MUAJ ib hnub koj saib this vis txog ib tug neeg txawj ntaus nkauj uas muaj koob nto npe. Nws pib ntaus nkauj thaum nws yau los lawm. Nws niaj hnub xyaum nws thiaj txawj. Nws mus ncig teb ncig chaw ntaus nkauj rau sawvdaws mloog kom lub koob lub npe nrov. Ces thaum zaj yeej yaj kiab yuav xaus nws laus zuj zus ces tsis ntev tom qab ntawd nws tas simneej lawm.

Zaj yeeb yaj kiab no hais txog ib tug neeg lub neej, tiamsis tu siab tias nws tsis muaj sia nyob lawm. Yog tias nws tseem ua neej nyob ntshe nws lub npe tseem yuav nrov dua no ntxiv. Txawm yuav yog ib tug neeg nto moo uas txawj ntaus nkauj, neeg tshawb txujci, paub ncaws pob, lossis lwm yam los sawvdaws taug tib txojkev xwb. Peb yeej txawj laus txawj tuag.

Peb paub tias peb yeej tsis dim txojkev tuag li. (Tej Lus Qhia 9:5) Txawm peb yuav nrhiav kev kho kom txhob txawj laus txawj tuag los nrhiav tsis tau. Peb kuj tsis paub xyov peb puas yuav muaj mob lossis yuav raug tej xwm phem ua rau peb txojsia tu. Phau Vajlugkub hais tias peb tsuas zoo li tej huab uas “nyob ib pliag xwb ces twb yaj tas lawm.”​—Yakaunpaus 4:14.

Muaj ib txhia tsis muaj kev vam kev cia siab rau yav tom hauv ntej lawm. Lawv paub tias ib hnub lawv yeej yuav tuag. Vim li no, lawv thiaj hais tias, “Peb cia li noj thiab haus, rau qhov tagkis peb yuav tuag.” (1 Kauleethaus 15:32) Yog li ntawd, ua neej nyob thaum peb ntsib kev nyuaj siab, tej zaum peb yuav xav tias, “Lub neej no puas yog tag li no lawm xwb?” Yog koj xav li no, koj yuav ua li cas?

Niaj hnub no, tibneeg cia siab rau cov neeg tshawb txujci vim lawv txawj nrhiav tshuaj kho mob. Tiamsis txawm lawv yuav nrhiav npaum li cas los tibneeg tsuas nyob ntev li qub xwb. Cov neeg tshawb txujci tsis paub vim li cas peb thiaj txawj laus txawj tuag thiab txojkev tuag yuav raug rhuav li cas. Cov ntsiab lus tomntej yuav tham txog tej no. Tsis tas li ntawd xwb, kuj yuav qhia seb lub neej no puas yog tag li no lawm xwb.