1-3. Muaj tej yam twg yuav ua rau peb lub kua muag ntxaum ntxiav peb lub plhu?

 TWB tau hov ntev lawm txij thaum koj lub kua muag ntxaum ntxiav koj lub plhu? Puas yog koj quaj vim zoo siab los yog tu siab? Peb ib txhia quaj vim kev ploj tuag los caum cuag, thiaj muaj kev quaj ntsuag. Muaj ib tug muam ntseeg hu ua Hli, nyob hauv tebchaws Yunaithim Xatej (United States) hais tias: “Thaum kuv tus mentxhais uas yog tus 3 tag simneej lawm mas dua rhe kuv nplooj siab. Kuv lub neej nyob tsaus ntuj nti, yuav ciaj los ciaj tsis taus yuav tuag los tuag tsis taus.” *

² Muaj qho lub caij, peb qaug zog thiaj li ua rau peb lub kua muag nrog. Nyob hauv tebchaws Nyiv Pooj, muaj ib tug muam uas tho kev hu ua Huab hais tias: “Kuv mus tshaj tawm txoj moo zoo mas tsis muaj leejtwg xav mloog Vajtswv Txojlus mas ua rau kuv qaug zog zis. Tej thaum kuv cia li nyob tib pob quaj lawm xwb. Kuv thov Yehauvas kom nws pab coj kuv txoj hau kev mus nrhiav tus uas muaj lub siab xib nrhiav nws.”

³ Peb ib tug twg puas tau taug ob tug muam no txojke dua li? Muaj ntau zaus peb coob leej ntau tus yeej taug nkawv txojke tib yam nkaus. (1 Petus 5:9) Peb yeej xav kom peb muaj kev “zoo siab thiab pehawm [Yehauvas]” tiamsis muaj qho lub caij peb yuav taug tau txojkev quaj ntsuag, txojkev qaug zog, lossis txojkev sim siab. (Phau Ntawv Nkauj 6:6; 100:2) Yog tias peb tau taug txojke zoo li no lawm, peb yuav tig mus cuag leejtwg?

4. Piav seb zaj kawm no peb yuav mus tham txog dabtsi.

⁴ Nco ntsoov tias Yexus tso tau ib tug yam ntxwv zoo heev rau peb xyaum. Muaj qho lub caij, Yexus kuj txawj “quaj” thiab. (Yauhas 11:35; Lukas 19:41; 22:44; Henplais 5:7) Hauv zaj kawm no, peb yuav mus tham me ntswb mentsis seb Yexus quaj rau lub  caij twg thiab seb tej ntawd qhia peb li cas txog Yehauvas thiab Yexus nkawv. Tsis tas li ntawd, peb yuav tau coj li cas thaum peb raug tej yam ua rau peb lub kua muag los sis laub sis lug.

5. Raws li Yauhas 11:32-36, muaj li cas txog Yexus?

⁵ Tabtom yog lub caij ntuj no xyoo 32 tom qab Yexus yug, Yexus txawm hnov xov tias nws tus kwv luag npe hu ua Laxalus muaj mob hnyav heev ces tom qab ntawd nws tag sim neej lawm. (Yauhas 11:3, 14) Yexus kuj raug zoo nrog Laxalus thiab nws tsev neeg kawg nkaus li. Laxalus muaj ob tug muam npe hu ua Malis thiab Mathas. Nkawv nyob mluas mlob vim Laxalus nyuam qhuav tas sim neej. Thaum Yexus tuaj txog hauv lub zos Npethanis, Mathas txawm mus zoj rau ntawm Yexus thiab hais tias: “Tus Tswv, yog koj nrog peb nyob ntawm no, kuv tus nus yuav tsis tuag.” (Yauhas 11:21) Thaum Yexus pom Malis thiab sawvdaws kua muag ntws sis laub sis lug ces Yexus “txawm quaj” nrog lawv.​—Nyeem Yauhas 11:32-36.

6. Vim li cas Yexus thiaj nrog sawvdaws quaj?

⁶ Vim li cas Yexus ho nrog lawv quaj? Muaj ib Phau Tsom Faj hais tias: “Thaum Yexus pom lwm tus muaj kev nyuaj siab ua rau nws mob siab kawg li. Xav txog lub sijhawm uas Yexus tus phoojywg Laxalau tuag lawm. Phau Vajlugkub qhia tias thaum Yexus pom Laxalau cov nruab ze quaj zom zaws, ua rau nws ‘mob siab heev thiab nyuaj siab kawg.’” * Tej zaum Yexus pom Laxalus ob tug muam quaj ncia dhuj dheev mas ua rau nws hlub nkawv kawg nkaus li. Nyob hauv Yexus nruab siab, ntshe Yexus twb xav zoj tias Laxalus tus mob tsis kam tso nws tseg mas ntshe ua rau nws nyob txom nyem ntsuav. Thiab ntshe Laxalus tu los tu siab tias ua cas ib ntsais muag xwb, nws txojsia txawm siv yuav tu. Yog tias peb muaj ib tug neeg twg tau tas sim neej ces peb yuav nkag siab txog lawv txojke quaj ntsuag. Cia peb mus tham me ntswb mentsis seb peb khaws tau 3 yam twg hauv zaj no.

7. Thaum Yexus quaj qhia peb li cas txog Yehauvas?

 ⁷ Yehauvas yeej nrog peb mob siab tib yam nkaus. Yexus “muaj hwvxyeej ib yam li Vajtswv.” (Henplais 1:3) Yog li ntawd, qhov Yexus quaj xwb yeej qhia tias dua rhe Yehauvas ib nplooj siab lawm thaum muaj ib tug twg tas sim neej. (Yauhas 14:9) Yog tias muaj ib tug peb hlub tshua tas sim neej lawm, nco ntsoov tias Yehauvas yeej ntsia ntsoov thiab pom peb txojkev lwj siab. Nws hlub tshua peb kawg nkaus li, nws thiaj nrhiav nrhw kev los pab peb.​—Phau Ntawv Nkauj 34:18; 147:3.

8. Vim li cas peb ho tso siab plhuav tias Yexus yuav tsa cov peb hlub tshua?

⁸ Yexus tos tsis hnyu yuav tsa cov peb hlub tshua. Mathas yeej kub siab lug teev tiam Yehauvas ces nws yeej hnov txog lub caij lub nyoog thaum Eliyas thiab Elisas nkawv tsa cov neeg uas tag sim neej lawm kom rov muaj sia. (1 Vajntxwv 17:17-24; 2 Vajntxwv 4:32-37) Tsis tas li ntawd, nws yeej hnov ntsoov tias Yexus twb tau tsa cov neeg tas sim neej dua lawm thiab. (Lukas 7:11-15; 8:41, 42, 49-56) Yog li ntawd, thaum Yexus hais rau Mathas tias: “Koj tus nus yeej yuav sawv rov qab los,” ntshe ua rau Mathas sov siab so. (Yauhas 11:23-27) Zoo tib yam li ntawd, peb tsis txhob rawm maj tag kev cia siab. Peb yeej yuav rov qab pom cov neeg peb hlub tshua ib zaug ntxiv. Thaum Yexus quaj thiab nplig lwm tus qhia tau tias nws tos tsis hnyu yuav rov qab tsa cov neeg uas tas sim neej lawm sawv rov los muaj sia dua.

9. Zoo yam li Yexus, piav seb peb yuav mus nplig tau lwm tus li cas.

⁹ Peb yuav tau mus nplig cov neeg muaj kev quaj ntsuag. Yexus tsis yog nrog luag quaj xwb tiamsis nws kuj mus nplig Laxalus ob tug muam siab ntsws. Cia peb xyaum coj yam li Yexus. Xws li nyob tebchaws Auxitalia (Australia), muaj ib tug txwj laus npe hu ua Ntaj hais tias: “Thaum kuv pojniam tas sim neej, kuv nyob mluas mlob. Cov kwvtij ntseeg thiab lawv cov pojniam yeej tuaj nplig kuv siab txhua lub caij nyoog. Lawv yeej nyob rawv ntawd mloog kuv piav kuv tej kev ntxhov siab thiab thaum kuv quaj los lawv tsis xav li cas. Tsis tas li ntawd, lawv pab kuv xws li tu tsheb, mus kav kiab kav khw rau kuv, thiab ua zaub mov tuaj rau kuv noj. Ntxiv ntawd, lawv kuj nrog kuv thov Vajtswv tsis tseg tsis tu ua ke. Yog li ntawd, lawv yeej yog tej phoojywg kwv luag uas “txawj sib hlub txhua lub sijhawm” tiag tiag li.​—Pajlug 17:17.

10. Piav seb muaj li cas tshwm sim hauv Lukas 19:36-40.

¹⁰ Hnub Nixam 9 xyoo 33 tom qab Yexus yug, Yexus txawm tuaj txog ze ntawm lub nroog Yeluxalees. Tej neeg tuaj ntawd txawm hle lawv tej tsho ntev zom zaws los pua kev thiab hais tias Yexus yog lawv tus Vajntxwv. Txhua leej txhua tus yeej zoo siab luag ntxhi tos txais Yexus. (Nyeem Lukas 19:36-40.) Tiamsis “thaum Yexus tuaj ze lub nroog Yeluxalees, nws pom lub nroog, nws quaj.” Yexus quaj li no vim nws paub tias yuav muaj tej yam tsis zoo los raug cov neeg hauv lub nroog Yeluxalees.​—Lukas 19:41-44.

11. Vim li cas Yexus quaj rau cov neeg nyob hauv Yeluxalees?

¹¹ Txawm sawvdaws zoo siab tos txais Yexus, los Yexus quaj vim nws paub tias lawv yuav tsis mloog tej nws qhia txog lub Nceeg Vaj. Ces lub nroog Yeluxalees yuav raug puas tsuaj thiab cov Yudais yuav poob mus ua cev qhev. (Lukas 21:20-24) Tom qab no, yeej muaj raws nkaus li Yexus hais tseg lawm tiag. Ua li niaj hnub niam no, yog tias tibneeg tsis mloog thaum peb qhia txog lub Nceeg Vaj, qhov uas Yexus quaj ho qhia tau peb li cas? Cia peb mam li mus piav txog 3 lub ntsiab lus ntxiv los teb.

12. Thaum Yexus quaj txog tej neeg zej zog, qhia peb li cas txog Yehauvas?

 ¹² Yehauvas yeej hlub tshua tibneeg tiag tiag. Qhov uas Yexus quaj xwb twb qhia tau tias Yehauvas hlub tshua tibneeg npaum li cas. Yehauvas yeej “tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg.” (2 Petus 3:9) Niaj hnub niam no, cia peb rau siab ntso mus piav txog lub Nceeg Vaj kom qhia tias peb khuvleej tej kwvtij zej zog tiag.​—Mathais 22:39. *

13-14. Yexus khuvleej tibneeg li cas, thiab peb yuav xyaum nws li cas?

¹³ Yexus rau siab ntso qhia txoj moo zoo tsis cia chaw so. Yexus khuvleej tibneeg kawg nkaus li, nws thiaj nrhiav nrhw kev mus qhia tibneeg. (Lukas 19:47, 48) Muaj qho lub caij, Yexus thiab nws cov thwjtim twb “tsis khoom noj mov li.” (Malakaus 3:20) Hos muaj ib hmos, ib tug txivneej tuaj cuag Yexus. Twb tsaus ntuj nti lawm los Yexus yeej txaus siab hlo nrog nws tham. (Yauhas 3:1, 2) Nyob rau tiam ntawd, Yexus twb qhia tshab tshab rau tibneeg paub tag lawm. Txawm Yexus qhia rau coob leej ntau tus los muaj qho leej thiaj los ua nws cov thwjtim xwb. Niaj hnub niam no los, peb yeej xav kom ib zej tsoom sawvdaws hnov txoj moo zoo tib yam nkaus. (Tes Haujlwm 10:42) Yog li ntawd, peb yuav tau soj lub caij lub nyoog kom thiaj ntsib tau tibneeg.

¹⁴ Txawj soj lub caij lub nyoog qhia. Yog tias peb pheej mus qhia tib lub sijhawm xwb ces peb yuav nrhiav tsis tau tej tug uas xav mloog txoj moo zoo. Niam Khwb uas yog ib tug tho kev hais tias: “Kuv tus txiv wb tsis mus qhia txoj moo zoo tib lub sijhawm nkaus nkaus xwb. Tiamsis thaum sawv ntxov, wb mus qhia rau ntawm luag tej tsev lag luam. Thaum tav su, wb mus teeb laub qhia Vajlugkub rau tej neeg dua kev. Ces yav lig, wb mam li mus xyuas tibneeg rau tom lawv tej vajtse.” Zoo tib yam li nkawv, peb tsis txhob mus qhia Vajlugkub rau lub sijhawm uas peb xis mus qhia xwb. Ua tib zoo xav seb yuav ntsib tibneeg rau lub caij twg ces peb mus qhia rau lub caij ntawd. Yog peb xyaum yam li no, Yehauvas yuav pom zoo rau peb.

15. Raws li Lukas 22:39-44, piav seb muaj li cas tshwm sim rau Yexus?

¹⁵ Hnub Nixam 14, xyoo 33 tom qab Yexus yug, thaum tsaus tsaus ntuj lawm, Yexus txawm mus rau ntawm lub vaj Khexemanes. Nws phua siab hlo qhib siab lug thov Yehauvas. (Nyeem Lukas 22:39-44.) “Nws thov nws quaj thiab los kua muag kawg li.” (Henplais 5:7) Ua li, Yexus thov nws Txiv txog dabtsi? Nws thov kom Yehauvas txhab ntxiv dag zog rau nws xwv nws thiaj tuav rawv Yehauvas tsis tso tseg thiab ua Yehauvas tes haujlwm kom tiav. Yehauvas yeej hnov nws tus Tub Yexus tej lus quaj thov. Yog li ntawd, nws thiaj txib ib tug tubtxib saum ntuj los txhawb Yexus lub dag lub zog.

16. Vim li cas Yexus thiaj ntxhov siab hnyo thaum nws thov Yehauvas?

¹⁶ Nyob hauv lub vaj Khexemanes, Yexus tau quaj quaj vim neeg yuav liam tias nws ua saib tsis taus Vajtswv. Tsis tas li ntawd, nws paub hais tias lub nra uas ris Yehauvas lub koob lub npe hnyav kawg nkaus li. Nws yuav tau tuav rawv Yehauvas thiab tsis txhob kheev ib yam dabtsi twg thuam tau Yehauvas lub koob lub npe. Yog li ntawd, niaj hnub niam no peb ib txhia txojkev ntseeg raug sim tib yam li Yexus seb peb yuav ua zaj twg tsav twg. Yexus txojkev ntxhov siab no ho pab qhia peb li cas? Cia peb mam li tham me ntswb mentsis txog 3 lub ntsiab lus yuav hais tuaj no.

17. Yehauvas mloog thaum Yexus thov qhia peb li cas?

¹⁷ Yehauvas yeej hnov peb tej lus thov. Yehauvas yeej mloog nraim Yexus tej lus thov vim hais tias yuav ciaj yuav tuag los nws yeej tuav rawv Yehauvas thiab tsis kheev ib yam dabtsi twg thuam tau Yehauvas lub koob lub npe kiag li. Zoo tib yam li ntawd, Yehauvas yeej yuav mloog peb tej lus thov yog tias yuav ciaj yuav tuag los peb tuav rawv Yehauvas tsis tseg tsis tu thiab tsis kheev ib yam dabtsi twg thuam tau Yehauvas lub koob lub npe hlo li.​—Phau Ntawv Nkauj 145:18, 19.

18. Vim li cas peb ho paub tias Yexus nkag siab peb?

¹⁸ Yexus yeej nkag siab peb vim nws paub thaum ib tug twg qaug zog lawm thiab xav tau lwm tus pab zoo li cas. Nws paub tej uas peb lub siab xav li cas ces nws thiaj txhawb peb lub dag zog kom raws nkaus li peb xav tau. (Henplais 4:15, 16, NWT ) Muab piv txwv zoo li thaum peb  piav peb tej kev ntxhov siab rau ib tug twg es nws tsis nkag siab ces zoo li tshuab raj rau twm pob ntseg. Tiamsis yog peb piav peb tej kev ntxhov siab es tus tod txais raug mas yuav ua rau peb kaj siab lawm hov ntau. Yog li ntawd, Yexus yeej txais raug peb tej kev ntxhov siab. Zoo li thaum Yehauvas txib ib tug tubtxib saum ntuj los txhawb Yexus hauv lub vaj Khexemanes los Yexus tos txais nws pab. Txawm yuav yog peb los, Yehauvas yuav siv qho tug lossis qho yam los txhawb peb lub dag zog xws li cov txwj laus, cov kwvtij nkauj muam ntseeg, tej lus qhuab qhia, tej ntaub tej ntawv thiab tej yeeb yaj kiab lub koom haum luam tawm. Txhob ua siab deb, peb cia li tos txais tej kev pab yam li no.

19. Piav seb peb yuav ua li cas yog tias peb txojkev ntseeg raug sim.

¹⁹ Yehauvas yuav pub lub siab kaj rau peb. Thaum peb thov Yehauvas, nws yuav muab lub siab kaj uas “yeej tsis muaj leejtwg yuav paub” rau peb. (Filipis 4:6, 7) Thaum peb muaj siab kaj lawd, peb yuav ua neeg txawj xav thiab txiav txim siab tau zoo dua. Muaj ib tug muam ntseeg hu ua Lug hais tias: “Muaj ntau ntau zaus kuv nyob ib leeg kho siab khuav. Kuv pheej xav ntau tsav ntau yam, tej thaum kuv xav tias Yehauvas twb tsis xam muaj kuv. Tiamsis tamsim no thaum twg kuv xav zoj li ntawd ces kuv qhib siab hlo thov kiag Yehauvas pab tamsid. Tom qab kuv thov tag, kuv lub siab txawm kaj taws nrig tuaj.” Raws li Lug cov lus, yog peb qhib siab lug thov Yehauvas ces peb yuav kaj siab tib yam nkaus.

20. Qhov uas Yexus quaj pab tau peb li cas?

²⁰ Qhov uas Yexus quaj pab tau peb lawm hov ntau. Xws li, peb yuav tau mus nplig cov uas tau txais txojkev quaj ntsuag. Peb yuav tau nco ntsoov tias Yehauvas thiab Yexus nplig tau peb thaum ib tug uas peb hlub tshua tas sim neej lawm. Peb yuav tau xyaum Yehauvas thiab Yexus txojkev khuvleej lwm leej lwm tus es kub siab lug mus pab qhia txoj moo zoo rau lawv. Tsis tas li ntawd, Yehauvas thiab Yexus nkawv yeej nkag siab peb. Nkawv paub tias qho lub caij peb yuav qaug zog tiamsis nkawv yeej yuav nrog nraim thiab pab kom peb peem dhau. Yog li ntawd, cia li khaws tej uas peb tau kawm hauv zaj no coj mus siv ua neej. Peb tos ntsoov hnub Yehauvas yuav so peb “tej kua muag huv tibsi mus.”​—Tshwmsim 21:4.