1-2. Tom qab ib tug neeg ua kev cai raus dej tas, nws yuav txais tej koob hmoov twg?

 THAUM peb ua kev cai raus dej thiab tau los ua Vajtswv Yehauvas tsev neeg mas peb yeej zoo siab kawg li tiag. Yeej yog ib qhov koob hmoov zoo kawg li uas tau los nrog Yehauvas sib raug zoo. Peb yeej xav ib yam li zaj nkauj uas Daviv sau tias: “Cov neeg uas koj [Yehauvas] xaiv tseg yuav zoo siab heev, lawv yog cov uas koj coj los nyob hauv lub tsev uas neeg tuaj pehawm koj.”​—Phau Ntawv Nkauj 65:4.

² Yehauvas tsis coj txhua tus los ua nws tsev neeg. Zoo li zaj peb twb kawm tas lawd Yehauvas tsuas txav ze rau cov uas zoo siab hlo xav nrog nws sib raug zoo xwb. (Yakaunpaus 4:8) Thaum koj muab koj tus kheej cob rau Yehauvas thiab ua kev cai raus dej, koj muaj ib txoj kev sib raug zoo tshwj xeeb heev. Tom qab koj ua kev cai raus dej tas Yehauvas yuav foom “koob hmoov ntau nplua mias los rau [koj].”​—Malakis 3:10; Yelemis 17:7, 8.

3. Cov Khixatias uas tau muab lawv tus kheej cob rau Yehauvas thiab ua kev cai raus dej yuav tau ua dab tsi? (Tej Lus Qhia 5:4, 5)

³ Thaum koj ua kev cai raus dej ces yog koj nyuam qhuav pib teev tiam Yehauvas xwb. Tom qab ntawd, txawm koj raug sim thiab raug kev txom nyem los koj yeej nco ntsoov ua raws li koj cog lus rau Yehauvas thiab tuav rawv kev ntseeg. (Nyeem Tej Lus Qhia 5:4, 5.) Vim koj yog Yexus ib tug thwj tim lawm, koj xyaum nws tus qauv thiab coj raws li nws tej lus sam hwm. (Mathais 28:19, 20; 1 Petus 2:21) Zaj no yuav pab koj ua tau li ntawd.

 RAUG KEV TXOM NYEM KEV SIM SIAB LOS RAWS YEXUS QAB MUS LI

4. Ua li cas Yexus ho hais tias nws cov thwj dim yuav kwv “tus ncej ntoo”? (Lukas 9:23)

⁴ Tom qab ua kev cai raus dej tsis yog koj yuav tsis ntsib teeb meem li lawm. Yexus twb hais lawm tias nws cov thwj tim yuav kwv tus “ncej ntoo” raws nws qab. Nws hais tias lawv “yuav tsum niaj hnub kwv” tus ncej ntoo. (Nyeem Lukas 9:23.) Qhov uas Yexus hais no puas qhia tias nws cov thwj tim yuav niaj hnub raug kev txom nyem? Tsis qhia li ntawd. Tiam sis nws piav tias txawm lawv tau txais koob hmoov los lawv tseem yuav raug kev txom nyem. Tej zaum, yuav nyuaj heev rau lawv thiab.​—2 Timautes 3:12.

5. Yexus cog lus tias cov uas tso ib puas tsav yam tseg yuav tau koob hmoov dab tsi?

⁵ Tej zaum koj tau raug kev tawm tsam los ntawm koj tsev neeg. Los sis koj tau tso tej qhov txhia chaw tseg koj thiaj muab tau Vajtswv lub Nceeg Vaj tso ua ntej hauv koj lub neej. (Mathais 6:33) Vajtswv Yehauvas pom ntsoov tej uas koj tau ua. (Henplais 6:10) Koj puas pom tias muaj raws li Yexus cov lus no: “Txhua tus uas tso niam tso txiv, tso tub tso kiv, tso kwv tso tij, tso nkauj tso muam, tso vaj tso tsev, tso liaj tso teb tseg los ua kuv tus thwj tim, tiam no yuav tau 100 npaug ntxiv, tsis hais niam txiv, tub ki, kwv tij nkauj muam, vaj tse, liaj teb. Nws kuj yuav raug tsim txom. Thiab tiam tom ntej nws yuav tau txoj sia ib txhis tsis kawg.” (Malakaus 10:29, 30) Tej koob hmoov uas koj tau txais yeej zoo tshaj txhua yam uas koj muab tso tseg lawd.​—Phau Ntawv Nkauj 37:4.

6. Vim li cas tom qab koj ua kev cai raus dej, koj tseem yuav tau tawm tsam “tej uas lub cev nqaij tawv ntshaw”?

⁶ Tom qab koj ua kev cai raus dej tas, koj tseem yuav tau tawm tsam “tej uas lub cev nqaij tawv ntshaw.” (1 Yauhas 2:16) Koj yuav tau ua li no vim koj tseem yog noob txaug neeg txhaum. Tej zaum koj yuav xav li Povlauj xav thiab. Nws hais tias: “Nyob puag hauv kuv nruab siab, kuv yeej nyiam Vajtswv txoj cai heev. Tiam sis kuv ho pom dua ib txoj cai hauv kuv lub cev uas tawm tsam txoj cai uas kav kuv txoj kev xav. Txoj cai ntawd yog txoj kev txhaum uas nyob hauv kuv nruab ce kav rawv kuv.” (Loos 7:22, 23) Thaum koj xav txog tej uas koj yuav tsum tawm tsam, ntshe koj yuav qaug zog tas. Tiam sis yog koj nco ntsoov koj cov lus cog tseg rau Yehauvas thaum koj muab koj tus kheej cob rau nws, koj yuav tuaj zog. Yehauvas yuav pab kom koj kov yeej tej kev sim siab. Qhov uas koj muab koj tus kheej cob rau Yehauvas lawd yuav pab tau koj. Yuav pab tau li cas?

7. Qhov uas koj muab koj tus kheej cob rau Yehauvas yuav pab tau kom koj muab siab npuab nws li cas?

⁷ Thaum koj muab koj tus kheej cob rau Yehauvas ces koj tsis ua raws li koj lub siab nyiam lawm. Qhov no txhais tias koj yuav tsis ua raws li koj lub siab ntshaw los sis mus vuag tej uas tsis haum Yehauvas siab. (Mathais 16:24) Yog li, thaum koj raug kev sim siab koj yuav tsis ua xyem xyav. Rau qhov koj twb txiav txim siab lawm tias koj yuav muab siab npuab Yehauvas xwb. Koj yuav ua tau siab tawv qhawv ua haum Yehauvas siab. Thaum koj ua li no twb yog koj ua ib yam li Yauj ntag. Txawm nws raug kev txom nyem kawg nkaus li los nws hais hlo tias: “Kuv yuav tsis tso kuv lub siab ncaj tseg mus txog thaum kuv tuag.”​— Yauj 27:5.

8. Yog koj nco ntsoov qhov uas koj thov Vajtswv thiab muab koj tus kheej cob rau nws yuav pab tau koj li cas thaum raug kev sim siab?

⁸ Thaum koj thov Yehauvas tias koj muab koj tus kheej cob rau nws ces koj yuav pom tias koj kov yeej tau txhua yam kev sim siab. Piv txwv li no, koj puas xav thab luag lwm tus  txwj nkawm? Koj yeej tsis xav li! Koj twb cog lus rau Yehauvas lawm tias koj yuav tsis ua li ntawd. Tsam neb muaj siab lawm ces neb ho tso tsis taus tseg lawm. Koj kuj ‘tsis mus ua txoj kev phem’ thiab.​—Pajlug 4:14, 15.

9. Yog koj nco ntsoov qhov uas koj thov Vajtswv thiab muab koj tus kheej cob rau nws yuav pab tau koj muab Vajtswv tso ua ntej li cas?

⁹ Yog tias koj nrhiav tau ib txoj hauj lwm uas koj yuav mus koom tsis tau kev sib txoos ne? Koj yeej paub tias yuav ua li cas thiaj zoo. Ua ntej koj yuav ua txoj hauj lwm ntawd koj yeej txiav txim tias koj tsis ua txoj uas koj mus tsis tau kev sib txoos. Tsis tas koj yuav xav ntev xav ntau tias xyov yuav ua los tsis ua. Xyaum Yexus tus qauv yuav pab tau peb. Nws yeej txiav txim siab ua raws li nws Leej Txiv pom zoo. Zoo ib yam li Yexus, koj yeej txiav txim tau tam sim ntawd tias koj yuav tsis ua tej yam uas Vajtswv tus uas koj cob koj tus kheej rau lawd, tsis pom zoo.​—Mathais 4:10; Yauhas 8:29.

10. Tom qab koj ua kev cai raus dej, Yehauvas yuav ua li cas pab koj “raws Yexus qab mus li”?

¹⁰ Thaum koj raug teeb meem los sis raug sim, tej uas koj txiav txim siab ua ntawd yuav ua pov thawj qhia tias koj yog ib tug uas “raws Yexus qab mus li”. Koj kuj tso siab tau tias Yehauvas yuav pab koj raws Yexus qab mus li thiab. Phau Vajlugkub hais tias: “Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiamsis thaum nej raug kev sim siab Vajtswv yuav pab kom nej ua taus lub siab ntev.”​—1 Kauleethaus 10:13.

UA LI CAS THIAJ RAWS TAU YEXUS QAB MUS LI

11. Txoj kev zoo tshaj plaws uas raws Yexus qab mus li yog li cas? (Saib daim duab.)

¹¹ Yexus kub siab lug ua Yehauvas tes hauj lwm kawg siab kawg ntsws thiab nws thov  Yehauvas tsis tseg tsis tu li. (Lukas 6:12) Tom qab koj ua kev cai raus dej tas, ib yam uas yuav pab tau koj raws Yexus qab mus li yog rau siab ntso ua tej uas yuav pab koj txav ze rau Yehauvas. Phau Vajlugkub hais tias: “Txawm peb paub Vajtswv zoo npaum li cas los cia peb peem tiag mus lawm tom ntej kom peb yim huab paub Vajtswv ntxiv.” (Filipis 3:16) Ntau zaus koj yuav hnov txog tej uas koj cov kwv tij nkauj muam twb txiav txim siab ua rau Yehauvas tes hauj lwm ntxiv. Tej zaum lawv mus kawm lub tsev kawm ntawv, Kev Kawm Rau Cov Qhia Lub Nceeg Vaj los sis cov uas tau khiav mus nyob rau thaj chaw uas cheem tsum cov tshaj tawm. Yog koj ua tau li no yuav yog ib lub hom phiaj zoo heev rau koj thiab. Yehauvas cov tib neeg nrhiav nrhw kev los ua nws tes hauj lwm ntxiv. (Tes Haujlwm 16:9) Yog tias koj ua tsis tau li ntawd tam sim no, txhob xav tias koj tsis muaj peev xwm li luag tej. Qhov tseem ceeb tsis yog peb sib tw tiam sis peb xyaum kub siab lug li Yexus es thev mus txog thaum kawg. (Mathais 10:22) Nco ntsoov tias thaum koj ua npaum li koj ua tau, yog koj ua rau Yehauvas zoo siab. Qhov no yog qhov tseem ceeb uas tom qab koj ua kev cai raus dej tas es koj raws Yexus qab mus li.​—Phau Ntawv Nkauj 26:1.

12-13. Koj yuav ua li cas yog tias koj tsis kub siab teev tiam Yehauvas li qub lawd? (1 Kauleethaus 9:16, 17) (Saib lub ntsiab “ Dhia Tiag Mus.”)

¹² Koj yuav ua li cas yog koj pom tias koj tsuas thov Vajtswv kom tag kev cai xwb, los sis koj tsis mob siab ua Vajtswv tes hauj lwm li qub lawm? Thiab koj tsis rau siab nyeem phau Vajlugkub li qub lawm ? Yog tias tom qab koj ua kev cai raus dej, tau muaj li no rau koj los txhob xav hais tias Yehauvas tso koj tseg lawm. Vim peb yog neeg zoo tsis tiav, muaj tej zaud peb yeej qaug zog thiab. Yog tias koj tsis  kub siab li yav thaud lawm ces ua tib zoo xav txog tus tub txib Povlauj. Txawm nws xav xyaum raws li Yexus los tej thaud nws yuam nws lub siab ua xwb. (Nyeem 1 Kauleethaus 9:16, 17.) Nws hais tias: “Txawm yog kuv tsis yeem ua los tes haujlwm ntawd yeej yog kuv tes.” Yog li ntawd, txawm Povlauj yuav xav li cas los nws yeej npaj siab ua kom tiav li.

¹³ Ib yam li ntawd, thaum koj qaug zog lawd koj tsis txhob maj txiav txim raws li koj xav. Txawm koj xav ua tsis xav los, cia li npaj siab ua qhov ncaj qhov yog xwb. Ntev mus ntev tuaj koj yuav muaj lub siab kub lug ua lawm. Tam sis no yog koj mob siab kawm Vajlugkub rau koj tus kheej, thov Vajtswv, mus kev sib txoos, thiab tshaj tawm txoj xov zoo ces yuav pab koj raws Yexus qab mus li. Thaum koj cov kwv tij nkauj muam pom koj ua siab ntev teev tiam Yehauvas li ntawd, yuav txhawb tau lawv heev.​—1 Thexalaunikes 5:11.

“CIA LI TSHUAJ . . . CIA LI SIM”

14. Koj yuav tshuaj xyuas koj tus kheej li cas thiab yog vim li cas? (2 Kauleethaus 13:5)

¹⁴ Tom qab koj ua kev cai raus dej tseem ceeb rau koj tshuaj koj tus kheej tsis tus ncua. (Nyeem 2 Kauleethaus 13:5.) Tshuaj seb koj puas thov Vajtswv txhua hnub, nyeem thiab kawm phau Vajlugkub, mus kev sib txoos, thiab mus tshaj tawm txoj xov zoo. Tej no yog tej yam uas yuav pab tau koj txoj kev ntseeg ruaj khov. Yog li ntawd yuav ua li cas koj thiaj yim huab nyiam ua tej no? Cov lus nug no yuav pab tau koj: ‘Kuv puas paub piav tej nqe Vajlugkub rau lwm tus? Yuav ua li cas kuv thiaj nquag mus tshaj tawm? Kuv puas thov Vajtswv tsi ntsees rau tej uas nyob hauv kuv lub siab? Kuv tej lus thov puas qhia tias kuv tso siab rau Yehauvas? Kuv puas mus kev sib txoos tsis tu ncua? Kuv yuav ua li cas txawj mloog thiab txawj teb tom kev sib txoos?’

15-16. Koj kawm tau li cas txog ib tug kwv tij uas raug sim?

¹⁵ Tseem ceeb rau koj tshuaj koj lub siab seb koj ntshaw dab tsi. Ib tug kwv tij npe hu ua Lanpaw (Robert) hais li no tias: “Thaum kuv muaj 20 xyoo, kuv ua me ntsis hauj lwm xwb. Muaj ib hnub tom hauj lwm, muaj ib tug poj niam caw kuv mus tom nws tsev. Nws hais tias thaum wb ob leeg xwb ces ‘wb yuav lom zem heev.’ Thaum ntej ces kuv kuj yig me ntsis thiab, tiam sis thaum kawg kuv hais tias mus tsis tau. Kuv thiaj piav tias vim li cas kuv mus tsis tau.” Lanpaw zam dhau txoj kev sim no thiab tsim nyog qhuas nws kawg. Tiam sis tom qab no nws mam li xav tias cas nws tsis hais hlo rau tus poj niam ntawd xwb. Nws lees tias: “Ua cas kuv tseem tsis hais kiag rau nws li  Yauxej hais rau Pautifas tus poj niam thiab. (Chivkeeb 39:7-9) Kuv mam pom hais tias nyuaj yig npaum li cas tiag. Txoj kev sim no pab kuv pom tias kuv yuav tsum muaj kev sib raug zoo nrog Yehauvas tshaj no ntxiv.”

¹⁶ Yog koj xyaum li Lanpaw yuav pab tau koj heev. Txawm yog koj twb tawm tsam yeej qho zaus lawm los, nug koj tus kheej li no, ‘Lwm zaus kuv puas yuav yig kiag tam sid?’ Txawm tias muaj tej yam uas koj yuav tau kho los txhob tas kev cia siab. Zoo kawg uas koj paub tias muaj qho yam uas koj yuav tau kho. Thov Yehauvas pab koj xwv koj thiaj ua tau tej yam uas yuav txhawb koj muaj lub siab xav mloog Yehauvas lus.​—Phau Ntawv Nkauj 139:23, 24.

17. Tej uas Lanpaw ntsib tiv thaiv tau Yehauvas lub npe li cas?

¹⁷ Muaj ib yam ntxiv uas peb kawm tau txog tej uas Lanpaw ntsib li no. Nws hais tias: “Tom qab tus poj niam ntawd ntxias tsis tau kuv, nws txawm hais tias, ‘Koj yeej lawm!’ Kuv tsis nkag siab. Kuv thov kom nws piav ntxiv. Nws piav tias nws muaj ib tug phooj ywg uas yav tas los yog Yehauvas ib tug Tim Khawv tau hais rau nws tias cov tub ntxhais hluas uas yog Yehauvas Cov Tim Khawv, lawv yeej ua txhaum nraim nkoog tsis pub leej twg paub xwb. Nws thiaj qhia rau nws tus phooj ywg tias nws xav sim seb kuv puas zoo li ntawd thiab.”

18. Tom qab koj ua kev cai raus dej, koj yuav tau ua li cas? (Saib lub ntsiab “ Muaj Ob Zaj Uas Koj Yuav Nyiam.”)

¹⁸ Thaum koj muab koj tus kheej cob rau Yehauvas thiab ua kev cai raus dej, yeej qhia tias koj xav txhawb nws lub npe txawm yuav muaj kev sim siab li cas los raug koj. Koj yeej paub tseeb hais tias Yehauvas paub tej kev ntxhov siab uas koj raug. Nws yuav pab koj yig dhau. Koj yeej tso siab tau tias Yehauvas lub hwj huam dawb huv yuav pab koj. (Lukas 11:11-13) Tom qab koj ua kev cai raus dej, Yehauvas yuav pab koj raws Yexus qab mus li.