ZAJ KAWM 1
‘Cov Neeg Uas Hwm Yehauvas Yuav Muaj Txhua Yam Zoo Uas Lawv Xav Tau’
NQE VAJLUGKUB XYOO 2022: ‘Cov neeg uas hwm Yehauvas yuav muaj txhua yam zoo uas lawv xav tau.’—PHAU NTAWV NKAUJ 34:10.
ZAJ NKAUJ 4 Yehauvas Yog Kuv Tus Tswv Yaj
ZAJ NO THAM TXOG DABTSI? *
Txawm Daviv raug ntau yam kev sim siab los nws hais tias nws “muaj txhua yam zoo” (Saib nqe 1-3) *
1. Piav seb Daviv ntsib tej xwm twg.
THAUM Xa-ules ua vajntxwv kav tebchaws Yixalayees, nws nrhiav nrhw muab Daviv tua pov tseg. Daviv thiaj khiav tawm ntawm thaj chaw ntawd mus kom thiaj cawm tau nws txojsia. Tom qab ntawd, Daviv yoo tshaib yoo nqhis. Nws thiaj mus rau hauv lub nroog Naus thiab mus thov tau 5 lub ncuav noj. (1 Xamuyees 21:1, 3) Dhau ntawd, Daviv txawm khiav mus nkaum hauv ib lub qhov tsua. (1 Xamuyees 22:1) Vim li cas ho muaj tej xwm no los raug Daviv?
2. Xa-ules ua tej yam kev phem twg? (1 Xamuyees 23:16, 17)
2 Twb yog vim Daviv ntaus yeej ntau ntsuj rog ua rau txhua leej txhua tus qhuas nws, Xa-ules thiaj li khib khib Daviv. Tsis tas li ntawd, Yehauvas tsis yuav Xa-ules ua vajntxwv lawm thiab xaiv Daviv los nyob nws chaw. (Nyeem 1 Xamuyees 23:16, 17.) Cheem lub sijhawm ntawd Xa-ules tseem ua vajntxwv, nws muaj tsheej sob tub rog thiab muaj pejxeem txhawb nqa nws. Yog li ntawd, nws thiaj nrhiav nrhw Daviv tua ces Daviv yuav tau khiav mus nkaum rau ub rau no. Vajtswv Txojlus piav tsis txog tiamsis ntshe Xa-ules ua zaj ua ntxeev rhuav qhov uas Vajtswv tsa Daviv ua vajntxwv. (Yaxayas 55:11) Yog tias muaj tseeb li no tiag, Xa-ules ras tsis txog tias cov uas tawm tsam Vajtswv yeej yuav swb.
3. Txawm tias Daviv raug ntau yam kev nyuaj siab los nws coj li cas?
3 Daviv yog ib tug neeg txo hwjchim. Nws yeej tsis tau tsa nws tus kheej los ua vajntxwv tiamsis Yehauvas yog tus xaiv nws. (1 Xamuyees 16:1, 12, 13) Thaum Xa-ules nrhiav nrhw xav muab nws tua los, nws yeej tsis liam Yehauvas ib los li. Thaum Daviv tshaib nqhis thiab yuav tau nkaum rau tej qhov zeb qhov tsua los nws yeej tsis yws Yehauvas ib qho li. Tej zaum thaum Daviv nkaum hauv qhov tsua, nws seev suab hu tias: ‘Cov neeg uas hwm Yehauvas yuav muaj txhua yam zoo uas lawv xav tau.’—Phau Ntawv Nkauj 34:10.
4. Peb yuav mus piav txog 4 lo lus nug twg thiab yog vim li cas?
4 Niaj hnub niam no, Yehauvas Cov Timkhawv muaj tej tug ntsib kev txom nyem. Tsis tas li ntawd, thaum tus kab mob aws los raug sawvdaws nthawv nthav huab yam ua rau sawvdaws txom nyem. Yav tom ntej los, lub sijhawm uas txom nyem kawg nkaus tseem yuav tsub kev txom nyem loj zuj zus ntxiv. (Mathais 24:21) Vim muaj tej yam xws li no, peb yuav mus piav txog 4 lo lus nug no: Ua cas thiaj hais tau tias Daviv “muaj txhua yam zoo”? Vim li cas peb yuav tau txaus siab rau tej yam peb muaj? Vim li cas peb ho paub tseeb tseeb tias Yehauvas yuav tsom kwm peb? Peb yuav ua li cas npaj peb lub siab rau tej yam yuav muaj tshwm sim rau yav tom ntej?
“KUV MUAJ TXHUA YAM TXAUS”
5-6. Phau Ntawv Nkauj 23 pab tau peb nkag siab Daviv cov lus “muaj txhua yam zoo” li cas?
5 Vim li cas Daviv ho hais tias cov uas teev tiam Yehauvas “muaj txhua yam zoo”? Yuav kom peb nkag siab zoo, cia peb mus xyuas Phau Ntawv Nkauj 23. (Nyeem Phau Ntawv Nkauj 23:1-6.) Nyob hauv Phau Ntawv Nkauj 23:1, Daviv hais tias: “[Yehauvas] yog tus tsomkwm kuv, kuv muaj txhua yam txaus.” Raws li Cov Nqe Lus Henplais sau tseg, nqe no Daviv muab Yehauvas hu ua tus Tswv Yug Yaj. Yog peb nyeem Phau Ntawv Nkauj 23 thoob plaws ces peb yuav pom tias Daviv piav txog tej yam zoo Yehauvas muab pub rau nws vim nws vam khom Yehauvas ua tus coj. Xws li, yeej yuav muaj qho lub caij uas nws yuav “taug txojkev uas tsaus ntuj nti.” Yuav muaj neeg tawm tsam nws tiamsis yog nws tso siab plhuav rau Yehauvas tam li tus Tswv Yug Yaj, ces nws yuav “tsis ntshai dabtsi.” Muaj qee lub caij nws yuav muaj kev zoo siab hos qho lub caij nws yuav muaj kev ntxhov siab los Yehauvas yuav coj nws “taug txojkev ncaj ncees.” Yehauvas yuav cia nws “so hauv lub tshav uas muaj zaub mos nyoos ntsuab xiab”.
6 Raws li peb tau piav tas los no, vim li cas Daviv thiaj hais tias nws “muaj txhua yam zoo”? Tos Daviv hais tau li no los Yehauvas nkawv sib raug zoo heev. Tsis tas nws yuav tau yam ub yam no nws thiaj li zoo siab. Qhov uas Yehauvas tsom kwm nws thiab foom koob hmoov rau nws twb txaus nws siab lawm.
7. Raws li Lukas 21:20-24, cov ntseeg nyob hauv Yudas txojkev ntseeg raug sim li cas?
7 Peb khaws tau Daviv tej lus li cas? Peb yeej muaj tej txhiam laj txhiam xwm siv hauv vaj hauv tsev, tiamsis peb yuav tau txhob muab vuag heev dhau. Nyob thawj 100 xyoo, cov ntseeg hauv lub xeev Yudas txojkev ntseeg raug sim seb lawv puas vuag ub vuag no. (Nyeem Lukas 21:20-24.) Yexus ceeb toom tseg rau lawv ua ntej lawm tias muaj ib hnub, lawv yuav “pom tubrog tuaj vij lub nroog Yeluxalees.” Thaum lawv pom muaj li no, lawv yuav tau “khiav mus rau pem tej roob.” Lawv yuav tau yaws khaub yaws tsuag khiav ces lawv yuav nqa tsis tau tej nyuag txhiam laj txhiam xwm nrog lawv mus. Muaj ib Phau Tsom Faj tau hais tias: “Lawv muab lawv tej liaj teb vaj tse tso pov tseg huv tibsi. Lawv vuag tsis yeej ib yam dabtsi li. Lawv yuav tau tso siab rau Yehauvas thiab tuav rawv kev ntseeg.”
8. Cov ntseeg thaum ub lub neej qhia peb li cas?
8 Cov ntseeg thaum ub lub neej qhia peb li cas? Phau Tsom Faj hais ntxiv tias: “Yav tom hauv ntej los, yuav muaj tej yam uas yuav sim peb txojkev ntseeg seb peb puas vuag tej txhiam laj txhiam xwm hauv vaj hauv tsev lossis peb yuav tso siab rau Yehauvas. Thaum Yehauvas los txhim kho ib puas tsav yam hauv ntiajteb, peb tsis paub xyov peb yuav muaj kev sim siab li cas. Tej zaum peb yuav tau rub siab ntev thiab tsis txhob tshua peb tej nyuag txhiam laj txhiam xwm. Tej zaum peb yuav tau yaws khaub yaws tsuag ib yam li cov ntseeg nyob thawj 100 xyoo los tsis paub.”
9. Tus tubtxib Paulus tej lus puas txhawb tau koj lub zog?
9 Thaum peb zaum tsaws xav txog cov ntseeg thaum ub, tej zaum yuav nyuaj rau lawv mus pib dua ib lub neej tshiab. Lawv yuav tau muaj kev ntseeg tiag tiag, lawv thiaj tso siab rau Yehauvas ua tus tsom kwm lawv txoj hau kab. Tsis tas li ntawd, 5 xyoos ua ntej cov neeg Loos tuaj vij lub nroog Yeluxalees, tus tubtxib Paulus twb hais rau cov ntseeg uas yog neeg Henplais lawm tias: “Nej tsis txhob qaug rau nyiaj rau kub, nej muaj npaum li cas nej cia li zoo siab rau tej uas nej muaj; rau qhov Vajtswv hais tias, ‘Kuv yuav tsis tso koj tseg lossis kuv yuav tsis muab koj povtseg ib zaug li.’” (Henplais 13:5, 6) Cov uas khaws Paulus tej lus tseg cia tsis nco qab txhawj tsam tsis muaj tej nyuag txhiam laj txhiam xwm thaum lawv mus zwm rau ib thaj chaw twg. Lawv tso siab tias Yehauvas yuav pub kom txwm nkaus rau lawv. Cia peb khaws Paulus cov lus no tseg cia, peb thiaj yuav tso siab rau Yehauvas tib yam nkaus.
“PEB CIA LI TXAUS SIAB RAU TEJ NTAWD”
10. Thaum Paulus hais kom cia li txaus siab, yog li cas tiag?
10 Paulus tau ntuas Timautes hais tias: “Yog peb muaj noj muaj hnav lawm, peb cia li txaus siab rau tej ntawd xwb.” (1 Timautes 6:8) Puas yog Paulus hais tias kom peb tsis txhob noj nqaij txhiab nqaij ci, txhob muaj vag muaj tse, lossis txhob yuav tej tsoos zoo los hnav? Tsis yog, tsis txhob nkag siab yuam kev Paulus cov lus. Nws tsuas xav kom peb txaus siab rau tej peb muaj lawm xwb. (Filipis 4:12) Tos Paulus hais li no los nws xav kom peb saib peb txojkev sib raug zoo nrog Yehauvas muaj nuj nqis dua tej txhiam laj txhiam xwm hauv vaj hauv tsev.—Hanpakus 3:17, 18.
Thaum cov Yixalayees ncig tiaj nrag suab puam ntev li 40 lub xyoos, lawv “muaj txhua yam zoo”. Ua li tamsim no peb puas txaus siab rau tej peb muaj? (Saib nqe 11) *
11. Mauxes cov lus ntuas qhia kom peb txaus siab rau tej peb muaj li cas?
11 Tej zaum peb yuav hais tias peb paub yam twg peb tu ncua. Tiamsis nco ntsoov tias Yehauvas paub peb zoo dua. Xws li thaum Mauxes hais rau cov Yixalayees tias: “Nej nco ntsoov hais tias, [Yehauvas] uas yog nej tus Vajtswv tau foom koob hmoov rau txhua yam uas nej ua tas los lawm. Nws tau tsomkwm nej thaum nej taug kev los hla lub tiaj suabpuam uas dav heev. Nws nrog nraim nej tau plaub caug xyoo thiab pub txhua yam rau nej kom muaj txaus.” (2 Kevcai 2:7) Yeej muaj tseeb raws li nqe no tiag vim Yehauvas tau pub manas rau lawv noj tau 40 lub xyoos. Tej tsoos tsho uas lawv hnav thaum lawv tawm hauv tebchaws Iziv, los yeej tsis ntuag ib daim li. (2 Kevcai 8:3, 4) Tej zaum ib txhia Yixalayees yuav yws tias tej Yehauvas pub rau lawv twb tsis txwm. Tiamsis Mauxes hais tias lawv tau li ntawd xwb txaus lawm. Zoo tib yam li ntawd, cia peb txaus siab rau tej yam peb muaj thiab tej Yehauvas muab.
TSO SIAB TIAS YEHAUVAS YUAV PUB KOM TXWM
12. Vim li cas peb ho paub tias Daviv tso siab rau Yehauvas?
12 Daviv yeej ntseeg tias Yehauvas nrog nraim tus uas muaj lub siab xib nrhiav Nws. Thaum Daviv sau Phau Ntawv Nkauj 34, nws thiaj hais tau tias Yehauvas tus tubtxib saum ntuj “zov rawv” nws. (Phau Ntawv Nkauj 34:7) Tos Daviv hais li no los tej zaum nws muab tus tubtxib saum ntuj piv rau ib tug tub rog ncig mus ncig los tsis pub yeeb ncuab tuaj ntaus lub yeej. Nco ntsoov, Daviv yog ib tug tub rog khov khwb kho thiab muaj siab tawv. Tsis tas li ntawd, nws haj tseem yuav sawv ua vajntxwv. Txawm li ntawd los, nws tsis tso siab rau tej pob zeb uas nws txawj fiav lossis tsis tso siab rau tej ntaj tej riam. (1 Xamuyees 16:13; 24:12) Tus uas nws tso siab yog Yehauvas. Nws ntseeg tias Yehauvas tus tubtxib saum ntuj yuav cawm tus uas “hwm [Yehauvas].” Txawm niaj hnub no tsis zoo li yav thaud los peb tso siab tau tias cov uas tso siab rau Yehauvas yuav muaj txojsia nyob ntev dhawv mus ib txhis.
Thaum txog lub sijhawm uas txom nyem kawg nkaus, Nkos hauv tebchaws Mankos yuav tuaj tawm tsam peb hauv peb tej vajtse. Txawm li ntawd los, peb yuav tsis ntshai tshee na vim Yexus thiab cov tubtxib saum ntuj yuav tiv thaiv peb (Saib nqe 13)
13. Vim li cas Nkos hauv tebchaws Mankos xav tias peb tsis muaj zog, thiab vim li cas peb ho tsis ntshai tshee na? (Saib daim duab ntawm lub khaum.)
13 Tsis ntev tom ntej no, Nkos hauv tebchaws Mankos uas yog ib tsoom tebchaws, yuav sawv tawm tsam Yehauvas cov tibneeg. Qhov no yuav sim peb txojkev ntseeg seb peb puas tso siab rau Yehauvas ua tus cawm peb dim. Thaum ntawd yog peb kev ntseeg tsis loj txaus ces peb yuav ntshai tshee na thiab xav tias tsam peb tsis dim. Tsis tas li ntawd, thaum ib tsoom tebchaws pom peb, lawv yuav xav tias peb zoo li tej yaj tsis muaj tsw vim peb tsis muaj riam phom thiab tsis txawj ua tsov ua rog. (Exekees 38:10-12) Ces lawv yuav pom peb zoo li tej ntsaum kab rwg uas nkag hauv av es cia li muab tsuj pes ntiag. Tiamsis peb muaj kev ntseeg thiab paub tias Yehauvas cov tubtxib saum ntuj nyob puag ncig thiab yuav tiv thaiv peb. Ib tsoom tebchaws tsis muaj kev ntseeg thiab lawv tsis paub tias Yehauvas siv nws cov tubtxib saum ntuj los tiv thaiv peb. Lawv yuav xav tsis thoob li thaum Yehauvas cov tubtxib saum ntuj los cawm peb dim.—Tshwmsim 19:11, 14, 15.
NPAJ TAMSIM NO RAU YAV TOM NTEJ
14. Peb yuav npaj li cas tamsim no rau yav tom ntej?
14 Thawj thawj yam peb yuav tau npaj yog txhob tshua tej nyuag txhiam laj txhiam xwm peb muaj hauv vaj hauv tsev. Peb tsis paub nyob tsam muaj ib hnub twg, peb yuav tau muab tej ntawd tso pov tseg rau tom qab. Peb muaj li cas los cia li txaus siab rau yam ntawd thiab cia li zoo siab tias peb tseem muaj kev sib raug zoo nrog Yehauvas. Kav tsij tsav peb txojkev ntseeg tsis tseg tsis tu xwv peb thiaj vam khom Yehauvas thaum Nkos hauv tebchaws Mankos sawv tawm tsam.
15. Daviv raug tej yam twg, nws thiaj tso siab plhuav rau Yehauvas?
15 Cia peb mus piav txog Daviv qho mentsis seb nws tau npaj nws lub siab li cas thaum raug kev sim siab. Daviv hais tias: “Nej sim xav saib [Yehauvas] ua zoo npaum li cas rau nej lawm. Cov neeg uas los nrhiav chaw nkaum ntawm [Yehauvas], lawv tau zoo nyob kaj siab lug.” (Phau Ntawv Nkauj 34:8) Raws li Daviv cov lus no qhia tias nws vam khom Yehauvas. Tsis tas li ntawd, txhua zaus Yehauvas yeej cev tes los pab nws. Xws li thaum Daviv tseem yog tub hluas es Nkauli-am nkawv sib tawm tsam. Daviv hais tias: “Hnub no [Yehauvas] yuav muab koj cob rau kuv tes.” (1 Xamuyees 17:46) Txawm yog tom qab no thaum Xa-ules nrhiav nrhw Daviv tua pov tseg los, Yehauvas haj tseem “nrog nraim Daviv.” (1 Xamuyees 18:12) Daviv yeej pom tias Yehauvas pab nws tag pab nws tuaj. Yog li ntawd, thaum nws tej kev sim siab yuav nphau pes phwv tuaj raug nws los nws yeej muab nws lub siab khi rau Yehauvas khov khwb kho.
16. Tamsim no, peb yuav tso siab rau Yehauvas rau ntwb ntu twg?
16 Peb yuav tau tso siab rau Yehauvas thiab cia nws coj peb txoj hau kev tamsim no, peb thiaj yuav tso siab rau nws yav tom hauv ntej. Xws li, peb yuav tau muaj kev ntseeg peb thiaj mus hais taus peb tus los pav tso cai rau peb mus tej kev sib txoos, tej rooj sib txoos, thiab mus qhia Vajlugkub. Yog tias peb tus los pav tsis yib thiab tsis yuav peb ua haujlwm, peb puas tso siab tias Yehauvas yuav saib xyuas peb thiab txhab ntxiv tej yam peb tu ncua? (Henplais 13:5) Muaj coob leej ntau tus ua haujlwm puv ntoob rau Yehauvas twb raug tej no dua los lawm. Yehauvas yeej coj ncaj ncees thiab cev tes pab lawv.
17. Nqe Vajlugkub rau xyoo 2022 yog li cas thiab vim li cas thiaj xaiv nqe Vajlugkub no?
17 Muaj Yehauvas tuaj peb tog ces peb yuav tsis txhawj tsis ntshai tej yam yuav muaj rau yav pem suab. Nco ntsoov mus ua Yehauvas tes haujlwm vim nws yeej yuav tsis tso peb tseg. Twb yog muaj li no, Pab Uas Ntaus Thawj thiaj npaj nqe Vajlugkub rau xyoo 2022 los npaj peb lub siab lub ntsws rau yav tom ntej thiab pab kom peb nco ntsoov tias Yehauvas yuav tsis tso peb tseg ib zaug li. Nqe Vajlugkub ntawd yog rho ntawm Phau Ntawv Nkauj 34:10 uas hais tias: ‘Cov neeg uas hwm Yehauvas yuav muaj txhua yam zoo uas lawv xav tau.’
ZAJ NKAUJ 38 Nws Yuav Hwj Koj Ruaj Khov
^ Nqe Vajlugkub rau xyoo 2022 yog rho tawm los ntawm Phau Ntawv Nkauj 34:10 uas hais tias: ‘Cov neeg uas hwm Yehauvas yuav muaj txhua yam zoo uas lawv xav tau.’ Niaj hnub niam no, Yehauvas Cov Timkhawv ib txhia tsis muaj nyiaj xws li luag teb luag chaw. Tiamsis ua li cas nqe Vajlugkub rau xyoo no ho hais tias Yehauvas cov tibneeg yuav “muaj txhua yam zoo uas lawv xav tau”? Zaj kawm no mam li teb rau peb paub thiab yuav pab kom peb nkag siab zoo zoo txog nqe Vajlugkub no. Tsis tas li ntawd, tej peb kawm no npaj peb lub siab rau tej yam yuav muaj tshwm sim rau yav tom ntej.
