Phau Vajlugkub hais li no: “Nej tsis txhob qaug rau nyiaj rau kub, nej muaj npaum li cas nej cia li zoo siab rau tej uas nej muaj.”​—Henplais 13:5.

Niaj hnub no muaj ntau yam uas tibneeg xav tias peb yuav tsum muaj peb thiaj zoo siab. Tiamsis phau Vajlugkub hais tias “cia li zoo siab rau tej uas nej muaj.” Peb yuav zoo siab rau tej uas peb muaj li cas?

Txhob “qaug rau nyiaj rau kub.” Ib co tibneeg tsis cia ib yam dabtsi los tav lawv kev khwv nyiaj li. Lawv tso lawv tsevneeg thiab tej phoojywg tseg, lawv coj tsis ncaj, tsis ntshai poob ntsejmuag, thiab txawm yuav muaj mob li cas los lawv yeej ua tiag kom npluanuj vim lawv “ntshaw nyiaj txiag.” (1 Timautes 6:10) Yeej tsis tsimnyog ua li no vim tus uas ntshaw nyiaj yeej yuav “tsis muaj kev txaus siab” li.​—Tej Lus Qhia 5:10.

Saib tias tibneeg tseemceeb. Tej khoom uas peb muaj pab tau peb tiamsis tej ntawd tsis txawj mob siab thiab tsis txawj nco peb txiaj ntsig. Tsuas yog tibneeg thiaj ua tau li ntawd xwb. Peb cov phoojywg zoo thiaj yuav hlub thiab txhawb kom peb muaj kev kaj siab.​—Pajlug 17:17.

Phau Vajlugkub hais li no: “Kev zoo siab ua hauv tshuaj kuab muaj tsuas rau koj lub cev.”​—Pajlug 17:22.

Zoo ib yam li tej “tshuaj,” kev zoo siab yuav pab peb nyiaj kom taus peb tus mob. Tiamsis peb yuav muaj kev zoo siab li cas yog peb tus mob pheej tsis zoo li?

Xam pom qhov zoo. Yog peb pheej xav ntsoov txog peb tej kev nyuaj siab ces tsuas zoo li peb “ua neej” txomnyem ntsuav xwb. (Pajlug 15:15) Zoo rau peb ua li phau Vajlugkub hais kom “niaj hnub ua Vajtswv tsaug.” (Kaulauxais 3:15) Nco ntsoov ris txiaj ntsig rau txhua yam uas Vajtswv pub. Zoo li mus saib lub hnub poob qho, tawm rooj mus lim cua, thiab nrog cov neeg uas peb hlub tshua nyob ua ke. Yog li ntawd, txawm yuav me thiab loj los, cia li zoo siab rau txhua yam zoo peb muaj.

Pub rau luag. Txawm peb yuav muaj mob npaum li cas los, yog “yus pub rau luag yus zoo siab heev dua thaum yus tau luag li.” (Tes Haujlwm 20:35) Thaum peb pub rau luag es luag nco peb txiaj ntsig, peb yuav zoo siab thiab yuav ua rau peb tsis nco qab xav txog peb tus mob lawm. Yog peb pab lwm tus li no, peb lub neej yuav zoo siab dua.

Phau Vajlugkub hais li no: “Paub hais tias yam twg yog yam uas zoo dua ntais.”​—Filipis 1:10.

Tus txiv thiab tus pojniam yuav tsum siv sijhawm ua ke, nkawd ib leeg thiaj li tsis ncaim ntawm ib leeg zuj zus. Ob tug yuav tau saib nkawd txojkev txij nkawm kom muaj nqis thiab yog ib yam uas zoo dua ntais.

Siv sijhawm ua ke. Tsis txhob nyias taus nyias ua lawm ib yam. Yuav zoo dua yog tias ob niamtxiv siv sijhawm los sib pab ua yam ub yam no ua ke. Phau Vajlugkub hais tias: “Ob leeg zoo dua ib leeg.” (Tej Lus Qhia 4:9) Tej zaum tus txiv kuj pab tus niam ua mov noj. Nkawd kuj tawm mus taug kev ua si lossis nyob tham pem hauv tsev xwb los kuj tau thiab.

Qhia tias peb hlub peb tus txij nkawm. Phau Vajlugkub txhawb kom ob niamtxiv txawj sib hlub thiab ib leeg hwm ib leeg. (Efexus 5:28, 33) Zoo rau neb xyaum hais lus luag ntxhwb ntxhi thiab tsis txhob tseg txojkev sib tuav tes. Kuj yog ib yam zoo rau neb muab khoom sib pub. Tej no yuav pab kom neb txojkev txij nkawm nyob ruaj khov. Tsis tas li ntawd, txuag txojkev pw ua txij nkawm rau neb ob leeg xwb.​—Henplais 13:4.