1. Yam haujlwm uas tseem ceeb tshaj rau Yexus yog dabtsi, thiab yog vim li cas?

YEXUS KHETOS yog ib tug kws ntoo, tom qab no nws los ua ib tug xibhwb qhia Vajtswv txoj xov zoo. (Malakau 6:3; Yauhas 13:13) Yexus txawj ua ob txoj haujlwm no ib yam nkaus. Thaum nws yog ib tug kws ntoo, nws siv tej twj los muab ntoo txua ua ntau yam rau tibneeg tau siv. Thaum nws yog ib tug xibhwb, nws siv Vajtswv Txojlus los pab tibneeg to taub qhov tseeb hauv phau Vajlugkub. (Mathai 7:28; Luka 24:32, 45) Thaum Yexus muaj 30 xyoo, nws tseg tsis ua kws ntoo lawm. Nws mus ua ib tug xibhwb qhia Vajtswv txoj xov zoo lawm xwb. Nws paub tias tes haujlwm no tseem ceeb dua lwm tes. Yexus hais tias ib qho uas Vajtswv txib nws los hauv ntiajteb yog los tshaj tawm txoj xov zoo txog Vajtswv lub Nceeg Vaj. (Mathai 20:28; Luka 3:23; 4:43) Yexus thiaj siv tag nrho nws lub neej los tshaj tawm txoj xov zoo, thiab nws xav kom lwm tus ua ib yam li ntawd.​—Mathai 9:35-38.

2. Yuav ua li cas peb thiaj txawj “koom nrog Vajtswv ua haujlwm”?

² Peb feem coob tsis yog kws ntoo, tiamsis peb sawvdaws puavleej yog Vajtswv cov tub qhe qhia txoj xov zoo. Tes  haujlwm no tseem ceeb kawg li Vajtswv thiaj nqes tes nrog peb ua. Vim li no, phau Vajlugkub thiaj hais tias peb yog cov uas “koom nrog Vajtswv ua haujlwm.” (1 Khaulee 3:9; 2 Khaulee 6:4) Peb yeej pom li tus sau nkauj hais no: “Lub ntsiab loj hauv koj tej lus yog kev tseeb.” (Ntawv Nkauj 119:159, 160) Yehauvas txojlus yeej yog qhov tseeb tiag. Yog li ntawd, thaum peb mus qhia Vajlugkub, peb yuav tau ua tib zoo “qhia Vajtswv txojlus tseeb raug cai.” (Nyeem 2 Timaute 2:15.) Phau Vajlugkub yog yam twj tseem ceeb tshaj. Peb yuav tsum txawj siv phau Vajlugkub los pab lwm tus paub Yehauvas, Yexus, thiab lub Nceeg Vaj. Tsis tas li ntawd, Yehauvas lub koom haum tau npaj Cov Twj Mus Ua Vajtswv Tes Num peb thiaj txawj qhia lwm tus. Peb yuav tsum txawj siv tej twj no thiab.

3. Thaum peb mus ua Vajtswv tes haujlwm, peb yuav tsum tau hau ntsoov ua dabtsi, thiab Tubtxib Tes Haujlwm 13:48 pab tau peb li cas?

³ Cov Twj Mus Ua Vajtswv Tes Num yog tsim los qhia tibneeg txog qhov tseeb. Thaum peb “qhia” ib tug twg ces yog peb ua tib zoo piav kom nws to taub tej peb qhia thiab kom nws ua raws li tej ntawd. Peb tsis tshuav sijhawm ntau lawm, peb yuav tsum tau hau ntsoov mus pib kawm Vajlugkub nrog tibneeg es qhia qhov tseeb rau lawv kom lawv los ua Khetos cov thwjtim. Yog li ntawd, peb yuav tau kub siab lug mus nrhiav txhua tus uas xav “tau txojsia ib txhis tsis kawg” thiab pab kom lawv los teev tiam Yehauvas.​—Nyeem Tubtxib Tes Haujlwm 13:44-48.

4. Yuav ua li cas peb thiaj nrhiav tau cov uas xav “tau txojsia ib txhis tsis kawg”?

⁴ Yuav ua li cas peb thiaj nrhiav tau cov uas xav “tau txojsia ib txhis tsis kawg”? Nyob thawj 100 xyoo, yuav kom cov Khixatia nrhiav tau cov zoo li ntawd lawv yuav tsum tshaj tawm txoj xov zoo. Yexus hais rau lawv tias: “Thaum nej mus rau hauv lub moos twg lossis lub zos twg, mas tshuaj saib leejtwg tsim nyog mus so rau hauv.” (Mathai 10:11) Niaj hnub no los peb yuav tau ua ib yam li ntawd thiab. Peb paub tias cov uas tsis txo hwjchim, tsis xav kawm Vajlugkub tiag, thiab tsis quav ntsej Vajtswv yeej tsis xav hnov txoj xov zoo. Yog li ntawd, peb tsuas mus nrhiav cov uas txo hwjchim, xav kawm Vajlugkub, thiab xav paub qhov tseeb xwb. Peb tes haujlwm mus nrhiav tibneeg kuj zoo li Yexus tes haujlwm ua kws ntoo. Ua ntej Yexus yuav txua ib lub rooj tog twg, nws yuav tau mus nrhiav hom ntoo uas zoo txua rooj txua tog tso. Tom qab ntawd, nws mam siv nws tej twj los txua li nws txawj. Niaj hnub no los zoo ib yam li ntawd. Peb yuav tau xub mus nrhiav cov uas xav kawm Vajlugkub tso. Thaum nrhiav tau lawd, peb mam siv peb tej twj los qhia lawv li peb txawj qhia kom lawv los ua thwjtim.​—Mathai 28:19, 20.

5. Zoo rau peb paub li cas txog peb Cov Twj Mus Ua Vajtswv Tes Num? Ua piv txwv seb. (Saib thawj cov duab hauv zaj no.)

⁵ Tej twj ib yam zoo txawv ib yam. Piv txwv li cov twj uas Yexus siv los txua ub txua no. Yexus muaj cov twj uas ntsuas, kos, txiav, tshau, thiab kuam ntoo. Tsis tas li ntawd xwb, Yexus kuj muaj cov twj uas ntsuas kom tiaj thiab txuas kom khov. Peb Cov Twj Mus Ua Vajtswv Tes Num los kuj zoo ib yam li ntawd thiab, ib yam twj yog siv los ua ib yam haujlwm. Yog li ntawd, cia peb kawm kom peb paub siv cov twj no.

6. Koj tau siv daim ntawv tiv tauj li cas lawd?

⁶ Ntawv Tiv Tauj. Daim ntawv no yog ib daim me me xwb tiamsis tau haujlwm heev. Daim ntawv no qhia tibneeg tias peb yog leejtwg thiab kuj coj lawv mus xyuas peb lub vej xaij jw.org. Thaum lawv mus rau hauv peb lub vej xaij, lawv yuav kawm tau ntau yam txog peb thiab rau tau npe kawm Vajlugkub. Twb muaj tshaj li 400,000 tus tau rau npe kawm Vajlugkub lawm, thiab tseem muaj pua pua tus niaj hnub rau npe kawm Vajlugkub rau hauv! Nco ntsoov nqa ib co ntawv tiv tauj nrog koj xwv thaum koj nrog tibneeg tham koj thiaj tau muab rau lawv.

7. Vim li cas peb thiaj siv daim ntawv caw?

⁷ Ntawv Caw. Daim ntawv caw tibneeg tuaj peb tej kev sib txoos hais tias: “Thov caw koj kawm Vajlugkub nrog Yehauvas Cov Timkhawv.” Tom qab ntawd kuj hais ntxiv tias “tuaj nrog peb sib txoos ua ke” “lossis nrog ib tug kawm ua ke.” Daim ntawv caw pab kom tibneeg paub tias peb zoo li cas thiab kuj caw cov uas xav “hnov Vajtswv tej lus thiab coj raws nraim” los kawm Vajlugkub nrog peb. (Luka 11:28) Peb yeej zoo siab caw txhua leej txhua tus tuaj peb tej kev sib txoos, txawm lawv kawm Vajlugkub los tsis kawm. Thaum lawv tuaj peb tej kev sib txoos, lawv yuav kawm tau ntau yam txog phau Vajlugkub.

8. Vim li cas ho tseem ceeb rau tibneeg tuaj koom peb tej kev sib txoos, txawm tsis tuaj kiag los 1 zaug? Piav txog tus qauv.

⁸ Tseem ceeb heev rau peb rau siab ntso caw tibneeg tuaj peb tej kev sib txoos, txawm tsis tuaj kiag los 1 zaug. Vim li cas? Rau qhov thaum lawv tuaj, lawv yuav pom tias Yehauvas Cov Timkhawv qhia qhov tseeb hauv phau Vajlugkub thiab pab tibneeg los paub Vajtswv. Tej kev ntseeg cuav tsis ua li ntawd. (Yaxaya 65:13) Muaj ob niam txiv hauv tebchaws U.S.A. uas hu ua Les (Ray) thiab Leedas (Linda) tau pom li no. Nkawd yeej ntseeg Vajtswv thiab xav paub Vajtswv heev, nkawd thiaj txiav txim siab mus xyuas tag nrho cov tshawj lossis tsev teev ntuj, hauv nkawd lub nroog seb lub twg muaj 2 yam uas nkawm nyiam ces nkawd mam li mus koom. Thawj yam, nkawd yuav tsum kawm tau ib yam dabtsi thiab yam 2, cov tibneeg yuav tsum hnav zoo kom phim qhov uas teev tiam Vajtswv. Nkawd siv li ob peb xyoos thiaj mus txhua, rau qhov nkawd lub nroog muaj ntau lub tshawj. Tiamsis tsis muaj ib lub zoo li nkawd xav. Nkawd kawm tsis tau ib yam dabtsi thiab cov neeg los hnav ua dog ua dig xwb. Tom qab nkawd mus xyuas lub kawg nkaus, tus pojniam mus ua haujlwm hos tus txiv rov mus tsev. Thaum tus txiv mus txog tog kev, nws pom ib lub Tsev Nceeg Vaj. Nws txawm xav tias, ‘Cia kuv mus hauv seb ho zoo li cas.’ Zoo kawg li! Txhua leej txhua tus luag ntxhwb ntxhi thiab ua zoo heev rau nws. Lawv kuj hnav zoo heev thiab. Nws txawm mus zaum kiag pem hauv ntej, nws nyiam tej nws hnov kawg li! Yeej zoo li tus tubtxib Povlauj qhia, cov uas tuaj koom kev sib txoos thawj zaug yuav hais tias: “Vajtswv nrog nraim nej tiag tiag li.” (1 Khaulee 14:23-25) Tom qab ntawd, tus txiv txawm tuaj sib txoos txhua txhua Hnub 7. Tsis ntev, nws txawm tuaj 2 txojkev sib txoos huvsi lawm. Tus pojniam kuj pib tuaj kev sib txoos thiab. Txawm nkawd twb muaj 70 tawm xyoo lawm los nkawd pib kawm  Vajlugkub thiab nimno tau ua kevcai raus dej lawm.

9. Vim li cas cov ntawv tseb ho yoojyim rau siv nrog lwm tus txuas lus?

⁹ Ntawv tseb. Peb muaj 8 daim ntawv tseb uas yoojyim rau peb siv los nrog tibneeg tham. Txij thaum luam tau thawj daim ntawv tseb xyoo 2013, tau luam txog li 5,000 plhom daim lawm! Cov ntawv tseb no zoo tib yam nkaus. Yog koj paub siv ib daim lawd ces koj yeej paub siv tag nrho 8 daim huvsi! Koj yuav siv cov ntawv tseb los nrog lwm tus txuas lus li cas?

10. Piav seb yuav siv daim ntawv tseb Vajtswv Lub Nceeg Vaj Yog Dabtsi? li cas.

¹⁰ Piv txwv tias koj yuav siv daim ntawv tseb Vajtswv Lub Nceeg Vaj Yog Dabtsi? Muab lo lus nug ntawm sab 1 rau tus tswv tsev saib thiab nug nws li no: “Koj puas tau xav ib zaug li tias Vajtswv lub Nceeg Vaj yog dabtsi? Koj xav li cas, puas yog . . . ?” Nug seb nws nyiam lo lus teb twg. Txawm nws nyiam lo twg los, txhob qhia rau nws tias nws teb yog los tsis yog. Tom qab ntawd cia li nthuav mus rau lub ntsiab me “Phau Vajlugkub Qhia Li No” hauv sab 2 thiab nyeem Daniyee 2:44 thiab Yaxaya 9:6 rau nws. Thaum xaus mus nug lo lus hauv lub ntsiab me “Kawm Ntxiv”: “Thaum Vajtswv lub Nceeg Vaj kav lawd, peb lub neej yuav zoo li cas?” Cia lwm zaus mam rov mus teb lo lus nug ntawd. Thaum koj rov mus, nthuav mus rau sab kawg nkaus uas tham txog zaj kawm 7 hauv phau ntawv Vajtswv Muaj Xov Zoo Rau Peb! Phau no kuj yog ib yam twj uas peb siv los qhia Vajlugkub rau tibneeg thiab.

11. Phau Tsom Faj thiab Tsim Dheev! yog sau los ua dabtsi, thiab peb yuav tsum paub txog dabtsi?

¹¹ Phau Tsom Faj Thiab Tsim Dheev! Ob phau ntawv no tau muab luam tawm thiab tau muab txhais tawm ntau tshaj txhua phau hauv ntiajteb! Vim muaj tibneeg nyob thoob ntiajteb nyeem 2 phau ntawv no, thiaj tau xaiv tej ntsiab kom tibneeg txhua qhov nyiam. Peb yuav tsum siv 2 phau ntawv no los pab kom tibneeg pom tias yam twg yog yam uas tseem ceeb tshaj rau neeg lub neej niaj hnub nimno. Tiamsis ua ntej ntawd peb yuav tsum paub seb phau twg sau rau hom neeg twg.

12. (1) Phau Tsim Dheev! yog sau rau cov neeg twg, thiab lub hom phiaj yog li cas? (2) Thaum koj tseb phau Tsim Dheev! tibneeg puas nyiam thiab? Piav seb.

¹² Phau Tsim Dheev! yog sau rau cov uas tsis paub ntau txog phau Vajlugkub lossis tsis paub Vajlugkub hlo li. Tej zaum lawv tsis paub ib yam dabtsi txog cov Khixatia tej lus qhia, tsis tso siab rau kev ntseeg, lossis tsis xav tias phau Vajlugkub yuav pab tau lawv lub neej. Ib lub hom phiaj uas sau phau Tsim Dheev! yog los pab kom tibneeg pom tias yeej muaj Vajtswv tiag. (Loos 1:20; Henplais 11:6) Kuj sau los pab kom tibneeg thiaj ntseeg tias phau Vajlugkub yog “qhov tseeb yog Vajtswv txojlus.” (1 Thexalaunika 2:13) Cov ntsiab lus rau 3 phau Tsim Dheev! rau xyoo 2018 yog: “Lub Neej Kaj Siab Lug,” “12 Lub Ntsiab Uas Txhawb Lub Cuab Lub Yig,” thiab “Pab Cov Uas Muaj Kev Quaj Ntsuag.”

13. (1) Phau Tsom Faj uas tseb tawm yog sau rau cov neeg twg? (2) Thaum koj tseb Phau Tsom Faj, tibneeg puas nyiam thiab? Piav seb.

¹³ Phau Tsom Faj uas tseb tawm yog sau  los ua dabtsi? Yog sau los piav phau Vajlugkub tej lus qhia rau cov uas twb nyiam Vajtswv thiab phau Vajlugkub lawm. Cov no yeej paub mentsis txog phau Vajlugkub, tiamsis tsis paub tseeb seb phau Vajlugkub qhia li cas tiag. (Loos 10:2; 1 Timaute 2:3, 4) Cov ntsiab lus rau 3 Phau Tsom Faj rau xyoo 2018 yog: “Phau Vajlugkub Puas Pab Tau Peb Tiam No?,” “Yav Tom Hauv Ntej Yuav Zoo Li Cas?,” thiab “Vajtswv Puas Hlub Koj?”

14. (1) Plaub zaj yeeb yaj kiab uas nyob hauv Cov Twj Mus Ua Vajtswv Tes Num yog tsim los ua dabtsi? (2) Thaum koj tso cov yeeb yaj kiab no rau tibneeg saib, lawv puas nyiam thiab? Piav seb.

¹⁴ Yeeb Yaj Kiab. Nyob rau Yexus lub caij, cov kws ntoo tsuas muaj tej twj siv tes xwb. Tiamsis nyob rau lub caij no, cov kws ntoo muaj ntau hom twj, muaj cov twj siv fais fab zoo li rab kaw, rab tshau, thiab rab txhuam. Zoo ib yam li ntawd, niaj hnub no thaum peb mus tshaj tawm, peb tsis yog muaj ntaub ntawv xwb, tiamsis peb kuj muaj tej yeeb yaj kiab uas zoo saib heev los rau tibneeg saib thiab. Muaj 4 zaj nyob hauv peb Cov Twj Mus Ua Vajtswv Tes Num: Kawm Vajlugkub Ua Dabtsi?, Kev Kawm Vajlugkub Zoo Li Cas?, Mus Ua Dabtsi Tom Tsev Nceeg Vaj?, thiab Yehauvas Cov Timkhawv Zoo Li Cas? Cov yeeb yaj kiab uas ntev li 2 feeb rov hauv, zoo muab tso rau neeg saib thawj zaug ntsib. Cov ntev zog, zoo muab tso rau thaum rov mus xyuas thiab rau thaum tus tswv tsev muaj sijhawm. Cov yeeb yaj kiab no yog ib co twj zoo heev rau qhov yuav rub tau neeg lub siab xav kawm Vajlugkub thiab xav tuaj kev sib txoos.

15. Thaum tibneeg saib peb cov yeeb yaj kiab ua lawv yam lus, pab tau lawv li cas? Piav txog cov qauv.

¹⁵ Ib tug muam ntsib ib tug pojniam uas hais lus Yav (Yap). Tus pojniam ntawd tau tsiv hauv Maikaunixia (Micronesia) mus rau thaj tsam uas tus muam nyob. Tus muam muab zaj yeeb yaj kiab Kawm Vajlugkub Ua Dabtsi? ua lus Yav rau nws saib. Thaum pib zaj yeeb yaj kiab xwb, tus pojniam txawm hais tias: “Yog kuv yam lus sad. Tsis txaus ntseeg li! Nws hais lus zoo li kuv! Yuav tsum yog tuaj hauv kuv lub pov txwv tuaj xwb.” Tom qab ntawd, tus pojniam thiaj hais tias nws mam mus nyeem thiab saib txhua yam hauv jw.org uas ua nws yam lus. (Muab piv rau Tubtxib Tes Haujlwm 2:8, 11.) Muaj dua ib tug muam uas nyob rau tebchaws U.S.A. uas muaj ib tug xeeb ntxwv nyob rau lwm sab ntuj. Nws xa tau zaj yeeb yaj kiab Kawm Vajlugkub Ua Dabtsi? hauv e-mail mus rau nws tus xeeb ntxwv. Tom qab tus xeeb ntxwv saib tas, nws rov teb tuaj rau tus muam tias: “Kuv nyiam ntu uas hais tias lub ntiajteb huvsi nyob hauv tus uas phem qab hwjchim. Kuv twb rau npe kawm Vajlugkub lawm.” Zoo siab heev rau qhov tus xeeb ntxwv no nyob rau ib lub tebchaws uas peb tes haujlwm tseem raug txwv.

16. Piav seb cov ntawv me no tsim los ua dabtsi: (1) Mloog Vajtswv Lus koj thiaj Muaj Sia Nyob Mus Ib Txhis. (2) Vajtswv Muaj Xov Zoo Rau Peb! (3) Leejtwg Thiab Ua Li Yehauvas Siab Nyiam?

¹⁶ Ntawv Me. Yuav ua li cas peb thiaj qhia tau qhov tseeb rau ib tug uas nyeem tsis tau ntawv zoo lossis tsis muaj ntaub ntawv ua nws yam lus? Peb siv tau phau Mloog Vajtswv Lus koj thiaj Muaj Sia Nyob Mus Ib  Txhis. * (Saib cov lus hauv qab taw qhia.) Phau Vajtswv Muaj Xov Zoo Rau Peb! yog ib phau uas zoo siv mus qhia tibneeg heev thiab. Muaj 14 lub ntsiab uas nyob rau sab kawg nkaus, cia li muab rau tus tswv tsev saib seb nws nyiam lub ntsiab twg. Tom qab ntawd, nrog nws kawm zaj ntawd. Thaum koj rov mus xyuas ib tug twg, koj puas xyaum li hais tas los no? Ib phau ntxiv uas zoo siv heev yog phau Leejtwg Thiaj Ua Li Yehauvas Siab Nyiam? Phau no tsim los pab cov uas kawm Vajlugkub nrog peb paub txog peb lub koom haum. Yog koj xav paub siv phau ntawv no mus saib Lub Neej Thiab Tes Haujlwm Khixatia​—Phau Kawm lub 3 Hlis 2017.

17. (1) Ob phau ntawv peb siv mus qhia Vajlugkub yog tsim los ua dabtsi? (2) Txhua tus uas ua kevcai raus dej yuav tau ua dabtsi, thiab yog vim li cas?

¹⁷ Ntawv Loj. Thaum koj siv ib phau ntawv me los qhia ib tug twg, yog koj xav hloov mus kawm Phau Vajlugkub Qhia Txog Dabtsi Tiag? thaum twg los tau. Phau no qhia tibneeg txog tej ntsiab lus tseem ceeb hauv phau Vajlugkub. Yog nws kawm tau zoo ces thaum nws kawm tag phau no, koj kuj siv phau “Nyob Hauv Vajtswv Txojkev Hlub” los qhia nws ntxiv. Phau no qhia kom nws paub siv phau Vajlugkub tej hauv paus ntsiab lus los ua neej. Nco ntsoov tias, txawm ib tug twg twb ua kevcai raus dej lawm los, nws yuav tau kawm kom tag 2 phau ntawv no. Qhov no yuav pab kom nws muaj kev ntseeg rau Yehauvas thiab kom muab siab npuab Yehauvas mus li.​—Nyeem Khaulauxi 2:6, 7.

18. (1) Nqe Vajlugkub 1 Timaute 4:16 pab tau peb pom li cas, thiab thaum kawg zoo li cas? (2) Peb lub hom phiaj siv Cov Twj Mus Ua Vajtswv Tes Num yog dabtsi?

¹⁸ Peb yog Yehauvas Cov Timkhawv, peb muaj tes haujlwm mus qhia tibneeg txog “txojlus tseeb uas yog txoj xov zoo.” Txoj xov zoo yuav pab tau tibneeg muaj txojsia ib txhis tsis kawg. (Khaulauxi 1:5; nyeem 1 Timaute 4:16.) Yog li ntawd, peb thiaj muaj Cov Twj Mus Ua Vajtswv Tes Num los pab peb qhia txoj xov zoo. (Saib lub ntsiab me “ Cov Twj Mus Ua Vajtswv Tes Num.”) Cia peb ua tib zoo siv cov twj no. Peb nyias mam txiav txim siab seb nyias yuav siv phau ntawv twg thiab yuav siv rau thaum twg. Nco ntsoov tias peb lub hom phiaj tsis yog los tseb ntaub ntawv xwb. Peb tsis lam tau lam muab peb tej ntaub ntawv rau cov uas tsis nyiam txoj xov zoo. Peb lub hom phiaj yog los pab cov uas txo hwjchim, xav kawm Vajlugkub, thiab xav paub Vajtswv los ua Yexus cov thwjtim. Cov no thiaj yog cov uas xav “tau txojsia ib txhis tsis kawg.”​—Tubtxib Tes Haujlwm 13:48; Mathai 28:19, 20.