Vajtswv hais rau Adas tias: “Koj yuav tsum tsis txhob noj tsob ntoo ntawd cov txiv; yog koj noj hnub twg, koj yuav tuag hnub ntawd.” (Chivkeeb 2:17) Vajtswv cov lus no qhia tias nws tsis yog tsim kom Adas tuag. Tsis tas li ntawd xwb, Adas paub zoo tias yog nws tsis noj lub txiv ntawm tsob ntoo ntawd ces nws yuav tsis tuag.

Vajtswv tsim ntau tsob txiv ntoo hauv lub vaj rau Adas thiab Evas nkawd noj. Vajtswv tsuas txwv tsis pub noj tib tsob xwb. (Chivkeeb 2:9) Yog ob tug mloog lus, yuav qhia tias nkawd cia Vajtswv ua tus coj nkawd lub neej.

Yog peb xav paub vim li cas Adas thiab Evas tuag lawm, peb yuav tau saib seb Xatas uas yog dab Ntxwg Nyoog siv tus nab los dag ntxias Evas li cas. Phau Vajlugkub hais tias: “Nab yog ib tug uas ntse tshaj txhua yam tsiaj qus uas [Yehauvas] uas yog Vajtswv tau tsim huv tibsi. Nab thiaj nug tus pojniam hais tias, ‘Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los?’”​—Chivkeeb 3:1.

Evas teb tias: “Wb yeej noj tau txhua yam txiv ntoo uas nyob hauv lub vaj no, tsuas yog tshwj tsob txiv ntoo hauv plawv vaj thiaj tsis noj xwb. Vajtswv yeej txwv tsis pub wb noj tsob ntoo ntawd tej txiv lossis tsis pub kov tsob ntoo ntawd; yog wb noj, wb yuav tuag.” Tus nab txawm hais tias: “Tej lus ntawd tsis tseeb, neb yuav tsis tuag ib zaug li. Vajtswv hais li ntawd, rau qhov nws paub hais tias thaum twg neb noj tsob txiv ntoo ntawd, neb yuav paub qhov phem thiab qhov zoo.” Tej uas Xatas hais no, twb yog nws iab liam tias Yehauvas dag thiab npog tej yam zoo ntawm nkawd lawm xwb.​—Chivkeeb 3:2-5.

Evas ntseeg Xatas tej lus ntxias. Nws pom tsob ntoo ntawd tej txiv ntxim qab kawg li. Ces nws txawm cev tes mus de lub txiv noj. Tom qab ntawd, phau Vajlugkub hais tias: “Nws muab rau nws tus txiv noj.”​—Chivkeeb 3:6.

Vajtswv tu siab heev thaum Adas thiab Evas tsis mloog nws lus. Yehauvas thiaj tau ua li cas? Nws hais rau Adas tias: “Koj yuav . . . rov mus rau hauv cov av uas koj tawm los. Kuv muab av los puab koj, thiab koj yuav rov mus ua av dua.” (Chivkeeb 3:17-19) Adas thiaj li “tuag rau thaum nws hnubnyoog muaj cuaj pua peb caug xyoo.” (Chivkeeb 5:5) Thaum Adas tuag, tsis yog nws mus saum ntuj ceebtsheej lossis mus thawj thiab. Ua ntej Vajtswv muab av los puab Adas, nws tsis muaj sia nyob qhovtwg. Ces thaum Adas tuag, nws rov qab mus ua av lawm xwb.

Vim Adas thiab Evas tawm tsam Vajtswv, nkawd thiaj zoo tsis tiav thiab nyob tsis tau mus ibtxhis lawm. Nkawd pib muaj mob muaj nkeeg thiab txawj laus txawj tuag. Tiamsis tsis yog nkawd xwb. Txojkev txhaum no kis mus rau nkawd tej xeeb leej xeeb ntxwv huvsi. Loos 5:12 hais tias: “Twb yog vim ib tug xub ua txhaum, neeg ntiajteb txhua tus thiaj ua txhaum. Vim tus ntawd ua txhaum, tus ntawd thiaj tuag. Yog li ntawd, txhua haivneeg uas nyob hauv ntiajteb no thiaj txawj tuag, rau qhov txhua tus puavleej tau ua txhaum lawm.”

Phau Vajlugkub hais tias kev txhaum thiab kev tuag yog “txhua haivneeg tej kev nyuaj siab uas zoo ib yam li tauv huab.” (Yaxayas 25:7) Nqe no qhia tias yeej tsis muaj leejtwg dim tau ntawm kev txhaum thiab kev tuag. Vim li ntawd, “txhua tus puavleej raug kev ploj kev tuag, rau qhov sawvdaws yog Adas roj ntsha.” (1 Kauleethaus 15:22) Tej no yuav ua rau peb xav ib yam li tus timthawj lossis tubtxib Paulus hais tias: “Leejtwg thiaj yuav cawm tau kuv dim ntawm . . . kev ploj kev tuag?” Ua li, leejtwg thiaj yuav cawm tau peb dim?​—Loos 7:24.