Vajtswv lub npe hu li cas? Vajtswv hu ua Yehauvas. Tiamsis tej phau Vajlugkub tsis muaj Vajtswv lub npe nyob rau hauv lawm. (Yaxayas 42:8) Cov Vajlugkub ntawd tau muab lub npe Yehauvas hloov ua ib lub npe meej mom xws li “tus Tswv.” Tiamsis Vajtswv lub npe Yehauvas tshwm txog li 7,000 zaus diam. Vajtswv xav kom peb muaj ib txojkev sib raug zoo nrog nws thiab “thov hu nws lub npe.”​—Phau Ntawv Nkauj 105:1, TT.

Yehauvas Tej Npe Meej Mom. Yehauvas muaj ntau lub npe meej mom. Xws li “Vajtswv,” “tus muaj hwjchim loj kawg nkaus,” “tus Tswv Tsim,” “Leej Txiv,” thiab “tus Tswv.” Hauv  phau Vajlugkub, thaum tibneeg thov Yehauvas, lawv kuj siv cov npe meej mom no.​—Daniyees 9:4.

Vajtswv Puas Muaj Ib Lub Cev? Vajtswv yog ib tug plig, peb pom tsis tau nws. (Yauhas 4:24, NW ) Phau Vajlugkub hais tias “yeej tsis tau muaj leejtwg pom Vajtswv ib zaug li.” (Yauhas 1:18) Tiamsis phau Vajlugkub qhia tias peb kuj ua tau rau nws tu siab lossis “zoo siab.”​—Pajlug 27:11; Phau Ntawv Nkauj 78:40, 41.

Vajtswv Tej Yeeb Yam Zoo. Vajtswv tsis xaiv leejtwg ntsej muag. (Tes Haujlwm 10:34, 35) Nws “muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees.” (Khiav Dim 34:6, 7) Cia peb tham txog 4 qho yeeb yam zoo uas Vajtswv muaj.

Hwjchim. Vajtswv yog “tus uas muaj hwjchim loj kawg nkaus.” (Chivkeeb 17:1) Tsis muaj ib yam dabtsi Vajtswv ua tsis tau. Nws cog lus tseg li cas ces yeej yuav muaj raws li ntawd.

Tswvyim. Tsis muaj leejtwg muaj tswvyim tshaj Vajtswv. Phau Vajlugkub hais tias nws tib leeg xwb thiaj yog “tus uas muaj kev txawj ntse.”​—Loos 16:27.

Ncaj Ncees. Txhua yam Vajtswv ua puav leej ncaj. Nws “zoo kawg nkaus” thiab “ncaj ncees.”​—2 Kevcai 32:4.

Kev Hlub. Phau Vajlugkub hais tias “Vajtswv yog txojkev hlub.” (1 Yauhas 4:8, TT ) Nqe no tsis yog qhia tias Vajtswv muaj kev hlub xwb tiamsis qhia tias nws yog kev hlub. Ib puas tsav yam uas Yehauvas ua ncau ntawm txojkev hlub los.

Vajtswv Txojkev Sib Raug Zoo Nrog Tibneeg. Vajtswv yog Leej Txiv uas hlub tshua peb. (Mathais 6:9) Yog peb los paub nws, peb yuav muaj kev ntseeg, thiab ua tau nws tus phoojywg. (Phau Ntawv Nkauj 25:14) Nws xav kom peb thov thiab muab “tej kev nyuaj siab huv tibsi” tso plhuav rau nws vim nws mob siab peb.​—1 Petus 5:7; Yakaunpaus 4:8.

Yexus Tsis Yog Vajtswv. Tsis muaj leejtwg zoo li Yexus. Nws yog thawj tug uas Vajtswv tsim. Vim li ntawd phau Vajlugkub thiaj muab nws hu ua Vajtswv tus Tub. (Yauhas 1:14) Tom qab Yehauvas tsim Yexus, nws cia Yexus pab nws tsim ib puas tsav yam hauv lub qab ntuj khwb.​—Pajlug 8:30, 31; Kaulauxais 1:15, 16.

 Yexus Khetos tsis tau lees tias nws yog Vajtswv. Yexus hais tias: “Kuv los ntawm nws los, thiab nws yog tus txib kuv los.” (Yauhas 7:29) Yexus hais rau nws ib tug thwjtim tias Yehauvas “yog kuv Txiv thiab nej Txiv” thiab “yog kuv tus Vajtswv thiab nej tus Vajtswv.” (Yauhas 20:17) Tom qab Yexus tuag, Yehauvas tsa nws sawv rov qab mus nyob saum ntuj ceeb tsheej thiab muab hwjchim rau Yexus saib xyuas ib puas tsav yam.​—Mathais 28:18; Tes Haujlwm 2:32, 33.

Yexus Pab Peb Txav Ze Rau Vajtswv

Yexus los hauv ntiajteb los qhia peb txog nws Leej Txiv. Yehauvas hais li no txog Yexus: “Tus no yog kuv tus Tub uas kuv hlub, nej cia li mloog nws lus!” (Malakaus 9:7) Tsis muaj leejtwg paub Vajtswv zoo npaum li Yexus. Yexus hais tias: “Tsis muaj leejtwg paub Leej Txiv, tsuas yog Leej Tub thiab cov uas Leej Tub pom zoo qhia rau thiaj paub xwb.”​—Lukas 10:22.

Yexus muaj yeeb yam zoo nkaus li Vajtswv. Yexus hais tias: “Tus uas pom kuv, tus ntawd twb pom Leej Txiv lawm.” (Yauhas 14:9) Tej uas Yexus hais thiab ua pab tau tibneeg pom Vajtswv txojkev hlub thiab xav txav ze rau Yehauvas. Nws thiaj hais tias: “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau.” (Yauhas 14:6) Nws kuj hais tias: “Cov neeg uas pehawm Leej Txiv yuav pehawm [raws li lub hwj huam] thiab qhov tseeb, rau qhov Leej Txiv xav kom sawvdaws muaj nplooj siab dawb paug pehawm nws tiag.” (Yauhas 4:23) Qhov no qhia tias Yehauvas yeej xav kom koj los paub qhov tseeb txog nws.