KUV LUB NEEJ
Yehauvas Foom Koob Hmoov Nplua Mias Rau Kuv
Xyoo 1939 muaj ib hmos peb sawv thaum ib tag hmo dua thiab tsav tsheb tshaj li 1 txoos teev mus rau ib lub nroog me me hu ua Ntsopleem (Joplin) xeev Mixulis hauv tebchaws U.S.A. Peb maj nrawm nroos mus rau txhua lub tsev thiab muab ntawv ntxig rau hauv lawv qab taw rooj. Thaum peb ua peb koog tas, peb tsav tsheb mus ntsib cov kwvtij. Thaum no twb kaj ntug lawm. Ua cas hnub ntawd peb ho nyiag kev tseb ntawv? Ib pliag kuv mam li piav ntxiv txog qhov no.
KUV niam yug kuv rau xyoo 1934. Kuv niam thiab txiv hu ua Falej (Fred) thiab Evnam (Edna) Malauham. Nkawd twb ua Cov Tub Kawm Vajlugkub (Yehauvas Cov Timkhawv) tau 20 lub xyoos lawm. Kuv nco nkawd txiaj ntsig kawg li uas nkawd cob qhia kuv kom txawj hlub Yehauvas. Peb nyob hauv ib lub nroog me me hu ua Paxoos (Parsons) xeev Kheexav (Kansas). Yuav luag txhua tus hauv peb lub koom txoos yog cov xaiv tseg. Peb tsev neeg niaj hnub mus kev sib txoos thiab mus qhia Vajlugkub. Hnub 6 thaum tav su, peb kheev mus qhia Vajlugkub tom tej kev, nimno peb hu tias qhia Vajlugkub rau ntawm tej chaw uas muaj neeg coob dua kev. Yeej sab kawg li tiamsis tom qab peb ua tas, kuv txiv nco ntsoov coj peb mus noj khoom qab zib.
Peb lub koom txoos me me tiamsis peb thaj tsam dav heev. Peb qhia rau ntau lub menyuam zos thiab rau cov uas nyob tom teb. Thaum peb tseb ntawv, tibneeg tsis muab nyiaj rau peb, lawv muab zaub, muab qe (khaws hauv zes los), lossis muab qaib rau peb xwb. Kuv txiv muab nyiaj them tej ntaub ntawv lawm ces tej zaub mov uas luag muab, peb muab khaws cia rau peb noj.
KEV TSHAJ TAWM TSHWJ XEEB
Kuv niam thiab txiv yuav tau ib lub tshuab paj taub mus tshaj tawm. Kuv tseem me me kuv thiaj siv tsis tau tiamsis kuv pab kuv niam thiab txiv tso Kwvtij Luthafaw (Rutherford) tej zaj lus qhuab qhia rau cov peb rov mus xyuas thiab cov kawm Vajlugkub mloog.
Nrog kuv niam kuv txiv sawv ntawm peb lub tsheb paj taub
Kuv txiv muab ib lub paj taub loj loj nog rau saum peb lub tsheb Fuaj (Ford) 1936. Nws muab peb lub tsheb ua ib lub tsheb paj taub. Zoo siv heev thaum peb mus qhia Vajlugkub. Peb txhob txwm tso nkauj rau tibneeg mloog ua ntej, peb mam tso ib zaj lus qhuab qhia txog phau Vajlugkub. Tom qab ntawd, peb mam tseb ntaub ntawv rau cov uas xav paub ntxiv.
Muaj ib hnub, hauv lub zos me hu ua Tshelivau (Cherryvale) xeev Kheexav, kuv txiv tsav lub tsheb ntawd mus rau hauv ib lub tshav ua si. Muaj tibneeg
coob heev tuaj so thiab tuaj ua si hauv. Tiamsis tub ceev xwm tsis pub siv paj taub hauv lub tshav ntawd. Kuv txiv thiaj tsav tsheb mus nres ntawm ntug kev nws mam li tso rau tibneeg mloog. Lub caij no, kuv nyiam nrog kuv txiv thiab kuv tijlaug Ntsawlis (Jerry) ua ke heev.Lub caij ntawd muaj tej koog tibneeg tawm tsam peb heev. Twb yog li ntawd peb thiaj ua li kuv tau hais thaum xub thawj. Peb sawv ib tag hmo mus ntxig ntaub ntawv rau ntawm tej qhov rooj. Tom qab peb tseb tas, peb sawvdaws mam rov los sib sau ua ke nraum ntug zos nyob tsam tub ceev xwm ho ntes tau peb ib tug twg lawm.
Thaum ntawd, peb kuj kwv paib taug kev thiab. Peb khuam ib daim ntawm xubntiag ib daim ntawm nrob qaum thiab taug kev thoob plaws nroog. Kuv nco muaj ib zaug cov kwvtij tuaj kwv paib hauv peb zos. Lawv daim paib hais tias “Kev Ntseeg Yog Rooj Ntxiab Dag Noj Dag Haus.” Lawv pib ntawm peb tsev mus li 1 kilumev tawm (1 mais) thoob nroog mam rov los. Zoo siab kawg uas tsis muaj leejtwg txwv lawv, tiamsis coob tus xav paub seb lawv ua dabtsi.
TEJ ROOJ SIB TXOOS LOJ THAUM KUV TSEEM ME
Peb tsev neeg niaj zaus mus rau xeev Thexav (Texas) thaum muaj rooj sib txoos loj. Kuv txiv ua haujlwm rau lub koom haum pua kev tsheb nqaj hlau, yog li ntawd peb thiaj tau caij dawb mus kev sib txoos loj thiab mus xyuas kwvtij neej tsa. Kuv niam tus nus hlob, Falej Vixamaj (Fred Wismar) thiab nws tus pojniam Yulalis (Eulalie) nyob hauv lub nroog Theepauj (Temple) xeev Thexav. Ua ntej xyoo 1940, thaum dab laug Falej tseem hluas, nws kawm tau qhov tseeb thiab ua kevcai raus dej. Nws coj qhov tseeb los qhia rau nws cov kwv thiab cov muam. Cov kwvtij nyob hauv lub xeev Thexav paub kuv dab luag Falej zoo heev vim nws tau ua ib tug saib xyuas lawv thaj tsam. Nws yog ib tug neeg siab zoo thiab luag ntxhi xwb. Nws kub siab qhia qhov tseeb thiab tso tau ib tug qauv zoo heev rau kuv.
Xyoo 1941, peb caij tsheb nqaj hlau mus koom rooj sib txoos loj hauv lub nroog Xeej Lu-is (St. Louis), xeev Mixulis (Missouri). Lawv hais kom tag nrho cov menyuam yaus zaum ua ke ntawm sam thiaj mloog Kwvtij Luthafaw zaj lus qhuab qhia, “Vajntxwv Cov Menyuam.” Thaum xaus, Kwvtij Luthafaw thiab cov kwvtij muab phau ntawv tawm tshiab hu ua Children (Menyuam) rau tag nrho peb 15,000 leej menyuam.
Lub 4 Hlis xyoo 1943, peb mus koom rooj sib txoos hu ua “Nqes Tes Ua,” hauv lub nroog Khovfimvau (Coffeyville) xeev Kheexav. Rooj sib txoos no tshwj xeeb kawg li. Lawv tshaj tawm tias txhua lub koom txoos yuav muaj ib txojkev kawm tshiab hu ua Kev Kawm Tshaj Tawm. Peb sawvdaws tau txais ib phau ntawv uas muaj 52 zaj lus qhia nyob rau hauv. Xyoo ntawd kuv kuj muaj feem koom Kev Kawm Tshaj Tawm es cev ib zaj lus qhia. Rooj sib txoos ntawd kuj tshwj xeeb heev rau kuv rau qhov peb ob peb tug tau ua kevcai raus dej hauv ib lub pas dej.
KUV XAV UA HAUJLWM HAUV NPE-EE
Xyoo 1951, kuv kawm ntawv tiav kuv thiaj yuav tau txiav txim siab seb yuav siv kuv lub neej ua dabtsi. Kuv tus tijlaug Ntsawlis twb ua haujlwm hauv Npe-ee dua lawm. Kuv kuj xav mus thiab, kuv thiaj rau npe mus ua. Tsis ntev tom qab ntawd, lawv txawm caw kuv mus. Kuv pib hnub tim 10 lub 3 Hlis xyoo 1952. Qhov uas kuv txiav txim siab no pab tau kuv rau siab ntso ua Vajtswv tes haujlwm puv ntoob.
Kuv vam tias yuav tau nrog cov kwvtij luam ntaub ntawv. Tiamsis kuv tsis tau ua. Lawv muab kuv ua haujlwm thiab dej mov. Tom qab ntawd lawv muab kuv mus ua mov. Kuv nyiam tes haujlwm no kawg thiab kuv kawm tau ntau yam. Peb muaj ob peb pab kwvtij sib hloo nto ua haujlwm. Kuv thiaj muaj sijhawm los so mentsis thaum nruab hnub. Kuv nyiam kawm Vajlugkub hauv Npe-ee lub chav rau ntawv, muaj ntau phau rau kuv kawm. Vim kuv ua li no, kuv txojkev sib raug zoo nrog Yehauvas thiab kuv txojkev ntseeg thiaj loj hlob tuaj. Thiab ua rau kuv yimhuab ruaj siab tias kuv yuav ua haujlwm rau Yehauvas hauv Npe-ee ntev npaum li kuv ua tau. Ntsawlis tawm Npe-ee rau xyoo 1949 mus yuav nws tus pojniam Phathisa (Patricia). Thaum kuv mus txog Npe-ee nkawd txhawb tau kuv heev vim nkawd nyob tsis deb kuv hauv lub nroog Npluavlees (Brooklyn).
Tsis ntev tom qab kuv tuaj txog Npe-ee, cov kwvtij xav nrhiav ib co mus hais lus qhuab qhia sawv cev rau Npe-ee ntxiv. Cov kwvtij uas lawv xaiv no yuav tau mus xyuas tej koom txoos nyob deb li 320 kilumev (200 mais) ntawm Npluavlees. Lawv yuav tau cev ib zaj lus qhuab qhia thiab nrog lub koom txoos qhia Vajlugkub. Kuv yog ib tug uas lawv tau xaiv ua tes haujlwm no. Kuv ntshai kawg tiamsis kuv ua siab tawv qhawv mus. Thaum ntawd, ib zaj lus qhuab qhia ntev li 1 txoos teev. Kuv niaj zaus caij tsheb nqaj mus xyuas tej koom txoos xwb. Muaj ib zaug lub caij ntuj no, xyoo 1954, kuv caij tsheb nqaj rov los rau hauv Nus Yauj (New York). Hnub ntawd yog Hnub 7. Tiag mas lub tsheb nqaj yuav tsum los txog thaum tseem pom kev. Tiamsis los daus loj heev thiab huab cua nplawm ntws ces lub tsheb nqaj txawm tuag lawm. Twb yog kaj ntug tagkis thaum 5 teev sawv ntxov kuv mam los txog Nus Yauj. Kuv thiaj hloov tsheb nqaj mus rau Npluavlees thiab ncaj qha mus npaj tshais noj rau cov kwvtij. Kuv mus txog lig zog thiab kuv sab heev rau qhov hmo ntawd kuv tsis tau pw li. Tiamsis kuv zoo siab vim kuv pom tias tau nrog cov kwvtij ua ke thiab tau ntsib coob tus tshiab muaj nqes tshaj qhov kuv tau pw.
Npaj tshaj tawm hauv xov tooj cua WBBR
Lub koom haum muaj ib tshooj xov tooj cua hu ua WBBR. Txhua lub lim tiam lawv kawm Vajlugkub thiab muab tso tawm. Lawv kaw suab hauv lub tsev 124 txojkev Khauloonpia Haij (Columbia Heights) saum txheej 2. Thawj ob peb xyoos uas kuv ua haujlwm hauv Npe-ee kuv tau nrog cov kwvtij kaw thiab. Kwvtij Alexadaw Majmevleem (Alexander H. Macmillan) uas twb ua haujlwm tau ntau xyoo hauv Npe-ee lawm, niaj hnub mus kaw suab. Peb kheev muab nws hu ua Kwvtij Maj. Nws tso tau ib tug qauv zoo heev rau peb cov hluas rau qhov txawm nws muaj ntau yam kev nyuaj siab los, nws tsis tso kev ntseeg tseg li.
Ntawv tshaj tawm txog tshooj xov tooj cua WBBR
Xyoo 1958, lawv muab kuv los pab cov kawm tiav Kev Kawm Vajlugkub Kile-a. Cov kwvtij nkauj muam no kub siab qhia Vajlugkub heev. Kuv pab npaj tej ntaub ntawv thiab yuav pib rau lawv mus txawv tebchaws. Thaum ntawd ya dav hlau kim heev ces cov raug txib mus tebchaws Afika thiab Axia caij cov nkoj thauj khoom mus xwb. Ntau xyoo tom qab ntawd, thaum pib dav hlau pheej yig, lawv mam li tau caij dav hlau.
Npaj ntawv kawm tiav rau cov uas kawm Kile-a
MUS TEJ ROOJ SIB TXOOS
Xyoo 1961 muaj tej Rooj Sib Txoos Rau Ntau Tebchaws, lawv thiaj kom kuv nrhiav dav hlau thauj cov kwvtij nyob hauv tebchaws U.S.A. mus rau sab Yus Luv. Xyoo ntawd kuv tau mus rooj sib txoos hauv lub nroog Hanpawj (Hamburg) tebchaws Ntsaws Mes Nis. Tom qab rooj sib txoos tas, kuv thiab 3 tug kwvtij uas nrog kuv ua haujlwm hauv Npe-ee xauj ib lub tsheb tsav hla tebchaws Ntsaws Mes Nis mus xyuas ceg Npe-ee hauv Loos, tebchaws Ithali. Dhau ntawd peb mus rau Fab Kis teb ces mam hla cov roob Philinis (Pyrenees) mus rau nram tebchaws Xapee. Nom tswv txwv tsis pub Yehauvas Cov Timkhawv qhia Vajlugkub rau hauv tebchaws Xapee. Tiamsis peb muab ib co ntaub ntawv qhwv kom zoo li khoom pub tso rau cov kwvtij hauv lub nroog Npaxeloonam (Barcelona). Peb zoo siab heev tias peb tau ntsib lawv! Tom qab ntawd, peb tsav tsheb
mus rau lub nroog Axitawda (Amsterdam) ces mam li caij dav hlau rov los rau Nus Yauj.Xyoo 1963 muaj rooj sib txoos rau ntau tebchaws hu ua “Txoj Xov Zoo Uas Nyob Ib Txhis.” Lawv kom kuv nrhiav pib rau 583 tug kwvtij nkauj muam uas yuav mus koom tag nrho cov rooj sib txoos no ib lub zuj zus. Lawv mus sab Yus Luv, Axia, thiab tej koog povtxwv hauv hiavtxwv Paxifiv (Pacific) qab teb. Tom qab ntawd lawv mam li mus rau Honolulu xeev Havais (Hawaii) ces mam li mus xaus rau Phaxadinam (Pasadena) xeev Kalifaunias (California). Lawv kuj yuav mus xyuas tebchaws Lenpanoo (Lebanon) thiab tebchaws Yaladee (Jordan) mus saib tej qub teb qub chaw hauv phau Vajlugkub. Npe-ee npaj ib puas tsav yam rau lawv tsis hais pib dav hlau, tsev so, thiab ntaub ntawv hla tebchaws huvsi.
IB TUG TSHIAB NROG KUV MUS NCIG TEB NCIG CHAW
Xyoo 1963 yog ib xyoos uas tseem ceeb heev rau kuv vim tias hnub tim 29 lub 6 Hli, kuv yuav tau Lailam Lovntsawm (Lila Rogers) los ua kuv pojniam. Nws nyob Mixulis thiab pib ua haujlwm hauv Npe-ee xyoo 1960. Ib lub lim tiam tom qab wb ua tshoob tas, Lailam wb mam li lawv cov kwvtij qab mus rooj sib txoos tim tebchaws Kili, Iyi, thiab Lenpanoo. Tom qab ntawd wb kuj caij dav hlau mus saib Yaladee thiab. Tiamsis lub sijhawm ntawd nom tswv tseem txwv peb tes haujlwm hauv Yeluxalees ces lawv tsis kam ua ntaub ntawv rau Yehauvas Cov Timkhawv. Yog li ntawd, wb tsis paub tias thaum mus txog yuav zoo li cas. Tiamsis thaum wb mus txog ua ciav ho muaj ib pab kwvtij nkauj muam tuaj tos txais wb tom tshav dav hlau! Lawv tuav ib daim paib loj loj hais tias “Zoo Siab Tos Txais Yehauvas Cov Timkhawv!” Tsis txaus ntseeg li, ua rau wb zoo siab heev. Thaum wb mus pom tej qub teb qub chaw hauv phau Vajlugkub mas zoo kawg li. Wb pom tej chaw uas Aplahas, Yiha, thiab Yakhauj nyob, tej chaw uas Yexus thiab nws cov tubtxib mus qhia Vajlugkub thiab tej chaw uas cov Khixatia pib tshaj tawm txoj xov zoo “mus txog qab ntuj kawg.”—Tubtxib Tes Haujlwm 13:47.
Tau 55 lub xyoos no, txawm kuv raug txib mus ua haujlwm pab lub tebchaws twg los, Lailam nrog nraim kuv. Wb mus xyuas tebchaws Xapee thiab Po Tsu Nkau (Portugal) ob peb zaug thaum nom tswv tseem txwv peb tes haujlwm. Wb nqa tej ntawv thiab lwm yam mus txhawb cov kwvtij nkauj muam. Wb kuj mus xyuas ib co kwvtij uas raug kaw hauv lub nroog Kajdim (Cádiz), tebchaws Xapee thiab. Kuv zoo siab heev tias kuv tau cev ib zaj lus qhuab qhia rau lawv mloog.
Nrog Phathisa thiab Ntsawlis Malauham mus rooj sib txoos “Kev Sib Haum Xeeb Hauv Ntiajteb” xyoo 1969
Txij xyoo 1963 los, kuv pab npaj tej ntaub ntawv thiab yuav pib rau cov mus koom tej rooj sib txoos rau ntau tebchaws hauv tebchaws Afika, Auxitalia, sab Amelikas, sab Yus Luv, sab Axia, Havais, tebchaws Nus Xivleem (New Zealand), thiab tebchaws Puataus Likaum (Puerto Rico). Lailam wb mus koom ntau rooj sib txoos xws li rooj nyob hauv Vovxom (Warsaw) tebchaws Phaulees (Poland) xyoo 1989. Muaj cov kwvtij Lav Xias (Russia) coob tus tuaj koom rooj sib txoos ntawd. Yog thawj zaug uas lawv tau koom ib rooj sib txoos! Wb ntsib tej kwvtij nkauj muam uas raug Xauviaj (Soviet Union) kaw tau ntau xyoo vim tsis kam tso kev ntseeg tseg.
Ib tes haujlwm uas kuv nyiam heev yog mus txhawb tej cuab kwvtij Npe-ee thiab cov tubtxib tshaj tawm txawv tebchaws thoob plaws lub ntiajteb. Zaum tas uas wb mus, wb mus rau Kaus Lim Qab Teb. Wb mus xyuas 50 leej kwvtij uas raug kaw hauv lub nroog Xu-as (Suwon). Lawv puavleej nyob zoo siab hlo luag ntxhi thiab tos ntsoov hnub uas yuav tsis muaj leejtwg txwv Yehauvas tes haujlwm lawm. Lawv txhawb tau wb zog kawg li!—UA HAUJLWM PUV NTOOB YUAV TAU KEV ZOO SIAB
Kuv pom tias Yehauvas yeej foom koob hmoov rau nws cov tibneeg tiag. Thaum kuv ua kevcai raus dej xyoo 1943, tsuas muaj li 100,000 tus tshaj tawm xwb. Tamsim vim muaj cov uas kawm tiav Kili-a siv zog ua haujlwm, nimno thiaj muaj tshaj li 8,000,000 leej teev tiam Yehauvas hauv 240 lub tebchaws lawm. Kuv zoo siab tias kuv muaj feem npaj tej ntaub ntawv rau cov tubtxib tshaj tawm txawv tebchaws.
Kuv zoo siab heev uas thaum kuv tseem hluas, kuv txiav txim siab siv kuv lub neej los ua Yehauvas tes haujlwm es rau npe ua haujlwm hauv Npe-ee. Yehauvas yeej foom koob hmoov rau kuv txog tav no. Muaj ntau yam uas Lailam wb nyiam kawg li hauv Npe-ee. Wb kuj zoo siab tias tau 50 lub xyoos no wb tau nrog ob peb lub koom txoos hauv koog Npluavlees tshaj tawm ua ke. Wb ntau tau phoojywg nrog lawv coob tus.
Vim muaj Lailam txhawb kuv, kuv thiaj ua haujlwm hauv Npe-ee los txog niaj hnub nimno. Txawm kuv twb muaj li 84 xyoos lawm los, kuv zoo siab heev uas kuv tseem ua taus haujlwm pab cov kwvtij teb cov ntawv uas tuaj rau Npe-ee.
Nrog Lailam niaj hnub no
Kuv zoo siab tias kuv muaj feem hauv Yehauvas lub koom haum thiab pom tias yeej muaj tseeb li cov lus hauv Malakhi 3:18: “Nej yuav rov qab pom tias tus uas ncaj ncees thiab tus uas limhiam txawv li cas, thiab tus uas ua koom tu Vajtswv thiab tus uas tsis ua koom tu nws txawv li cas.” Xatas lub qab ntuj tsuas phem zuj zus tuaj, tibneeg tsis muaj kev cia siab tsis muaj kev kaj siab li. Tiamsis cov uas hlub Yehauvas thiab teev tiam nws muaj lub neej kaj siab lug thiab muaj kev cia siab rau yav tom hauv ntej. Yog li ntawd peb thiaj saib tes haujlwm tshaj tawm txoj xov zoo rau nqe heev! (Mathai 24:14) Tsis ntev xwb, Vajtswv lub Nceeg Vaj yuav muab lub qab ntuj no hloov ua ib lub vaj kaj siab. Peb tos ntsoov hnub ntawd! Thaum ntawd, txhua tus hauv lub ntiajteb no yuav noj qab nyob zoo thiab muaj kev zoo siab thiab nyob mus ib txhis tsis kawg.