1-2. Vim li cas peb ho ua kev cai nco txog Yexus txhua xyoo?

 YUAV luag 2,000 xyoo dhau los lawm, Yexus tau muab nws txoj sia los theej peb lub txhoj kom qhib tau txoj hau kev rau peb tau txoj sia mus ib txhis. Hmo ua ntej Yexus tuag, nws sam hwm rau nws cov thwj tim kom nco ntsoov muab ib lub ncuav thiab ib khob cawv coj los ua kev cai nco txog qhov uas nws tau los tuag theej tib neeg lub txhoj.​—1 Kauleethaus 11:23-26.

² Peb ua raws li Yexus sam hwm yeeb vim yog peb hlub tshua txog nws. (Yauhas 14:15) Qhov uas peb ris txiaj ntsig rau Yexus tus nqe theej txhoj yog lauj sij hawm los xav txog thiab thov Vajtswv ob peb lub lim tiam ua ntej thiab tom qab ua kev cai nco txog Yexus. Peb kuj mus qhia Vajlugkub ntau dua qhov qub thiab caw tib neeg coob npaum li coob tau tuaj ua kev cai nco txog Yexus. Tsis tas li ntawd, peb tsis cia ib yam dab tsi los mus tab kaum tau peb kom txhob mus ua kev cai nco txog Yexus.

3. Nyob hauv zaj kawm no yuav piav txog dab tsi?

³ Muaj peb lub ntsiab hauv zaj kawm no uas yuav piav tias Yehauvas cov tib neeg tau ua li cas rau li cas los nco txog Yexus tus nqe theej txhoj. Peb lub ntsiab ntawd yog: (1) ua kev cai nco txog Yexus yam li nws tau qhia tseg, (2) caw lwm leej lwm tus tuaj ua kev cai nco txog Yexus, thiab (3) ua kev cai nco txog Yexus tab txawm nyuaj npaum li cas.

4. Thaum ua kev cai nco txog Yexus, tham txog dab tsi xwb thiab vim li cas peb ho ris txiaj ntsig rau tej uas peb kawm tau hmo ntawd? (Lukas 22:19, 20)

⁴ Txhua xyoo thaum ua kev cai nco txog Yexus, peb mus mloog ib zaj lus qhuab qhia uas teb tau ntau yam. Peb kawm  tias vim li cas noob neej ho yuav tau ib tug los theej lawv lub txhoj thiab vim li cas ib tug neeg ho los tuag tau theej coob leej ntau tus lub txhoj. Tsis tas li ntawd, peb kawm txog lub ncuav thiab khob cawv seb piv txwv txog dab tsi thiab leej twg thiaj haus tau xwb. (Nyeem Lukas 22:19, 20.) Ntxiv ntawd, peb yuav xav txog tej yam uas zoo zoo tseem yuav los tom ntej rau txhua tus uas muaj kev vam kev cia siab nyob mus ib txhis hauv ntiaj teb no. (Yaxayas 35:5, 6; 65:17, 21-23) Peb tsis txhob saib tej no tsis tseem ceeb yam li qas txhiab qas vam tus tib neeg uas tsis tau paub thiab tsis ris txiaj ntsig rau Yexus tus nqe theej txhoj. Lawv tsis ua kev cai nco txog Yexus yam li nws tau qhia tseg. Vim li cas lawv ho tsis kam ua?

5. Tom qab cov tub txib tuag yuav tag, tib neeg pib ua kev cai nco txog Yexus li cas zuj zus?

⁵ Tau tsis ntev tom qab Yexus cov tub txib tuag yuav tag, cov cuav Khixatia pib txeem zuj zus rau hauv lub koom txoos. (Mathais 13:24-27, 37-39) Lawv hais tej yam “tsis tseeb ntxias cov ntseeg kom mus ua lawv thwjtim.” (Tes Haujlwm 20:29, 30) Ib yam “tsis tseeb” uas lawv dag ntxias yog hais tias Yexus twb tsis tau muab nws lub cev los tuag theej yam li nyob hauv phau Vajlugkub qhia tias nws tuag “tib zaug xwb ris tau ntau leej lub txim.” (Henplais 9:27, 28) Niaj hnub niam no los coob leej ntau tus haj tseem ntseeg tej lus tsis tseeb no. Lawv mus hauv lawv tej tsev teev ntuj tej zaum ib hnub ib zaug los sis ib lub lim tiam ib zaug mus noj lub ncuav thiab haus khob cawv. Lawv ntseeg hais tias lub ncuav thiab khob cawv hloov mus ua Yexus lub cev thiab cov ntshav vim lawv xav hais tias Yexus lub cev thiab cov ntshav theej tau ib tug twg thaum nws mus ua txoj kev cai no. Hos lwm txoj kev ntseeg ua kev cai nco txog Yexus tsawg zog tiam sis lawv cov tswv cuab twb tsis paub txog Yexus tus nqe theej txhoj tias pab tau lawv li cas. Yog li ntawd ib txhia thiaj li xav hais tias, ‘Yexus txoj kev tuag puas tshem tau kuv tej kev txhaum tiag tiag?’ Tos ib txhia xav li no los yeeb vim yog muaj lwm tus tshum hais tias Yexus tuag tsis tau los txhiv tib neeg tej kev txhaum. Cov uas raws Yexus qab yuav ua kev cai nco txog Yexus li cas thiaj tseeb?

6. Thaum xyoo 1872, cov tub kawm Vajlugkub xaus lus li cas?

⁶ Thaum xyoo 1870, muaj ib tug hu ua Tshalau Tes Laxaum (Charles Taze Russell) coj ib pab tub kawm Vajlugkub tshawb nrhiav cov nqe Vajlugkub kom ntxaws ntxaws. Lawv xav paub qhov tseeb txog Yexus tus nqe theej txhoj seb muaj nqis npaum li cas thiab yuav ua kev cai nco txog Yexus li cas rau li cas. Ces nyob rau xyoo 1872, lawv thiaj li xaus lus tias Yexus yeej tau tuag this noob neej lawm tiag. Lawv tsis muab tej no npog cia tiam sis lawv muab tshaj tawm rau hauv tej ntaub ntawv, ntawv xov xwm, thiab tej phau ntawv tseb tawm. Ces lawv thiaj li xyaum coj ib yam li cov ntseeg nyob thawj 100 xyoo es tsuas ua kev cai nco txog Yexus ib xyoos ib zaug xwb.

7. Qhov uas cov tub kawm Vajlugkub tshawb nrhiav li no pab tau peb li cas?

⁷ Niaj hnub niam no tej uas cov ntseeg tshawb nrhiav txheej thaum ub yeej pab tau peb kawg nkaus li. Pab peb mus rau txoj ke twg? Yehauvas tau pab kom peb nkag siab txog Yexus tus nqe theej txhoj seb yog li cas tiag thiab yuav pab noob neej li cas rau li cas. (1 Yauhas 2:1, 2) Peb kuj kawm tau tias nyob hauv phau Vajlugkub, muaj ob txoj kev vam kev cia siab rau cov neeg uas coj lub neej raws li Vajtswv lub siab nyiam. Ib txhia yuav mus nyob saum ntuj thiab tau txoj sia uas tsis  txawj tuag hos dua li lwm cov yuav tau nyob hauv lub ntiaj teb no mus ib txhis. Thaum peb kawm tau tias Yehauvas hlub tshua peb npaum li cas thiab Yexus tus nqe theej txhoj pab tau peb npaum li cas, ua rau peb yim huab nrog Yehauvas sib raug zoo ntxiv zuj zus. (1 Petus 3:18; 1 Yauhas 4:9) Yog li ntawd zoo ib yam li cov ntseeg nyob txheej thaum ub, cia peb mus caw txhua leej txhua tus kom tuaj ua kev cai nco txog Yexus raws li Yexus tau qhia tseg.

8. Yehauvas cov tib neeg tau ua dab tsi thiaj caw tau lwm tus tuaj ua kev cai nco txog Yexus? (Saib daim duab.)

⁸ Yehauvas cov tib neeg tau caw tib neeg tuaj ua kev cai nco txog Yexus tau ntau ntau xyoo lawm. Txij ntua thaum xyoo 1881, nyob hauv teb chaws Yunaithim Xatej (United States) ntawm lub xeev Pheexauvenyia (Pennsylvania) hauv Alenkinis (Allegheny) cheeb tsam, cov kwv tij nkauj muam mus sib txoos hauv ib tug lub vaj lub tsev ua kev cai nco txog Yexus. Tom qab no ib lub koom txoos twg, nyias thiaj ua kev cai nco txog Yexus nyias lawm. Thaum lub 3 Hlis xyoo 1940, cov kwv tij nkauj muam kuj caw tau lwm tus nyob rau hauv lawv koog uas qhia tias lawv muaj siab xib rau Yehauvas tuaj koom thiab. Xyoo 1960, yog thawj zaug Npe-ee muab cov ntawv caw luam tawm rau sawv daws caw tib neeg tuaj koom. Txij thaum ntawd los, sawv daws tau tseb daim ntawv caw no ntau kawg nkaus li. Ua li cas peb ho lauj sij hawm ntau ua luaj mus caw tib neeg?

9-10. Caw lwm tus tuaj ua kev cai nco txog Yexus pab tau lawv li cas? (Yauhas 3:16)

⁹ Ib yam uas peb caw lwm tus tuaj ua kev cai nco txog Yexus yog peb xav kom cov uas tuaj  thawj zaug paub qhov tseeb txog tej uas Yehauvas thiab Yexus nkawd tau ua rau peb. (Nyeem Yauhas 3:16.) Peb vam thiab cia siab tias tej uas lawv hnov thiab pom yuav pab tau lawv xav kawm thiab xav los pe hawm Yehauvas. Qhov uas peb caw tib neeg tuaj kuj pab tau lwm cov tib yam nkaus li ntawd thiab.

¹⁰ Peb kuj caw cov uas tsis teev tiam Yehauvas lawm tuaj thiab. Qhov uas peb ua li no yog peb xav kom lawv paub tias Yehauvas haj tseem hlub tshua txog lawv. Muaj coob leej ntau tus tuaj koom thiab peb zoo siab pom lawv kawg li. Qhov uas lawv tuaj ua kev cai nco txog Yexus no yuav ua rau lawv nco txog lawv lub neej thaum ub uas lawv tseem pe hawm Yehauvas. Xws li muaj ib tug muam hu ua Ntxhi. b Thaum muaj tus kab mob khaus viv-19 (COVID-19), nws rov qab pib mus qhia txoj xov zoo. Tom qab nws mus ua kev cai nco txog Yexus rau xyoo 2021, nws hais tias: “Qhov ua kev cai nco txog Yexus rau xyoo no mas raug kuv siab kawg li. Kuv tseg tau 20 xyoo lawm, kuv mam li tau rov qab mus qhia Vajlugkub rau tib neeg thiab caw lawv tuaj ua kev cai nco txog Yexus. Kuv kub siab lug mus caw txhua leej txhua tus, yeeb vim yog kuv ris txiaj ntsig rau tej uas Yehauvas thiab Yexus nkawd tau ua rau kuv. (Phau Ntawv Nkauj 103:1-4) Txawm tib neeg yuav nyiam thiab tsis nyiam los cia peb kub siab lug mus caw tib neeg tuaj ua kev cai nco txog Yexus, tsuav peb paub tias peb twb ua rau Yehauvas zoo siab lawm.

11. Yehauvas tau foom koob hmoov li cas rau qhov uas peb caw tib neeg tuaj ua kev cai nco txog Yexus? (Hakais 2:7)

¹¹ Yehauvas foom koob hmoov ntau heev rau qhov uas peb caw tib neeg tuaj ua kev cai nco txog Yexus. Nyob rau xyoo 2021, txawm tus kab mob khaus viv-19 loj npaum li cas los haj tseem muaj li 21,367,603 leej ua kev cai nco txog Yexus. Qhov no yuav luag li peb npaug Yehauvas Cov Tim Khawv nyob thoob qab ntuj. Yehauvas tsis txhawj tias yuav muaj pes tsawg leej tuaj koom. Nws tsuas xav paub tus twg muaj siab teev tiam nws tiag. (Lukas 15:7; 1 Timautes 2:3, 4) Peb paub zoo tias Yehauvas siv qhov uas peb caw tib neeg tuaj koom no los nrhiav tus uas muaj lub siab xib nws.​—Nyeem Hakais 2:7.

12. Vim li cas muaj qee lub caij ho nyuaj ua kev cai nco txog Yexus? (Saib daim duab.)

¹² Yexus faj lem hais tias nyob rau tiam kawg, peb yuav raug ntau tsav ntau yam xws li tsev neeg tawm tsam, kev tsim txom, kev tsov kev rog, kab mob kis, thiab lwm yam uas hais tsis txhua. (Mathais 10:36; Malakaus 13:9; Lukas 21:10, 11) Qee lub sij hawm tej yam uas hais tas los no yuav tab kaum peb kom ua tsis tau kev cai nco txog Yexus. Yog li ntawd, peb cov kwv tij nkauj muam ho tau ua li cas thiab Yehauvas ho pab lawv li cas xwv lawv thiaj ua tau kev cai nco txog Yexus?

13. Yehauvas tau foom koob hmoov rau Teeb li cas vim nws ua siab tawv qhawv thiab kub siab lug xav ua kev cai nco txog Yexus hauv tsev loj cuj?

¹³ Hauv tsev loj cuj. Peb cov kwv tij uas raug kaw hauv tsev loj cuj vim lawv txoj kev ntseeg, yeej ua npaum li lawv ua tau los ua kev cai nco txog Yexus. Cia peb mus piav txog ib tug hu ua Teeb. Nyob rau xyoo 2020 thaum lub caij ua kev cai nco txog Yexus, luag muab nws kaw rau ib chav uas txaus kaw li 5 tug tib neeg. Txawm nws raug kaw lawm los nws haj tseem khaws tau ib co khoom los ua kev cai nco txog Yexus thiab nws npaj ua tus cev zaj lus qhuab qhia rau hmo ntawd. Tiam sis cov neeg raug  txim nyob ib ncig nws ntawd nyiam hais lus phem thiab haus luam yeeb. Nws ua li cas xwb? Nws thov kom lawv tsis txhob hais lus phem thiab haus luam yeeb 1 txoos teev. Teeb ntseeg tsis tau li tias cov neeg raug txim ib ncig nws ntawd tsis haus luam yeeb thiab tsis hais lus phem rau lub sij hawm uas nws ua kev cai nco txog Yexus. Teeb hais tias, “Kuv qhia lawv txog qhov ua kev cai nco txog Yexus.” Txawm lawv tias lawv tsis xav hnov los thaum lawv pom thiab mloog Teeb ua kev cai nco txog Yexus, lawv kuj nug nws seb yog li cas rau li cas tiag.

14. Sawv daws tau ua li cas kom txhua leej txhua tus thiaj ua tau kev cai nco txog Yexus rau lub caij muaj tus kab mob khaus viv-19?

¹⁴ Tus kab mob khaus viv-19. Thaum tus kab mob no nyuam qhuav chiv, Yehauvas cov tib neeg mus ua tsis tau kev cai nco txog Yexus tim ntsej tim muag. Txawm muaj li no los yeej tav tsis tau kom lawv tsis txhob ua kev cai nco txog Yexus. c Cov koom txoos uas muaj Is Taws Nej ua kev cai nco txog Yexus rau saum huab saum cua. Tiam sis tej teb chaws uas tsis  muaj Is Taws Nej, tej ceg Npe-ee muab zaj lus qhuab qhia ua kev cai nco txog Yexus tshaj tawm rau hauv this vis (TV) los sis rau hauv xov tooj cua. Txuas ntxiv ntawd, tej ceg Npe-ee muab zaj lus qhuab qhia kaw ua 500 tawm yam lus kom cov uas nyob rau yaj sab thiaj tau ua kev cai nco txog Yexus. Tom qab txhais tag, muaj ib co kwv tij kuj tau muab xa rau cov kwv tij nyob yaj sab tau mloog.

15. Koj khaws tau Xw tus yam ntxwv li cas?

¹⁵ Raug tsev neeg tawm tsam. Nyuaj rau ib txhia ua kev cai nco txog Yexus, yeeb vim yog raug tsev neeg tawm tsam. Xws li muaj ib tug kawm Vajlugkub hu ua Xw. Nyob rau xyoo 2021, hnub ua ntej ua kev cai nco txog Yexus, Xw qhia rau tus qhia Vajlugkub rau nws tias nws raug tsev neeg tawm tsam heev thiab yuav koom tsis tau qhov ua kev cai nco txog Yexus. Tus qhia Vajlugkub rau Xw txawm nyeem Lukas 22:44 rau nws thiab qhia rau nws tias thaum peb muaj kev nyuaj siab li cas, peb yuav tau xyaum Yexus tus yam ntxwv es thov Yehauvas pab thiab tso siab plhuav rau Yehauvas. Hnub tom qab, Xw txawm npaj ib qho ncuav thiab ib qho cawv ces nws txawm saib zaj Tham Vajlugkub Ua Ke hauv lub vej xaij jw.org. Thaum tsaus ntuj, nws mus nyob ib leeg hauv txaj thiab siv nws lub xov tooj hu mus koom nrog sawv daws ua kev cai nco txog Yexus. Tom qab ntawd Xw hu mus rau tus qhia Vajlugkub rau nws tias: “Nag hmo koj txhawb kuv kawg nkaus li. Kuv yeej ua npaum li kuv ua tau kom nrog tau sawv daws ua kev cai nco txog Yexus thiab Yehauvas yeej pab kuv kawg nkaus li. Kuv zoo siab thiab ris txiaj ntsig tshaj plaws li.” Ua li koj puas xav tias Yehauvas yuav pab tau koj ib yam nkaus li ntawd thiab?

16. Vim li cas peb ho tso siab plhuav tias Yehauvas yuav foom koob hmoov yog peb mus ua kev cai nco txog Yexus? (Loos 8:31, 32)

¹⁶ Yehauvas yeej txaus siab heev thaum peb ua npaum li peb ua tau mus ua kev cai nco txog Yexus. Peb tso siab plhuav tias Yehauvas yeej yuav foom koob hmoov rau peb yog peb ris txiaj ntsig rau tej uas nws tau ua rau peb. (Nyeem Loos 8:31, 32.) Cia peb ua npaum li peb ua tau mus ua kev cai nco txog Yexus rau xyoo no thiab lub caij ntawd cia peb ua kom tshaj qhov peb niaj zaus ua rau Yehauvas.