THAUM hais txog lub “tsheb nees” uas hais nyob hauv phau Vajlugkub mas hais txog ntau hom tsheb nees. (Tes Haujlwm 8:28, 29, 38) Hos lub uas thaum tus nom Ethi-aupias caij, tej zaum nws caij lub loj loj uas tsis zoo li cov me uas siv ua rog los sis sib xeem. Cia peb mus tshuaj ntxiv txog qhov no.

Tus nom Ethi-aupias yog ib tug uas muaj meej mom siab thiab nws yuav tau khiav kev deb heev. Nws yog ‘neeg Ethi-aupias thiab yog ib tug nom tswv uas saib niam Vajntxwv Khadakes uas kav tebchaws Ethi-aupias lub txhab nyiaj.’ (Tes Haujlwm 8:27) Txheej thaum ub lub teb chaws Ethi-aupias nyob thaj tsam teb chaws Xudees (Sudan) txuas mus rau yav qab teb kawg nkaus hauv tebchaws Iyiv. Tej zaum tus nom no tsis caij tib lub tsheb nees kom mus txog chaw. Txawm li ntawd los nws yuav tau thauj khoom ntau ntau nrog nws. Nyob rau thawj 100 xyoo muaj tej tsheb nees thauj neeg mus ub mus no uas muaj plaub lub log thiab muaj ib qho khwb sab saud li lub tsev. Muaj ib phau ntawv uas piav txog phau Tes Hauj Lwm tau hais li no tias cov tsheb nees uas siv mus kev deb, “muaj plaub lub log thiab muaj ib qho khwb sab saud zoo li lub tsev, thiaj muaj chaw ntim khoom thiab tsis sab thaum yus mus kev deb. Tsis tas li ntawd mus tau deb dua.”

Tus nom Ethi-aupias tab tom nyeem ntawv thaum Filis caum cuag nws. Hauv nqe Vajlugkub hais tias “Filis khiav ceev nrooj mus, nws hnov tus nom ntawd tabtom nyeem Yaxayas uas yog tus cev Vajtswv lus phau ntawv.” (Tes Haujlwm 8:30) Cov tsheb nees siv mus kev deb khiav tsis nrawm pe tsawg. Vim khiav tsis nrawm, tus nom thiaj nyeem tau ntawv thiab Filis los thiaj khiav caum cuag tau lub tsheb nees.

Tus nom Ethi-aupias hais kom “Filis nce mus nrog nws caij tsheb nees.” (Tes Haujlwm 8:31) Cov uas caij tej tsheb nees khiav sib xeem yuav tsum sawv ntsug caij xwb, tsis muaj chaw zaum. Tiam sis cov tsheb nees siv mus kev deb muaj chaw txaus rau tus nom Ethi-aupias thiab Filis zaum.

Vim tej uas tau sau tseg hauv Tes Hauj Lwm tshooj 8 thiab tej keeb kwm uas tshawb tau, peb cov ntaub ntawv thiaj tau hloov tej duab txog tus nom Ethi-aupias uas caij lub tsheb nees mus kev deb, nws tsis yog caij lub tsheb nees me uas siv ua rog los sis sib xeem.