ZAJ KAWM 11
ZAJ NKAUJ 129 Thev Mus Txog Thaum Kawg
Teev Tiam Yehauvas Kam Tiag
“Txawm yog nej raug kev txomnyem los nej tseem ua siab ntev tiv thiab tsis tso kuv tseg.”—TSHWMSIM 2:3.
LUB NTSIAB RAU ZAJ NO
Peb yuav tau peem kam tiag ua Yehauvas tes hauj lwm tab txawm yuav muaj ntau yam txo peb.
1. Peb yuav tau dab tsi yog peb nyob rau hauv Yehauvas lub koom haum?
UA NEEJ nyob rau lub qab ntuj no tsuas phem zuj zus ntxiv tiam sis yog ib qho koob hmoov zoo kawg uas peb tau nyob rau hauv Yehauvas lub koom haum. Yehauvas pub kom peb muaj cov kwv tij nkauj muam ntseeg. (Phau Ntawv Nkauj 133:1) Yehauvas pab kom peb tsev neeg muaj kev zoo siab. (Efexus 5:33–6:1) Thiab nws pab kom peb muaj laj lim tswv yim xwv peb thiaj li thev taus tej kev nyuaj siab uas peb raug thiab muaj kev zoo siab.
2. Peb yuav tau ua dab tsi, thiab yog vim li cas?
2 Peb yuav tau rau siab ntso teev tiam Yehauvas vim muaj qee lub sij hawm lwm tus yuav ua los sis hais qho yam yuam kev rau peb. Tsis tas li ntawd, muaj qee zaug peb yuav ua tau yuam kev ces ho txo tau peb lub zog. Peb yuav tau peem tiag ua Yehauvas tes hauj lwm tab txawm (1) ib tug kwv tij nkauj muam tau ua siab ua qes rau peb, (2) thaum peb tus txij nkawm ua tsis tau raws li siab xav, thiab (3) thaum peb ua tau ib yam twg yuam kev. Nyob rau hauv zaj kawm no mam li piav txog tej no thiab seb cov uas hais nyob rau hauv phau Vajlugkub ho tau ua li cas rau li cas.
THAUM IB TUG KWV TIJ NKAUJ MUAM TAU UA SIAB UA QES
3. Yehauvas cov tib neeg ntsib tej yam twg?
3 Qhov teeb meem. Muaj ib txhia kwv tij nkauj muam yeej ua tau tej yam los xeeb txob peb. Hos muaj ib txhia kuj ua rau peb tu siab los sis ua tsis zoo rau peb. Cov txwj laus los kuj ua tau qho yam yuam kev. Thaum muaj li no, thiaj ua rau ib txhia xav tias puas yog Vajtswv lub koom haum tiag. Tej thaud kuj ua rau lawv tseg tsis tuaj kev sib txoos los sis tsis kam nrog cov uas tau ua siab ua qes rau lawv tham lus. (Xefaniyas 3:9) Puas tsim nyog lawv ua li ntawd? Cia peb mus tham txog ib tug uas hais nyob hauv phau Vajlugkub uas tau raug tib yam li no.
4. Muaj dab tsi los raug Povlauj?
4 Ib qho yam ntxwv hauv phau Vajlugkub. Tus tub txib Povlauj yeej paub tias nws cov kwv tij nkauj muam ntseeg yeej yog noob txaug neeg txhaum. Xws li thaum nws nyuam qhuav pib los ntseeg, muaj ib txhia hauv lub koom txoos hauv Yeluxalees kuj tsis ntseeg tias nws yog ib tug thwj tim. (Tes Haujlwm 9:26) Muaj ib txhia kuj hais phem txog Povlauj kom ua rau lwm cov tsis txhob ntseeg nws. (2 Kauleethaus 10:10) Povlauj xam pom tias qhov uas ib tug txwj laus ua tau yuam kev yuav txo tau lwm tus lub zog. (Kalatias 2:11, 12) Malakaus uas yog ib tug uas Povlauj paub zoo ua rau Povlauj tu siab heev. (Tes Haujlwm 15:37, 38) Yog Povlauj tsis xav nrog cov ua yuam kev rau nws ua ke los tau tiam sis nws saib qhov zoo uas cov kwv tij nkauj muam ua, thiab nws kub siab lug teev tiam Yehauvas. Muaj dab tsi ho pab tau Povlauj ua siab ntev thev?
5. Muaj dab tsi pab tau kom Povlauj nrog nraim cov kwv tij nkauj muam ntseeg? (Kaulauxais 3:13, 14) (Saib daim duab.)
5 Povlauj hlub cov kwv tij nkauj muam ntseeg kawg nkaus li. Txoj kev hlub uas Povlauj muaj rau lwm tus pab tau kom nws tsis txhob cim ntsoov lwm tus tej kev txhaum tiam sis xam pom qhov zoo ntawm lwm tus xwb. Kev hlub pab tau kom Povlauj zam txim rau lwm tus, nws thiaj hais cov lus nyob rau hauv Kaulauxais 3:13, 14. (Nyeem.) Ua li Povlauj xav li cas rau Malakaus xwb? Txawm Malakaus muab Povlauj tso tseg thaum nkawd mus qhia txoj xov zoo txog tog xwb los Povlauj tsis khaws chim rau nws. Tom qab no Povlauj sau ib tsab ntawv mus rau cov ntseeg hauv Kaulauxais. Nws qhuas Malakaus tias Malakaus yog ib tug nrog nws ua hauj lwm thiab “txhawb [nws] lub zog.” (Kaulauxais 4:10, 11) Thaum Povlauj raug kaw hauv Loos, nws hais kom Malakaus tuaj pab nws. (2 Timautes 4:11) Qhov no qhia tias Povlauj zam txim pub rau Malakaus thiab tseem nrog nws sib raug zoo. Peb khaws tau li cas los ntawm Povlauj tus yam ntxwv?
Thaum Povlauj hais lus tsis sib haum nrog Npananpas thiab Malakaus los nws tsis khaws chim. Tom qab no nws kuj ua hauj lwm nrog Malakaus (Saib nqe 5)
6-7. Muaj dab tsi pab tau kom peb hlub cov kwv tij nkauj muam tab txawm lawv ua tau qho yam yuam kev rau peb? (1 Yauhas 4:7)
6 Peb khaws tau li no. Yehauvas xav kom peb rau siab ntso hlub peb cov kwv tij nkauj muam. (Nyeem 1 Yauhas 4:7.) Thaum ib tug kwv tij nkauj muam twg ua tau siab tau qes rau peb, cia peb nco ntsoov tias lawv yeej tsis txhob txwm ua rau kom peb mob siab tiam sis twb yog lawv tsis xav tom ntej tom qab xwb. (Pajlug 12:18) Vajtswv yeej hlub nws cov tib neeg heev tab txawm lawv yog noob txaug neeg txhaum. Nws yeej tsis muab peb txiav tu npawv thaum peb ua yuam kev los sis nws tsis cib nyeej. (Phau Ntawv Nkauj 103:9) Peb ris txiaj ntsig kawg li uas Yehauvas zam txim pub rau peb thiab peb yuav tau xyaum nws tus cwj pwm uas zam lwm tus!—Efexus 4:32–5:1.
7 Nco ntsoov tias peb yuav tau ncawg peb cov kwv tij nkauj muam rau lub sij hawm kawg no. Yav tom ntej no yuav muaj kev tsim txom heev zuj zus ntxiv. Tej zaum peb yuav raug kaw vim peb txoj kev ntseeg los muaj. Yog muaj li no tshwm sim, peb yuav vam khom peb cov kwv tij nkauj muam ntseeg los pab peb. (Pajlug 17:17) Nyob rau hauv Xapee (Spain), muaj ib tug txwj laus npe hu ua Vam Tuam. a Nws thiab ib co kwv tij raug kaw ua ke vim lawv tsis tuaj ib roog nom tswv twg tog. Nws hais tias: “Nyob rau hauv nkuaj, peb sawv daws nyob ua ib ke ces tej thaum ib leeg yeej ua tau xeeb txob ib leeg. Peb yuav tau ua siab ntev thiab sib zam. Ua li no thiaj yuav pab tau peb sib koom siab thiab sib hlub sib pab. Yeej muaj cov uas tsis teev tiam Yehauvas kaw nrog peb thiab. Muaj ib zaug kuv ua sav kuv sab caj npab ces kuv ua tsis tau dab tsi li. Tiam sis muaj ib tug kwv tij pab ntxhua kuv tej khaub ncaws thiab tu kuv. Thaum kuv txom nyem li no kuv pom tias cov kwv tij hlub kuv kawg li.” Zaj no qhia tias kom peb ib leeg cia li zam txim rau ib leeg tam sim no!
THAUM PEB TUS TXIJ NKAWM UA TSIS TAU RAWS LI SIAB XAV
8. Cov txij nkawm ntsib tej yam twg?
8 Qhov teeb meem. Txhua tus txij nkawm yeej muaj kev nyuaj siab. Nyob hauv phau Vajlugkub yeej hais tias cov uas muaj txij nkawm yeej “niaj hnub nyuaj siab.” (1 Kauleethaus 7:28) Twb yog vim ob tug txij nkawm nyias los nyias ib qho los, nyias muaj nyias tus cwj pwm, thiab nyias nyiam nyias lawm ib yam. Tsis tas li ntawd, nyias los ntawm nyias ib haiv tib neeg los sis nyias muaj nyias ib txoj kev coj noj coj ua. Ua ntej ib tug txij nkawm tsis tau sib yuav, nkawd tsis pom qhov tsis zoo txog thaum sib yuav tau lawm. Tej no thiaj li ua rau nkawd muaj teeb meem heev. Nkawd tsis yeem kho tiam sis ib leeg liam hais tias yog tim ib leeg. Nkawd tsuas xam pom tias sib cais los sis sib nrauj ntshe yuav zoo dua. Tiam sis yog nkawd sib cais los sis sib nrauj, puas yuav kho tau nkawd tej teeb meem? b Cia peb mus tham txog ib tug uas hais nyob hauv phau Vajlugkub uas rau siab ntso teev tiam Yehauvas tab txawm nws tus txij nkawm ua nyuaj heev rau nws.
9. Anpinkayis raug li cas hauv nws lub neej?
9 Ib qho yam ntxwv hauv phau Vajlugkub. Anpinkayis yuav Nanpas uas nyob hauv phau Vajlugkub hais tias nws tsiv ncauj tsiv lus heev. (1 Xamuyees 25:3) Ntshe yeej nyuaj heev rau Anpinkayis ua neej nrog ib tug txiv neej yam li ntawd. Yog Anpinkayis xav tso nws tus txiv tseg los yeej tau. Vim li cas ho hais li ntawd? Vim Daviv twb npaj siab tuaj muab Anpinkayis tus txiv tua. (1 Xamuyees 25:9-13) Yog Anpinkayis xav nyiag kev khiav twj ywm es cia Daviv muab nws tus txiv tua los yeej tau. Tiam sis Anpinkayis tsis ua li ntawd. Nws mus txwv kom Daviv tseg tsis txhob muab nws tus txiv tua. (1 Xamuyees 25:23-27) Vim li cas Anpinkayis ho xav txuag nws tus txiv txoj sia?
10. Vim li cas Anpinkayis ho ua siab ntev nyob tab txawm tsis yooj yim ua neej nrog nws tus txiv?
10 Anpinkayis hlub Yehauvas thiab saib taus Nws tej kev cai uas hais txog kev sib yuav. Tej zaum Anpinkayis yeej paub txog Vajtswv cov lus uas hais rau Adas thiab Evas nkawd thaum Nws muab nkawd sib txis ua neej. (Chivkeeb 2:24) Anpinkayis paub tias Yehauvas saib txoj kev sib yuav rau nqi heev. Nws xav ua kom haum Yehauvas siab, yog li ntawd nws thiaj li ua npaum li nws ua tau los pab nws lub cuab lub yig. Nws thiaj li maj ceev nrooj mus tav Daviv kom tsis txhob muab Nanpas tua pov tseg. Nws kuj thov kom Daviv zam txim pub rau nws tab txawm nws tsis tau ua dab tsi yuam kev. Twb yog vim li ntawd, Yehauvas thiaj li hlub Anpinkayis heev vim nws yog neeg siab dawb siab zoo thiab muaj lub siab tawv. Ua li cov txiv tsev thiab cov niam tsev khaws tau Anpinkayis tus yam ntxwv li cas?
11. (1) Yehauvas xav kom ob niam txiv ua li cas xwb? (Efexus 5:33) (2) Koj khaws tau li cas los ntawm qhov uas Kab ua npaum li nws ua tau los kho nws txoj kev txij nkawm? (Saib daim duab.)
11 Peb khaws tau li no. Yehauvas kom tus txiv tsev thiab tus niam tsev nyob ua ke tab txawm nyuaj rau nkawd ob leeg. Vajtswv zoo siab heev thaum nws pom tias tus txiv thiab tus niam yeej ua npaum li nkawd ua tau los kho nkawd tej teeb meem, ib leeg hlub ib leeg thiab ib leeg saib taus ib leeg. (Nyeem Efexus 5:33.) Cia peb mus tham txog ib tug muam npe hu ua Kab. Kwv lam li rau xyoo tom qab nws sib yuav tag, Kab txawm kawm Vajlugkub thiab ua kev cai raus dej. Nws hais tias: “Kuv tus txiv tsis txaus siab rau kuv kiag li. Nws khib vim kuv teev tiam Yehauvas. Nws thuam thiab hem tias nws tsis kam yuav kuv lawm.” Txawm li ntawd los Kab yeej ua siab ntev ua neej nrog nws. Tau 50 lub xyoos los Kab haj tseem hlub thiab saib taus nws tus txiv. Nws hais tias: “Ntev mus ntev tuaj kuv thiaj li paub tias kuv tus txiv xav li cas rau li cas thiab kuv ua tib zoo hais lus rau nws. Kuv tsis kam muab kuv txoj kev txij nkawm rhuav pov tseg vim kev txij nkawm tseem ceeb heev rau Yehauvas, thiab kuv hlub Yehauvas. c Txawm yuav muaj ntau tsav ntau yam ua nyuaj rau koj txoj kev txij nkawm los yog koj tso siab rau Yehauvas ces nws yeej yuav pab koj thev dhau ib puas tsav yam.
Koj khaws tau li cas los ntawm qhov uas Anpinkayis ua npaum li nws ua tau los cawm nws tsev neeg? (Saib nqe 11)
THAUM PEB UA TAU IB YAM TWG YUAM KEV
12. Thaum peb tau ua ib qho txhaum loj, peb pheej xav li cas?
12 Qhov teeb meem. Thaum peb ua ib qho txhaum loj twg, peb lub siab pheej nkaug peb tsis tseg tsis tu txog tej kev txhaum ntawd. Nyob hauv phau Vajlugkub hais tias qhov txhaum peb ua ntawd ua rau peb puas siab puas ntsws tag. (Phau Ntawv Nkauj 51:17) Muaj ib tug kwv tij hu ua Laj yeej sib zog ntsos kom nws tau ua ib tug tub leg num. Ib sij huam, nws cia li ua tau ib qho txhaum loj thiab ua txhaum rau Yehauvas. Nws hais tias: “Thaum kuv xam pom tias kuv ua tau yuam kev, kuv lub siab rov qab nkaug kuv heev. Tom qab ntawd, kuv lub siab nyob tsis tswm. Kuv quaj thiab thov Yehauvas. Thaum ntawd, kuv paub tias Vajtswv yeej yuav tsis mloog kuv tej lus thov ntxiv lawm vim kuv ua rau nws tu siab heev.” Yog tias peb ua tau ib qho txhaum loj twg rau Yehauvas, peb yuav puas siab puas ntsws thiab xav hais tias Yehauvas yuav tsis yuav peb ntxiv lawm thiab tsis tsim nyog rau peb teev tiam nws. (Phau Ntawv Nkauj 38:4) Yog tias tau muaj li no rau koj, cia peb mus tham txog ib tug uas hais nyob hauv phau Vajlugkub uas rau siab ntso teev tiam Yehauvas tab txawm nws tau ua ib qho txhaum loj.
13. Petus tau ua txhaum loj li cas, thiab muaj li cas nws thiaj ua tau li ntawd?
13 Ib qho yam ntxwv hauv phau Vajlugkub. Hmo ua ntej Yexus tuag, tus tub txib Petus ua tau ob peb yam yuam kev, nws thiaj ua tau ib qho txhaum loj. Thaum thawj, Petus hais tias txawm lwm cov tub txib tso Yexus tseg los nws yeej tsis tso Yexus tseg hlo li. (Malakaus 14:27-29) Tom qab ntawd, thaum nyob hauv lub vaj Kexemanes, Petus tsis zov tos. (Malakaus 14:32, 37-41) Thaum ib pab neeg nqa riam nqa qws tuaj ntes Yexus, Petus txawm tso plau khiav lawm. (Malakaus 14:50) Ces Petus tsis lees paub Yexus peb zaug thiab tseem twv ntuj twv teb tsis lees paub Yexus. (Malakaus 14:66-71) Ua li Petus xav li cas xwb thaum nws ras tias nws ua tau ib qho txhaum loj heev? Nws txawm quaj tu siab nrho. (Malakaus 14:72) Ntshe Petus puas siab puas ntsws tas li thaum nws pom nws tus phooj ywg kwv luag Yexus tuag txom nyem ntsuav.
14. Muaj dab tsi pab tau kom Petus rau siab ntso teev tiam Yehauvas? (Saib daim duab.)
14 Muaj ob peb yam uas pab tau kom Petus rau siab ntso teev tiam Yehauvas. Xws li nws tsis nyob nws ib leeg twm zeej. Nws mus cuag lwm cov thwj tim thiab lawv txhawb nws lub zog. (Lukas 24:33) Tsis tas li ntawd, Yexus kuj los tshwm rau Petus pom kom txhawb tau Petus lub zog. (Lukas 24:34; 1 Kauleethaus 15:5) Tom qab ntawd, Yexus tsis cem Petus vim Petus ua yuam kev tiam sis Yexus qhia rau Petus tias Petus yuav muaj hauj lwm ntau heev ua. (Yauhas 21:15-17) Petus paub tias nws yeej ua tau txhaum loj lawm tiam sis nws kuj tsis tso tseg. Petus paub tseeb tseeb tias Yexus haj tseem hlub nws heev. Cov kwv tij ntseeg los haj tseem txhawb nws thiab. Ua li peb khaws tau dab tsi los ntawm Petus tus yam ntxwv?
Yauhas 21:15-17 qhia tias Yexus yeej tsis tau tso Petus tseg. Qhov no thiaj txhawb tau Petus lub zog (Saib nqe 14)
15. Yehauvas xav kom peb tso siab li cas? (Phau Ntawv Nkauj 86:5; Loos 8:38, 39) (Saib daim duab.)
15 Peb khaws tau li no. Yehauvas xav kom peb paub tias nws yeej hlub peb thiab tos tsis hnyu yuav zam peb tej kev txhaum. (Nyeem Phau Ntawv Nkauj 86:5; Loos 8:38, 39.) Thaum peb ua tau ib qho txhaum loj, peb lub siab yeej rov nkaug peb. Yeej yuav muaj li ntawd tiam sis peb yuav tau tsis txhob xav tias Yehauvas tsis hlub peb los sis tsis zam peb lub txim. Peb yuav tau maj nrawm nroos mus nrhiav kev pab. Laj hais tias: “Tos kuv ua txhaum los twb yog kuv tso siab dhau rau kuv tus kheej.” Laj xam pom tias nws yuav tau mus qhia rau cov txwj laus paub. Nws hais tias: “Thaum kuv mus nrog cov txwj laus tham, lawv pab tau kuv pom tias Yehauvas hlub kuv kawg li. Cov txwj laus los yeej hlub kuv thiab lawv pab tau kuv pom tias Yehauvas yeej tsis tau muab kuv tso tseg.” Raws li hais no, peb yeej tso siab tau tias Yehauvas yuav hlub thiab zam txim rau peb yog tias peb lees peb tej kev txhaum, mus cuag cov txwj laus, thiab tsis txhob rov mus ua txhaum dua. (1 Yauhas 1:8, 9) Yog tias peb tso siab rau Yehauvas yam li hais tas no ces peb yeej yuav tsis tso Yehauvas tseg tab txawm peb ua tau ib yam twg yuam kev.
Thaum koj pom cov txwj laus ua npaum li lawv ua tau los pab koj, qhia rau koj li cas? (Saib nqe 15)
16. Vim li cas koj ho yuav rau siab ntso teev tiam Yehauvas?
16 Yehauvas yeej pom qhov uas peb rau siab ntso teev tiam nws nyob rau lub sij hawm kawg no thiab nws saib rau nqi heev. Yog muaj Yehauvas ua tus pab peb lawm, peb yeej thev dhau tej yam uas peb tau ua tsis yog los sis lwm tus tau ua yuam kev rau peb. Peb yeej yuav hlub cov kwv tij nkauj muam kam tiag tab txawm lawv ua siab ua qes rau peb. Peb yeej hlub Vajtswv thiab saib taus txoj kev txij nkawm uas nws rhawv tseg cia yog peb ua npaum li peb ua tau los kho peb txoj kev txij nkawm. Yog peb ua tau ib qho txhaum loj peb yeej yuav nrhiav Yehauvas pab, xam pom tias nws hlub thiab yeej zam txim pub rau peb, thiab kub siab lug teev tiam nws lawm yav tom ntej. Peb paub tias Yehauvas yeej yuav foom koob hmoov rau peb nplua mias yog tias peb ‘tsis nkees ua tej haujlwm zoo.’—Kalatias 6:9.
YUAV UA LI CAS PEB THIAJ RAU SIAB NTSO TEEV TIAM YEHAUVAS THAUM . . .
-
ib tug kwv tij nkauj muam tau ua siab ua qes rau peb?
-
peb tus txij nkawm ua tsis tau raws li siab xav?
-
peb ua tau ib yam twg yuam kev?
ZAJ NKAUJ 139 Xav Txog Thaum Koj Nyob Hauv Lub Ntiajteb Tshiab
a Tau muab cov npe hauv zaj no ib txhia hloov lawm.
b Vajtswv Txoj Lus qhia tias tsis zoo rau tus txiv thiab tus poj niam sib cais. Tsis tas li ntawd, qhov nkawd sib cais tsis tau tso cai rau nkawd mus yuav dua lwm tus. Tiam sis muaj qho yam ua rau ib txhia sib cais. Mus saib phau Nyob Kaj Siab Lug Mus Ib Txhis ntawm cov lus qhia 4 “Thaum Ob Niam Txiv Sib Cais”.
c Yog xav paub ntxiv, mus saib lub vej xaij jw.org/hmn ntawm zaj yeeb yaj kiab hu ua Kev Thaj Yeeb Nyab Xeeb Hauv Ntiaj Teb No Tsuas Yog Ib Ntus Xwb—Darrel Thiab Deborah Freisinger.
