1. Ib txhia uas teev tiam Yehauvas tau xav li cas?

 PEB zoo siab thaum peb paub tias Yehauvas txaus siab heev rau nws cov tib neeg. Phau Vajlugkub hais tias: “[Yehauvas] txaus siab heev rau nws haivneeg.” (Phau Ntawv Nkauj 149:4) Muaj ib txhia thaum lawv qaug zog heev, tej zaum lawv yuav xav tias, ‘Yehauvas puas txaus siab rau kuv?’ Muaj coob tus teev tiam Yehauvas uas nyob hauv phau Vajlugkub, thaum lawv qaug zog kuj ua rau lawv xav tias Yehauvas puas txaus siab rau lawv thiab.​—1 Xamuyees 1:6-10; Yauj 29:2, 4; Phau Ntawv Nkauj 51:11.

2. Yehauvas txaus siab rau tus twg xwb?

² Phau Vajlugkub qhia meej meej tias txawm peb yog neeg txhaum los, peb yeej ua tau haum Yehauvas siab. Qhov uas peb ua tau ntawd yog muaj kev ntseeg rau Yexus Khetos thiab ua kev cai raus dej. (Yauhas 3:16) Thaum peb ua li no ces twb yog peb qhia rau sawv daws tias peb tau tso peb tej kev txhaum tseg thiab tau cog lus rau Vajtswv tias peb yuav ua raws li nws lub siab nyiam. (Tes Haujlwm 2:38; 3:19) Qhov no ua rau Yehauvas txaus siab heev vim nws pom tias peb xav nrog nws sib raug zoo. Yog peb ua raws li peb lo lus cog tseg tias peb yuav teev tiam nws ces Yehauvas yeej txaus siab heev rau peb thiab yeej suav tias peb yog nws cov phooj ywg.​—Phau Ntawv Nkauj 25:14.

3. Peb yuav teb peb lo lus nug twg?

³ Vim li cas tej thaud ib txhia thiaj xav tias Vajtswv tsis txaus siab rau lawv? Yehauvas qhia li cas tias nws txaus siab rau peb? Thiab yuav ua li cas peb thiaj paub tias Yehauvas txaus siab rau peb?

 IB TXHIA XAV TIAS YEHAUVAS TSIS TXAUS SIAB RAU LAWV

4-5. Thaum peb xav tias peb tsis muaj nqis, cia peb nco ntsoov li cas?

⁴ Peb ib txhia pheej xav tias peb tsis muaj nqis dab tsi txij thaum yau los. (Phau Ntawv Nkauj 88:15) Tus kwv tij hu ua Adias (Adrián) hais tias: “Kuv ib txwm saib kuv tus kheej qis qis. Kuv nco thaum kuv tseem yau, kuv tau thov Vajtswv kom kuv tsev neeg tau mus nyob hauv lub Vaj Kaj Siab tiam sis kuv ntseeg tias kuv yuav tsis tau mus vim kuv zoo tsis txaus.” Thoonis (Tony) uas loj hlob hauv ib tse neeg uas tsis teev tiam Yehauvas hais tias: “Kuv niam thiab txiv yeej tsis tau hais ib zaug rau kuv tias nkawd hlub kuv los sis qhuas kuv. Nkawd tsuas txhawb kom kuv rau rau siab xwb.”

⁵ Thaum peb xav tias peb tsis muaj nuj nqis, nco ntsoov tias Yehauvas yog tus rub peb los nrog nws sib raug zoo. (Yauhas 6:44) Nws pom tej yam zoo peb muaj uas peb tsis pom, thiab nws paub peb lub siab. (1 Xamuyees 16:7; 2 Xwmtxheej Vajntxwv 6:30) Yog li ntawd, thaum Yehauvas hais tias peb muaj nqis heev rau nws, cia li ntseeg nws.​—1 Yauhas 3:19, 20.

6. Povlauj xav li cas txog nws tej kev txhaum yav tas los?

⁶ Ua ntej peb los paub Yehauvas, peb ib txhia tau ua tej yam uas tej zaud tseem nkaug peb lub siab. (1 Petus 4:3) Hos ib txhia twb teev tiam Yehauvas tau ntev loo lawm los lawv yuav tau tswj lawv lub siab uas ntshaw mus ua qhov phem kam tiag. Ua li koj ne, tej thaud koj puas xav tias Yehauvas tsis zam koj lub txim thiab? Yog koj xav li ntawd, nco ntsoov tias cov uas teev tiam Yehauvas txheej thaum ub los kuj xav ib yam li koj thiab. Xws li, tus tub txib Povlauj kuj ntxhov siab heev txog tej kev txhaum uas nws tau ua. (Loos 7:24) Txawm nws twb tso nws tej kev txhaum tseg thiab ua kev cai raus dej lawm los nws tseem hais tias nws yog “tus tubtxib uas yau dua lwm tus huvsi” thiab “yog tus muaj txim loj dua cov neeg uas muaj txim huv tibsi.”​—1 Kauleethaus 15:9; 1 Timautes 1:15.

7. Peb yuav tau nco ntsoov li cas txog peb tej kev txhaum yav tas los?

⁷ Peb Leej Txiv Yehauvas cog lus tias nws yuav zam peb lub txim yog peb tso peb tej kev txhaum tseg. (Phau Ntawv Nkauj 86:5) Yog peb tso peb tej kev txhaum tseg lawm tiag tiag ces peb yeej ntseeg tau tias Yehauvas yuav zam peb lub txim li nws tau hais.​—Kaulauxais 2:13.

8-9. Yuav ua li cas peb thiaj tsis xav tias txawm peb ua npaum li cas los yeej tsis txaus Yehauvas siab?

⁸ Peb sawv daws yeej xav teev tiam Yehauvas li peb ua tau. Tiam sis ib txhia xav tias txawm lawv ua npaum li cas los lawv yeej ua tsis txaus Yehauvas siab. Tus muam hu ua Ameda (Amanda) hais tias: “Kuv pheej xav tias kuv yuav tau ua ntau tshaj qhov uas kuv ua tau thiaj yog kuv muab qhov zoo tshaj rau Yehauvas. Yog li ntawd, kuv thiaj rau siab ntso ua kom ntau tshaj qhov kuv ua tau. Thaum kuv ua tsis tau li ntawd ces kuv xav tias Yehauvas tsis txaus siab rau kuv.”

⁹ Yuav ua li cas peb thiaj tsis muaj qhov uas xav tias peb ua tsis txaus Yehauvas siab ib zaug li? Nco ntsoov tias Yehauvas yeej tsis yuam kom peb ua ntau tshaj qhov peb ua tau. Nws yeej ris peb txiaj ntsig rau tej peb ua rau nws, tsuav yog peb ua li peb ua tau xwb. Cia peb xav txog cov uas teev tiam Yehauvas kawg siab kawg ntsws txheej thaum ub uas zoo li Povlauj. Tau ntau lub xyoos, Povlauj kub siab lug mus tshaj tawm txoj xov zoo thiab mus tsa ntau lub koom txoos. Tiam sis tom qab no thaum nws ua tsis tau npaum li nws ib txwm ua, Yehauvas puas tseem txaus siab rau nws? Yehauvas yeej tseem txaus siab rau nws thiab foom koob hmoov rau nws vim nws tseem ua li nws ua tau. (Tes Haujlwm 28:30, 31) Tib yam li ntawd, txawm peb lub neej hloov li cas lawm los tsuav yog peb tseem ua li peb ua tau los teev tiam  Yehauvas ces nws yeej txaus siab heev rau peb. Cia peb mus tham seb ua li cas peb thiaj paub tias Yehauvas txaus siab rau peb.

YEHAUVAS QHIA LI CAS TIAS NWS TXAUS SIAB RAU PEB?

10. Yuav ua li cas peb thiaj paub tias Yehauvas txaus siab rau peb? (Yauhas 16:27)

¹⁰ Los ntawm phau Vajlugkub. Yehauvas yeej nrhiav kev los qhia nws cov tib neeg tias nws hlub thiab txaus siab rau lawv. Yehauvas qhia rau Yexus ob zaug tias nws hlub thiab txaus siab rau Yexus. (Mathais 3:17; 17:5) Koj puas xav kom Yehauvas qhia koj tias nws txaus siab rau koj? Yehauvas tsis hais lus saum ntuj tuaj rau peb tiam sis nws siv nws Txoj Lus los hais rau peb. Thaum peb nyeem cov lus uas Yexus hais rau nws cov thwj tim ces twb zoo cuag li Yehauvas hais lus rau peb. (Nyeem Yauhas 16:27.) Yexus coj tau Yehauvas tus yam ntxwv zoo kawg li. Thaum peb nyeem Yexus cov lus uas nws hais tias nws txaus siab heev rau nws cov thwj tim ces twb zoo yam li Yehauvas hais cov lus ntawd rau peb thiab.​—Yauhas 15:9, 15.

11. Vim li cas thaum peb raug kev sim siab ho tsis yog Yehauvas tsis txaus siab rau peb lawm? (Yakaunpaus 1:12)

¹¹ Los ntawm tej Yehauvas ua rau peb. Yehauvas yeej maj nroos pab peb. Xws li, thaum peb cheem tsum tej ub tej no. Tej thaud Yehauvas kuj cia peb raug kev txom nyem ib yam li Yauj. (Yauj 1:8-11) Thaum peb raug kev sim siab, tsis yog Yehauvas tsis txaus siab rau peb lawm. Tiam sis lub sij hawm ntawd yog lub sij hawm los qhia tias peb hlub thiab tso siab rau peb tus Vajtswv npaum li cas. (Nyeem Yakaunpaus 1:12.) Thaum peb raug kev sim siab, peb yuav pom tias Yehauvas hlub thiab pab peb npaum li cas es peb thiaj thev taus.

12. Tej uas Dimithis raug pab tau peb li cas?

¹² Cia peb mus tham txog ib tug kwv tij hu ua Dimithis (Dmitrii) uas nyob rau sab Axias. Nws poob nws txoj hauj lwm thiab nrhiav tsis tau hauj lwm tau ntau lub hlis. Yog li ntawd, nws thiaj tso siab rau Yehauvas es txiav txim siab mus tshaj tawm txoj xov zoo kom ntau ntxiv. Txawm li ntawd los nws yeej tseem nrhiav tsis tau hauj lwm ua tau ntau lub hlis. Ces nws txawm tau ib tug mob hnyav heev ua rau nws da luam saum txaj xwb. Nws thiaj saib nws zoo li ib leej txiv thiab ib tug txiv tsis tseem ceeb dab tsi, thiab nws xav tias ntshe Yehauvas tsis txaus siab rau nws lawm. Ces muaj ib hmos nws tus ntxhais tseem luam tau ib daim ntawv uas muaj cov lus uas hais hauv Yaxayas 30:15 tias: “Nyob twjywm thiab cia siab rau kuv.” Nws tus  ntxhais thiaj coj los rau nws saum txaj thiab hais tias, “Txiv, thaum twg koj nyuaj siab ces nco ntsoov nqe Vajlugkub no.” Thaum ntawd Dimithis thiaj nco dheev tias twb yog vim muaj Yehauvas es nws tsev neeg thiaj tseem muaj noj muaj haus, muaj ris muaj tsho hnav, thiab muaj vaj muaj tsev nyob. Dimithis thiaj hais tias: “Qhov kuv yuav tsum ua ces yog nyob twj ywm thiab cia siab rau kuv tus Vajtswv.” Yog tias koj tab tom raug kev sim siab li no, cia li tso siab tias Yehauvas mob siab koj thiab yuav pab kom koj thev taus.

13. Yehauvas siv leej twg los qhia tias nws txaus siab rau peb, thiab nws qhia li cas?

¹³ Los ntawm peb cov kwv tij nkauj muam. Yehauvas siv peb cov kwv tij nkauj muam los qhia tias nws txaus siab rau peb. Xws li, tej thaud nws siv lwm tus los txhawb peb rau lub sij hawm peb qaug zog. Tau muaj li no rau ib tug muam nyob sab Axias rau lub sij hawm nws nyuaj nyuaj siab. Lub sij hawm ntawd, nws poob nws txoj hauj lwm thiab tau ib tug mob hnyav heev. Nws tus txiv los tseem mus ua ib qho txhaum loj thiab tsis tau ua txwj laus lawm. Nws hais tias: “Kuv tsis paub xyov vim li cas thiaj muaj tej no. Kuv xav tias tej zaum kuv tau ua txhaum dab tsi es Yehauvas tsis txaus siab rau kuv lawm.” Tus muam thiaj taij thov Yehauvas kom qhia seb Yehauvas puas tseem txaus siab rau nws. Yehauvas qhia li cas? Tus muam hais tias: “Cov txwj laus hauv lub koom txoos nrog kuv tham thiab pab kuv pom tias Yehauvas tseem hlub kuv.” Ib ntus tom qab ntawd, nws rov thov kom Yehauvas qhia seb Yehauvas puas tseem txaus siab rau nws. Nws hais tias: “Tib hnub ntawd, kuv txawm txais tau ib tsab ntawv uas cov kwv tij nkauj muam hauv lub koom txoos xa tuaj. Thaum kuv nyeem lawv cov lus, kuv pom tias Yehauvas hnov kuv cov lus thov lawm.” Qhov no qhia tias Yehauvas yeej siv lwm tus los qhia tias nws txaus siab rau peb tiag.​—Phau Ntawv Nkauj 10:17.

14. Lwm txoj kev uas Yehauvas siv los qhia tias nws txaus siab rau peb yog dab tsi?

 ¹⁴ Yehauvas kuj siv lwm tus los ntuas peb thaum tsim nyog. Qhov no kuj qhia tias nws txaus siab rau peb. Xws li, thaum thawj 100 xyoo, Yehauvas siv tus tub txib Povlauj sau 14 tsab ntawv mus rau cov ntseeg. Nyob rau hauv cov ntawv ntawd, Povlauj kuj ntuas lawv tsis zais hlo li. Vim li cas Yehauvas thiaj kom Povlauj sau ntawv mus ntuas lawv li ntawd? Yehauvas yog ib Leej Txiv zoo thiab yeej ntuas nws cov me nyuam uas “nws zoo siab rau.” (Pajlug 3:11, 12) Yog li ntawd, thaum lwm tus siv phau Vajlugkub los ntuas peb, tsis yog Yehauvas tsis txaus siab rau peb lawm tiam sis twb yog nws hlub peb xwb. (Henplais 12:6) Ua li lwm yam twg kuj qhia tias Yehauvas txaus siab rau peb?

LWM YAM UAS YEHAUVAS QHIA TIAS NWS TXAUS SIAB RAU PEB

15. Yehauvas muab nws lub hwj huam dawb huv rau leej twg, thiab peb ho cia siab li cas?

¹⁵ Yehauvas muab nws lub hwj huam dawb huv rau cov uas nws txaus siab rau. (Mathais 12:18) Xav txog lo lus nug no, ‘Kuv puas coj tau tej yeeb yam ntawm Vajtswv lub hwj huam hauv kuv lub neej?’ Koj puas pom tias tom qab koj los paub Yehauvas, koj rub tau koj lub siab ntev dua tuaj? Thaum koj yim huab coj tau tej yeeb yam ntawm lub hwj huam ces koj yim huab pom tias Yehauvas txaus siab rau koj!​—Saib lub ntsiab “ Tej Yeeb Yam Ntawm Lub Hwj Huam Yog . . . ”

16. Yehauvas siv leej twg los tshaj tawm txoj xov zoo, thiab koj xav li cas xwb txog qhov ntawd? (1 Thexalaunikes 2:4)

¹⁶ Yehauvas cia cov uas nws txaus siab rau tshaj tawm txoj xov zoo. (Nyeem 1 Thexalaunikes 2:4.) Ib tug muam hu ua Ntsoxelees (Jocelyn) pom tseeb li ntawd thaum nws mus tshaj tawm txoj xov zoo. Muaj ib hnub thaum nws sawv los, nws nyuaj siab heev. Nws hais tias: “Kuv tsis muaj ib lub zog ua ib yam dab tsi li. Tiam sis kuv yog ib tug tho kev thiab hnub ntawd yog hnub kuv mus qhia Vajlugkub. Ces kuv txawm thov Vajtswv thiab mus qhia Vajlugkub lawm.” Tag kis ntawd, Ntsoxelees thiaj mus ntsib Melis (Mary) uas yog ib tug neeg siab zoo heev thiab kam kawm Vajlugkub. Ob peb lub hlis tom qab Melis mam hais tias thaum Ntsoxelees khob nws qhov rooj, nws tab tom thov Vajtswv pab. Thaum Ntsoxelees xav txog qhov no, nws hais tias, “Cuag li Yehauvas hais rau kuv tias, ‘Koj ua haum kuv siab.’” Thaum peb mus tshaj tawm txoj xov zoo, yeej tsis muaj pes tsawg leej kam mloog tiam sis Yehauvas  yeej txaus siab rau peb thaum peb ua npaum li peb ua tau.

17. Tej uas Vikim hais txog tus nqi txhiv pab tau koj li cas? (Phau Ntawv Nkauj 5:12)

¹⁷ Tus nqi txhiv tsuas theej tau cov uas Yehauvas txaus siab rau xwb. (1 Timautes 2:5, 6) Tiam sis yog peb tseem xav tias Yehauvas tsis txaus siab rau peb tab txawm peb twb ntseeg tias Yexus los tuag theej peb lub txhoj thiab peb twb ua kev cai raus dej tas lawm, peb yuav tau ua li cas? Nco ntsoov tias peb ntseeg tsis tau peb lub siab tiam sis peb ntseeg tau Yehauvas. Nws suav tias cov uas muaj kev ntseeg rau tus nqi txhiv yog cov uas ncaj ncees thiab yuav foom koob hmoov rau lawv. (Nyeem Phau Ntawv Nkauj 5:12; Loos 3:26) Thaum ib tug muam hu ua Vikim (Vicky) ua tib zoo xav txog tus nqi txhiv, nws ras tias: “Yehauvas twb ua siab ntev rau kuv ntev los lawm. . . Tiam sis kuv tseem hais rau nws tias: ‘Koj yeej hlub tsis tau ib tug zoo li kuv. Koj tus Tub tus nqi txhiv yeej theej tsis tau kuv tej kev txhaum.’” Thaum Vikim ua tib zoo xav txog tus nqi txhiv, nws mam li paub tias Yehauvas hlub nws npaum li cas. Tib yam li ntawd, yog peb ua tib zoo xav txog tus nqi txhiv ces peb yuav pom tias Yehauvas hlub thiab txaus siab rau peb.

18. Yog peb hlub peb Leej Txiv Yehauvas tsis tseg ces peb tso siab tau li cas?

¹⁸ Txawm peb twb kawm tej no tas lawm los, qee lub sij hawm peb tseem qaug zog thiab xav tias Yehauvas tsis txaus siab rau peb. Yog muaj li no, nco ntsoov tias Vajtswv txaus siab rau “tus uas hlub Vajtswv” mus li. (Yakaunpaus 1:12) Yog li ntawd, rau siab ntso nrog Yehauvas sib raug zoo thiab nco ntsoov tej Yehauvas tau ua uas qhia tias nws txaus siab rau koj. Thiab nco ntswb ntsoov tias Yehauvas ‘yeej nyob tsis deb ntawm peb txhua tus.’​—Tes Haujlwm 17:27.