Thaum Vajtswv lub Nceeg Vaj kav tag nrho lub ntiajteb, yuav muaj kev thaj yeeb kev sib haum xeeb thiab txhua tus yuav txaus siab hlo rau tej haujlwm uas lawv ua. Vajtswv yuav tsa Yexus ua tus kav lub ntiajteb no. Yexus yuav tsis kav li tej tibneeg niaj hnub niam no kav. Nws yuav xam pom txhua leej txhua tus. Nws yuav hlub tshua txhua tus thiab yuav txiav txim ncaj ncees.​—Yaxayas 11:4.

Tibneeg txhua qhov txawm yuav yog haiv neeg twg los yuav tsis sib cais ua pab ua pawg. Sawvdaws yuav koom siab ua ib haiv neeg lawm xwb. (Tshwmsim 7:9, 10) Txhua tus yuav hlub Vajtswv. Ib leeg yuav txawj hlub ib leeg thiab sawvdaws yuav sib koom tes tu lub ntiajteb kom txhua yam muaj tiav raws li Vajtswv hom tseg.​—Phau Ntawv Nkauj 115:16.

Thaum Vajtswv lub Nceeg Vaj kav lub ntiajteb lawm, Vajtswv kuj yuav tswj tagnrho tej huab cua thiab. (Phau Ntawv Nkauj 24:1, 2) Thaum Yexus tseem nyob hauv ntiajteb no nws siv Vajtswv lub hwjchim los tswj kom cua tus. (Malakaus 4:39, 41) Yog li thaum Yexus kav lawm peb yuav tsis ntshai tsam muaj huab cua phem. Tibneeg thiab tsiaj txhu yuav muaj kev sib haum xeeb thiab yuav tsis muaj leejtwg ua rau tej huab cua qias lawm.​—Hauxeyas 2:18.

Txhua tus yuav nyob nyab xeeb. Tibneeg yuav tsis muaj mob lossis txawj laus txawj tuag li lawm. (Yaxayas 35:5, 6) Txhua tus yuav zoo siab hlo nyob hauv ib lub ntiajteb uas muaj huab cua zoo npaum li thaum nyob hauv lub vaj Edees. Av yuav zoo cog qoob loo thiab tej qoob loo yuav ntsu vo. (Chivkeeb 2:9) Zoo ib yam li Vajtswv haiv neeg Yixalayees thaum ub, txhua tus uas nyob hauv lub Vaj Kaj Siab yuav “muaj noj muaj haus nplua mias.”​—Levis Kevcai 26:4, 5.

Thaum Vajtswv lub Nceeg Vaj kav lub ntiajteb txhua tus yuav muaj kev sib haum xeeb, ib tug yuav ua zoo thiab ua ncaj rau ib tug. Kev tsov kev rog yuav ploj mus, ib tug yuav tsis caij tsuj ib tug, thiab txhua tus yuav muaj txaus noj txaus hnav. Vajtswv cog lus tias: “Txhua tus yuav nyob kaj siab lug ntawm nyias tej vaj txiv hmab, txiv ncuavpias, thiab yuav tsis muaj leejtwg ua rau nws tau kev txhawj kev ntshai li.”​—Mikhas 4:3, 4.

Txhua yim neeg yuav muaj vaj muaj tse nyob thiab yuav tsis ntshai tsam lawv tej vaj tej tse poob mus ua luag ntiag tug. Txhua yam uas lawv ua yuav nce tes lias. Cov uas nyob hauv lub qab ntuj tshiab “yuav tsis khwv do do xwb.”​—Yaxayas 65:21-23, TT.

Phau Vajlugkub qhia tias tibneeg thoob ntiajteb yuav paub Yehauvas. (Yaxayas 11:9) Cov uas nyob hauv lub qab ntuj tshiab yuav kawm txog Yehauvas lub tswvyim thiab tej uas nws tau tsim. Lawv yuav tsis siv lawv lub tswvyim los tsim tej cuab yeej phem uas yuav ua mob rau lwm tus. (Yaxayas 2:4) Txhua tus yuav nyob sib haum xeeb thiab yuav tu ntshis lub ntiajteb no.​—Phau Ntawv Nkauj 37:11.

Vajtswv siv zog npaj lub ntiajteb rau peb nyob kom peb zoo siab hlo ua neej nyob txhua hnub. Nws yeej tsis xav kom peb tuag, yog li nws ‘yuav rhuav txojkev tuag kom puas tsuaj mus ib txhis.’ (Yaxayas 25:8; 45:18; Phau Ntawv Nkauj 37:29) ‘Kev tuag, kev quaj ntsuag thiab kev mob yuav tsis muaj ib zaug li lawm.’ (Tshwmsim 21:4) Cov uas Vajtswv cawm thaum nws rhuav tshem lub qab ntuj no, thiab cov uas nws yuav tsa sawv hauv qhov tuag rov qab los yuav muaj feem tau txojsia nyob mus ib txhis.​—Yauhas 5:28, 29; Tes Haujlwm 24:15.

 Niaj hnub niam no twb muaj coob leej ntau tus los zwm rau Vajtswv txojkev kav lawm. Txawm lawv yog neeg zoo tsis tiav los, lawv twb xyaum coj raws li Vajtswv lub siab nyiam kom tsim nyog tau mus nyob hauv lub qab ntuj tshiab. Lawv ua tau li no vim lawv kawm txog Vajtswv Yehauvas thiab nws leej tub Yexus Khetos.​—Yauhas 17:3.

Koj puas xav paub ntxiv seb yuav ua li cas koj thiaj tau mus nyob hauv Vajtswv lub qab ntuj tshiab? Hais kom Yehauvas Cov Timkhawv ib tug tuaj qhia Vajlugkub rau koj nrog phau ntawv Nyob Kaj Siab Lug Mus Ib Txhis.