1. Piav seb vim li cas peb yuav tsum tau Yehauvas ua tus coj kev.

 MUAB ua piv txwv tias koj poob zoo rau tej hav zoov hav tsuag. Txaus ntshai heev vim muaj tsiaj qus, muaj nab taug, muaj hiab, thiab tej av los tsis txawm yeem. Tej zaum koj yuav zoo siab heev yog muaj ib tug paub paub kev coj koj tawm ntawm qhov chaw ntawd mus! Lub qab ntuj neeg no zoo tib yam li koog hav zoov ntawd ntag. Muaj ntau yam uas yuav rhuav tau koj txoj kev sib raug zoo nrog Yehauvas. Txawm li ntawd los tsis txhob tag kev cia siab, Yehauvas yuav yog tus coj koj txoj hau kev tawm ntawm tej yam phom sij kom koj mus txog rau lub qab ntuj tshiab.

2. Yehauvas coj peb txoj hau kev li cas rau li cas?

² Thawj yam Yehauvas siv los coj peb txoj hau kev yog siv nws Txoj Lus. Tsis tas li ntawd, nws kuj siv tib neeg los mus coj peb kev thiab. Xws li nws siv “tus qhev ncaj thiab ntse” kom faib zaub faib mov ntawm sab kev ntseeg rau peb xwv peb thiaj paub txiav txim tau qhov zoo. (Mathais 24:45) Yehauvas kuj siv lwm cov txiv neej uas paub tab los coj peb kev. Xws li cov saib xyuas thaj tsam thiab cov txwj laus los txhawb thiab qhia seb yuav ua li cas rau li cas thaum muaj kev nyuaj siab ntxhov plawv. Peb ris txiaj ntsig kawg li uas muaj cov los coj peb txoj hau kev rau tiam kawg no! Qhov no yuav pab tau kom peb ua tau raws li Yehauvas lub siab nyiam thiab pab peb taug txoj kev uas mus tau txoj sia.

3. Nyob rau hauv zaj kawm no yuav tham txog dab tsi?

³ Muaj qee lub sij hawm tsis yooj yim rau peb ua raws li Yehauvas hais vim cov txiv neej uas Yehauvas siv los coj kev yog noob txaug neeg txhaum. Tej zaum peb tsis nyiam tej uas lawv hais peb. Los sis tej zaum peb xav tias tej uas lawv hais ntawd tsis muaj qab hau thiab ntshe tsis yog Yehauvas kom ua li ntawd. Tej  ntwb ntu zoo li no peb yuav tau tso siab tias Yehauvas yog tus coj nws cov tib neeg thiab qhov uas mloog nws tej lus yuav zoo rau peb. Yuav kom tsav tau peb txoj kev tso siab rau nws, zaj kawm no yuav tham txog (1) seb Yehauvas coj nws cov tib neeg txheej puag thaum ub li cas, (2) seb nws ho coj nws cov tib neeg li cas niaj hnub nim no, thiab (3) yuav pab tau peb li cas yog peb mloog tej uas Yehauvas qhia.

YEHAUVAS COJ COV IXAYEES KEV

4-5. Yehauvas ua qhia li cas tias nws siv Mauxes coj cov Ixayees kev? (Saib daim duab.)

⁴ Yehauvas xaiv Mauxes los mus coj cov Ixayees tawm hauv teb chaws Iyiv. Tsis tas li ntawd, nws qhia meej tseeb rau nws cov tib neeg tias Mauxes yog tus uas nws xaiv. Xws li nws ua tus ncej huab thaum nruab hnub thiab tus ncej hluav taws cig hmo ntuj. (Khiav Dim 13:21) Mauxes mus raws li tus ncej ntawd, nws thiaj li coj tau cov Ixayees mus rau ntawm tus Dej Liab. Tiam sis cov Iyiv caum cov Ixayees qab thiaj li ua rau cov Ixayees ntshai tsam cov Iyiv tuaj tua tau lawv. Cov Ixayees xav tias Mauxes coj lawv los yuam kev rau ntawm tus Dej Liab lawm tiam sis tsis yog yuam kev. Yehauvas yeej txhob txwm cia Mauxes coj Nws cov tib neeg los rau ntawd. (Khiav Dim 14:2) Yehauvas thiaj li ua txuj ci los cawm nws cov tib neeg.​—Khiav Dim 14:26-28.

⁵ Tau 40 lub xyoos, Mauxes cia tus ncej huab ntawd coj Vajtswv cov tib neeg tawm hauv tiaj moj sab qhua. a Muaj ib ncuas sij hawm, Yehauvas muab tus ncej huab tso ncaj rau saum Mauxes lub tsev ntaub sab saud xwv tag nrho cov Ixayees thiaj pom. (Khiav Dim 33:7, 9, 10) Yehauvas hais lus hauv tus ncej huab tuaj rau Mauxes ces Mauxes mam li hais mus rau sawv daws. (Phau Ntawv Nkauj 99:7) Cov Ixayees yeej paub tseeb tseeb tias Yehauvas siv Mauxes coj lawv kev.

6. Cov Ixayees xav li cas rau tus uas Yehauvas xaiv? (Teev Npe 14:2, 10, 11)

⁶ Txawm Yehauvas siv Mauxes ua tus sawv cev nws los cov Ixayees feem coob haj tseem tsis pom zoo. (Nyeem Teev Npe 14:2, 10, 11.) Ib zaug tag ib zaug tuaj los lawv yeej tsis kam lees tias Mauxes yog tus uas Yehauvas xaiv los coj lawv. Yog li ntawd, Yehauvas thiaj li tsis pub lawv nkag mus rau hauv lub teb chaws uas nws tau cog lus tseg.​—Teev Npe 14:30.

7. Piav seb leej twg yog cov uas mloog Yehauvas lus. (Teev Npe 14:24) (Saib daim duab.)

⁷ Muaj ib txhia Ixayees mloog raws li tus uas Yehauvas xaiv tseg qhia. Xws li Yehauvas hais tias: “Kalej . . . muab siab npuab kuv heev.” (Nyeem Teev Npe 14:24.) Vajtswv foom koob hmoov rau Kalej thiab pub nws xaiv seb nws yuav nyob rau qhov chaw twg hauv lub teb chaws uas Vajtswv cog tseg. (Yausuas 14:12-14) Cov Ixayees uas tau mus nyob rau hauv lub teb chaws Vajtswv cog tseg yeej mloog Vajtswv lus. Thaum Yausuas los hloov Mauxes chaw los coj cov Ixayees kev, lawv “hwm Yausuas mus tas nws simneej.” (Yausuas 4:14) Vim lawv ua raws li Yehauvas hais, nws thiaj li foom koob hmoov rau lawv thiab cia lawv mus nyob hauv lub teb chaws uas nws cog tseg.​—Yausuas 21:43, 44.

8. Piav seb Yehauvas coj nws cov tib neeg li cas rau li cas thaum muaj cov vaj ntxwv kav. (Saib daim duab.)

⁸ Tau ntau xyoo tom qab no, Yehauvas tsa tau ib co txiav txim los coj nws cov tib neeg. Tom qab ntawd, thaum muaj vaj ntxwv los kav nws cov tib neeg ces Yehauvas siv cov cev nws lus los coj nws cov tib neeg. Cov vaj ntxwv uas muaj kev ntseeg rau Yehauvas yeej mloog cov cev lus tej lus. Xws li Vaj Ntxwv Daviv yeej txo hwj chim mloog Nathas tus uas cev  Vajtswv lus tej lus ntuas. (2 Xamuyees 12:7, 13; 1 Xwmtxheej Vajntxwv 17:3, 4) Hos Vaj Ntxwv Yehausafas tso siab rau Yahaxiyees tus uas cev Vajtswv lus los coj nws txoj hau kev thiab Yehausafas txhawb kom cov neeg hauv Yudas “cia li ntseeg . . . tej lus uas cov cev Vajtswv lus qhia rau [lawv].” (2 Xwmtxheej Vajntxwv 20:14, 15, 20) Thaum Vaj Ntxwv Hexekiyas muaj kev nyuaj siab ntxhov plawv, nws kuj mus cuag Yaxayas tus uas cev Vajtswv lus kom pab nws. (Yaxayas 37:1-6) Txhua zaus uas cov vaj ntxwv mloog Yehauvas lus, lawv tau koob hmoov thiab Yehauvas yeej tiv thaiv lawv. (2 Xwmtxheej Vajntxwv 20:29, 30; 32:22) Txhua leej txhua tus yeej pom ntsoov tias Yehauvas yeej siv cov uas cev Nws lus los coj nws cov tib neeg. Tiam sis cov vaj ntxwv thiab cov Ixayees feem coob tsis kam mloog cov cev Vajtswv lus.​—Yelemis 35:12-15.

YEHAUVAS COJ COV NTSEEG NYOB THAWJ 100 XYOO KEV

9. Yehauvas siv leej twg los coj cov ntseeg nyob thawj 100 xyoo? (Saib daim duab.)

⁹ Nyob thawj 100 xyoo tom qab Yexus yug, Yehauvas tsa muaj ib lub koom txoos. Ua li Yehauvas ho coj cov ntseeg ntawd txoj hau kev li cas? Nws xaiv Yexus ua tus coj lub koom txoos. (Efexus 5:23) Tiam sis Yexus tsis hais lus rau ib tug thwj tim dhau ib tug thwj tim tias kom ua li cas rau li cas. Nws siv cov tub txib thiab cov txwj laus hauv Yeluxalees los coj. (Tes Haujlwm 15:1, 2) Tsis tas li ntawd, kuj tau xaiv kom muaj txwj laus los coj tej koom txoos.​—1 Thexalaunikes 5:12; Titus 1:5.

10. (1) Cov ntseeg nyob thawj 100 xyoo feem coob xav li cas txog tej uas lawv hnov? (Tes Haujlwm 15:30, 31) (2) Vim li cas ho muaj ib txhia tsis kam mloog cov uas Yehauvas siv los coj lus? (Saib lub ntsiab “ Vim Li Cas Ib Txhia Tsis Kam Mloog.”)

¹⁰ Cov ntseeg nyob thawj 100 xyoo feem coob yeej txaus siab hlo mloog cov uas Yehauvas siv los coj lus. Lawv “zoo siab kawg li” vim tej lus ntawd “txhawb lawv lub zog heev.” (Nyeem Tes Haujlwm 15:30, 31.) Ua li Yehauvas ho coj nws cov tib neeg niaj hnub nim no li cas?

YEHAUVAS COJ COV NTSEEG NIM NO KEV

11. Piav seb Yehauvas coj nws cov tib neeg niaj hnub nim no li cas rau li cas.

¹¹ Yehauvas haj tseem niaj hnub coj nws cov tib neeg niaj hnub nim no kev. Nws siv nws Txoj  Lus thiab nws tus Tub uas yog tus uas coj ntawm lub koom txoos. Ua li peb puas pom tias Vajtswv haj tseem siv tib neeg los mus coj niaj hnub nim no? Peb yeej pom. Xws li tom qab xyoo 1870, Tshalau Tes Laxaum (Charles Taze Russell) thiab cov uas nrog nws xam pom tias xyoo 1914 yog ib xyoos tseem ceeb heev rau Vajtswv lub Nceeg Vaj. (Daniyees 4:25, 26) Tos lawv paub li no los twb yog lawv tshawb nrhiav hauv phau Vajlugkub thiab ntseeg tias lawv yuav pom tej lus faj lem ntawd muaj tshwm sim. Yehauvas yeej yog tus pab lawv vim xyoo 1914, muaj ntau yam tshwm sim uas ua pov thawj tias Vajtswv lub Nceeg Vaj pib kav lawm. Txawm muaj Ntsuj Rog Thoob Qab Ntuj Zaum 1 ces tom qab ntawd muaj kab mob kis, av qeeg, thiab muaj kev tshaib kev nqhis. (Lukas 21:10, 11) Yehauvas yeej siv cov txiv neej no los mus coj nws cov tib neeg.

12-13. Thaum Ntsuj Rog Thoob Qab Ntuj Zaum 2, cov kwv tij uas saib xyuas tau ua li cas los pab txoj kev tshaj tawm txoj xov zoo?

¹² Cia peb mus tham seb muaj li cas thaum muaj Ntsuj Rog Thoob Qab Ntuj Zaum 2. Cov kwv tij uas nyob ntawm lub hauv paus koom haum loj kawm Tshwmsim 17:8. Lawv xam pom tias Ntsuj Rog Thoob Qab Ntuj Zaum 2 yuav tsis mus zuj zus rau Amankedoos. Lawv paub hais tias tom qab ntsuj rog ntawd, yuav qhib ntau txoj hau kev rau Yehauvas Cov Tim Khawv mus qhia txoj xov zoo rau tib neeg. Ntxim yam li tsis zoo caij zoo nyoog tiam sis cov kwv tij saib xyuas txawm pib txoj kev kawm Kile-a los mus cob qhia cov tub txib tshaj tawm txawv teb chaws. Lawv kuj xa cov uas kawm tiav no mus tshaj tawm tab txawm tseem muaj tsov muaj rog rau txhua txhia qhov. Tus qhev ncaj thiab ntse pib ib lub tsev kawm ntawv los cob qhia tag nrho cov koom txoos kom lawv txawj mus qhia Vajlugkub. b Tej kev kawm no yog los mus npaj Vajtswv cov tib neeg kom txawj mus tshaj tawm txoj xov zoo.

¹³ Niaj hnub nim no peb pom hais tias Yehauvas yeej coj nws cov tib neeg nyob rau lub caij muaj kev nyuaj siab ntxhov plawv ntawd. Txij thaum Ntsuj Rog Thoob Qab Ntuj Zaum 2, Yehauvas cov tib neeg tau mus tshaj tawm rau ntau lub teb chaws. Muaj coob leej ntau tus tib neeg tau los paub Yehauvas thiab nws cov tib  neeg yeej tshaj tawm mus thoob plaws ntiaj teb no.

14. Vim li cas peb ho tso siab tau rau tej uas los ntawm Yehauvas lub koom haum los thiab cov txwj laus? (Tshwmsim 2:1) (Saib daim duab.)

¹⁴ Niaj hnub nim no Pab Uas Ntaus Thawj haj tseem tos nrhw Yexus Khetos ua tus coj lawv txoj hau kev. Lawv tsis xav qhia raws li lawv lub siab xav tiam sis lawv xav qhia cov kwv tij raws li Yehauvas lub siab nyiam. Ces cov saib xyuas thaj tsam thiab cov txwj laus mam li hais qhia rau cov koom txoos paub. c Cov txwj laus uas yog cov xaiv tseg nyob ntawm Khetos “txhais tes xis.” (Nyeem Tshwmsim 2:1.) Cov txwj laus yeej yog noob txaug neeg txhaum ces lawv yeej yuav ua tau yuam kev. Qho zaus Mauxes, Yausuas thiab cov tub txib kuj ua tau yuam kev thiab. (Teev Npe 20:12; Yausuas 9:14, 15; Loos 3:23) Tiam sis peb yeej pom tias Yexus haj tseem coj tus qhev ncaj thiab ntse thiab cov txwj laus kev “mus txog thaum lub sim ceeb no kawg.” (Mathais 28:20) Yog li ntawd, peb yeej tso siab plhuav rau cov kwv tij uas Yexus siv ua cov coj.

PEB YUAV TAU LUB NEEJ ZOO

15-16. Koj khaws tau li cas los ntawm tej tug uas cia Yehauvas coj lawv txoj hau kev?

¹⁵ Peb yuav tau txais tej yam zoo yog peb cia Yehauvas coj peb txoj hau kev. Xws li ib tug kwv tij hu ua Eedis (Andy) thiab nws tus poj niam hu ua Lonpees (Robyn) tau ua nkawd lub neej kom yooj yim yam li tus qhev ncaj thiab ntse hais. (Mathais 6:22) Nkawd thiaj li tau mus pab tsa kom muaj tej Tsev Nceeg Vaj thiab lwm cov tsev ua Yehauvas tes hauj lwm. Lonpees hais tias: “Muaj qee zaug wb nyob tej qho chaw me me uas twb tsis muaj chaw ua noj. Tsis tas li ntawd, kuv nyiam yees duab heev tiam sis kuv yuav tau muab kuv tej koob yees duab muag mas ua rau kuv quaj ib pluag. Tiam sis kuv nco txog Anplahas thiab Xalas nkawd tus yam ntxwv kom xav txog yav tom ntej, tsis txhob xav txog tej yam tom qab.” (Henplais 11:15) Ua li puas zoo rau nkawd txiav txim siab ua li no? Lonpees hais tias: “Wb zoo siab heev vim wb paub tias wb muab wb lub neej los ua Yehauvas tes hauj lwm. Thaum kuv tus txiv wb ua tej hauj lwm uas Yehauvas muab pub rau wb mas zoo yam nkaus li wb pom wb lub neej ib vuag hauv lub qab ntuj tshiab.” Eedis hais tias: “Wb zoo siab heev vim wb muab tag nrho wb lub sij hawm thiab lub dag lub zog los ua Yehauvas tes hauj lwm.”

 ¹⁶ Peb kuj yuav tau txais tej yam zoo twg ntxiv yog peb cia Yehauvas coj peb txoj hau kev? Tom qab Maxias (Marcia) kawm tiav qeb kaum ob, nws txiav txim siab ua raws li cov nqe Vajlugkub hais es ua ib tug tho kev. (Mathais 6:33; Loos 12:11) Nws hais tias: “Kuv yeej mus kawm tau plaub xyoos ntawv qeb siab dawb xwb. Tiam sis kuv xav ua ntau yam rau Yehauvas. Kuv thiaj li mus kawm ib qho uas qhia kom kuv ua tau hauj lwm los koob kuv ua ib tug tho kev. Qhov kev txiav txim siab no yog ib qho uas kuv txiav txim tau zoo kawg li. Tam sim no kuv nyiam ua ib tug tho kev heev, kuv kuj muaj ib txoj hauj lwm uas pab tau kom kuv mus pab ua hauj lwm me ntsis ntawm Npe-ee thiab ua lwm yam rau Yehauvas.”

17. Yog peb cia Yehauvas coj peb txoj hau kev, peb yuav tau dab tsi ntxiv? (Yaxayas 48:17, 18)

¹⁷ Muaj qee lub sij hawm Yehauvas lub koom haum yeej qhuab ntuas kom peb ceev faj qho yam thiaj pab tau peb. Xws li, lawv ceeb toom kom peb tsis txhob ntshaw nyiaj txiag thiab tsis txhob ua tej yam uas hla Yehauvas tej kev cai. Yog peb cia Yehauvas ua tus coj peb txoj hau kev ces peb yuav tau txais ntau yam zoo. Peb lub siab yuav tsis rov nkaug peb thiab peb yuav tsis raug teeb meem. (1 Timautes 6:9, 10) Peb yeej yuav teev tiam tau Yehauvas kawg peb lub siab lub ntsws. Yog peb ua li no ces peb yuav muaj lub siab tus thiab nyob kaj siab lug.​—Nyeem Yaxayas 48:17, 18.

18. Vim li cas koj ho cia Yehauvas ua tus coj koj txoj hau kev?

¹⁸ Yehauvas yeej yuav siv tib neeg los coj nws cov tib neeg rau lub sij hawm muaj kev txom nyem loj kawg nkaus thiab thaum 1,000 xyoo. (Phau Ntawv Nkauj 45:16) Ua li peb yuav ua ywj siab los sis peb yuav mloog lus rau tej lub sij hawm ntawd? Yuav yooj yim rau peb mloog Yehauvas lus dua yog tias peb twb xyaum tam sim no lawm. Yog li ntawd, cia Yehauvas ua tus coj peb txoj hau kev, tab txawm nws yuav siv cov txiv neej uas nws xaiv los saib xyuas peb. (Yaxayas 32:1, 2; Henplais 13:17) Yog peb mloog Yehauvas lus ces nws yuav coj peb kom tsis txhob muaj ib yam dab tsi los rhuav tau peb txoj kev sib raug zoo nrog nws thiab nws yuav pab kom peb muaj txoj sia ntev dhawv mus ib txhis hauv lub qab ntuj tshiab.