Txawm li ntawd los Yehauvas yeej xav kom peb ua siab ntev tos nws. Nws yeej yuav kho txhua yam raws li nws tau teem tseg. Ua li cas Yehauvas thiaj xav kom peb ua siab ntev tos nws? Dab tsi yuav ua rau peb zoo siab thaum peb tos Yehauvas?

UA LI CAS YEHAUVAS THIAJ XAV KOM PEB UA SIAB NTEV TOS NWS?

Phau Vajlugkub hais tias: “[Yehauvas] tos ntev loo yuav foom koob hmoov rau nej; yog li ntawd, nws thiaj los hlub nej. Rau qhov [Yehauvas] yog Vajtswv tus uas ncaj ncees; cov neeg uas tos nws yuav tau txais koob hmoov.” (Yaxayas 30:18) Yaxayas cov lus no yog hais rau cov Yudais txheej thaum ub uas ntxeev siab rau Yehauvas. (Yaxayas 30:1) Tiam sis cov Yudais ntawd kuj muaj ib txhia uas tseem muab siab npuab Yehauvas. Ces Yaxayas cov lus yeej tseem pab tau cov ntawd muaj kev cia siab. Cov lus ntawd kuj pab tau cov uas muab siab npuab Yehauvas niaj hnub nim no muaj kev cia siab thiab.

Yog li ntawd, peb yuav tsum ua siab ntev tos Yehauvas rau qhov Yehauvas twb ua siab ntev. Yehauvas yeej teem tseg lub sij hawm uas nws yuav muab lub sim ceeb no rhuav tshem. Nws tseem niaj hnub tos lub sij hawm ntawd los txog. (Mathais 24:36) Thaum lub sij hawm ntawd los txog ces sawv daws yuav pom tias tej lus uas Xatas iab liam Yehauvas thiab cov uas pe hawm Nws tsis muaj tseeb. Thaum ntawd Yehauvas yuav muab Xatas thiab cov uas nrog nws tshem tawm tiam sis Yehauvas yuav khuv leej peb.

Lub sij hawm no tej zaum Yehauvas yuav tsis tshem tej kev sim siab uas peb raug mus tiam sis nws cog lus tias peb yeej muaj taus kev zoo siab thaum peb tos nws. Zoo li Yaxayas tau hais, peb yeej muaj taus kev zoo siab thaum peb cia siab tias peb yuav tau txais ib yam zoo. (Yaxayas 30:18) Yuav ua li cas peb thiaj tau txoj kev zoo siab ntawd? Muaj plaub qho yuav pab tau peb.

MUAJ KEV ZOO SIAB THAUM PEB TOS

Xav txog qhov zoo. Vaj Ntxwv Daviv pom ntau yam phem hauv nws lub neej. (Phau Ntawv Nkauj 37:35) Txawm li ntawd los nws tseem sau tias: “Ua siab ntev thiab tos [Yehauvas] ua nws tes haujlwm, tsis txhob nyuaj siab rau tej neeg uas vammeej, lossis cov neeg uas ua lawv tej kev phem tiav raws li lawv xav tseg lawm.” (Phau Ntawv Nkauj 37:7) Daviv yeej ua raws li cov lus ntawd es xav ntsoov txog cov lus uas Yehauvas tau cog tseg tias  Yehauvas yuav cawm nws. Thiab Daviv kuj ris Yehauvas txiaj ntsig rau txhua yam zoo uas Yehauvas tau ua rau nws. (Phau Ntawv Nkauj 40:5) Yog peb xav ntsoov txog tej yam zoo uas peb muaj es txhob mus xav txog tej kev nyuaj siab uas peb raug ces yuav yooj yim rau peb ua siab ntev tos Yehauvas ib yam li Daviv thiab.

Rau siab qhuas Yehauvas. Phau Ntawv Nkauj 71 uas tej zaum Daviv yog tus sau hais tias: “Kuv yuav niaj hnub cia siab rau koj, kuv yuav qhuas koj mus tsis tso tseg li.” (Phau Ntawv Nkauj 71:14) Daviv qhuas Yehauvas li cas? Daviv qhia Yehauvas rau lwm tus thiab hu nkauj qhuas nws. (Phau Ntawv Nkauj 71:16, 23) Peb kuj nrhiav tau kev zoo siab ib yam li Daviv thiab thaum peb tos Yehauvas. Peb qhuas tau Yehauvas thaum peb mus tshaj tawm txoj xov zoo, thaum peb nrog tib neeg tham, thiab thaum peb hu nkauj qhuas Yehauvas. Lwm zaus koj hu peb ib zaj nkauj, ua tib zoo xav txog cov lus ntawd seb ua rau koj kaj siab npaum li cas.

Cia koj cov kwv tij nkauj muam cuab koj lub zog. Thaum Daviv ntsib kev nyuaj siab, nws hais rau Yehauvas tias: “Kuv yuav tshaj tawm koj lub npe tab meeg cov uas hwm koj.” (Phau Ntawv Nkauj 52:9) Peb cov kwv tij nkauj muam los yeej cuab tau peb lub zog thiab, tsis hais thaum peb mus kev sib txoos, mus tshaj tawm txoj xov zoo, los sis mus noj mus haus ua ke.​—Loos 1:11, 12.

Tsav koj txoj kev cia siab. Phau Ntawv Nkauj 62:5 hais tias: “Kuv muab siab npuab Vajtswv tib leeg xwb, nws thiaj yog tus uas kuv cia siab.” Tseem ceeb rau peb muaj ib txoj kev cia siab uas ruaj khov rau qhov thaum lub sij hawm kawg tsis los raws li peb lub siab xav peb thiaj ua siab ntev tos. Peb yuav tsum ruaj siab tias yeej yuav muaj raws li Yehauvas tau cog tseg tsis hais peb yuav tau tos ntev npaum li cas. Peb yuav tsav tau peb txoj kev cia siab kom ruaj khov yog peb kawm Vajtswv Txoj Lus, kawm tej lus faj lem, kawm seb phau Vajlugkub sib dhos li cas, thiab kawm seb Yehauvas tau hais txog nws tus kheej li cas. (Phau Ntawv Nkauj 1:2, 3) Tsis tas li ntawd, peb yuav tau thov Yehauvas kom peb txoj kev sib raug zoo nrog nws ruaj khov thaum peb nyob tos Yehauvas lo lus cog tseg tias peb yuav tau txoj sia ntev dhawv mus ib txhis.​—Yudas 20, 21.

Peb yuav tau ua ib yam li Daviv es cia siab tias Yehauvas yuav saib ntsoov txhua tus uas tos nws thiab yuav hlub cov ntawd. (Phau Ntawv Nkauj 33:18, 22) Cia peb ua siab ntev tos Yehauvas es xav ntsoov txog tej yam zoo, qhuas nws, cia cov kwv tij nkauj muam cuab peb lub zog, thiab tsav peb txoj kev cia siab kom ruaj khov.