1. Yehauvas tau muab txoj kev vam kev cia siab twg rau peb?

 TXOJ SIA ntev dhawv mus ib txhis yog txoj kev vam kev cia siab uas Yehauvas muab rau peb. Ib txhia muaj txoj kev vam kev cia siab yuav mus nyob saum ntuj ceeb tsheej. (1 Kauleethaus 15:50, 53) Feem coob muaj txoj kev vam kev cia siab yuav nyob mus ib txhis hauv lub ntiaj teb no thiab tsis muaj mob muaj nkeeg, nyob kaj siab lug tso siab plhuav. (Tshwmsim 21:3, 4) Peb yeej saib peb txoj kev vam kev cia siab muaj nuj nqis, tsis hais peb yuav muaj feem mus nyob saum ntuj ceeb tsheej los sis nyob hauv ntiaj teb no mus ib txhis.

2. Kev vam kev cia siab yog li cas tiag?

² “Txoj kev vam kev cia siab” uas hais muaj nyob hauv phau Vajlugkub txhais hais tias yog “yuav tau txais tej yam uas peb tos.” Txoj kev cia siab peb muaj rau yav tom ntej no yeej yuav muaj tiag tiag li, yeeb vim yog Yehauvas tau hais li ntawd. (Loos 15:13) Yehauvas yeej ib txwm ua raws li nws cog tseg. (Teev Npe 23:19) Yog li ntawd, peb yeej paub ntsoov tias tej yam Yehauvas xav tseg lawm, nws yeej muaj hwj chim ua kom tau raws li nws lub siab nyiam. Peb txoj kev vam kev cia siab tsis yog lam npau suav xwb tiam sis yeej muaj pov thawj qhia tias yuav muaj tiag tiag.

3. Nyob rau hauv zaj kawm no yuav piav txog dab tsi? (Phau Ntawv Nkauj 27:14)

³ Peb Txiv Yehauvas xav kom peb tso siab plhuav rau nws vim nws hlub peb kawg nkaus li. (Nyeem Phau Ntawv Nkauj 27:14.) Yog peb tso siab rau Yehauvas, peb yuav thev taus txhua yam uas peb raug, ua taus siab loj siab tawv thiab muaj kev kaj siab. Cia peb mus soj ntsuas seb txoj kev vam kev cia siab ntawd ho pab tau peb li cas. Thawj qhov yog peb yuav tshuaj seb txoj kev vam kev cia siab ntawd zoo li tus nqe lauj nkoj thiab lub kaus mom hlau li cas. Ces tom qab ntawd peb mam li piav seb yuav ua li cas peb txoj kev vam kev cia siab thiaj nyob ruaj khov ruaj nreeg.

4. Txoj kev vam kev cia siab zoo li tus nqe lauj li cas? (Henplais 6:19)

⁴ Tus tub txib Paulus tsab ntawv uas sau rau cov ntseeg uas yog  neeg Henplais tau hais tias txoj kev vam kev cia siab zoo yam nkaus li tus nqe lauj. (Nyeem Henplais 6:19.) Paulus yeej ib sij caij nkoj ib zaug tsis so ces nws paub hais tias tus nqe lauj yog siv los khuab lub nkoj kom tsis txhob ntas mus rau ub rau no. Muaj ib zaug, nws nyob rau hauv ib lub nkoj ces cua daj cua dub txawm los nplawm. Thaum cua nplawm nroo ntws, cov neeg tsav nkoj txawm muab cov nqe lauj pov mus rau hauv dej hiav txwv kom khuab lub nkoj cia thiaj tsis mus tsoo pob zeb. (Tes Haujlwm 27:29, 39-41) Peb txoj kev vam kev cia siab zoo ib yam li tus nqe lauj uas khuab peb rau ntawm Yehauvas peb thiaj tsis ncaim ntawm nws mus thaum raug tej teeb meem uas hlob li cua daj cua dub ntsawj tuaj. Peb txoj kev vam kev cia siab yuav ua rau peb lub siab nyob tus yees vim peb ntseeg tias yav tom hauv ntej yeej yuav tsum mus rau qhov zoo xwb. Nco ntsoov thaum ub Yexus twb ceeb toom tias peb yeej yuav raug tsim txom. (Yauhas 15:20) Yog peb xav ntsuj ntsoov txog tej yam Yehauvas twb cog tseg cia lawm, yuav pab kom peb teev tiam nws mus li.

5. Thaum Yexus yuav tuag, nws txoj kev vam kev cia siab pab tau nws li cas?

⁵ Txawm Yexus yuav raug txoj kev ploj kev tuag txom nyem ntsuav los qhov uas Yexus muaj txoj kev vam kev cia siab pab tau nws tuav rawv nws txoj kev ntseeg rau Yehauvas. Hnub Peetekos 33 tom qab Yexus yug, tus tub txib Petus tau hais txog ib zaj lus faj lem uas nyob rau hauv Phau Ntawv Nkauj txog Yexus muaj lub siab tus yees tias: “Kuv tseem muaj kev cia siab, rau qhov koj yeej yuav tsis tso kuv . . . rau hauv [lub qhov tuag]; koj yuav tsis cia koj tus tubtxib uas ncaj ncees cev nqaij lwj rau hauv qhov ntxa . . . qhov uas koj nrog kuv nyob, ua rau kuv zoo siab kawg li.” (Tes Haujlwm 2:25-28; Phau Ntawv Nkauj 16:8-11) Yexus paub tias txawm nws tuag lawm los, nws yeej cia siab ntsoov tias Yehauvas yuav tsa nws sawv rov qab los thiab nws yuav tau rov mus pom nws Txiv saum ntuj ceeb tsheej nyob kaj siab lug tso siab plhuav dua.​—Henplais 12:2, 3.

6. Muaj ib tug kwv tij tau hais li cas txog txoj kev vam kev cia siab?

⁶ Peb txoj kev vam kev cia siab pab tau coob leej ntau tus kwv tij nkauj muam ntseeg thev taus tej yam lawv raug. Cia peb mus piav txog ib tug kwv tij npe hu ua Li-naw Tshees (Leonard Chinn) nyob rau teb chaws Askiv. Thaum Ntsuj Rog Thoob Qab Ntuj Zaum 1, nws raug kaw yeeb vim yog nws tsis kam mus ua tub rog. Lawv muab nws kaw ib leeg tau ob lub hlis. Tom qab ntawd, lawv mam muab nws coj mus ua hauj lwm hnyav heev. Nws tau sau hais tias: “Qhov uas kuv raug no pab tau kuv pom tias txoj kev vam kev cia siab pab tau peb thev taus txhua yam. Peb muaj Yexus, cov tub txib, cov cev Vajtswv lus, thiab tej lus cog tseg nyob hauv phau Vajlugkub los pab peb tuav rawv peb txoj kev vam kev cia siab rau yav tom ntej thiab kom peb thev taus txhua yam uas peb raug.” Txoj kev vam kev cia siab yog tus nqe lauj uas khuam Li-naw cia, thiab kuj yog tus nqe lauj uas khuam peb tib yam nkaus.

7. Tej kev sim siab peb raug ua rau peb haj yam tuav rawv peb txoj kev vam kev cia siab kom ruaj khov li cas? (Loos 5:3-5; Yakaunpaus 1:12)

⁷ Thaum peb thev taus ib yam kev sim siab twg, peb yuav pom Yehauvas cev tes los pab peb ces peb yuav paub hais tias nws yeej txaus siab rau peb tiag. Thaum no, yuav ua rau peb txoj kev vam kev cia siab ruaj khov ruaj nreeg. (Nyeem Loos 5:3-5; Yakaunpaus 1:12.) Peb txoj kev vam kev cia siab yuav khov dua li thaum peb nyuam qhuav los ntseeg Yehauvas. Xatas xav kom peb tej kev sim siab ua rau peb tws kev tag tiam sis qhov uas peb thev taus txhua yam yog muaj Yehauvas ua tus pab peb.

8. Txoj kev vam kev cia siab zoo li lub kaus mom hlau li cas? (1 Thexalaunikes 5:8)

⁸ Nyob rau hauv phau Vajlugkub tau hais tias txoj kev vam kev cia siab zoo yam nkaus li lub kaus mom hlau. (Nyeem 1 Thexalaunikes 5:8.) Ib tug tub rog yeej ntoo ib lub kaus mom hlau los  tiv thaiv nws lub taub hau kom cov yeeb ncuab tsis txhob tua raug nws. Zoo ib yam li ntawd, peb kuj ua rog nrog rau Xatas ces peb yuav tau tiv thaiv peb txoj kev xav xwv Xatas thiaj ntxias tsis tau peb xav txog tej yam phem thiab vuab tsuab. Lub kaus mom hlau tiv thaiv tus tub rog lub taub hau li cas ces peb txoj kev vam kev cia siab yuav tiv thaiv peb tib yam li ntawd kom peb tsis txhob muab Yehauvas tso pov tseg.

9. Cov tib neeg uas tsis muaj kev vam kev cia siab lub neej zoo li cas?

⁹ Peb txoj kev vam kev cia siab uas yuav tau nyob mus ib txhis pab tau peb muaj tswv yim thiab txawj txiav txim. Tiam sis yog peb txoj kev vam kev cia siab ntawd tsuag zuj zus ces peb tsuas yuav xav txog peb tus kheej xwb. Cia peb mus piav txog ib co ntseeg uas nyob hauv lub nroog Kauleethaus yav thaum ub. Lawv tsis nco qab txog tias ib hnub Yehauvas yuav tsa tib neeg sawv rov los. (1 Kauleethaus 15:12) Paulus sau hais tias cov tib neeg uas tag kev cia siab yuav huas ntshis mus ua lub neej raws li lawv lub siab nyiam. (1 Kauleethaus 15:32) Niaj hnub niam no tej tib neeg yeej ua lub neej raws nkaus li ntawd. Tiam sis peb tsis zoo li ntawd vim peb tso siab rau Yehauvas tej lus cog tseg yav tom ntej. Peb txoj kev vam kev cia siab tiv thaiv peb tej kev xav ib yam li lub kaus mom hlau kom tsis txhob mus ua lub neej ywj siab es thiaj tsis rhuav tau peb txoj kev sib raug zoo nrog Yehauvas.​—1 Kauleethaus 15:33, 34.

10. Yog peb muaj kev vam kev cia siab yuav pab tiv thaiv tau peb li cas?

¹⁰ Peb txoj kev vam kev cia siab yuav pab kom peb lub siab tsis txhob yws daws dom tias peb yeej ua tsis tau haum Yehauvas siab ib zaug li. Tej zaud kuj muaj ib txhia tau hais li no tias: ‘Kuv ces ntshe yuav tsis tau nrog luag nyob mus ib txhis vim kuv twb ua tsis tau zoo hlo li. Ntshe kuv yeej yuav ua tsis tau haum Vajtswv siab.’ Cov lus no zoo xws nkaus li Elifas tej lus uas hais rau Yauj kiag ntag. Elifas hais tias: “Yuav ua li cas neeg thiaj ua tau zoo?” Thiab nws hais txuas ntxiv li no txog Vajtswv: “Txawm yog Vajtswv cov timtswv los nws yeej tsis ntseeg siab; rau qhov cov timtswv los twb tsis ncaj tabmeeg Vajtswv.” (Yauj 15:14, 15) Tej lus no yog lus dag ntxias xwb. Nco ntsoov tias Xatas yeej lom txwm xav kom peb xav li ntawd. Nws paub ntsoov tias yog peb muaj lub siab rov nkaug peb li ntawd ces peb txoj kev vam kev cia siab yuav tsuag zuj zus mus. Yog li ntawd, peb tsis txhob mloog tej uas peb lub siab pheej yws daws dom no tiam sis cia li xav ntsoov txog tej Yehauvas tau cog tseg lawm rau peb. Tsis txhob xav ntau ntau, Yehauvas yeej yuav pab koj vim nws xav kom koj nyob tau mus ib txhis.​—1 Timautes 2:3, 4.

11. Cheem peb txoj kev vam kev cia siab tsis tau los, vim li cas peb yuav tau rub siab ntev tos?

¹¹ Muaj qee zaug peb txoj kev vam kev cia siab yeej tsuag zuj zus. Peb yeej rub tsis taus lub siab ntev tos Vajtswv los mus txhim kho ib puas tsav yam. Tej yam ntev ntev rau peb los zoo li ib nyuag vuag rau Yehauvas xwb yeeb vim yog nws ib txwm muaj nyob. (2 Petus 3:8, 9) Nws yeej yuav ua raws li nws tej lus cog tseg tiam sis nws yuav tsis ua raws li lub caij peb pom zoo. Yuav ua li cas peb txoj kev vam kev cia siab thiaj li tsis tsuag cheem peb tseem tos Vajtswv ua raws li nws tej lus cog tseg?​—Yakaunpaus 5:7, 8.

12. Raws li Henplais 11:1, 6, txoj kev vam kev cia siab thiab txoj kev ntseeg sib chab sib chaws li cas?

¹² Peb txoj kev vam kev cia siab yuav nyob ruaj khov khwb kho yog peb tuav rawv peb txoj kev sib raug zoo nrog Yehauvas, yeeb vim yog nws thiaj muab tau txoj kev cia siab ntawd rau peb. Yuav kom peb muaj taus kev vam kev cia siab, peb yuav tsum muaj kev ntseeg tias yeej muaj Yehauvas tiag tiag li thiab nws “yuav muab nqi zog rau tus uas los cuag” nws. (Nyeem Henplais 11:1, 6.) Yog peb ntseeg tias muaj Yehauvas ces peb yuav tso siab hlo tias nws yeej yuav ua raws li nws tau cog tseg. Cia peb mus piav txog tej yam kom txhawb tau peb txoj kev sib raug zoo  nrog Yehauvas xwv thiaj yuav pab tau peb txoj kev vam kev cia siab kom nyob ruaj khov ruaj nreeg.

13. Yuav ua li cas peb thiaj nrog tau Vajtswv sib raug zoo?

¹³ Thov Yehauvas thiab nyeem nws Txoj Lus. Txawm peb tsis pom Yehauvas los peb yeej nrog tau nws sib raug zoo. Peb yeej nrog tau nws sib txuas lus thiab tso siab lug tias nws yeej mloog peb tej lus. (Yelemis 29:11, 12) Thaum peb nyeem Vajtswv Txoj Lus thiab xav txog tej lus ntawd ces twb yog peb mloog nws lus ntag. Peb txoj kev vam kev cia siab yuav nyob ruaj khov khwb kho thaum peb nyeem txog tej yam Yehauvas tau pab nws cov neeg mloog nws lus yav ntuj thaum ub. Txhua nqe uas nyob hauv Vajtswv Txoj Lus “yog sau qhia rau peb. Vajtswv txojlus ua rau peb muaj kev cia siab, ua siab ntev thiab muab siab rau ntseeg ntxiv.”​—Loos 15:4.

14. Vim li cas zoo rau peb xav txog tej yam Yehauvas tau ua rau lwm tus?

¹⁴ Xav txog tej yam uas Yehauvas tau ua raws li nws tau cog tseg. Xws li tej uas Yehauvas tau ua rau Anplahas thiab Xalas nkawv. Nkawv hnub nyoog nchav lawm thiab xeeb tsis tau tub ki. Txawm li ntawd los Vajtswv cog lus tias nkawv yeej yuav muaj tub muaj ki. (Chivkeeb 18:10) Anplahas xav li cas txog tej no xwb? Nyob hauv phau Vajlugkub hais tias: “Anplahas tseem ntseeg thiab cia siab hais tias, ‘Nws yuav tau ua ntau haivneeg tus yawgkoob.’” (Loos 4:18) Txawm Anplahas tsis paub tias xyov Yehauvas yuav ua li cas thiaj muaj raws li Nws tau cog tseg los Anplahas yeej tso siab tias Yehauvas yeej yuav ua tau xwb xwb li. Yeej muaj raws nraim li Yehauvas cog tseg tiag. (Loos 4:19-21) Raws li zaj no, yeej qhia kom peb tso siab rau Yehauvas tias nws yeej yuav ua tau raws li nws tau cog tseg tab txawm peb saib yam li ua tsis tau.

15. Vim li cas zoo rau peb xav txog tej uas Vajtswv tau ua rau peb?

¹⁵ Xav txog tej uas Yehauvas tau ua rau koj. Cia li zaum tsaws xav txog tej lus cog tseg nyob hauv phau Vajlugkub uas pab tau koj lawm. Xws li Yexus  cog lus tias Yehauvas yuav pub tej uas koj cheem tsum rau koj. (Mathais 6:32, 33) Tsis tas li ntawd, Yexus kuj tau hais tias thaum koj thov txog, Yehauvas yuav muab lub hwj huam dawb huv los pab koj. (Lukas 11:13) Yehauvas yeej ua raws li nws tau cog lus tseg. Tej zaud koj yeej yuav xav tau lwm yam uas Yehauvas tau cog lus tseg thiab tau muaj raws li ntawd. Xws li nws cog lus yuav zam koj lub txim, nplig koj lub siab, thiab pub tej yam yuav tsav tau koj txoj kev ntseeg rau koj. (Mathais 6:14; 24:45; 2 Kauleethaus 1:3) Thaum koj ua zoo zaum tsaws xav txog tej uas Yehauvas twb tau ua tag rau koj lawm, yuav tsav tau koj txoj kev vam kev cia siab rau tej yam uas Vajtswv tseem yuav ua rau koj yav tom hauv ntej.

16. Vim li cas txoj kev vam kev cia siab ho yog ib qho khoom uas Vajtswv muab pub?

¹⁶ Txoj kev vam kev cia siab uas nyob mus ib txhis yog Vajtswv pub. Peb tos tsis hnyu txog lub neej zoo zoo yuav muaj los yav tom ntej. Txoj kev cia siab no khuam peb cia ib yam li tus nqe lauj khuam xwv peb thiaj thev dhau tej kev sim siab, kev tsim txom, thiab kev ploj kev tuag. Tsis tas li ntawd, txoj kev vam no zoo li lub kaus mom hlau uas tiv thaiv peb txoj kev xav xwv peb thiaj nco ntsoov ua tej yam zoo es zam tej yam phem. Txoj kev vam kev cia siab uas hais nyob hauv phau Vajlugkub no pab tau peb nrog Vajtswv sib raug zoo thiab qhia tias Vajtswv hlub peb kawg nkaus li. Yog peb tuav rawv txoj kev vam kev cia siab no ces yuav pab tau peb lub neej tshaj plaws li.

17. Vim li cas txoj kev vam kev cia siab ho pab tau peb muaj kev zoo siab?

¹⁷ Tus tub txib Paulus tsab ntawv sau mus rau cov ntseeg hauv Loos hais tias: “Qhov uas nej cia siab rau Vajtswv yuav ua rau nej zoo siab.” (Loos 12:12) Paulus zoo siab tias yog nws tuav rawv nws txoj kev ntseeg ces nws yuav tau txoj sia ntev dhawv mus ib txhis saum ntuj ceeb tsheej. Peb los kuj zoo siab thiab muaj kev vam kev cia siab tias Yehauvas yuav ua raws li nws tej lus cog tseg. Tus sau phau ntawv nkauj hais tias: “Tus uas muaj kev kaj siab yog tus . . . tso siab plhuav rau [Yehauvas] uas yog nws tus Vajtswv, . . . Nws yeej ibtxwm uas raws li nws tej lus cog tseg.”​—Phau Ntawv Nkauj 146:5, 6.