1-2. Cov uas teev tiam Yehauvas raug tej yam twg?

 THAUM muaj ib yam dab tsi los raug peb lub neej, yeej ua rau peb lub neej hloov hlo thiab tsis zoo li qub lawm. Xws li muaj ib tug kwv tij npe hu ua Lwm. a Tib ntsais muag xwb nws muaj kheeb xawm (cancer). Kws tshuaj hais rau nws tias nws tsuas tshuav ob peb lub hlis ua neej nyob lawm xwb. Hos muaj ib tug muam npe hu ua Mab. Nws thiab nws tus txiv kub siab lug teev tiam Yehauvas. Ua ciav muaj ib hnub Mab mam li soj tau tias nws tus txiv uas yog ib tug txwj laus, muaj dua ib lub neej nrog lwm tus uas nws tsis paub txog. Ntxiv ntawd, muaj ib tug muam hu ua Ci uas haj tseem tsis tau muaj txij nkawm. Muaj cua daj cua dub los ntaus ntawm qhov chaw uas nws nyob ces nws yuav tau khiav ntawm thaj chaw ntawd mus. Thaum nws rov qab los txog, nws lub tsev puas ntsoog tag. Ib sij huam xwb, lawv cov uas hais no lub neej cia li hloov hlo tag nrho. Ua li puas tau muaj ib yam dab tsi los raug koj es hloov hlo koj lub neej yam nkaus li lawv cov no?

² Txawm peb teev tiam Yehauvas los peb yeej yuav raug tej kev nyuaj siab ntxhov plawv thiab muaj mob muaj nkeeg li tib neeg ib txwm raug. Tsis tas li ntawd, tej zaum peb tseem yuav tau thev tej kev tsim txom los sis kev tawm tsam los ntawm cov uas ntxub Yehauvas cov tib neeg. Txawm Yehauvas tsis tshem tej no tawm mus los nws cog lus tias nws yuav pab peb. (Yaxayas 41:10) Yog peb muaj Yehauvas pab, peb yuav muaj  kev zoo siab, txawj txiav txim siab, thiab yuav tsis tso nws tseg tab txawm yuav raug kev nyuaj siab npaum li cas. Nyob rau hauv zaj kawm no yuav tham txog plaub txoj hau kev uas Yehauvas pab peb thaum peb lub neej tsaus ntuj nti. Ntxiv ntawd, zaj no kuj yuav piav tias thaum Yehauvas cev tes pab peb, peb yuav tau coj li cas.

YEHAUVAS YUAV TIV THAIV KOJ

3. Thaum peb raug ib yam kev nyuaj siab twg, peb lub siab zoo li cas?

³ Kev ntxhov siab. Thaum muaj ib yam kev nyuaj siab twg los raug peb, peb ua zaj twg tsav twg los ua tsis tsheej vim ntxhov siab txoog xwb. Zoo ib yam li huab laum nkaus ua rau peb tsis pom tom hauv ntej seb yuav taug sab xis los sis sab laug. Ci hais tias: “Tom qab cua daj cua dub muab kuv lub tsev ntsawj puas tsuaj tag, ua rau kuv lub siab puas tsoj puas tsus thiab ua dab tsi los ua tsis tsheej.” Hos Mab hais li no thaum nws tus txiv tsis tab cuab vij zeej tias: “Ua rau kuv tu siab nrho. Kuv lub siab los puas ntsoog tag. Kuv ua zaj twg tsav twg los tsis tsheej. Kuv tsis xav hais tias kuv lub neej yuav xaus li no.” Ua li Yehauvas cog lus tias nws yuav pab peb rau tej ntwb ntu zoo li no li cas?

4. Raws li Filipis 4:6, 7, Yehauvas cog lus li cas rau peb?

⁴ Yehauvas yuav ua li no. Yehauvas cog lus tias nws yuav pub kom peb “muaj lub siab tus.” (Nyeem Filipis 4:6, 7.) Tos peb muaj tau lub siab tus ntawd los twb yog vim peb muaj ib txoj kev sib raug zoo nrog nws. “Neeg yeej tsis nkag siab txog Vajtswv txoj kev siab tus no.” Puas tau muaj ib zaug uas tom qab koj thov Vajtswv tag ces koj lub siab cia li nyob tus yees lawm xwb? Qhov ntawd twb yog “Vajtswv txoj kev siab tus.”

5. Vajtswv txoj kev siab tus tsom kwm tau peb lub siab thiab peb txoj kev xav li cas?

⁵ Filipis 4:7 kuj hais tias Vajtswv txoj kev siab tus “yuav tsom kwm nej lub siab thiab nej txoj kev xav.” Tos siv lo lus “tsom kwm” hauv nqe no los vim yav thaum ub muaj tub rog tsom kwm lub nroog kom txhob muaj lwm tus tuaj ntaus tau. Cov tib neeg uas nyob rau hauv lub nroog ntawd nyob tso siab lug vim lawv paub hais tias tej tub rog yuav tiv thaiv lawv. Zoo ib yam li ntawd, yog hais tias Vajtswv txoj kev siab tus tsom kwm peb lub siab thiab peb txoj kev xav ces peb lub siab yuav tus yees thiab tsis txhawj ntshai ib yam dab tsi. (Phau Ntawv Nkauj 4:8) Txawm tias tej teeb meem uas peb raug tsis hloov nthawv nthav tam sid los nco ntsoov tias Hanas yeej muaj lub siab tus yees txawm nws tej teeb meem tseem nyob li qub. (1 Xamuyees 1:16-18) Thaum peb muaj lub siab tus ces peb yuav txiav txim siab tau zoo dua.

6. Peb yuav ua li cas Vajtswv thiaj muab lub siab tus yees rau peb? (Saib daim duab.)

 ⁶ Peb yuav tau ua li no. Yav thaum ub, thaum ib lub nroog twg muaj teeb meem, cov pej xeem yeej mus qhia rau cov tub rog xwv cov tub rog thiaj paub tiv thaiv tau lawv. Zoo tib yam li ntawd, peb kuj yuav tau thov kom Yehauvas pab peb. Zoo rau peb thov tag thov thiab, mus txog thaum peb muaj lub siab tus yees. (Lukas 11:9; 1 Thexalaunikes 5:17) Thaum Lwm thiab nws poj niam Ab paub tias nws tsuas ua neej nyob ob peb lub hlis lawm xwb, nws hais tias: “Thaum muaj tej ntwb ntu zoo li no mas wb yeej tsis pom qab yuav ua zaj twg tsav twg txog kev kho mob thiab lwm yam. Qhov uas pab tau wb muaj lub siab tus yees yog thov Vajtswv.” Lwm thiab nws poj niam hais tias nkawd thov Vajtswv tsis tseg tsis tu kom Vajtswv muab lub siab tus thiab laj lim tswv yim rau nkawd txawj txiav txim siab. Nkawd thov li no nkawd xam pom tias Vajtswv yeej pab tau nkawd tiag. Zoo tib yam li nkawd, yog tias koj tab tom raug ib yam teeb meem twg los kav tsij thov Vajtswv kam tiag, Vajtswv yeej yuav muab lub siab tus yees rau koj.​—Loos 12:12.

YEHAUVAS YUAV HWJ KOM KOJ RUAJ KHOV

7. Thaum peb raug kev sim siab, peb xav li cas xwb?

⁷ Kev ntxhov siab. Thaum peb raug kev sim siab, peb yuav tsis xav thiab coj li qub vim peb ntxhov siab dhau. Ab nyuaj siab kawg li thaum Lwm tag sim neej. Nws hais tias: “Thaum kuv nyob ib leeg ntsiag twb to, kuv tu siab rau kuv tus kheej kawg li. Kuv chim siab heev uas nws tso kuv tseg.” Muaj tej thaud Ab kuj kho siab thiab tsis paub yuav ua zaj twg vim thaum nws tus txiv nyob, nws tus txiv yog tus ua txhua yam rau nkawd. Tej thaud nws saib zoo li nws nyob hauv ib lub nkoj uas raug cua daj cua dub ntsawj mus ntsawj los hauv hiav txwv. Ua li thaum peb ntxhov siab dhau, Yehauvas ho pab peb li cas?

8. Yehauvas cog lus rau peb li cas hauv Yaxayas 33:6?

⁸ Yehauvas yuav ua li no. Yehauvas cog lus rau peb tias nws yuav hwj kom peb nyob ruaj khov. (Nyeem Yaxayas 33:6.) Thaum muaj cua daj cua dub ntsawj ces yuav ua rau lub nkoj yoj mus yoj los. Yuav kom hwj tau lub nkoj nyob ruaj khov, luag ua ob sab tis rau ntawm ob sab nkoj ces ua rau lub nkoj mus tus yees lawm. Yehauvas yuav hwj peb tib yam li ntawd yog peb rau siab ntso teev tiam nws tsis tseg txawm peb yuav raug kev sim siab dab tsi.

9. Tej twj uas Yehauvas lub koom haum tau ua yuav pab tau peb muaj lub siab tus li cas? (Saib daim duab.)

⁹ Peb yuav tau ua li no. Thaum koj ntxhov siab, rau siab ntso thov Vajtswv, mus tej kev sib txoos, thiab tshaj tawm txoj xov zoo li koj ua tau. Koj yeej yuav ua tsis tau li yav tas los  tiam sis nco ntsoov tias Yehauvas yeej tsis tseev kom koj ua tshaj li qhov koj ua tau. (Muab piv rau Lukas 21:1-4.) Siv sij hawm los kawm Vajlugkub thiab xav txog tej ntawd. Yehauvas twb siv nws lub koom haum los sau tau tej zaj kawm thiab tej zaj yeeb yaj kiab los pab kom peb nyob ruaj khov thaum peb muaj kev nyuaj siab. Koj yuav nrhiav tau tej no hauv lub twj JW Library^® thiab Yehauvas Cov Tim Khawv Phau Ntawv Tshawb Nrhiav Vajlugkub. Mab hais tias nws siv tej no los pab nws thaum nws ntxhov siab. Nws mus nrhiav tej ntsiab zoo li kev npau taws los sis kev ntxeev siab ces thaum nws nyeem tag, ua rau nws kaj siab tuaj. Mab hais tias: “Thaum kuv pib tshawb nrhiav mas kuv ntxhov siab heev. Tiam sis thaum kuv nyeem zaj kuv nrhiav tau mas zoo li Yehauvas muab kuv puag kiag rau hauv nws xub ntiag. Yehauvas paub kuv txoj kev nyuaj siab thiab pab kuv.” Yog koj siv tej uas Yehauvas lub koom haum tau ua los pab peb ces yuav pab tau kom koj muaj lub siab tus.​—Phau Ntawv Nkauj 119:143, 144.

YEHAUVAS YUAV PAB KOJ

10. Tej zaum peb yuav xav li cas thaum peb raug ib yam kev ntxhov siab twg?

¹⁰ Kev ntxhov siab. Yog peb raug ib yam kev ntxhov siab twg, muaj tej hnub yuav ua rau peb qaug zog heev. Thaum ntawd peb yuav zoo li tus neeg uas sib tw dhia uas sav ceg es mus tsis taus kev lawm. Thaum zoo li no ces muaj qho yam peb yuav ua tsis tau los sis yuav tsis muaj siab ua. Tej zaum peb yuav zoo li Eliyas es xav pw xwb, tsis xav sawv. (1 Vajntxwv 19:5-7) Ua li, Yehauvas tau cog lus li cas thaum peb qaug zog?

11. Yehauvas tau cog lus li cas? (Phau Ntawv Nkauj 94:18)

¹¹ Yehauvas yuav ua li no. Yehauvas cog lus tias nws yuav pab peb. (Nyeem Phau Ntawv Nkauj 94:18.) Tus neeg sib tw dhia uas sav ceg lawm yuav tsum muaj lwm tus pab thiaj rov mus taus kev, peb los tej zaud yuav tsum tau kev pab thiaj ua tau Yehauvas tes hauj lwm tsis tseg. Yehauvas cog lus tias: “Kuv yog [Yehauvas], [koj] tus Vajtswv; kuv yeej tuav rawv [koj] sab tes xis, thiab kuv hais rau [koj] hais tias, ‘Tsis txhob ntshai kuv yuav pab [koj]!’” (Yaxayas 41:13) Yehauvas tau pab Vaj Ntxwv Daviv li hais ntawd. Thaum Daviv raug kev sim siab thiab raug nws cov yeeb ncuab tawm tsam, nws hais rau Yehauvas tias: “Koj txhais tes xis tuav rawv kuv.” (Phau Ntawv Nkauj 18:35) Ua li, Yehauvas tuav rawv peb li cas?

12. Tej zaum Yehauvas yuav siv leej twg los pab peb thaum peb qaug zog?

 ¹² Qhov uas Yehauvas tuav rawv peb yog rub lwm tus los pab peb. Xws li, muaj ib zaug thaum Daviv qaug zog heev, nws tus phooj ywg Yaunathas tau mus xyuas nws thiab mus txhawb nws lub zog. (1 Xamuyees 23:16, 17) Muaj ib zaug Yehauvas kuj siv Elisas mus pab Eliyas thiab. (1 Vajntxwv 19:16, 21; 2 Vajntxwv 2:2) Niaj hnub nim no, tej zaum Yehauvas yuav siv peb tsev neeg, peb cov phooj ywg, los sis cov txwj laus los pab peb. Tiam sis thaum peb qaug zog, peb yuav tsis xav pom leej twg li. Peb yuav xav nyob ib leeg xwb. Thaum zoo li no, peb yuav tau ua li cas es Yehauvas thiaj pab tau peb?

13. Peb yuav tau ua li cas thiaj tau Yehauvas txoj kev pab? (Saib daim duab.)

¹³ Peb yuav tau ua li no. Tsis txhob ua neeg twm zeej. Thaum peb nyob ib leeg twm zeej ces peb yuav xav txog peb thiab peb tej teeb meem xwb. Thaum zoo li no ces peb yuav txiav txim siab tsis tau zoo. (Pajlug 18:1) Tej thaud peb kuj yuav tau nyob peb ib leeg thaum peb raug ib qho xwm txheej twg hauv peb lub neej. Tiam sis yog peb pheej nyob ib leeg tas mus li xwb ces ntev mus peb yuav tsis xav cia leej twg los pab peb. Txawm peb nyuaj siab npaum li cas los, peb yuav tsum cia peb tsev neeg, peb cov phooj ywg, thiab cov txwj laus los pab peb. Peb yuav tsum xam pom tias lawv yog cov uas Yehauvas siv los pab peb.​—Pajlug 17:17; Yaxayas 32:1, 2.

YEHAUVAS YUAV NPLIG KOJ

14. Tej twg ua rau peb ntshai?

¹⁴ Kev ntxhov siab. Muaj tej lub sij hawm peb yuav ntshai heev. Nyob hauv phau Vajlugkub, muaj tej tug uas teev tiam Vajtswv kuj ntshai tshee hnyo thaum lawv cov yeeb ncuab tawm tsam lawv los sis raug lwm yam xwm dab tsi. (Phau Ntawv Nkauj 18:4; 55:1, 5) Niaj hnub no peb los kuj raug peb tsev neeg, tej nom tej tswv, cov nyob tom tsev kawm ntawv, los sis tom hauj lwm tawm tsam thiab. Tej thaud peb kuj ntshai tsam peb tuag thaum peb muaj ib tug mob hnyav twg. Thaum zoo li no ces peb yuav zoo li ib tug me nyuam mos liab uas pab tsis tau nws tus kheej. Ua li Yehauvas yuav pab peb li cas rau tej ntwb ntu zoo li no?

15. Raws li Phau Ntawv Nkauj 94:19, Yehauvas yuav ua dab tsi rau peb?

¹⁵ Yehauvas yuav ua li no. Yehauvas nplig peb thiab ua kom peb rov muaj kev zoo siab. (Nyeem Phau Ntawv Nkauj 94:19.) Nqe no ua rau peb xav txog ib tug me nyuam ntxhais  uas ntshai heev thiab pw tsis tsaug zog li vim muaj nag xob nag cua hlob heev. Nws txiv txawm los muab nws puag kiag hauv xub ntiag mus txog thaum nws tsaug zog lawm. Txawm nag xob nag cua tseem nrov nroo ntws sab nraud los tus me ntxhais tsis ntshai vim nws nyob hauv nws txiv lub xub ntiag. Tib yam li ntawd, thaum peb raug tej kev sim siab uas ua rau peb ntshai los peb yuav tau cia peb Leej Txiv saum ntuj pab peb mus txog thaum peb lub siab kaj siab tus. Ua li peb yuav tau ua li cas Yehauvas thiaj nplig tau peb?

16. Peb yuav tau ua li cas Yehauvas thiaj nplig tau peb? (Saib daim duab.)

¹⁶ Peb yuav tau ua li no. Koj yuav tau lauj sij hawm los thov Yehauvas thiab nyeem nws Txoj Lus. (Phau Ntawv Nkauj 77:1, 12-14) Yog koj ua li no ces thaum koj muaj kev nyuaj siab, thiaj yooj yim rau koj thov koj Leej Txiv saum ntuj pab. Thaum koj thov Yehauvas, cia li qhia koj tej kev txhawj xeeb thiab kev ntshai rau nws. Ces mus nyeem nws Txoj Lus es cia nws cov lus nplig koj. (Phau Ntawv Nkauj 119:28) Phau Vajlugkub muaj tej zaj uas yuav nplig tau koj thaum koj ntshai xws li phau Yauj, Phau Ntawv Nkauj, phau Pajlug, thiab phau Mathais tshooj 6. Yog koj thov Yehauvas thiab nyeem nws Txoj Lus ces yuav nplig tau koj.

17. Peb tso siab tau li cas?

¹⁷ Peb yeej tso siab tias Yehauvas yuav nrog nraim peb thaum peb lub neej tsaus ntuj nti. (Phau Ntawv Nkauj 23:4; 94:14) Yehauvas cog lus tias nws yuav tiv thaiv peb, hwj peb, pab peb, thiab nplig peb. Yaxayas 26:3 hais txog Yehauvas li no tias: ‘Yehauvas, koj muab txojkev kaj siab uas zoo kawg nkaus rau cov neeg uas muab siab npuab koj, vim lawv tso siab plhuav rau koj.’ Yog li ntawd, cia li tso siab plhuav rau Yehauvas es cia nws pab koj. Yog koj ua li no ces Yehauvas yuav pub dag pub zog rau koj thaum koj muaj kev ntxhov siab.