ZAJ KAWM 12
ZAJ NKAUJ 77 Ci Kaj Nrig Rau Lub Ntiajteb Tsaus Ntuj Nti
Nyob Rawv Rau Hauv Qhov Kaj
“Yav tas los nej yeej nyob hauv qhov tsaus ntuj, tiamsis nimno nej cov uas ntseeg Vajtswv, nej twb los nyob hauv qhov pom kev lawm.”—EFEXUS 5:8.
LUB NTSIAB RAU ZAJ NO
Peb yuav khaws tau ntau yam nyob rau hauv Efexus tshooj 5 txog qhov tsaus thiab qhov kaj uas Povlauj tau hais tseg.
1-2. (1) Thaum Povlauj sau tsab ntawv mus rau cov ntseeg hauv Efexus, nws tab tom raug li cas thiab vim li cas nws ho sau rau lawv? (2) Nyob rau hauv zaj kawm no peb yuav mus piav txog ob lo lus nug twg?
THAUM Povlauj haj tseem raug kaw rau tim Loos, nws mus txhawb tsis tau cov ntseeg lawm, nws thiaj li sau ntawv mus txhawb lawv lub zog. Ib tsab ntawv uas nws sau yog mus rau cov ntseeg nyob hauv Efexus rau thaum kwv lam li xyoo 60 los sis 61 tom qab Yexus yug.—Efexus 1:1; 4:1.
2 Yuav luag tau kaum lub xyoos ua ntej ntawd, Povlauj twb mus tshaj tawm txoj xov zoo rau hauv Efexus lawm. (Tes Haujlwm 19:1, 8-10; 20:20, 21) Nws hlub tshua cov kwv tij nkauj muam hauv Efexus kawg li thiab nws xav pab kom lawv tuav rawv lawv txoj kev ntseeg rau Yehauvas. Tiam sis vim li cas nws ho sau rau lawv txog qhov kaj thiab qhov tsaus? Thiab peb txhua tus ho khaws tau dab tsi los ntawm qhov uas nws sau rau lawv? Nyob rau hauv zaj kawm no mam li piav seb yog li cas rau li cas.
TAWM QHOV TSAUS MUS RAU QHOV KAJ
3. Nyob hauv tsab ntawv uas Povlauj sau rau cov ntseeg hauv Efexus, nws siv ob lo lus twg los sib piv?
3 Povlauj sau rau cov ntseeg nyob hauv Efexus tias: “Yav tas los nej yeej nyob hauv qhov tsaus ntuj, tiamsis nimno nej cov uas ntseeg Vajtswv, nej twb los nyob hauv qhov pom kev lawm.” (Efexus 5:8) Povlauj siv “qhov tsaus” thiab “qhov pom kev” los ua piv txwv tias cov ntseeg nyob hauv Efexus hloov tau lawv lub neej yam nkaus li hais ntawd. Cia peb mam li tham txuas ntxiv vim li cas Povlauj ho hais rau lawv tias “yav tas los nej yeej nyob hauv qhov tsaus ntuj.”
4. Cov neeg hauv Efexus nyob tsaus ntuj nti li cas?
4 Kev ntseeg cuav. Ua ntej cov ntseeg hauv Efexus los paub qhov tseeb, Povlauj hais tias lawv ntseeg tej yam cuav thiab ua khawv koob yees siv. Nyob hauv lub nroog Efexus, muaj ib lub tuam tsev los teev tus mlom Alatemis uas ntau moo mus thoob plaws ntiaj teb. Tiam sis mus rau ntawm lub tuam tsev ntawd yog mus teev tiam mlom. Cov neeg ntaus nyiaj tau nyiaj ntau heev los ntawm qhov uas lawv muag tej moj zeej txog lub tuam tsev thiab tus mlom Alatemis. (Tes Haujlwm 19:23-27) Tsis tas li ntawd, nyob rau lub nroog Efexus, tib neeg yeej ua khawv koob nchuav nthwv.—Tes Haujlwm 19:19.
5. Cov neeg hauv Efexus nyob tsaus ntuj nti li cas?
5 Kev plees kev yi. Cov neeg nyob hauv Efexus ua kev plees kev yi thiab tsis paub txaj muag txog tej ntawd li. Tsis tas li ntawd, lawv ua yeeb yam thiab tej koob tsheej puav leej hais cob coos rau kev plees kev yi. (Efexus 5:3) Muaj coob leej ntau tus neeg hauv Efexus “tsis paub txajmuag.” (Efexus 4:17-19) Ua ntej cov ntseeg paub qhov yog thiab qhov tsis yog, lawv lub siab kuj tsis nkaug lawv thiab lawv tsis ras txog tias Yehauvas ho xav li cas txog tej lawv ua. Yog li ntawd, Povlauj thiaj hais tias “lawv lub siab ruam thiab tsaus ntuj nti lawm. Lawv tsis tau txojsia uas Vajtswv pub rau cov ntseeg.”
6. Vim li cas Povlauj hais tias cov Efexus “nyob hauv qhov pom kev lawm”?
6 Tiam sis ib co neeg Efexus tsis nyob rau hauv qhov tsaus ntuj nti mus li. Povlauj sau hais tias thaum lawv los ntseeg Vajtswv, lawv “nyob hauv qhov pom kev lawm.” (Efexus 5:8) Tam sim no lawv ua lub neej raws li Yehauvas Txoj Lus qhia. Yehauvas Txoj Lus ntawd zoo yam li lub teeb uas ci rau lawv txoj hau kev. (Phau Ntawv Nkauj 119:105) Cov neeg Efexus no tso lawv tej kev ntseeg cuav tseg thiab tsis ua kev plees kev yi lawm. Lawv “xyaum ua [lawv] lub neej raws li Vajtswv tus yam ntxwv” thiab ua npaum li lawv ua tau los teev tiam Yehauvas thiab ua haum nws siab.—Efexus 5:1.
7. Peb lub neej thiab cov ntseeg hauv Efexus lub neej zoo sib xws li cas?
7 Zoo ib yam li ntawd, ua ntej peb los ntseeg Yehauvas, peb nyob hauv qhov tsaus ntuj nti. Xws li peb ib txhia ua koob tsheej hos ib txhia ua kev plees kev yi. Tiam sis thaum peb los paub seb Yehauvas saib qhov twg zoo qhov twg phem ces peb mam li hloov peb lub neej kom raws li ntawd. Peb thiaj pib ua peb lub neej raws li nws lub siab nyiam, thiab tau tej yam zoo. (Yaxayas 48:17) Txawm li ntawd los peb kuj yuav raug ntau yam kev sim siab. Peb yuav tau tsis txhob rov qab mus coj lub neej tsaus ntuj nti tiam sis “nyob hauv qhov pom kev.” Yuav ua li cas peb thiaj tso tau tseg?
Cov uas tso cai rau daim duab no yog Papyrology Collection, Graduate Library, University of Michigan, P.Mich.inv. 6238. Licensed under CC by 3.0
Niaj hnub nim no los peb haj tseem siv tau cov lus uas Povlauj sau rau cov ntseeg hauv Efexus (Saib nqe 7) b
TSO QHOV TSAUS NTUJ TSEG
8. Raws li Efexus 5:3-5, cov ntseeg hauv Efexus yuav tau tso dab tsi tseg?
8 Nyeem Efexus 5:3-5. Yuav kom cov ntseeg hauv Efexus tso tau kev plees kev yi tseg, lawv yuav tau tso tej yam uas tsis haum Yehauvas siab tseg, tsis hais kev sib daj sib dee xwb tiam sis yuav tau tseg tsis txhob hais tej lus vuab tsuab. Povlauj rov hais dua rau cov ntseeg hauv Efexus tias yuav kom lawv “muaj feem mus nyob hauv Yexus Khetos thiab Vajtswv lub [Nceeg Vaj]” mas lawv yuav tau zam tej ntawd huv tib si.
9. Vim li cas peb yuav tau ceev faj tsis txhob ua tej yam uas yuav ua rau peb mus ua kev plees kev yi?
9 Peb yuav tau ua tib zoo xwv peb thiaj tsis ua tej yam uas yog “qhov tsaus ntuj” li. (Efexus 5:11) Tus uas pheej ntsia, mloog los sis tham txog tej yam tsis huv los sis vuab tsuab kheev mus ua tej ntawd. (Chivkeeb 3:6; Yakaunpaus 1:14, 15) Nyob rau hauv ib lub teb chaws, muaj ib co kwv tij lawv pheej sib txuas lus nyob rau hauv is taws nej. Thaum thawj lawv kuj tham txog Yehauvas thiab tej yam zoo. Tiam sis ntev mus ntev tuaj, lawv txawm pib tham txog tej yam uas tsis haum Yehauvas siab. Tej uas lawv hais txog ntawd feem ntau yog hais txog kev plees kev yi. Tom qab no muaj ib txhia kwv tij qhia tias thaum lawv tham tej lus zoo li ntawd ces txawm ua rau lawv mus ua kev nkauj kev nraug nrog lwm tus lawm.
10. Xatas haub ntxias peb li cas? (Efexus 5:6)
10 Nyob rau hauv lub qab ntuj uas Xatas kav no, tej tib neeg yeej haub ntxias kom peb ntseeg tias tej uas Yehauvas suav tias tsis dawb huv thiab vuab tsuab tsis txhaum dab tsi. (2 Petus 2:19) Tej no yeej tsis ua rau peb ceeb sob li vim Xatas yeej ib txwm xav kom tib neeg tsis txhob paub tias qhov twg yog thiab qhov twg tsis yog. (Yaxayas 5:20; 2 Kauleethaus 4:4) Twb yog vim li ntawd, thiaj muaj tej yam uas tsis raws li Yehauvas lub siab nyiam nyob rau hauv tej yeeb yaj kiab, this vis, thiab hauv tej vej xaij! Xatas xav ntxias kom peb xav tias tej yam tsis dawb huv thiab ua kev plees kev yi mas lom zem heev thiab tsis txhaum leej twg.—Nyeem Efexus 5:6.
11. Hli tus yam ntxwv pab tau kom peb coj raws li Efexus 5:7 li cas? (Saib daim duab.)
11 Xatas xav kom peb mus poo cov tib neeg uas yuav haub tau kom peb tsis txhob coj Yehauvas tej kev cai. Yog li ntawd, Povlauj thiaj li txhawb cov Efexus tias: “Nej tsis txhob mus nrog cov neeg ntawd ua ke hlo li,” lawv tsis coj raws li Vajtswv pom zoo. (Efexus 5:7) Peb yuav tau nco ntsoov tias tsis yog ceev faj rau cov uas peb pom tim ntsej tim muag xwb tiam sis peb yuav tau ceev faj cov uas peb nrog tham saum huab saum cua. Nyob rau sab Axias, muaj ib tug npe hu ua Hli a xam pom tias yeej phom sij siv tej vej xaij ntaus phooj ywg. Nws hais tias: “Ntev mus ntev tuaj, kuv txawm saib yam li tsis ua luaj twg nrog tej ‘phooj ywg’ uas tsis hwm phau Vajlugkub tej hauv paus ntsiab lus. Ces kuv txawm xav tias mus nrhiav lub neej uas tsis haum Yehauvas siab los tsis ua luaj twg.” Muaj ib co txwj laus thiaj li pab Hli kom nws tsis txhob xav li ntawd. Hli hais tias: “Tam sim no kuv tsis xav txog tej yam hauv tej vej xaij ntaus phooj ywg tiam sis tsuas xav txog Yehauvas thiab seb Yehauvas xav li cas rau li cas.”
Tej phooj ywg uas peb xaiv yeej txw tau peb mloog los sis tsis mloog Yehauvas tej lus (Saib nqe 11)
12. Dab tsi thiaj pab tau kom peb coj raws li Yehauvas tej kev cai?
12 Peb yuav tau tsis txhob xav tias kev plees kev yi tsis ua luaj twg. Peb yeej paub tias tsis yog lawm. (Efexus 4:19, 20) Peb yuav tau rov tshuaj peb tus kheej li no tias: ‘Kuv puas ua tib zoo tshuaj kom kuv tsis txhob nrog cov uas tsis coj Yehauvas tej kev cai ua ke tshaj li tsim nyog, xws li cov neeg kuv nrog ua hauj lwm, nrog kawm ntawv, los sis lwm tus? Kuv puas muaj siab tawv qhawv coj li Yehauvas tej kev cai tab txawm lwm tus thuam kuv?’ Raws li 2 Timautes 2:20-22, peb yuav tau ua tib zoo tshuaj cov neeg uas peb nrog ua ke hauv lub koom txoos. Muaj ib txhia yuav tsis txhawb kom peb rau siab ntso teev tiam Yehauvas.
“NYOB HAUV QHOV POM KEV”
13. “Nyob hauv qhov pom kev” yog li cas tiag? (Efexus 5:7-9)
13 Povlauj tsis yog txhawb kom cov ntseeg hauv Efexus txhob nyob hauv qhov tsaus ntuj xwb tiam sis nws hais kom lawv “nyob hauv qhov pom kev.” (Nyeem Efexus 5:7-9.) Nws tus nru lus yog xav kom peb coj ib yam li ib tug tseem Khixatias txhua txhua lub sij hawm. Ib yam uas yuav pab kom peb ua li ntawd yog rau siab ntso nyeem thiab kawm phau Vajlugkub nrog rau peb tej ntaub ntawv Vajlugkub. Tsis tas li ntawd, zoo rau peb ua tib zoo soj ntsuas tej uas Yexus qhia thiab nws tus yam ntxwv vim nws yog “qhov kaj uas ci rau qab ntuj neeg.”—Yauhas 8:12; Pajlug 6:23.
14. Lub hwj huam dawb huv pab tau peb li cas?
14 Yuav kom peb “nyob hauv qhov pom kev,” peb yuav tau muaj Vajtswv lub hwj huam dawb huv pab peb vim tsis yooj yim ua lub neej dawb huv hauv lub qab ntuj uas nyiam kev plees kev yi. (1 Thexalaunikes 4:3-5, 7, 8) Vajtswv lub hwj huam dawb huv pab tau kom peb tsis txhob xav li lub qab ntuj neeg, xws li neeg lub tswv yim thiab tej kev xav uas txawv Vajtswv tej kev xav. Lub hwj huam dawb huv yuav pab tau kom peb “ua tau txhua yam zoo, ua neeg ncaj ncees.”—Efexus 5:9.
15. Yuav kom Vajtswv lub hwj huam dawb huv pab peb, peb yuav tau ua li cas? (Efexus 5:19, 20)
15 Yuav kom peb muaj lub hwj huam dawb huv pab peb, ib qho peb yuav tau ua yog thov kom Yehauvas muab rau peb. Yexus hais tias Yehauvas “muab lub hwj huam dawb huv rau cov uas thov nws.” (Lukas 11:13) Tsis tas li ntawd, thaum peb mus rau tej kev sib txoos, Yehauvas kuj muab nws lub hwj huam dawb huv los pab peb. (Nyeem Efexus 5:19, 20.) Vajtswv lub hwj huam dawb huv yuav pab tau kom peb coj lub neej uas haum Vajtswv siab.
16. Dab tsi thiaj pab tau kom peb txawj txiav txim? (Efexus 5:10, 17)
16 Thaum peb yuav txiav txim siab ua ib yam dab tsi twg, peb yuav tau “ua tib zoo saib, saib Vajtswv xav kom [peb] ua yam twg” ces xyaum coj ib yam li ntawd. (Nyeem Efexus 5:10, 17.) Thaum peb nrhiav tau tej hauv paus ntsiab lus hauv phau Vajlugkub uas hais tsi ntsees rau tej uas peb raug, twb yog peb cia Vajtswv pab peb. Yog peb coj raws li tej hauv paus ntsiab lus ntawd, peb yuav txiav txim tau qhov zoo qhov yog.
17. Peb yuav siv peb lub sij hawm kom muaj nuj nqis li cas? (Efexus 5:15, 16) (Saib daim duab.)
17 Povlauj kuj ntuas kom cov ntseeg hauv Efexus siv lawv lub sij hawm kom muaj nuj nqis. (Nyeem Efexus 5:15, 16.) Xatas uas yog tus yeeb ncuab “uas Phem” xav kom peb tsis muaj sij hawm ua Yehauvas tes hauj lwm. (1 Yauhas 5:19) Yeej yooj yim heev rau ib tug Khixatias twg xav txog nyiaj txiag, kawm ntawv qib siab, los sis hauj lwm dua li ua tej yam los teev tiam Yehauvas ntxiv. Yog tias ib tug Khixatias twg ua li no, twb yog nws pib xav li lub qab ntuj neeg lawm. Txhua yam uas hais tas no yeej tsis txhaum tiam sis yuav tau tsis txhob muab ua thawj yam hauv peb lub neej. Yuav kom “nyob hauv qhov pom kev,” peb yuav tau “siv txhua lub sij hawm kom muaj nqis” rau tej yam uas tseem ceeb.
Cov ntseeg hauv Efexus siv lawv lub sij hawm muaj nuj nqis es mus tshaj tawm txoj xov zoo (Saib nqe 17)
18. Nuj tau ua dab tsi xwv nws thiaj siv tau nws lub sij hawm kom muaj nuj nqis?
18 Nrhiav txhua txoj hau kev kom ua tau ntau yam ntxiv rau Yehauvas. Nyob hauv Afika Qab Teb, muaj ib tug npe hu ua Nuj hais tias: “Kuv xav txog kuv lub neej thiab thov Yehauvas pab kom kuv mus tshaj tawm tau txoj xov zoo. Kuv thiaj thov kom nws pab kuv nrhiav ib txoj hauj lwm uas yuav pab tau kuv mus tshaj tawm. Yehauvas thiaj li pab kuv nrhiav tau ib txoj hauj lwm. Yog li ntawd, kuv poj niam wb thiaj li ua tau hauj lwm puv ntoob rau Yehauvas.”
19. Yuav ua li cas peb thiaj “nyob hauv qhov pom kev”?
19 Povlauj tsab ntawv uas sau mus rau cov ntseeg hauv Efexus mas pab tau lawv tuav rawv lawv txoj kev ntseeg rau Yehauvas. Povlauj tej lus ntuas kuj pab tau peb niaj hnub nim no thiab. Xws li, pab tau kom peb ua tib zoo xaiv tej yam peb saib, tej uas peb mloog, thiab cov neeg uas peb nrog ua ke. Tsis tas li ntawd, kuj pab tau kom peb kub siab lug kawm phau Vajlugkub xwv peb thiaj nyob rawv hauv qhov kaj. Txuas ntxiv ntawd, tseem ceeb rau peb muaj Vajtswv lub hwj huam dawb huv xwv peb thiaj coj tau qhov zoo. Yog peb coj li tej uas Povlauj sau, yuav pab tau peb txawj txiav txim raws li Yehauvas pom zoo. Yog peb ua li no ces yuav pab tau kom peb tsis txhob rov mus nyob rau hauv qhov tsaus ntuj nti tiam sis nyob rawv rau hauv qhov kaj mus li!
KOJ YUAV TEB LI CAS?
-
“Qhov tsaus ntuj” thiab “qhov pom kev” hauv Efexus 5:8 yog dab tsi?
-
Yuav ua li cas peb thiaj tsis nyob hauv “qhov tsaus ntuj”?
-
Yuav ua li cas peb thiaj “nyob hauv qhov pom kev”?
ZAJ NKAUJ 95 Paub Vajtswv Txoj Lus Zuj Zus
a Tau muab cov npe hauv zaj no ib txhia hloov lawm.
b DAIM DUAB: Povlauj tsab ntawv rau cov Efexus txheej thaum ub.
