Vajtswv Tsim Peb Nyob Mus Ibtxhis
PEB tus twg thiaj tsis xav ua neej nyob kaj siab lug, tso siab plhuav? Peb txhua tus yeej xav noj qab nyob zoo, xav nyob mus ibtxhis. Yog peb nyob tau li ntawd mas peb yuav nrog peb tsevneeg ua ke ntev zog, muaj sijhawm ncig teb ncig chaw, kawm txuj kawm ci, thiab ua txhua yam uas peb xav ua.
Ua cas tibneeg thiaj xav ua neej nyob mus ibtxhis? Vajtswv Txojlus hais tias Vajtswv yog tus tsim kom peb ntshaw lub neej li ntawd. (Tej Lus Qhia 3:11) Phau Vajlugkub kuj hais tias, “Vajtswv yog tus uas muaj kev hlub.” (1 Yauhas 4:8) Yog nws hlub peb, nws yuav tsis tsim kom peb ntshaw lub neej nyob mus ibtxhis tiamsis ho cia peb tuag.
Yeej tsis muaj leejtwg xav tuag li. Phau Vajlugkub hais tias kev tuag zoo li ib tug “yeebncuab.” (1 Kauleethaus 15:26) Txawm laus thiab hluas los, peb tsis paub hnub twg peb yuav tuag. Kuj muaj coob tus tsis xav tham txog kev tuag, tsis xav hnov rau qhov ua rau lawv ntshai. Yog li ntawd, puas yuav muaj ib hnub peb yuav tsis txawj tuag li lawm?
YEEJ MUAJ KEV CIA SIAB TIAG
Vajtswv yeej tsis tsim kom tibneeg txawj tuag. Phau Vajlugkub qhia tias Yehauvas * yeej xav kom tibneeg nyob mus ibtxhis hauv lub ntiajteb. Vim li ntawd nws thiaj ua tib zoo npaj lub ntiajteb rau tibneeg nyob. Tom qab ntawd, nws mam tsim thawj tug txivneej hu uas Adas thiab muab nws tso rau hauv lub vaj Edees. Thaum Vajtswv saib ib puas tsav yam uas nws tsim mas nws txaus siab heev.—Chivkeeb 1:26, 31.
Vajtswv tsim Adas thiab Evas muaj nws tus yamntxwv thiab tsis muaj kev txhaum. (2 Kevcai 32:4) Yehauvas hais rau nkawd tias: “Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb. Kuv tsa neb kav tej ntses hauv hiavtxwv, tej noog uas ya saum nruab ntug, thiab txhua tsav yam tsiaj uas nyob hauv ntiajteb no.”—Chivkeeb 1:28
Yuav siv sijhawm ntev, tibneeg thiaj huamvam thoob plaws ntiajteb. Evas yuav tau yug menyuam, nkawd cov menyuam los yuav tau yug xeeb leej xeebntxwv txog thaum lawv nyob puv nkaus lub ntiajteb. (Yaxayas 45:18) Yog tias Yehauvas tsim Adas thiab Evas nkawd nyob ib ntus xwb, nws yuav tsis samhwm li no.
Tsis tas li ntawd xwb, Vajtswv tsa Adas thiab Evas nkawd kav tej tsiaj txhu huv tibsi. Nws hais kom Adas tis npe rau tej tsiaj ntawd. (Chivkeeb 2:19) Tiamsis yuav kom Adas paub tis npe, nws yuav tau ua tib zoo tu thiab kawm txog tej tsiaj ntawd. Yog li ntawd, yeej yuav siv sijhawm ntev loo thiaj xaiv tau lub npe zoo.
Ces qhov uas Vajtswv hais kom nkawd muaj tub muaj ki nyob thoob plaws ntiajteb thiab kav tej tsiaj txhu huvsi qhia tias nws yeej tsim kom nkawd muaj txojsia nyob mus ibtxhis. Adas yeej nyob ntev kawg li.
YEHAUVAS YEEJ XAV KOM TIBNEEG NYOB MUS IBTXHIS HAUV LUB NTIAJTEB
LAWV UA NEEJ NYOB NTEV
Adas nyob 930 xyoo
Methuxelas nyob 969 xyoo
Nau-es nyob 950 xyoo
Tamsim no yog 70-80 xyoo
Vajtswv Txojlus qhia tias thaum ub neeg nyob ntev tshaj tamsim no. Ib nqes hais tias, Adas “tuag rau thaum nws hnubnyoog muaj cuaj pua peb caug xyoo.” Phau Vajlugkub kuj qhia txog 6 leej uas nyob ntev tshaj 900 xyoo. Cov ntawd yog Xej, Enauj, Kenas, Yales, Methuxelas, thiab Nau-es. Cov no puavleej nyob ua ntej dej dag nyab ntiajteb. Thaum dej dag nyab ntiajteb, Nau-es twb nyob tau 600 xyoo lawm. (Chivkeeb 5:5-27; 7:6; 9:29) Ua cas lawv thiaj nyob tau ntev ua luaj?
Cov txivneej no nyob ntev twb yog vim lawv nyob tsis ntev tom qab Adas thiab Evas. Ua ntej nkawd ua txhaum, nkawd nyob tau mus ibtxhis. Tiamsis yog peb tsis muaj kev txhaum yuav pab tau peb muaj txojsia nyob ntev li cas? Thiab txojkev tuag yuav raug rhuav li cas? Yuav kom peb teb tau ob los lus nug no, peb yuav tsum xub paub vim li cas peb thiaj txawj laus txawj tuag.
^ nqe 6 Phau Vajlugkub qhia tias Vajtswv lub npe hu ua Yehauvas.