1-2. Ua ntej ib tug twg yuav ua kev cai raus dej, nws yuav tau ua li cas?

 TSIB xyoos dhau los no, muaj tshaj li ib plhom leej los ua kev cai raus dej ua Yehauvas ib tug Tim Khawv. Feem coob zoo li Timautes uas nyob thawj 100 xyoo. Lawv tau kawm qhov tseeb txij thaum lawv “tseem yau.” (2 Timautes 3:14, 15) Hos lwm cov twb laus lawm, lawv mam pib kawm txog Yehauvas. Muaj ib tug poj niam tau kawm Vajlugkub nrog Yehauvas Cov Tim Khawv thiab ua kev cai raus dej thaum nws muaj 97 xyoo!

² Yog tias koj tab tom kawm Vajlugkub los sis koj niam koj txiv tu koj loj hlob los pe hawm Yehauvas, koj yeej xav ua kev cai raus dej thiab puas yog? Qhov no yog ib lub hom phiaj zoo heev li! Tiam sis ua ntej koj yuav ua kev cai raus dej koj yuav tau muab koj tus kheej cob rau Yehauvas tso. Zaj kawm no yuav piav tias qhov uas koj muab koj tus kheej cob rau Yehauvas yog li cas tiag? Tsis tas li ntawd xwb, zaj no yuav pab kom koj txhob ua xyem xyav yog tias koj twb npaj txhij lawm.

MUAB COB RAU YEHAUVAS YOG LI CAS?

3. Piav txog tej tug hauv phau Vajlugkub uas tau muab cob rau Yehauvas.

³ Nyob hauv phau Vajlugkub, cov uas tau muab cob rau Yehauvas yog cov uas muab cais los ua ib teg hauj lwm tseem ceeb. Cov Ixayees thaum ub yog ib haiv neeg uas tau muab cob rau Yehauvas. Tiam sis tej tug cob txawv ntawm lwm cov. Zoo li Aloos, nws ntoo ib hau phuam uas muaj ib “daim phiaj kub dawbhuv” dai rau saud. Qhov no txhais tias Aloos tau ua ib teg hauj lwm tseem ceeb uas yog ua cov Ixayees tus tuam pov thawj hlob. (Levis Kevcai 8:9) Hos cov Naxis cob lawv tus kheej txawv.  Lawv yuav tau coj raws li Mauxes Txoj Kev Cai uas sau rau cov Naxis. Lo lus “Naxis” los ntawm lo lus Henplais nazirʹ, uas txhais tias “Raug Muab Cais,” los sis “Cob Nws Tus Kheej.”​—Teev Npe 6:2-8.

4. (1) Thaum koj muab koj tus kheej cob rau Yehauvas lawd, yog koj xav ua tes hauj lwm tseem ceeb twg? (2) “Tsis txhob ua raws li [koj] lub siab nyiam” yog li cas tiag? (Saib daim duab.)

⁴ Thaum koj cob koj tus kheej rau Yehauvas twb yog koj xaiv los ua Yexus ib tug thwj tim. Qhov uas koj ua raws li Vajtswv lub siab nyiam yuav yog yam uas tseem ceeb tshaj hauv koj lub neej. Tus Khixatias yuav tsum ua dab tsi? Yexus hais tias: “Yog leej twg xav nrog kuv mus, tus ntawd yuav tsum tsis txhob ua raws li nws lub siab nyiam.” (Mathais 16:24) Thaum koj muab koj tus kheej cob rau Yehauvas lawd, txhua yam uas tsis haum Yehauvas siab koj yuav tsis ua lawm. (2 Kauleethaus 5:14, 15) Yog li ntawd tsis txhob mus ua “tej uas neeg lub siab nyiam ua,” xws li kev nkauj kev nraug. (Kalatias 5:19-21; 1 Kauleethaus 6:18) Tej uas Vajtswv txwv no puas yog ua kom nyuaj koj xwb? Tsis yog. Yog tias koj hlub Yehauvas thiab ntseeg tias nws txoj kev cai zoo rau koj ces yeej tsis nyuaj rau koj li. (Phau Ntawv Nkauj 119:97; Yaxayas 48:17, 18) Muaj ib tug kwv tij npe hu ua Nikaulas (Nicholas) hais tias: “Yog koj saib Vajtswv tej kev cai zoo li ib lub nkuaj uas kaw koj xwb ces koj yuav tsis kaj siab. Tiam sis yog koj saib Vajtswv tej kev cai zoo li lub laj kab tiv thaiv koj ntawm tsov ntxhuav ces koj yuav kaj siab.”

5. (1) Koj muab koj tus kheej cob rau Yehauvas li cas? (2) Qhov cob koj tus kheej rau Yehauvas thiab ua kev cai raus dej sib txawv li cas? (Saib daim duab.)

⁵ Koj muab koj tus kheej cob rau Yehauvas li cas? Koj thov nws thiab cog lus rau nws tias koj yuav pe hawm nws tib leeg xwb thiab yuav ua raws li nws lub siab nyiam ua ntej txhua tsav txhua yam tib si. Koj cog lus tias koj yuav hlub Yehauvas “kawg siab kawg ntsws, kawg koj txoj  sia, kawg laj lim tswv yim” mus li. (Malakaus 12:30) Thaum koj muab koj tus kheej cob rau Yehauvas tsuas yog koj thiab Yehauvas thiaj paub xwb. Tiam sis thaum koj ua kev cai raus dej ces qhia tab meeg sawv daws tias koj muab koj tus kheej cob rau Yehauvas lawm. Qhov koj cog lus tseg rau Yehauvas es muab koj lub neej cob rau nws tseem ceeb heev. Koj yeej xav ua raws li koj tej lus cog tseg. Yehauvas yeej xav kom koj ua raws li ntawd thiab.​—Tej Lus Qhia 5:4, 5.

VIM LI CAS HO MUAB KOJ TUS KHEEJ COB RAU YEHAUVAS?

6. Vim li cas ib tug neeg ho txiav txim siab muab nws tus kheej cob rau Yehauvas?

⁶ Koj muab koj tus kheej cob rau Yehauvas rau qhov koj yeej hlub nws. Qhov uas koj hlub Vajtswv tsis yog vim nws Txoj Lus ua rau koj kaj siab xwb. Tiam sis txoj kev hlub ntawd yeej cog ruaj khov vim koj twb kawm thiab “nkag siab” qhov tseeb txog Vajtswv Yehauvas thiab tej uas nws “lub siab nyiam” lawm. (Kaulauxais 1:9) Qhov uas koj kawm Vajtswv Txoj Lus ua rau koj pom meej hais tias (1) yeej muaj Yehauvas tiag, (2) phau Vajlugkub yeej yog Vajtswv tshoov tib neeg sau, thiab (3) Vajtswv siv nws lub koom haum los ua raws li nws lub siab nyiam.

7. Ua ntej muab peb tus kheej cob rau Vajtswv peb yuav coj li cas?

⁷ Cov uas muab lawv tus kheej cob rau Yehauvas yeej paub tej tseem ntsiab hauv Vajtswv Txoj Lus thiab coj raws li tej lus ntawd. Lawv rau siab ntso mus qhia lwm tus txog tej uas lawv tau kawm. (Mathais 28:19, 20) Lawv txoj kev hlub rau Yehauvas loj zuj zus tuaj ces lawv tsuas xav teev tiam nws tib leeg xwb. Puas zoo li ntawd rau koj thiab? Yog koj hlub Yehauvas li no, koj yuav tsis lam muab koj tus kheej cob rau Yehauvas thiab ua kev cai raus dej kom tus qhia  Vajlugkub rau koj los sis koj niam koj txiv zoo siab xwb. Koj tsis lam caum tej npoj ua kev cai raus dej thiab.

8. Yog peb nco Yehauvas txiaj ntsig peb yuav txiav txim siab ua dab tsi? (Phau Ntawv Nkauj 116:12-14)

⁸ Thaum koj xav txog ib puas tsav yam uas Yehauvas tau ua rau koj mas koj yeej xav muab koj tus kheej cob rau nws xwb. (Nyeem Phau Ntawv Nkauj 116:12-14.) Phau Vajlugkub thiaj hais li no tias Yehauvas yog tus pub “Ib puas tsav yam uas zoo thiab ib puas tsav yam koob hmoov uas zoo kawg nkaus.” (Yakaunpaus 1:17) Yam koob hmoov uas zoo tshaj plaws Yehauvas pub rau peb yog nws tus Tub Yexus uas muab nws txoj siab los txhiv peb. Sim xav seb zoo npaum li cas! Twb yog vim muaj tus nqi txhiv koj thiaj tau los nrog Yehauvas sib raug zoo. Thiab nws yuav pub txoj sia rau koj nyob mus ib txhis. (1 Yauhas 4:9, 10, 19) Thaum koj muab koj tus kheej cob rau Yehauvas ces qhia tias koj nco nws txiaj ntsig rau txoj kev hlub uas nws pub, thiab ntau yam koob hmoov uas nws muab pub rau koj. (2 Kevcai 16:17; 2 Kauleethaus 5:15) Yog xav paub seb yuav nco txiaj ntsig rau Yehauvas txoj kev hlub li cas, mus rau phau ntawv Nyob Kaj Siab Lug Mus Ib Txhis, zaj kawm 46, nyeem lub ntsiab me 4 thiab saib zaj yeeb yaj kiab Muab Tej Koj Muaj Fij Rau Vajtswv.

KOJ PUAS NPAJ TXHIJ COB KOJ TUS KHEEJ THIAB UA KEV CAI RAUS DEJ?

9. Thaum ib tug neeg yuav muab nws tus kheej cob rau Yehauvas, vim li cas txhob muab piv rau lwm tus?

⁹ Tej zaum koj xav tias koj npaj tsis tau txhij muab koj tus kheej cob rau Yehauvas thiab ua kev cai raus dej. Tej zaum koj xav tias tseem muaj ntau yam koj yuav tau hloov xwv thiaj coj tau raws li Yehauvas tej kev cai. Los sis tej zaum koj yuav tau kawm ntxiv kom koj muaj kev ntseeg tso. (Kaulauxais 2:6, 7) Tsis yog txhua tus uas kawm Vajlugkub yuav muaj kev hlub rau Yehauvas ib yam nkaus. Tsis yog txhua tus me nyuam uas muaj tib lub hnub nyoog yuav muab lawv tus kheej cob rau Yehauvas thiab ua kev cai raus dej. Ua tib zoo xav seb tseem tshuav dab tsi uas koj yuav tau ua thiab rau siab ntso ua npaum li koj ua tau es txhob muab koj tus kheej piv rau lwm tus.​—Kalatias 6:4, 5.

10. Yog koj xav tias koj npaj tsis tau txhij muab koj tus kheej cob rau Yehauvas thiab ua kev cai raus dej koj yuav tau ua dab tsi? (Saib lub ntsiab “ Cov Uas Loj Hlob Hauv Qhov Tseeb.”)

¹⁰ Txawm yog koj npaj tsis tau txhij muab koj tus kheej cob rau Yehauvas, los tsom ntsoov lub hom phiaj ntawd. Thov Yehauvas kom nws pab koj hloov tau koj lub neej. (Filipis 2:13; 3:16) Nco ntsoov tias Yehauvas yeej mloog koj tej lus thov thiab yuav pab koj.​—1 Yauhas 5:14.

VIM LI CAS IB TXHIA HO UA XYEM XYAV

11. Yehauvas pab tau peb muab siab npuab nws li cas?

¹¹ Muaj ib txhia tsim nyog cob lawv tus kheej rau Yehauvas thiab ua kev cai raus dej lawm tiam sis ua cas lawv tseem ua xyem xyav. Tej txhia xav tias, ‘yog tom qab kuv ua kev cai raus dej tsam kuv ua txhaum loj es ho raug rho tawm lawm?’ Yog koj txhawj li ntawd, nco ntsoov tias Yehauvas yeej yuav pab koj rau txhua txoj ke xwv koj thiaj “yuav ua tau neeg zoo raws li Vajtswv lub siab nyiam.” (Kaulauxais 1:10) Nws kuj yuav pub lub peev xwm rau koj ua tau qhov ncaj qhov yog. Nws twb pab tau coob leej ntau tus lawm. (1 Kauleethaus 10:13) Vim li no thiaj tsis muaj coob tus raug rho tawm hauv lub koom txoos Khixatias. Yehauvas yeej pab tau nws cov tib neeg muab siab npuab nws tiag.

12. Peb yuav ua li cas thiaj tsis mus ua kev txhaum loj?

¹² Txhua tus neeg uas zoo tsis tiav yeej muaj ib nplooj siab ntxhi kom mus ua phem. (Yakaunpaus 1:14) Yog li ntawd thaum koj raug sim, koj yuav tau txiav txim seb koj yuav ua li cas.  Tsuas yog koj xwb thiaj yog tus uas tswj seb koj yuav ua lub neej zoo li cas. Muaj ib txhia hais tias koj yeej tswj tsis tau koj lub siab thiab tej uas koj yuav ua. Tiam sis tsis muaj tseeb li ntawd. Koj yeej xyaum tau los tswj lub siab ntshaw mus ua phem. Yog li ntawd thaum koj raug sim koj yeej txiav txim siab tau txhob mus ua phem. Thov Vajtswv Yehauvas pab koj txhua hnub koj thiaj tsis mus ua txhaum. Niaj hnub niaj hmo kawm Vajtswv Txoj Lus. Mus tej kev sib txoos tsis tu ncua. Muab tej uas koj kawm piav rau lwm tus. Yog koj ua raws li no tsis tseg tsis tu koj yuav ua tau raws li koj twb cog lus rau Yehauvas lawd. Nco ntsoov tias Yehauvas yuav pab koj ua tau li no.​—Kalatias 5:16.

13. Yauxej ua qauv zoo rau peb xyaum li cas?

¹³ Thaum koj raug kev sim siab, yog koj twb xub xav tseg lawm tias koj yuav ua li cas, yuav yooj yim rau koj ua raws li koj cog lus rau Yehauvas lawd. Phau Vajlugkub qhia rau peb tias muaj coob tus tau ua li ntawd. Lawv kuj yog neeg txhaum ib yam li peb thiab. Xws li, thaum Pautifas tus poj niam tsuas pom haub ntxias Yauxej, tiam sis Yauxej twb xav tseg lawm tias nws yuav ua li cas. Phau Vajlugkub qhia peb tias nws tsis yeem. Nws hais tias: “Kuv yuav ua li cas muaj pluaj siab deev koj thiab ua txhaum rau Vajtswv?” (Chivkeeb 39:8-10) Tej no qhia tseeb tias Yauxej yeej xav ua ntej lawm tias yog Pautifas tus poj niam sim nws ces nws yuav ua li cas. Thaum muaj kev sim siab los raug nws, thiaj yooj yim rau nws ua qhov ncaj qhov yog.

14. Peb yuav ua li cas thiaj tsis qaug rau txoj kev sim siab?

¹⁴ Koj yuav xyaum Yauxej li cas es tawm tsam tej kev sim siab thiab muab siab npuab Vajtswv. Tam sim no yog lub sij hawm uas koj npaj seb thaum muaj kev sim siab koj yuav ua li cas. Xyaum kom koj txawj muab tej yam uas Yehauvas ntxub xyeeb hlo pov tseg tsis txhob xav txog li. (Phau Ntawv Nkauj 97:10; 119:165) Yog koj ua li ntawd koj thiaj tsis qaug rau txoj kev txhaum rau qhov koj twb npaj txhij lawm tias koj yuav ua dab tsi.

15. Ib tug neeg uas xav nrhiav Yehauvas yuav coj li cas? (Henplais 11:6)

¹⁵ Ntawm koj mas tej zaum koj yeej paub tias koj nrhiav tau qhov tseeb lawm thiab koj yeej xav teev tiam Yehauvas kawg koj lub siab lub ntsws. Tiam sis zoo li tseem muaj tej yam khuam koj cia, koj thiaj tsis tau muab koj tus kheej cob rau Yehauvas thiab ua kev cai raus dej. Koj kuj xav txog Vaj Ntxwv Daviv tus qauv  es taij thov Yehauvas ib yam li nws hais no: “Thov koj tshuaj kuv kom paub kuv lub siab, thov koj sim kuv thiab nthuav tej uas kuv lub siab xav saib zoo li cas. Thov koj saib kuv lub siab saib puas muaj qhov txhaum li cas, thiab thov koj coj kuv taug txojkev uas nyob mus ibtxhis.” (Phau Ntawv Nkauj 139:23, 24) Yehauvas yeej yuav muab nqi zog rau txhua tus uas muab siab rau “nrhiav nws.” Qhov uas koj xav muab koj tus kheej cob rau Yehauvas thiab ua kev cai raus dej yeej qhia rau nws tias koj xav nrhiav nws tiag.​—Nyeem Henplais 11:6.

TXAV ZE RAU YEHAUVAS MUS LI

16-17. Cov uas lawv niam lawv txiv twb teev tiam Yehauvas lawd, Yehauvas ho coj lawv los li cas? (Yauhas 6:44)

¹⁶ Yexus hais tias nws cov thwj tim yog Yehauvas coj los rau nws xwb. (Nyeem Yauhas 6:44.) Sim xav seb qhov no zoo npaum li cas diam. Yehauvas yeej pom ib yam zoo nyob hauv txhua tus neeg uas nws coj los. Nws saib txhua tus ntawd puav leej “yog nws teej nws tug.” (2 Kevcai 7:6) Nws saib koj zoo ib yam li no thiab.

¹⁷ Yog koj niam koj txiv twb yog Yehauvas ib tug Tim Khawv lawm tej zaum koj yuav xav tias yog koj niam koj txiv coj koj los ntseeg Yehauvas xwb, tsis yog Yehauvas coj. Txawm koj xav li ntawd los phau Vajlugkub hais tias: “Txav los ze Vajtswv mas nws yuav los ze nej.” (Yakaunpaus 4:8; 1 Xwmtxheej Vajntxwv 28:9) Thaum koj zoo siab hlo txav ze rau Yehauvas, nws yuav txav ze koj thiab. Yehauvas tsis saib rau ib pab neeg coob coob, tiam sis nws saib ib tug zuj zus thiab coj lawv los cuag nws. Nws yeej pom txhua tus uas loj hlob hauv qhov tseeb thiab coj lawv los tib yam nkaus. Thaum ib tug neeg zoo siab hlo txav ze rau Yehauvas, Yehauvas txais yuav nws ib yam li hais hauv Yakaunpaus 4:8.​—Muab piv rau 2 Thexalaunikes 2:13.

18. Hauv zaj tom ntej peb yuav kawm dab tsi? (Phau Ntawv Nkauj 40:8)

¹⁸ Thaum koj muab koj tus kheej cob rau Yehauvas thiab ua kev cai raus dej, twb yog koj muaj Yexus tus cwj pwm. Yexus zoo siab hlo muab nws tus kheej cob ua nws Leej Txiv tes hauj lwm. (Nyeem Phau Ntawv Nkauj 40:8; Henplais 10:7) Zaj tom ntej, peb yuav kawm tias tom qab koj ua kev cai raus dej tas yuav ua li cas koj thiaj rau siab teev tiam Yehauvas mus li.