1. Muaj coob leej ntau tus xav li cas txog lub tswv yim hauv phau Vajlugkub? (Pajlug 1:20, 21)

 NYOB rau ntau lub teb chaws, yeej muaj cov mus tshaj tawm txoj moo zoo rau tib neeg ntawm tej kev tshuam. Tej zaud koj twb tau mus qhia li no dua lawm thiab. Ntshe yuav ua rau koj rais txog nqe Vajlugkub nyob rau hauv Pajlug uas hais tias tswv yim lub suab hu tom tej kev kom tib neeg tig ntsej los mloog tswv yim qhia. (Nyeem Pajlug 1:20, 21.) Nyob rau hauv phau Vajlugkub thiab tej ntaub ntawv lub koom haum luam tawm, puav leej muaj Yehauvas lub “tswvyim” nyob rau hauv. Cov tswv yim no yog cov tswv yim uas pab kom tib neeg muaj txoj sia ntev dhawv mus ib txhis. Peb zoo siab kawg nkaus li thaum ib tug twg txais tej ntaub ntawv no mus nyeem. Tiam sis tsis yog txhua tus yuav ua li ntawd. Ib txhia tsis xav paub phau Vajlugkub. Muaj tej tug zij ncaug ntxi muag rau peb. Lawv xav tias phau Vajlugkub qub dhau lawm thiab pab tsis tau dab tsi li. Muaj dua ib txhia kuj thuam tias cov neeg uas coj li tej lus qhia hauv phau Vajlugkub yog neeg khav theeb thiab coj nruj heev. Txawm li ntawd los Yehauvas haj tseem txaus siab hlo qhia nws lub tswv yim rau txhua leej txhua tus. Nws ho qhia li cas rau li cas?

2. Niaj hnub niam no Yehauvas qhia nws lub tswv yim puv ntia li cas, tiam sis ib txhia tib neeg ho coj li cas?

² Ib txoj hau kev uas Yehauvas qhia nws lub tswv yim yog phau Vajlugkub. Phau ntawv no yeej muab faib tawm rau tib neeg yuav luag txhua. Peb tej ntaub ntawv los pab kawm phau Vajlugkub muab txhais ntau tshaj li 1,000 tawm yam lus. Cov tib neeg uas nyeem tej ntau ntawv no thiab siv rau hauv lawv lub neej yeej pab tau lawv lawm hov ntau. Tiam sis kuj muaj ib txhia tsis xav mloog Yehauvas qhia. Thaum lawv yuav txiav txim siab ua ib yam dab tsi, lawv tsuas ua raws li lawv lub siab nyiam los sis mus nug lwm tus tib neeg kom pab lawv. Tej zaud lawv yuav saib tsis taus peb vim peb coj raws li tej lus nyob hauv  phau Vajlugkub. Nyob rau hauv zaj kawm no, yuav piav tias vim li cas tib neeg thiaj xav li ntawd. Tiam sis ua ntej no, cia peb mus kawm seb ua li cas thiaj tau Yehauvas lub tswv yim.

3. Peb yuav tau ua li cas peb thiaj muaj Yehauvas lub tswv yim?

³ Tswv yim yog siv tej yam uas peb paub los pab peb paub txiav txim ua neej. Tiam sis Yehauvas lub tswv yim tseem tob tshaj qhov ntawd lawm thiab. Nyob hauv phau Vajlugkub hais tias: “Tus uas muaj tswvyim yog tus uas paub hwm [Yehauvas]. Yog koj paub Vajtswv tus uas Dawbhuv, koj thiaj yog tus totaub tiag.” (Pajlug 9:10) Yog li ntawd, thaum peb yuav txiav txim siab ib yam dab tsi hauv lub neej, peb yuav tau nrhiav seb Yehauvas ho xav li cas. Qhov uas peb yuav nrhiav tau ntawd yog kawm phau Vajlugkub thiab tej ntaub ntawv lub koom haum luam tawm. Ua li no, peb thiaj li yuav muaj Yehauvas lub tswv yim.​—Pajlug 2:5-7.

4. Vim li cas Yehauvas thiaj yog tus uas txawj qhia tswv yim rau peb?

⁴ Yehauvas ib leeg xwb thiaj yog tus uas txawj qhia tswv yim rau peb. (Loos 16:27) Tos peb hais li no los yeeb vim yog (1) nws yog tus kws tsim thiab nws paub txhua yam uas nws tau tsim. (Phau Ntawv Nkauj 104:24) (2) Txhua yam Yehauvas ua puav leej qhia tias nws ntse tshaj plaws. (Loos 11:33) (3) Yog cov uas coj raws li Yehauvas qhia, yeej tsav tau lawv lub neej lawm hov ntau tuaj. (Pajlug 2:10-12) Yog peb xav kom peb muaj tswv yim, peb yuav tau ntseeg raws li peb nqes hais tas los no thiab nco ntsoov tias yog yuav txiav txim siab ua ib yam dab tsi, cia li muab tej no los xav ua ntej tso.

5. Muaj li cas xwb thaum tib neeg tsis kam lees paub Yehauvas lub tswv yim?

⁵ Thaum peb mus qhia Vajlugkub, muaj coob leej ntau tus uas peb ntsib yeej nyiam tej yam zoo zoo nkauj nyob ib ncig lawv tiam sis lawv tsis lees paub tus kws tsim thiab haj tseem hais tias txhua yam yog txia los xwb. Muaj dua ib txhia kuj lees paub Vajtswv, tiam sis lawv hais tias tej tswv yim nyob hauv phau Vajlugkub tsis zoo yuav lawm ces lawv ua neej ywj siab. Qhov uas tib neeg tsis yuav Yehauvas lub tswv yim, tib neeg lub neej puas zoo dua tuaj? Lawv puas muaj kev kaj siab tiag tiag los sis puas muaj kev vam kev cia siab rau yav tom hauv ntej? Thaum peb muab txhua yam coj los ua zoo tshuaj, peb yuav pom tau tias: “Yog [Yehauvas] tawmtsam koj lawm, neeg lub tswvyim, txojkev txawj ntse thiab kev totaub yeej pab tsis tau koj li.” (Pajlug 21:30) Tej lus no yuav pab kom peb rau siab ntso thov Yehauvas muab nws lub tswv yim los qhia peb. Tiam sis ua cas ib txhia tib neeg tsis kam lees yuav Yehauvas lub tswv yim?

6. Raws li Pajlug 1:22-25, leej twg yog cov tsis lees yuav Yehauvas lub tswv yim?

⁶ Txawm Yehauvas lub tswv yim “lub suab hu tom tej kev” los tib neeg feem coob ntsaws qhov ntsej tsis hnov. Raws li hais nyob hauv phau Vajlugkub mas muaj peb pawg tib neeg tsis xav yuav Yehauvas lub tswv yim: “cov uas tsis thoob tsib,” “cov uas thuam luag,” thiab “cov uas ruam.” (Nyeem Pajlug 1:22-25.) Cia peb kawm txuas ntxiv seb vim li cas lawv ho tsis xav lees yuav Yehauvas lub tswv yim thiab kom peb tsis txhob xyaum coj yam li lawv.

7. Vim li cas ib txhia tib neeg nyiam ua “cov uas tsis thoob tsib”?

⁷ “Cov uas tsis thoob tsib” yog cov neeg uas ntseeg txhua yam lawv hnov thiab luag ntxias tau yooj yooj yim. (Pajlug 14:15) Thaum peb mus qhia Vajlugkub, peb yeej ntsib cov neeg zoo yam li no. Xws li qas txhiab qas vam leej ua raws li tej xib hwb ntawm tej kev ntseeg los sis  tej nom tswv tej lus haub ntxias. Thaum ib txhia paub hais tias cov tib neeg ntawd dag rau lawv mas ua rau lawv ntseeg tsis taus li. Tiam sis nyob rau hauv Pajlug 1:22, muaj ib txhia yeem ua neeg tsis thoob tsib vim lawv yeej nyiam li ntawd. (Yelemis 5:31) Lawv tsuas nyiam ua li lawv lub siab ntshaw xwb vim lawv tsis xav ua li tej uas hais nyob rau hauv phau Vajlugkub. Muaj coob leej ntau tus xav tib yam li tus poj niam hauv teb chaws Kanadas (Canada) uas tau hais rau Yehauvas ib tug Tim Khawv tias, “Yog peb tus txiv plig dag peb ces yog tim nws xwb tsis yog tim peb.” Cov neeg coj yam li no txhob txwm tsis xav yuav Yehauvas lub tswv yim. Cia peb tsis txhob xyaum li lawv.​—Pajlug 1:32; 27:12.

8. Muaj dab tsi pab tau peb kom txawj ua neeg thoob tsib?

⁸ Nyob hauv phau Vajlugkub tau hais tias kom peb tsis txhob ua neeg tsis thoob tsib tiam sis yuav tsum txawj “xav li tej neeg laus xav.” (1 Kauleethaus 14:20) Peb yuav ua neeg thoob tsib yog peb coj raws li tej hauv paus ntsiab lus nyob rau hauv phau Vajlugkub. Ntev mus ntev tuaj, peb yuav pom tias tej hauv paus ntsiab lus ntawd yuav pab tau peb kom tsis txhob raug teeb meem thiab yuav pab tau kom peb txawj txiav txim rau qhov zoo. Cia peb nco ntsoov tshuaj peb tus kheej ntshuj ntshis. Xws li yog tias peb twb kawm Vajlugkub thiab mus kev sib txoos tau ib nyuag ntu, cia peb zaum tsaws xav seb vim li cas peb tsis muab peb lub neej cob rau Yehauvas thiab ua kev cai raus dej. Yog tias peb twb ua kev cai raus dej lawm, peb puas kub siab kawm kom txawj qhia txoj moo zoo? Tej peb txiav txim siab ua puas qhia tias peb coj raws li phau Vajlugkub tej hauv paus ntsiab lus? Peb puas saib taus lwm tus ib yam li Yexus saib taus lwm tus? Yog tias muaj qho yam peb yuav tau hloov, cia peb ua tib zoo mloog tej uas Yehauvas qhia vim yuav “ua rau tus uas muaj tswvyim tsawg txawj ntse tuaj.”​—Phau Ntawv Nkauj 19:7.

9. “Cov uas thuam luag” tau ua li cas tias lawv tsis yuav Yehauvas lub tswv yim?

⁹ Pab ob uas tsis lees yuav Yehauvas lub tswv yim yog “cov uas thuam luag.” Muaj qee zaug peb kuj ntsib cov tib neeg yam li no thaum mus qhia txoj moo zoo. Lawv nyiam thuam lwm tus. (Phau Ntawv Nkauj 123:4) Nyob rau hauv phau Vajlugkub tau qhia tias yuav muaj cov tib neeg zoo yam li no coob heev rau tiam kawg. (2 Petus 3:3, 4) Cov neeg niaj hnub niam no ib txhia zoo li Lauj ob tug vauv uas tsis quav ntsej Vajtswv tej lus ceeb toom. (Chivkeeb 19:14) Muaj ib txhia tib neeg kuj luag cov uas coj lub neej raws li phau Vajlugkub qhia. Lawv coj li no vim lawv “nyiam ua phem raws li lawv lub siab nyiam.” (Yudas 7, 17, 18) Nyob rau hauv phau Vajlugkub yeej hais tau dhos daws rau cov fav xeeb thiab cov uas tsis lees yuav Yehauvas.

10. Raws li Phau Ntawv Nkauj 1:1, yuav ua li cas peb thiaj tsis xyaum ua neeg thuam lwm leej lwm tus?

¹⁰ Yuav ua li cas peb thiaj tsis xyaum ua neeg thuam lwm leej lwm tus? Ib qho yog txhob mus nrog cov neeg yws taus ua ke. (Nyeem Phau Ntawv Nkauj 1:1.) Yuav kom peb tsis ua li no, peb yuav tau txhob mus nyeem los sis mloog cov neeg fav xeeb tej lus haub ntxias. Yog peb tsis mam xav mam ua ces tib ntsais muag xwb peb yuav xyaum ua neeg yws taus. Peb yuav pib xav tsis zoo txog Yehauvas thiab tej yam Yehauvas lub koom haum tau tshaj tawm tuaj. Yuav kom peb tsis txhob ua neeg yws taus, cia peb rov tshuaj peb tus kheej li no tias: ‘Thaum muaj ib yam twg tau hloov, kuv puas yws mus yws los tias tsis yog lawm? Nyob hauv kuv nruab siab, puas nrhiav nrhw kev los thuam cov saib xyuas Yehauvas cov tib neeg?’ Yog peb xav tau tej yam tsis no rau hauv nruab siab, kav tsij maj nrawm nroos muab tshem  tawm mus xwv Yehauvas thiaj li txaus siab rau peb.​—Pajlug 3:34, 35.

11. “Cov neeg ruam” saib Yehauvas tej kev cai zoo li cas?

¹¹ Pab peb uas tsis lees yuav Yehauvas lub tswv yim yog “cov neeg ruam.” Lawv ruam vim lawv tsis kam coj Yehauvas tej kev cai rau hauv lawv lub neej. Lawv xav hais tias, lawv yog cov uas hais yog. (Pajlug 12:15) Cov neeg zoo li no tsis kam lees yuav Yehauvas tus uas yog lub hauv paus tswv yim. (Phau Ntawv Nkauj 53:1) Thaum peb mus qhia Vajlugkub, cov neeg no yeej thuam peb vim peb coj li tej kev cai hauv phau Vajlugkub. Txawm lawv hais li ntawd los, lawv twb tsis muaj ib yam zoo qhov twg los qhia peb. Nyob rau hauv phau Vajlugkub hais tias: “Cov neeg txawj ntse hais tej lus uas tob tob ua rau tus neeg ruam tsis totaub; thaum sib tham txog tej yam tseemceeb, tus ruam tsis muaj lus hais li.” (Pajlug 24:7) Cov ruam yeej hais tsis tau ib lo lus twg ntse ntsuav los qhia rau leej twg. Yog li ntawd, Yehauvas thiaj ceeb toom kom peb ‘txav kom deb ntawm cov neeg ruam’.​—Pajlug 14:7.

12. Yuav ua li cas peb thiaj tsis coj li cov neeg ruam?

¹² Peb zoo tsis thooj li cov neeg ntxub ntxaug Yehauvas tej lus qhia. Tiam sis peb yuav tau xyaum kom thiaj nyiam tej yam uas Yehauvas lub siab xav, tsis hais tag nrho tej kab lig kev cai. Yuav kom peb nyiam coj Yehauvas tej kev cai, peb yuav tau muab cov uas coj nws tej cai thiab cov uas tsis kam coj nws tej cai lub neej los sib piv. Cia peb ua zoo soj ntsuas seb tus tsis kam mloog Yehauvas tej lus qhuab ntuas muaj teeb meem npaum li cas hauv nws lub neej. Tsis tas li ntawd, muab koj lub neej coj los tshuaj ntsuas seb zoo npaum li cas thaum koj mloog Yehauvas lus.​—Phau Ntawv Nkauj 32:8, 10.

13. Yehauvas puas yuam peb mloog nws lub tswv yim?

¹³ Yehauvas cia nws lub tswv yim muaj nyob puv ntia rau txhua tus kawm, tiam sis nws tsis yuam ib tug twg kom los coj. Nws yeej qhia meej meej tias tus uas tsis kam mloog nws lub tswv yim yuav tau saws dab tsi. (Pajlug 1:29-32) Cov uas txhob txwm tsis kam mloog Yehauvas yuav “tau sau raws li tej uas [lawv] tau ua los lawm.” Ntev mus ntev tuaj, lawv yuav raug kev nyuaj siab ntxhov plawv rau hauv lawv lub neej ces thaum kawg, Yehauvas yuav tau muab lawv rhuav tshem tawm mus. Tiam sis cov uas coj li Yehauvas lub tswv yim rau hauv lawv lub neej, Yehauvas cog lus tias: “Tus uas mloog kuv lus, tus ntawd yuav nyob khov kho thiab tso siab plhuav tsis ntshai ib yam dabtsi li.”​—Pajlug 1:33.

14-15. Peb khaws tau dab tsi los ntawm Pajlug 4:23?

¹⁴ Yog peb muab Yehauvas lub tswv yim coj los siv rau hauv lub neej, yeej yuav pab tau peb lawm hov ntau tuaj. Raws li peb twb piav tag los lawm, Yehauvas yeej qhia nws lub tswv yim nyob puv ntia qhov txhia qhov chaw. Xws li nyob rau hauv phau ntawv Pajlug, txhua lub tswv yim uas Yehauvas qhia puav leej pab tau  peb. Cia peb mus piav txog plaub lub tswv yim uas nyob rau hauv phau Pajlug.

¹⁵ Koj yuav tsum ua tib zoo tswj koj lub siab. Nyob rau huav phau Vajlugkub tau hais tias: “Koj yuav tsum ua tib zoo tswj koj lub siab rau txhua fab rau qhov txojsia txhawv tawm hauv lub siab los.” (Pajlug 4:23) Zoo ib yam li peb yuav tau tu peb lub cev ntaj ntsug ntshis. Xws li noj zaub mov, qoj ib ce, thiab ua tej yam kom txuag tau peb txoj sia. Zoo tib yam nkaus li ntawd, peb yuav tau ua ub ua no xwv peb thiaj tswj taus peb lub siab. Xws li nyeem Vajtswv Txoj Lus txhua hnub, npaj ua ntej tej kev sib txoos, mus kev sib txoos, thiab tsa tes teb. Txuas ntxiv ntawd, kub siab lug mus qhia txoj moo zoo. Thiab tsis txhob mus xyaum tej yam yuav ua tau rau peb xav qhov phem qhov qias, xws li mus poo tej neeg phem thiab mloog los sis saib tej yam tsis huv.

16. Vim li cas Pajlug 23:4, 5 ho pab tau peb niaj hnub niam no?

¹⁶ Txaus siab rau tej koj muaj. Nyob rau hauv phau Vajlugkub qhia li no tias: “Yuav tsum ua neeg ntse, tsis txhob cia nyiaj txiag yuam tau koj ua qhev. Rau qhov tib ntsais muag xwb, koj tej nyiaj txiag yuav ploj tas ib yam li tus dav uas muaj tis ya.” (Pajlug 23:4, 5) Peb tej nyiaj txiag thiab cuab txhiaj cuab tam yeej tsis kav mus ib sim. Txawm li ntawd los, cov muaj thiab cov pluag niaj hnub huas ntshis kom muaj nyiaj muaj txiaj nkaus nkaus xwb. Cov tib neeg no yeej ua ntau tsav ntau yam kom tau nyiaj txawm lawv yuav puas koob puas npe, rhuav lawv lub cuab lub yig, thiab tsub tau kab mob kev nkeeg los xij peem. (Pajlug 28:20; 1 Timautes 6:9, 10) Tiam sis yog peb muaj Yehauvas lub tswv yim ces peb yuav saib tej nyiaj txiag tsis loj ua luaj twg. Tsis tas li ntawd, haj tseem yuav tiv thaiv tau peb kom tsis txhob ntshaw nyiaj, txaus siab rau lub neej thiab muaj kev kaj siab.​—Tej Lus Qhia 7:12.

17. Raws li Pajlug 12:18, yuav ua li cas peb thiaj txawj hais tej lus zoo?

¹⁷ Xav tag mam hais. Yog peb ua ncauj lus sai, yuav tsub tau kev nyuaj siab. Nyob rau hauv phau Vajlugkub hais li no tias: “Tej lus tsis zoo chob luag siab ib yam li rab ntaj, tiamsis lo lus zoo nplig tau luag lub siab.” (Pajlug 12:18) Yog  peb tsis taug xaiv txog lwm tus ces sawv daws yeej sib raug zoo. (Pajlug 20:19) Yuav kom peb txawj hais tej lus txhawb siab, peb yuav tau nyeem phau Vajlugkub tsis so. (Lukas 6:45) Yog peb zaum tsaws xav txog tej lus nyob hauv phau Vajlugkub ces peb cov lus yuav zoo yam li “tus dejcag uas ntws ntshiab si” uas daws tau lwm tus txoj kev qhuav siab.​—Pajlug 18:4.

18. Yog peb coj raws li Pajlug 24:6, yuav pab tau kom peb txawj mus qhia Vajlugkub li cas?

¹⁸ Mloog tej uas Yehauvas lub koom haum tau qhia. Nyob rau hauv phau Vajlugkub hais li no tias: “Nej yuav tsum npaj tswvyim kom zoo ua ntej nej mam li mus ntaus rog, yog muaj ntau tus tuav tswvyim nej yim huab yuav kovyeej.” (Pajlug 24:6) Nqe Vajlugkub no txhawb kom peb txawj mus qhia txoj moo zoo. Peb yuav tau xyaum ua raws li Yehauvas lub koom haum qhia xwv peb thiaj tsis lam tau lam qhia ua dog ua dig. Thaum peb mus tom tej kev sib txoos, kuj muaj cov los qhuab qhia thiab ua yeeb yam kom peb thiaj xyaum tau. Tsis tas li ntawd, Yehauvas lub koom haum kuj npaj kom muaj tej ntaub ntawv thiab yeeb yaj kiab rau peb siv pab lwm tus nkag siab phau Vajlugkub. Kav tsij xyaum siv, koj thiaj txawj.

19. Koj puas nyiam Yehauvas lub tswv yim thiab? (Pajlug 3:13-18)

¹⁹ Nyeem Pajlug 3:13-18. Peb ris txiaj ntsig kawg nkaus li uas muaj Yehauvas lub tswv yim nyob rau hauv phau Vajlugkub. Peb yeej tsis muaj chaw cob cuab yog peb tsis muaj nws Txoj Lus los qhia peb ua neej. Nyob rau hauv zaj kawm no, peb yeej pom tias phau Pajlug yeej qhia tau ib co tswv yim zoo kawg li rau peb tau xyaum. Tsis yog Yehauvas tsuas qhia qho me ntsis rau hauv phau Pajlug xwb, tiam sis nws qhia nws lub tswv yim puv ntia phau Vajlugkub. Kav tsij muab nws Txoj Lus coj los siv rau hauv peb lub neej. Lub qab ntuj neeg no yuav nyiam hais li cas txog Yehauvas lub tswv yim los xij peem, peb yeej paub tseeb tseeb lawm tias “lub tswvyim yuav ua rau [peb] muaj sia nyob cus plaws.”