kwvtij nkauj muam thiaj tshaj txoj xov zoo mus rau “txhua tus neeg thoob qab ntuj.” (Khaulauxi 1:23) Niaj hnub nimno, Yehauvas cov tibneeg kuj koom ib lub siab thiab ua txhua yam raws kab raws kev. Lawv tshaj tawm txoj xov zoo mus thoob lub qab ntuj kawg lawm. Hauv zaj tom ntej peb tseem yuav kawm tias Yehauvas cov tibneeg yeej muaj lub siab xav qhuas Nws uas yog tus Tswv loj dua ntais thiab lawv yeej xav ua raws li nws Txojlus, phau Vajlugkub tiag.​—Ntawv Nkauj 71:15, 16.