NYOB rau Hnub 3 (Wednesday), lub 1 Hlis tim 18 xyoo 2023, tau tshaj tawm hauv lub vej xaij jw.org tias tau muab Kwv Tij Nkej Filinkaus (Gage Fleegle) thiab Kwv Tij Ntsefilis Vidaws (Jeffrey Winder) tsa ua ob tug ntawm Pab Uas Ntaus Thawj ntawm Yehauvas Cov Tim Khawv. Nkawd twb teev tiam Yehauvas ruaj nreeg tau ntev loo lawm.

Kwv Tij Nkej loj hlob hauv lub teb chaws Yunaithim Xatej (United States) ntawm lub xeev Pheexauvenyia (Pennsylvania). Nws niam nws txiv yeej cob nws los teev tiam Yehauvas thaum me tuaj lawm. Thaum nws yog ib tug tub hluas, lawv tau tsiv mus nyob rau hauv ib lub me nyuam zos uas tsis muaj cov tshaj tawm coob. Tsis ntev tom qab ntawd, nws thiaj ua kev cai raus dej rau lub 11 Hlis tim 20 xyoo 1988.

Kwv Tij Nkej niam thiab txiv yeej ib txwm txhawb kom nws ua hauj lwm puv ntoob rau Yehauvas. Lawv tos txais cov saib xyuas tshaj tsam thiab cov ua hauj lwm hauv Npe-ee mus so hauv lawv tsev. Nws pom tias cov kwv tij nkauj muam ntawd muaj kev zoo siab heev. Tsis ntev tom qab nws ua kev cai raus dej, nws txawm pib tho kev rau lub 9 Hlis tim 1 xyoo 1989. Ob lub xyoos tom qab ntawd, nws thiaj mus ua hauj lwm hauv Npe-ee uas yog nws lub hom phiaj thaum nws muaj 12 xyoos. Nyob rau lub 10 Hli xyoo 1991, nws pib ua hauj lwm nyob lub Npe-ee hauv Npluavlees (Brooklyn).

Thaum nyob hauv Npe-ee, Kwv Tij Nkej ua hauj lwm nyob hauv chav tom ntaub ntawv tau yim lub xyoos ces tom qab ntawd nws raug txib mus ua hauj lwm hauv Chav Saib Xyuas Kev Tshaj Tawm. Lub sij hawm ntawd, nws mus rau lub koom txoos Lav Xias. Xyoo 2006, nws thiaj yuav Nadia ua poj niam. Nadia kuj nrog nws ua hauj lwm hauv Npe-ee. Nkawd txawm mus lub koom txoos Pos Tshis Kis (Portuguese) ces tom qab ntawd nkawd mus pab cov uas hais lus Xapee (Spanish) tau kaum tawm lub xyoos. Tom qab Kwv Tij Nkej nyob hauv Chav Saib Xyuas Kev Tshaj Tawm tau ntau lub xyoos, nws ho raug txib mus rau chav Rooj Saib Xyuas Kev Kawm Vajlugkub ces tom qab ntawd ho mus rau chav Rooj Saib  Xyuas Kev Tshaj Tawm. Nyob rau lub 3 Hlis xyoo 2022, nws raug tsa los ua ib tug pab cuam rau Rooj Saib Xyuas Kev Tshaj Tawm ntawm Pab Uas Ntaus Thawj.

Kwv Tij Ntsefilis loj hlob hauv teb chaws Yunaithim Xatej hauv lub xeev Kalifaunias (California) ntawm lub nroog Mulitas (Murrieta). Nws niam thiab txiv cob nws loj hlob los teev tiam Yehauvas thiab nws ua kev cai raus dej lub 3 Hlis tim 29 xyoo 1986. Lub hlis tom qab ntawd kiag xwb, nws txawm txiav txim siab ua ib tug pab tho kev. Nws nyiam kawg li, nws xav pab tho kev ntxiv mus. Thaum nws ua ib tug pab tho kev tau ob peb lub hlis ces nws txawm pib ua ib tug tho kev rau lub 10 Hli tim 1 xyoo 1986.

Thaum Kwv Tij Ntsefilis tseem yog ib tug tub hluas, nws mus saib nws ob tug tij laug uas mus ua hauj lwm hauv Npe-ee. Qhov no ua rau nws xav mus ua hauj lwm hauv Npe-ee thaum nws muaj hnub nyoog. Lub 5 Hlis xyoo 1990, nws thiaj tau mus ua hauj lwm rau lub Npe-ee hauv Vakhiaj (Wallkill).

Thaum nyob hauv Npe-ee, Kwv Tij Ntsefilis tau mus ua hauj lwm rau ntau chav xws li chav tu vaj tu tsev, chav ua liaj ua teb, thiab chav saib xyuas cuab kwv tij Npe-ee. Xyoo 1997, nws yuav Entsalas (Angela) ua poj niam ces nkawd thiaj ua hauj lwm hauv Npe-ee los txog niaj hnub nim no. Xyoo 2014, tau muab nkawd tshais mus rau hauv Vaviv (Warwick) ces Kwv Tij Ntsefilis thiaj tau mus pab ua lub hauv paus koom haum loj. Nyob rau xyoo 2016, nkawd thiaj tsiv mus rau lub Npe-ee hauv Padawxoos (Patterson). Kwv Tij Ntsefilis txawm mus ua hauj lwm hauv chav kaw suab thiab ua yeeb yaj kiab. Plaub lub xyoos tom qab ntawd, nkawd thiaj rov mus rau Vaviv ces Kwv Tij Ntsefilis thiaj mus ua hauj lwm hauv chav rooj saib xyuas cuab kwvtij Npe-ee. Nyob rau lub 3 Hlis xyoo 2022, nws thiaj raug tsa los ua ib tug pab cuam rau chav rooj saib xyuas cuab kwvtij Npe-ee ntawm Pab Uas Ntaus Thawj.

Peb thov Yehauvas foom koob hmoov rau ob tug kwv tij no thaum nkawd rau siab ntso ua Yehauvas tes hauj lwm.​—Efexus 4:8.