ZAJ KAWM 1
“Koj Tej Lus Puav Leej Tseeb Tag Nrho”
NQE VAJLUGKUB XYOO 2023: “Koj tej lus puav leej tseeb tag nrho.”—PHAU NTAWV NKAUJ 119:160, NWT.
ZAJ NKAUJ 96 Phau Vajlugkub
ZAJ NO THAM TXOG DAB TSI? a
1. Vim li cas niaj hnub niam no muaj coob leej tsis tso siab rau tej lus hauv phau Vajlugkub?
MUAJ coob leej ntau tus niaj hnub niam no tsis pom qab tso siab rau leej twg. Lawv tsis paub tseeb tias tej neeg uas lawv ib txwm hwm xws li tej nom tswv, tej neeg tshawb txuj ci, thiab tej neeg ua lag ua luam puas yog ua zoo rau lawv tiag tiag. Tsis tas li ntawd, lawv kuj tsis xav mloog tej xib hwb uas lees tias ntseeg Vajtswv lus, lawv thiaj ua xyem xyav rau tej lus uas nyob hauv phau Vajlugkub.
2. Raws li Phau Ntawv Nkauj 119:160, peb tso siab li cas?
2 Tag nrho Yehauvas cov tib neeg yeej paub meej meej tias “Vajtswv tsis txawj dag” thiab nws tsuas xav kom peb tau qhov zoo xwb. (Henplais 6:18; Yaxayas 48:17) Peb paub tias peb yeej tso siab tau rau tej lus hauv phau Vajlugkub vim nws “tej lus puav leej tseeb tag nrho.” (Phau Ntawv Nkauj 119:160, NWT ) Peb yeej xam pom ib yam li ib tug neeg tshawb fawb Vajlugkub sau tias: “Tsis muaj ib zaug uas Vajtswv yuav hais lus dag los sis tej lus nws hais yuav tag tawb tag do. Vajtswv cov tib neeg yeej tso siab rau tej lus nws hais yeeb vim yog lawv tso siab rau nws.”
3. Nyob rau hauv zaj kawm no yuav piav txog dab tsi?
3 Yuav ua li cas peb thiaj pab tau lwm tus tso siab rau Vajtswv Txoj Lus ib yam li peb? Cia peb mus piav txog peb lub ntsiab tias vim li cas peb ho tso siab tau rau cov lus nyob hauv phau Vajlugkub. Peb lub ntsiab ntawd yog phau Vajlugkub yeej tsis tau hloov, tej faj lem los yeej muaj tshwm sim, thiab tej lus nyob hauv phau Vajlugkub yeej kho tau tib neeg lub neej.
PHAU VAJLUGKUB YEEJ TSIS HLOOV
4. Vim li cas ib txhia tib neeg ho xav tias phau Vajlugkub hloov lawm?
4 Vajtswv Yehauvas siv kwv lam li 40 leej txiv neej sau phau Vajlugkub. Tej nqe Vajlugkub qub qub sau puag txheej thaum ub yeej tsis kav los txog niaj hnub niam no. Vim yav thaud, tej tib neeg pheej muab ntawv los sau cov nqe Vajlugkub kom raws nraim li qub xwv thiaj tau siv ces peb tsuas muaj cov ntawv uas sau puag tom qab no xwb. Tej no thiaj ua rau ib txhia xav tias tej lus peb nyeem hauv phau Vajlugkub puas raug cov lus uas Yehauvas kom 40 leej txiv neej sau. Ua li cas peb ho paub tseeb tias txhua yam haj tseem zoo li qub?
Cov tib neeg uas muaj kev cob qhia sau Cov Nqe Lus Henplais yeej ua tib zoo maj mam sau Vajtswv Txoj Lus kom raug raug (Saib nqe 5))
5. Ua li cas Cov Nqe Lus Henplais ho sau tau raws nraim li qub? (Saib daim duab ntawm lub khaum.)
5 Yuav kom txuag tau cov lus nyob hauv phau Vajlugkub, Yehauvas hais rau nws cov tib neeg kom muab sau raws nraim yam li cov lus ntawd. Nws sam hwm kom cov Ixayees tej vaj ntxwv nyias sau nyias ib phau ntawv raws nraim li nws tej kev cai uas twb tau sau tseg cia lawm thiab nws xaiv cov Levis cob qhia tej kev cai ntawd rau nws cov tib neeg. (2 Kevcai 17:18; 31:24-26; Nehemis 8:7) Tom qab cov Yudais poob cev qhev hauv teb chaws Npanpiloos, muaj ib co txawj txawj sau ntawv txawm pib muab Cov Nqe Lus Henplais sau kom tau ntau ntau. (Exalas 7:6) Cov txiv neej no ua tib zoo sau kom tsis yog sau tau cov lus raug raug xwb tiam sis txhua tus tsiaj ntawv los yuav tsum raug huv tib si. Txawm li ntawd los, vim tib neeg yog noob txaug neeg txhaum ces yeej tseem tshuav yam puav txauv me ntsis nyob hauv phau Vajlugkub lawm thiab. Tiam sis vim lawv sau tau ntau ntau phau ces lawv thiaj muab coj los sib piv, lawv thiaj nrhiav tau qhov twg yog sau yuam kev. Lawv nrhiav li cas thiaj nrhiav tau?
6. Thaum rov sau phau Vajlugkub, ua cas ho muaj tej qho yuam kev?
6 Muaj ib yam uas cov neeg tshawb fawb Vajlugkub niaj hnub niam no nrhiav tau tej yam yuam kev thaum rov muab phau Vajlugkub sau dua. Muab ua piv txwv li no: Muaj 100 tus txiv neej siv tes sau ib sob ntawv twg. Ib tug txawm sau tau ib qho yuam kev me ntsis. Qhov uas paub hais tias nws sau yuam kev yog muab nws qhov ntawv coj mus piv rau lwm tus qhov ntawv seb puas zoo ib yam. Zoo ib yam li ntawd, cov neeg tshawb fawb Vajlugkub muab tej nqe Vajlugkub qub qub sau puag thaum ub coj los piv rau qhov tshiab, lawv thiaj nrhiav tau tej qho uas sau yuam kev los sis tej qho uas ho sau tsis tau.
7. Cov tib neeg uas muab phau Vajlugkub rov sau dua ho sau tau raug npaum li cas?
7 Yeej tsis yooj yim rau cov tib neeg uas rov muab phau Vajlugkub sau dua. Xws li tib neeg nrhiav tau phau ntawv uas qub tshaj plaws sau Cov Nqe Lus Henplais tiav rau thaum xyoo 1008 los sis 1009 tom qab Yexus yug hu ua Leneenkam Khaudes (Leningrad Codex). Tsis ntev tas los no, tib neeg kuj nrhiav tau ib co ntawv uas muaj tej nqe Vajlugkub uas ntuag tag thiab tej phau Vajlugkub uas nyob ntev tshaj li 1,000 xyoo ua ntej phau Leneenkam Khaudes. Yog li ntawd, tej zaum ib txhia tib neeg xav tias muab cov ntawv uas lawv nrhiav tau ntawd thiab phau ntawv Leneenkam Khaudes coj los sib piv ntshe nyias yuav txawv nyias, yeeb vim yog muaj li 1,000 xyoo kem lawm. Qhov tseeb tiag, tsis muaj li ntawd. Thaum cov neeg tshawb fawb Vajlugkub muab ob co ntawv no los sib piv, kuj tsis txawv deb ua luaj twg thiab. Tsuas yog qho lo thiaj txawv xwb, tus nru lus hauv phau Vajlugkub tseem nyob li qub.
8. Qhov uas txawv txav ntawm Cov Nqe Lus Kilis thiab lwm cov ntawv qub qub yog li cas tiag?
8 Cov ntseeg txheej thaum ub kuj xyaum cov uas rov xuas tes sau Cov Nqe Lus Henplais. Lawv maj mam saib, maj mam sau 27 phau ntawv uas yog Cov Nqe Lus Kilis. Lawv siv cov nqe lus no thaum mus sib txoos thiab thaum mus tshaj tawm txoj xov zoo. Muaj ib tug neeg tshawb fawb Vajlugkub muab Cov Nqe Lus Kilis coj mus piv rau lwm phau ntawv uas sau rau tib lub caij nyoog ntawd, nws thiaj hais tias: “Raws li kuv pom mas tej phau uas sau Cov Nqe lus Kilis haj tseem muaj ntau dua thiab txhij dua lwm phau ntawv.” Muaj ib phau ntawv piav txog keeb kwm ntawm Cov Nqe Lus Kilis hais tias: “[Cov Nqe Lus Kilis] niaj hnub niam no uas tib neeg muab txhais tawm yeej hais tau sib dhos pes daws yam li cov yav thaum ub. Cia li tso siab plhuav nyeem.”
9. Raws li Yaxayas 40:8, muaj tseeb li cas txog txoj xov hauv phau Vajlugkub?
9 Tau ntau pua xyoo tib neeg maj mam ua tib zoo rov xuas tes sau phau Vajlugkub kom raug raug, peb thiaj tau phau Vajlugkub los nyeem thiab kawm niaj hnub no. b Peb paub tias Yehauvas yeej saib ntshis kom txuag tau txoj xov hauv phau Vajlugkub cia. (Nyeem Yaxayas 40:8.) Tiam sis muaj ib txhia yws hais tias txawm peb tau phau Vajlugkub los tsis txhais hais tias cov lus ntawd yog Vajtswv tshoov lawm. Cia peb mam li mus piav ntxiv tias, vim li cas phau Vajlugkub haj tseem yog Vajtswv tshoov.
TEJ FAJ LEM YEEJ MUAJ TSHWM SIM
Sab laug: C. Sappa/DeAgostini/Getty Images; sab xis: Image © Homo Cosmicos/Shutterstock
Tej lus faj lem hauv phau Vajlugkub muaj tshwm sim yav thaum ub thiab niaj hnub niam no (Saib nqe 10-11) d
10. Piav txog ib zaj faj lem seb tau muaj tshwm sim li cas thiaj muaj raws li 2 Petus 1:21 tau hais. (Saib cov duab.)
10 Nyob hauv phau Vajlugkub, muaj ntau zaj faj lem twb tshwm sim lawm. Ib txhia faj lem yeej sau tau ntau pua xyoo ua ntej yuav tshwm sim. Peb paub tej no muaj tseeb vim tej faj lem nyob hauv phau Vajlugkub yog Yehauvas ua tus qhia. (Nyeem 2 Petus 1:21.) Xws li zaj faj lem uas hais txog lub nroog Npanpiloos txheej thaum ub raug puas tsuaj. Kwv lam li ib ncuas sij hawm ntawm xyoo 778 txog rau 732 ua ntej Yexus yug, Vajtswv tshoov Yaxayas kom hais txog lub nroog Npanpiloos tias yuav raug puas tsuaj. Nws kuj hais ntxiv tias tus uas tuaj ntaus yeej lub nroog ntawd npe hu ua Xailas. (Yaxayas 44:27–45:2) Tsis tas li ntawd, Yaxayas hais tias lub nroog Npanpiloos yuav raug puas tsuaj thiab tsis muaj neeg nyob hauv ntxiv lawm. (Yaxayas 13:19, 20) Yeej muaj raws nkaus li ntawd tiag. Xyoo 539 ua ntej Yexus yug, Npanpiloos poob mus rau cov Medes thiab Pawxias lawm tiag. Niaj hnub no, lub nroog muaj koob nto npe no nyob do cuas cia lawm xwb.—Mus saib zaj yeeb yaj kiab Phau Vajlugkub Qhia Tias Npanpiloos Yuav Puas Tsuaj Li Cas hauv phau Nyob Kaj Siab Lug Mus Ib Txhis, zaj kawm 03 lub ntsiab me 5.
11. Piav seb Daniyees 2:41-43 muaj tshwm sim li cas niaj hnub niam no.
11 Tej faj lem nyob hauv phau Vajlugkub tsis yog tshwm sim yav tag los lawm xwb tiam sis peb yeej pom muaj tshwm sim rau niaj hnub niam no thiab. Xws li zaj lus faj lem uas Daniyees sau txog teb chaws Askiv thiab teb chaws Yunaithim Xatej (United States) sib koom tes tswj teb kav chaw. (Nyeem Daniyees 2:41-43.) Zaj lus faj lem ntawd hais txog ob lub teb chaws no tias lawv yuav tawv li hlau thiab phom yam li av nplaum ces “ib txhia muaj zog thiab ib txhia tsis muaj zog.” Yog nkaus li ntawd lawm tiag. Askiv thiab Yunaithim Xatej muaj zog thiab tawv yam li hlau, lawv thiaj ntaus yeej ob Ntsuj Rog Thoob Qab Ntuj thiab muaj tub rog coob heev. Txawm li ntawd los, tej pej xeem haj tseem txo tau lawv lub zog los ntawm qhov uas tej pej xeem tawm tsam tej chaw ua hauj lwm, sawv tawm tsam nom tswv thiab tej lag luam. Muaj ib tug neeg paub kev nom kev tswv zoo zoo hais tias: “Niaj hnub niam no, tsis muaj ib roog nom tswv twg uas yuav cais ua pab ua pawg thiab ua voj ua viag npaum li teb chaws Yunaithim Xatej.” Hos hais txog teb chaws Askiv, tau ob peb xyoos tas los no lawv yeej sib cais zuj zus vim nyias muaj nyias ib lub tswv yim seb puas koom siab pab lwm lub teb chaws. Tej kev tsis sib haum xeeb no ua tau rau Askiv thiab Yunaithim Xatej ua tsis tau ywj siab.
12. Tej lus faj lem nyob hauv phau Vajlugkub qhia peb li cas?
12 Tej lus faj lem nyob hauv phau Vajlugkub uas twb tshwm sim lawm txhawb kom peb tso siab rau Vajtswv tej lus cog tseg uas tseem yuav muaj yav tom ntej no. Peb yeej xav tib yam li tus sau phau ntawv nkauj tej lus thov Yehauvas tias: “Kuv tos ntsoov koj txojkev cawm dim; kuv cia siab ntsoov rau koj tej lus.” (Phau Ntawv Nkauj 119:81) Nyob rau hauv phau Vajlugkub, Yehauvas pub kom peb “muaj kev cia siab rau yav tom ntej.” (Yelemis 29:11) Peb txoj kev vam kev cia siab no tsis yog los ntawm neeg tiam sis yog tej lus Yehauvas cog tseg. Cia peb sib zog ntsos kawm txog tej lus faj lem nyob hauv phau Vajlugkub xwv peb thiaj li yuav tso siab rau Vajtswv Txoj Lus.
TEJ LUS HAUV PHAU VAJLUGKUB KHO TAU NEEG LUB NEEJ
13. Raws li Phau Ntawv Nkauj 119:66, 138, vim li cas peb thiaj tso siab tau rau tej lus nyob hauv phau Vajlugkub?
13 Muaj dua ib yam uas peb tso siab tau rau cov lus hauv phau Vajlugkub yog pab tau neeg lub neej. (Nyeem Phau Ntawv Nkauj 119:66, 138.) Xws li muaj ib khub txij nkawm twg lub neej twb tshuav pluam lawm xwb los yog nkawd mloog tej lus nyob hauv phau Vajlugkub ces yeej kho tau nkawd lub neej. Nkawd tej tub tej ki los yuav ua neej kaj siab lug vim muaj niam muaj txiv teev tiam Yehauvas es saib xyuas thiab hlub lawv.—Efexus 5:22-29.
14. Piav seb tej lus nyob hauv phau Vajlugkub pab tau ib tug lub neej li cas.
14 Tej lus nyob hauv phau Vajlugkub yeej pab tau cov neeg phem hloov lawv lub neej. Xws li muaj ib tug npe hu ua Zeb uas raug kaw rau hauv tsev loj cuj thiab tau lub txim tuag. c Tib neeg yeej hnov ua nroo ntws tias nws yog ib tug neeg phem heev nws thiaj tau lub txim tuag. Muaj ib hnub nws txawm mus zaum nrog ib tug uas tab tom kawm Vajlugkub nrog Yehauvas Cov Tim Khawv. Cov kwv tij uas tuaj qhia ntawd coj cwj pwm zoo zoo ua rau nws xav tsis thoob ces nws thiaj pib kawm Vajlugkub nrog lawv. Thaum nws hloov nws lub neej los coj raws li tej lus hauv phau Vajlugkub ces nws tus cwj pwm txawm pib hloov ua zoo zuj zus lawm thiab. Ntev mus ntev tuaj, nws txawm ua tau ib tug tshaj tawm uas tsis tau raus dej ces tsis ntev nws txawm ua kev cai raus dej lawm. Nws kub siab lug qhia txog Vajtswv lub Nceeg Vaj rau cov uas nrog nws raug kaw ntawd ces muaj plaub tug thiaj li kawm Vajlugkub lawm thiab. Hnub uas luag teem txim yuav muab nws tua, Zeb yeej hloov tau nws lub neej lawm tiag. Nws ib tug kws lij choj hais tias: “Zeb tsis yog tus neeg uas kuv paub 20 lub xyoos dhau los lawm. Tej uas Yehauvas Cov Tim Khawv qhia hloov tau nws lub neej.” Txawm luag muab Zeb tua lawm los, nws tus yam ntxwv yeej qhia tau tias peb yeej tso siab tau rau Vajtswv Txoj Lus thiab tej lus ntawd muaj peev xwm hloov tau tib neeg lub neej.—Yaxayas 11:6-9.
Tej lus nyob hauv phau Vajlugkub hloov tau txhua haiv neeg lub neej (Saib nqe 15) e
15. Qhov uas Yehauvas cov tib neeg coj raws li phau Vajlugkub ho ua rau lawv txawv ntawm lwm tus li cas? (Saib daim duab.)
15 Yehauvas cov tib neeg coj raws li tej lus hauv phau Vajlugkub, lawv thiaj sib koom siab. (Yauhas 13:35; 1 Kauleethaus 1:10) Tib neeg yeej pom tias Yehauvas cov tib neeg yeej sib koom siab thiab nyob thaj yeeb, tsis zoo li cov tib neeg niaj hnub niam no uas cia tej kev nom kev tswv, lawv haiv neeg los sis qhov uas muaj txiag nplua nuj muab lawv cais. Muaj ib tug txiv neej npe hu ua Txhim yeej pom tias Yehauvas cov tib neeg sib koom siab. Nws loj hlob rau ntawm ib lub teb chaws hauv Afika. Thaum muaj tsov rog, nws mus ua ib tug tub rog tiam sis nws khiav tawm mus nyob lwm lub teb chaws. Nws thiaj li mus ntsib Yehauvas Cov Tim Khawv. Txhim hais tias: “Kuv kawm tias txoj kev ntseeg tseeb tsis mus koom ua kev nom kev tswv thiab tsis cais ua pab ua pawg. Lawv ib leeg yeej hlub ib leeg tiag tiag. Kuv ib txwm siv kuv lub neej los tiv thaiv kuv lub teb chaws tiam sis thaum kuv paub qhov tseeb hauv phau Vajlugkub lawm, kuv thiaj muab kuv lub neej cob rau Yehauvas.” Txhim lub neej yeej hloov hlo lawm tiag. Nws tsis mus sib ntaus sib tua nrog lwm haiv neeg tiam sis nws kub siab lug qhia txhua tus nws ntsib txog qhov tseeb hauv phau Vajlugkub. Yog li ntawd, peb yeej tso siab tau rau Vajtswv Txoj Lus vim yeej pab tau txhua haiv tib neeg.
TSO SIAB PLHUAV MUS LI RAU VAJTSWV TXOJ LUS
16. Vim li cas ho tseem ceeb rau peb tso siab plhuav rau Vajtswv Txoj Lus?
16 Lub qab ntuj no yuav phem zuj zus ntxiv, yog li ntawd yeej yuav tsis yooj yim rau peb tso siab rau Vajtswv Txoj Lus. Tej zaum tib neeg yeej yuav hais tej lus los mus dag ntxias peb kom txhob ntseeg tej lus hauv phau Vajlugkub los sis ntxias kom peb ua xyem xyav seb Yehauvas puas yog xaiv tus qhev ncaj thiab ntse los mus coj nws haiv neeg tiag. Yog peb twb paub lawm tias Vajtswv Txoj Lus ib txwm yog qhov tseeb ces peb yuav tsis mloog tej lus dag ntxias ntawd. Peb yuav “txiav txim siab ua raws li [Yehauvas] tej kevcai mus txog hnub kawg.” (Phau Ntawv Nkauj 119:112) Tsis tas li ntawd, peb “yuav tsis txajmuag” qhia lwm tus txog qhov tseeb hauv phau Vajlugkub thiab txhawb kom lawv coj raws li tej uas lawv kawm. (Phau Ntawv Nkauj 119:46) Ntxiv ntawd, peb yuav “ua siab ntev. . . thiab muaj siab xyiv fab” thev tej kev sim siab xws li kev tsim txom.—Kaulauxais 1:11; Phau Ntawv Nkauj 119:143, 157.
17. Nqe Vajlugkub rau xyoo 2023 pab kom peb nco ntsoov li cas?
17 Peb ris Yehauvas txiaj ntsig kawg li uas nws tau pub peb los paub qhov tseeb hauv phau Vajlugkub. Qhov uas peb paub qhov tseeb pab kom peb muaj lub siab tus thiab qhia kom peb txawj ua neej nyob rau hauv lub qab ntuj khwb uas ua voj ua viag. Tsis tas li ntawd, qhov tseeb pab kom peb muaj kev vam kev cia siab rau lub neej tom hauv ntej thaum Vajtswv lub Nceeg Vaj kav. Nqe Vajlugkub rau xyoo 2023 yuav pab kom peb tso siab plhuav rau Vajtswv Txoj Lus tias txhua yam nyob rau hauv puav leej tseeb tag nrho.—Phau Ntawv Nkauj 119:160, NWT.
ZAJ NKAUJ 94 Peb Zoo Siab Muaj Vajtswv Txoj Lus
a Nqe Vajlugkub rau xyoo 2023 yog: “Koj tej lus puav leej tseeb tag nrho.” (Phau Ntawv Nkauj 119:160, NWT ) Peb yeej ntseeg raws li nqe Vajlugkub no tiam sis muaj coob leej ntau tus tsis ntseeg tej lus nyob hauv phau Vajlugkub tias yog lus tseeb thiab yuav tsav tau lub neej. Nyob rau hauv zaj kawm no, muaj peb yam yuav pab cov neeg muaj siab mos siab muag pom tias lawv yeej tso siab tau rau tej lus hauv phau Vajlugkub thiab tej lus ntawd yuav tsav tau lawv lub neej.
b Yog xav paub ntxiv txog seb ho txuag tau phau Vajlugkub li cas rau li cas, mus saib lub vej xaij jw.org/hmn thiab nrhiav “Phau Vajlugkub Tej Keeb Kwm”.
c Tau muab cov npe hauv zaj no ib txhia hloov lawm.
