1-2. Piav seb tom qab ua kev cai raus dej tag, peb yuav tau ua li cas ntxiv.

 HOV ntev li koj mam li tu tsev ib zaug? Tej zaum thaum koj nyuam qhuav khiav los nyob rau hauv koj lub tsev, koj yeej muab tu du lug lawm. Koj lub tsev yuav zoo li cas xwb yog tias koj tsis tu ntxiv tom qab ntawd lawm? Koj yeej paub tias yeej yuav muaj plua plav paug. Yuav kom koj lub tsev huv siab si, koj yuav tau tu ntshis.

² Zoo tib yam li ntawd, thaum hais txog peb txoj kev xav thiab peb tus cwj pwm, los yuav tau saib ntshis. Thaum peb tsis tau ua kev cai raus dej, peb yeej ua txhua yam kom hloov tau peb lub neej, peb thiaj “tso plhuav tej kev txhaum uas peb ua thiab peb xav huv tibsi tseg.” (2 Kauleethaus 7:1) Tom qab ua kev cai raus dej tag, peb yuav tau mloog tus tub txib Povlauj tej lus ntuas kom rau siab ntso “hloov dua siab tshiab.” (Efexus 4:23) Vim li cas peb yuav tau hloov ntshuj ntshis? Vim tej kev phem hauv lub ntiaj teb no zoo yam li tej plua plav uas ya los paug peb ces peb yuav ua tsis tau neeg dawb huv rau Yehauvas. Yuav kom peb ua tau haum Yehauvas siab, peb yuav tau tshuaj ntshuj ntshis peb tej kev xav, peb tus cwj pwm, thiab tej uas peb lub siab ntshaw plias.

3. “Hloov nej txoj kev xav” yog li cas tiag? (Loos 12:2)

³ Peb yuav tau ua li cas xwv peb thiaj hloov tau peb txoj kev xav? (Nyeem Loos 12:2.) Zoo ib yam li yuav muab ib lub tsev hloov kho dua tshiab. Tsis yog peb muab tej nyuag khoom ub khoom no coj los yeb rau xwb ces yog hloov lawm. Peb yuav tau muab tej qho dawj pov tseg. Zoo ib yam li ntawd, yog peb ua qho yam zoo xwb tsis tau qhia hais tias peb hloov peb txoj kev xav lawm. Yuav kom peb hloov tau peb txoj kev xav, peb  yuav tau tshuaj peb lub siab lub ntsws. Yog yam twg tsim nyog hloov los peb yuav tau hloov kom thiaj coj tau raws li Yehauvas tej kev cai ntau npaum li ntau tau. Tsis yog ua ib zaug xwb ces tau lawm tiam sis yuav tau tshuaj ntshuj ntshis tas li.

4. Yuav ua li cas peb thiaj tsis cia peb tej kev xav yoog raws li lub qab ntuj no?

⁴ Thaum peb tsis muaj kev txaug kev txhaum lawm ces peb yeej yuav ua tau txhua yam raws li Yehauvas lub siab nyiam. Cheem tam sim no tseem tsis tau txog lub caij ntawd, cia peb ua npaum li peb ua tau kom raws li Yehauvas lub siab nyiam. Raws li Loos 12:2, Povlauj hais tias peb yuav tau hloov peb tej kev xav, peb thiaj yuav paub tias tej uas haum Vajtswv siab yog li cas tiag. Yog li ntawd, tsis txhob cia li mus yoog raws li lub qab ntuj neeg no txoj kev xav tiam sis ua tib zoo tshuaj seb peb puas xav ib yam li Vajtswv xav thaum peb muaj ib lub hom phiaj twg los sis yuav txiav txim siab ua ib yam twg.

5. Peb yuav tau tshuaj peb tej kev xav li cas cheem Yehauvas hnub tseem tsis tau los txog? (Saib daim duab.)

⁵ Xws li Yehauvas xav kom peb “yuav tsum niaj hnub tos hnub uas [nws] yuav los.” (2 Petus 3:12) Zaum tsaws xav li no tias: ‘Ua neej nyob, kuv puas paub hais tias twb tshuav tsis ntev lub sim ceeb no twb yuav kawg? Txawm kuv yuav txiav txim siab ua txoj hauj lwm twg thiab kawm ntawv qeb siab li cas los kuv puas saib txoj kev teev tiam Yehauvas tseem ceeb dua hauv kuv lub neej? Kuv puas tso siab plhuav rau Yehauvas tias nws yuav pab kom kuv koob tau kuv lub cuab lub yig, los sis kuv yuav tas zog txhawj tias yuav ua li cas thiaj tau txhiam laj txhiam tam ntau?’ Ua zoo xav seb Yehauvas yuav txaus siab npaum li cas yog tias peb ua lub neej raws li nws lub siab nyiam.​—Mathais 6:25-27, 33; Filipis 4:12, 13.

6. Peb yuav tau rau siab ntso ua li cas tiag?

 ⁶ Peb yuav tau tshuaj ntshuj ntshis peb tej kev xav xwv peb thiaj hloov tau tej qhov uas tsim nyog hloov. Povlauj hais rau cov ntseeg hauv Kauleethaus tias: “Nej cia li ua tib zoo xav thoob thoob saib nej puas yog cov uas muab siab rau ntseeg los tsis yog.” (2 Kauleethaus 13:5) Tsis yog mus kev sib txoos los sis mus qhia Vajlugkub xwb ces qhia tias peb “muab siab rau ntseeg” lawm. Tiam sis peb tej kev xav, tej peb ntshaw, thiab tej uas rub tau peb lub siab mus ua huv tib si yuav tsum qhia tias peb tuav rawv peb txoj kev ntseeg. Yog li ntawd, peb yuav tau nyeem Vajtswv Txoj Lus peb thiaj li xav ib yam li Vajtswv xav thiab ua npaum li peb ua tau los coj raws li Yehauvas lub siab nyiam.​—1 Kauleethaus 2:14-16.

7. Raws li Efexus 4:31, 32, peb yuav tau ua dab tsi ntxiv thiab vim li cas ho tsis yooj yim rau peb ua li ntawd?

⁷ Nyeem Efexus 4:31, 32. Muaj dua ib yam uas peb yuav tau ua yog “muab lub siab tshiab los coj.” (Efexus 4:24) Peb yuav tau tswj tiag, peb thiaj tsis muaj tus cwj pwm xws li lub siab phem, lub siab ua nruj ua tsiv thiab lub siab heev. Vim li cas ho tsis yooj yim rau peb ua li ntawd? Rau qhov muaj tej tug yeej coj tau tej cwj pwm no txij puag thaum yau los lawm. Yog li ntawd, nyob hauv phau Vajlugkub thiaj tau hais tias ib txhia tib neeg kheev “npautaws” thiab “chim taus.” (Pajlug 29:22) Tej tug uas muaj cwj pwm li hais no, txawm nws twb ua kev cai raus dej lawm los nws yuav tau tswj nws lub siab kam tiag. Cia peb mus piav txog ib tug yam ntxwv.

8-9. Tej uas Xatefanau ua qhia tias peb yuav tau muab lub siab qub tso pov tseg li cas?

⁸ Muaj ib tug kwv tij npe hu ua Xatefanau (Stephen) tswj tsis taus nws lub siab. Nws hais tias: “Txawm tias kuv twb ua kev cai raus dej lawm los kuv yuav tsum tswj nrees kuv lub siab. Muaj ib zaug thaum kuv mus qhia ib lub tsev rau ib lub, muaj tub sab dawj kuv lub xov tooj cua hauv tsheb mus lawm. Kuv thiaj dhia caum nws qab. Thaum kuv caum yuav cuag nws, nws muab lub xov tooj cua pov rhees hauv pem teb khiav lawm. Thaum kuv qhia zaj no rau cov kwv tij mloog, ib tug txwj laus thiaj nug tias: ‘Xatefanau, yog koj lam caum cuag nws koj yuav muab nws ntaus lov?’ Thaum nws nug kuv li ntawd tas, kuv mam ras tias kuv yuav tsum xyaum ua ib tug neeg uas muaj lub siab mos siab muag tiag tiag.” b

⁹ Xatefanau tus yam ntxwv qhia rau peb tias txawm peb xav tias peb twb tsis coj lub siab qub lawm los tib pliag ntshis xwb cia li rov tshwm plaws los. Yog tias muaj zoo li no rau koj no los tsis txhob ntaus siab yau thiab tsis txhob xav tias koj yog ib tug ntseeg uas coj tsis tau zoo. Txawm tus tub txib Povlauj los nws yeej lees hlo tias: “Thaum kuv xav ua qhov zoo, kuv ho xaiv ua qhov phem.” (Loos 7:21-23) Vim peb yog noob txaug neeg txhaum ces muaj qee zaug peb yeej yuav rov coj tau peb lub siab qub, zoo yam nkaus li tej plua plav uas paug hauv peb tsev. Peb yuav tau ua npaum li peb ua tau xwv peb thiaj ua tau neeg dawb neeg huv. Yuav ua li cas peb thiaj ua tau li ntawd?

10. Yuav ua li cas peb thiaj yuav tsis rov coj lub siab qub? (1 Yauhas 5:14, 15)

¹⁰ Thov Yehauvas pab koj xwv koj thiaj tsis rov mus coj lub siab qub thiab cia siab hais tias Yehauvas hnov koj thiab yuav pab koj. (Nyeem 1 Yauhas 5:14, 15.) Yehauvas yuav tsis ua txuj ci los tshem hlo koj lub siab qub mus tiam sis nws yuav txhawb koj lub zog kom koj tsis txhob rov mus ua. (1 Petus 5:10) Tsis  tas li ntawd, yog koj twb thov kom Yehauvas pab koj lawm ces koj yuav tau zam tej yam uas yuav rub tau koj lub siab rov mus coj lub siab qub. Xws li tsis txhob saib tej yeeb yaj kiab, this vis los sis nyeem tej ntaub ntawv txog tej yam uas koj twb siv zog muab tshem tawm mus. Ntxiv ntawd, tsis txhob zaum tsaws xav txog tej yam vuab tsuab.​—Filipis 4:8; Kaulauxais 3:2.

11. Yuav ua li cas peb thiaj coj tau lub siab tshiab?

¹¹ Txawm koj muab lub siab qub tso tseg lawm los koj yuav tau coj lub siab tshiab kam tiag. Yuav ua li cas thiaj coj tau lub siab tshiab? Thaum koj kawm txog Yehauvas tej yeeb yam, kav tsij muab tej uas koj kawm tau ntawd coj los siv rau koj lub neej. (Efexus 5:1, 2) Xws li thaum koj nyeem txog ib zaj hauv phau Vajlugkub txog Yehauvas txoj kev zam txim, cia li tshuaj koj tus kheej li no tias, ‘Kuv puas zam lwm tus lub txim?’ Thaum koj nyeem txog Yehauvas txoj kev hlub tshua rau cov neeg txom nyem, cia li tshuaj koj tus kheej li no tias, ‘Kuv puas hlub tshua cov kwv tij nkauj muam ntseeg thaum lawv raug kev txom nyem thiab kuv puas cev tes mus pab lawv?’ Thaum koj coj tau lub siab tshiab, twb yog koj cia Vajtswv hloov koj txoj kev xav. Tsis tas li ntawd, ua lub siab txias txias yog muaj qho yam koj tseem hloov tsis tau tau.

12. Tej lus hauv phau Vajlugkub hloov tau Xatefanau lub neej li cas?

¹² Xatefanau pom tias nws kuj coj tau lub siab tshiab zuj zus lawm. Nws hais tias: “Txij thaum kuv ua kev cai raus dej los txog niaj hnub nim no, muaj ntau zaus uas kuv yuav tsum tswj kuv lub siab tiag tiag, kuv thiaj ua taus siab ntev. Kuv pom tias thaum muaj neeg txhob txwm thab kuv, zoo rau kuv sawv mus rau lwm qhov, los sis nrhiav kev los pab kom kuv siab txias. Kuv poj niam thiab coob tus kuj qhuas kuv thaum kuv tswj tau siab tus yees. Muaj tej lub sij hawm kuv npau taws heev, tiam sis kuv tseem nyiaj taus thiab. Kuv paub tias twb yog muaj tej lus cob qhia hauv phau Vajlugkub los pab, kuv thiaj hloov tau li no xwb.”

13. Muaj dab tsi pab tau peb kom ua qhov zoo qhov yog? (Kalatias 5:16)

¹³ Nyeem Kalatias 5:16. Yehauvas tso nws lub hwj huam dawb huv los pab peb xwv peb thiaj ua tau qhov zoo qhov yog. Thaum peb kawm Vajtswv Txoj Lus twb yog peb cia lub hwj huam dawb huv pab peb. Thaum peb mus tej kev sib txoos los Vajtswv lub hwj huam yeej pab peb, thiab peb tau nrog cov kwv tij nkauj muam uas tab tom sib zog ntsos xyaum ua qhov zoo qhov yog yam li peb ua ke. Tej no ua rau peb tuaj zog kawg li. (Henplais 10:24, 25; 13:7) Tsis tas li ntawd thaum peb thov kom Yehauvas pab peb tswj tej yam uas peb lub siab ntshaw plias, nws yeej yuav muab lub hwj huam dawb huv los pab kom peb tswj taus txhua yam. Txawm peb thov li no los tej yam uas peb lub siab ntshaw plias yuav tsis ploj ntais tam sid mus tiam sis yuav pab kom peb tswj taus peb lub siab. Nyob rau hauv Kalatias 5:16 hais tias, cov uas cia Vajtswv lub hwj huam dawb huv pab lawv lub neej yuav tsis cia lawv lub siab kav lawv ib zaug li.

14. Vim li cas peb yuav tsum ua qhov zoo qhov yog kam tiag?

¹⁴ Thaum peb pib ua tau tej yam zoo rau Yehauvas, peb yuav tau rau siab ntso ua kam tiag thiab nco ntsoov ua qhov zoo qhov yog nkaus nkaus xwb. Vim li cas peb yuav tau nco ntsoov ua li ntawd? Tos peb ua li no los, yeeb vim yog peb tus yeeb ncuab yeej tsis tsaug zog ib chim los sis ib tsam li. Tus yeeb ncuab ntawd yog peb lub siab uas pheej txhib kom  peb mus ua txhaum. Txawm tom qab peb ua kev cai raus dej tag lawm los, qee zaug peb lub siab tseem ntshaw plias mus ua tej yam tsis zoo xws li twv txiaj yuam pov, qaug dej qaug cawv los sis saib tej duab liab qab. (Efexus 5:3, 4) Muaj ib tug kwv tij hluas hais tias: “Ib yam uas nyuaj rau kuv tshaj plaws yog muaj lub siab nyiam txiv neej. Kuv xav tias ntev mus ntev tuaj yeej yuav txawj ploj mus tiam sis haj tseem khi nrees hauv kuv nruab siab.” Yog koj muaj ib lub siab ntshaw plias ua tej yam tsis zoo, dab tsi thiaj pab tau koj?

15. Vim li cas zoo rau peb paub tias tsis yog peb xwb thiaj muaj lub siab xav txog tej yam tsis zoo? (Saib daim duab.)

¹⁵ Thaum koj tswj koj lub siab kom tsis txhob mus ua li lub siab ntshaw, nco ntsoov tias kuj muaj lwm tus kuj yuav tau tswj lawv lub siab ib yam li koj thiab. Nyob rau hauv phau Vajlugkub hais tias: “Tej kev sim siab uas nej raug yeej yog tej kev sim siab uas sawvdaws raug.” (1 Kauleethaus 10:13, thawj kab) Cov lus no yeej hais tsi ntsees rau cov ntseeg nyob hauv lub nroog Kauleethaus, tsis hais poj niam thiab txiv neej. Muaj ib txhia yeej tau deev luag poj luag txiv, txiv neej deev txiv neej, poj niam deev poj niam, thiab ua neeg qaug dej qaug cawv ua ntej lawv los ntseeg Yehauvas. (1 Kauleethaus 6:9-11) Koj puas tau xav tias nyob hauv lawv nruab siab nruab plawv, lawv ua kev cai raus dej tag lawm ces lawv tsis muaj lub siab ntshaw plias rov mus ua tej ntawd? Yeej tsis yog li ntawd kiag li. Txawm lawv yog cov xaiv tseg lawm los lawv haj tseem yog noob txaug neeg txhaum. Muaj qee zaug lawv tseem muaj lub siab ntshaw plias ua tej yam tsis zoo. Raws li hais tas no, yeej cuab tau peb lub zog lawm hov ntau, yeeb vim yog lwm tus twb peem dhau tej uas koj tab tom xav ntsoov rau hauv nruab siab. Yog li ntawd, “muab siab rau ntseeg . . . rau qhov [koj] twb paub lawm hais tias cov kwvtij  ntseeg uas nyob thoob plaws hauv qab ntuj no, lawv tabtom raug kev tsimtxom ib yam li [koj] raug thiab.”​—1 Petus 5:9.

16. Peb yuav tau tsis txhob muab tej yam twg xav mus xav los ntau ntau, thiab vim li cas?

¹⁶ Tsis txhob xav ntev xav ntau tias tsis muaj leej twg yuav nkag siab tej koj raug. Yog pheej xav li no, yuav ua rau koj tsis qab siab ua dab tsi thiab haj tseem yuav ua rau koj muaj lub siab ntshaw plias mus ua tej yam tsis zoo. Nyob hauv phau Vajlugkub hais tias: “Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiamsis thaum nej raug kev sim siab Vajtswv yuav pab kom nej ua taus lub siab ntev.” (1 Kauleethaus 10:13, kab kawg) Yog li ntawd thaum peb lub siab ntshaw plias ua tej yam tsis zoo, peb yeej yuav thev taus xwb xwb li. Yog muaj Yehauvas ua tus pab peb lawm, peb yeej yuav tsis rov mus ua tej yam tsis zoo.

17. Txawm peb tswj tsis tau lub siab ntshaw plias xav ua tej yam tsis zoo los peb tswj tau dab tsi?

¹⁷ Nco ntsoov li no tias: Vim tib neeg yog noob txaug neeg txhaum ces yus yeej muaj lub siab ntshaw plias mus ua tej yam tsis zoo. Tiam sis thaum koj muaj lub siab ntshaw plias yam li ntawd, cia li tswj kiag koj lub siab tam sid yam li Yauxej khiav tawm ntawm Pautifas tus poj niam mus tam sid. (Chivkeeb 39:12) Koj tsis tas yuav ua raws li koj lub siab ntshaw.

18-19. Peb yuav tshuaj peb tus kheej li cas xwv peb thiaj cia Vajtswv hloov peb tej kev xav?

¹⁸ Thaum peb cia Vajtswv hloov peb tej kev xav, yog peb tshuaj ntshis tej peb xav thiab ua kom haum Yehauvas siab. Yog li ntawd, peb yuav tau rov tshuaj peb tus kheej yam li no tias: ‘Kuv tej kev coj noj coj ua puas qhia tau tias kuv paub peb nyob rau tiam kawg lawm? Kuv puas hloov zuj zus kom coj tau lub siab tshiab? Kuv puas cia Yehauvas lub hwj huam pab kuv kom kuv thiaj tswj taus lub siab uas ntshaw plias tej yam tsis zoo?’

¹⁹ Thaum koj rov tshuaj koj tus kheej yam li no, tsis txhob xav tias koj yuav tau ua txhua yam kom zoo zoo tiam sis xav txog qhov uas koj twb hloov tau ntau npaum li cas lawm. Yog koj paub tias tseem tshuav qhov twg hloov tsis tau tau, los tsis txhob ntaus siab me. Tiam sis ua raws li cov lus nyob hauv Filipis 3:16 uas hais tias: “Txawm peb paub Vajtswv zoo npaum li cas los cia peb peem tiag mus lawm tom ntej kom peb yim huab paub Vajtswv ntxiv.” Yog koj ua li hais tas no, Yehauvas yuav foom koob hmoov rau koj lub dag lub zog.