Nyob rau xyoo ntawd, lub koom haum tau muab qho yam hloov me ntswb me ntsis los mus pab kom Cov Tub Kawm Vajlugkub thiaj muaj kev sib koom siab. Nyob rau hauv Phau Tsom Faj, tau muab tej nqe Vajlugkub uas tau siv thaum mus tej kev sib txoos coj los ua tib zoo piav. Tsis tas li ntawd, Cov Tub Kawm Vajlugkub ua tau ib daim kom tswj qhia seb yuav nyeem Vajlugkub li cas rau li cas txhua txhua lub lim tiam thiab seb yuav hu zaj nkauj twg thaum tsev neeg kawm Vajlugkub ua ke los sis kawm Vajlugkub ib leeg.

Nyob rau ntawm tej kev sib txoos, Cov Tub Kawm Vajlugkub tham txog tej yam xws li tej uas lawv tau ntsib thaum mus qhia txoj xov zoo, vim li cas lawv ho ris Vajtswv txiaj ntsig, hu ib zaj nkauj, los sis thov Vajtswv. Muaj ib tug muam npe hu ua Eva Npanis (Barney) tau ua kev cai raus dej xyoo 1923. Thaum ntawd nws muaj li 15 xyoos. Nws hais tias: “Thaum txog caij rau yus piav, yus yuav tau sawv ntsug thiab hais tias, ‘Kuv ua tus Tswv tsaug rau txhua yam nws tau ua zoo rau kuv ua ntej.’” Muaj ib txhia kwv tij nyiam hais lus heev. Tus muam Eva hais li no ntxiv tias: “Kwv Tij Nkavim (Godwin) hais ntau ntau yam los ua tus Tswv tsaug. Tiam sis thaum nws tus poj niam pom tias tus kwv tij uas coj ntawd ntxhov siab vim nws tus txiv hais ntev ntev ces nws thiaj li rub nws tus txiv lub tw tsho ces nws tus txiv thiaj li tsum thiab zaum lawm.”

Txhua lub hlis ib zaug, cov koom txoos nyias yeej muaj nyias qhov uas los piav rau sawv daws mloog thaum tuaj sib txoos ua ke. Phau Tsom Faj lub 4 Hlis tim 1 xyoo 1923 piav qhia li no tias: “Ib nrab ntawm qhov kev sib txoos ntawd yog muab rau sawv daws los tham txog seb mus tshaj tawm txoj xov zoo mus zoo li cas thiab los mus txhawb cov ua tes hauj lwm no. . . . Peb vam thiab cia siab tias qhov ua li no yuav txhawb tau kom sawv daws huab yam sib raug zoo ntxiv.”

Muaj ib tug kwv tij npe hu ua Tshalau Mateem (Charles Martin) uas muaj hnub nyoog 19 xyoos nyob teb chaws Kanada (Canada) ntawm lub nroog Vakhuvaws (Vancouver) nyiam qhov kev sib txoos no kawg li vim pab tau nws heev. Nws hais li no tias: “Qhov kev sib txoos no pab tau kuv txawj mus qhia txoj xov zoo ib lub qhov rooj dhau ib lub qhov rooj. Nyob rau ntawm no nyias los piav txog nyias zaj seb thaum lawv mus rau ntawm qhov rooj, lawv ho ntsib li cas. Tej uas lawv hais no pab kom kuv muaj tswv yim seb yuav hais li cas los mus teb tib neeg rau ntawm qhov rooj.”

Thaum teem muaj hnub rau sawv daws tuaj qhia Vajlugkub ua ke, ua rau cov kwv tij nkauj muam sib koom siab heev zuj zus. Nyob rau Phau Tsom Faj lub 4 Hlis tim 1 xyoo 1923 tshaj tawm tias: “Peb yuav tau sib  koom siab ua tib tes hauj lwm. Hnub 2 (Tuesday) lub 5 Hlis tim 1 xyoo 1923 yog hnub teem tseg rau sawv daws sib sau tuaj mus qhia Vajlugkub ua ke. Dua li ntawd lawm, txhua txhua lub hlis, thawj Hnub 2, lawv puav leej tuaj sib sau ua li no.”

Txawm cov hluas los yeej sib pab pes daws ua tes hauj lwm no. Muaj ib tug muam npe hu ua Hexaum Npafawj (Hazel Burford) uas muaj hnub nyoog 16 xyoo hais tias: “Muaj ib daim qauv rau peb xyaum kom cim tau rau nruab siab mus qhia txoj xov zoo. a Kuv yawm txiv wb kub siab lug mus qhia txoj xov zoo.” Muaj ib tug kwv tij los ntuas qhov uas Hexaum mus qhia Vajlugkub. Hexaum hais tias: “Muaj ib tug kwv tij uas hnub nyoog nchav lawm hais tias kom kuv tsis txhob mus qhia Vajlugkub rau tib neeg. Nyob rau lub sij hawm no, ib txhia tsis nkag siab tias cov tub hluas ntxhais hluas los kuj mus qhuas tau tus Tswv Tsim thiab.” (Phau Ntawv Nkauj 148:12, 13) Txawm li ntawd los Hexaum yeej tsis cia qhov no txwv tau nws. Nws mus kawm Kile-a pab ob, thiab tom qab nws mus ua ib tug tub txib tshaj tawm txawv teb chaws nyob rau teb chaws Panama. Tom qab no cov kwv tij ntawd kuj hloov lawv txoj kev xav txog tsis kheev cov hluas mus tshaj tawm txoj xov zoo.

Tej rooj sib txoos yeej ua tau rau cov kwv tij nkauj muam sib koom siab ntxiv zuj zus. Thaum muaj cov rooj sib txoos no, lawv kuj tshwj ib hnub mus qhia Vajlugkub ua ke. Xws li lub rooj sib txoos nyob teb chaws Kanada ntawm lub nroog Veniphes (Winnipeg), tau tshwj lub 3 Hlis tim 31 rau cov uas tuaj lub rooj sib txoos kom mus qhia txoj xov zoo rau hnub ntawd. Vim lawv mus li no, lawv thiaj ntsib coob leej ntau tus thiab lawv kuj ntsib ib txhia tib neeg uas nyiam Vajlugkub heev. Nyob rau lub 8 Hli tim 5, kwv lam li 7,000 leej tib neeg tuaj koom lub rooj sib txoos hauv lub nroog Veniphes. Zaum no tib neeg tuaj coob tshaj rau lub rooj sib txoos li txhia xyoo hauv teb chaws Kanada.

Nyob rau lub 8 Hli tim 18 txog 26 xyoo 1923, Yehauvas cov tib neeg muaj ib lub rooj sib txoos tseem ceeb heev nyob rau lub xeev Kalifaunias (California) ntawm lub nroog Lo Eentsulem (Los Angeles). Ob peb lub lim tiam ua ntej lub rooj sib txoos ntawd, muaj ntawv xov xwm sau txog lub rooj sib txoos no thiab Cov Tub Kawm Vajlugkub tau tseb tawm tshaj li 500,000 daim ntawv rau tib neeg. Lawv muab tej ntawv loj loj tshaj tawm txog lub rooj sib txoos lo rau tej tsheb loj loj thiab tej tsheb me.

Lub 8 Hli tim 25 uas yog Hnub 6 (Saturday), Kwv Tij Luthafaw (Rutherford) cev ib zaj lus qhuab qhia hu ua  “Cov Yaj Thiab Tshis.” Nws tias cov “yaj” yog cov muaj lub siab xib rau Vajtswv tiag thiab yuav nyob mus ib txhis rau hauv lub ntiaj teb no. Nws kuj tham ib zaj lus qhuab qhia ntxiv thiab nyeem ib daim ntawv hu ua “Ceeb Toom” seb sawv daws puas txaus siab li daim ntawv hais. Nyob rau hauv daim ntawv no tshaj tawm kom cov muaj lub siab mos siab muag rho npe thiab cais tawm ntawm “lub nroog Npanpiloos uas loj dua ntais.” (Tshwmsim 18:2, 4) Tom qab ntawd, Cov Tub Kawm Vajlugkub uas nyob thoob ntiaj teb muaj siab kub lug tseb tawm tej ntawv tseb uas hais txog qhov kev pom zoo no.

Hnub kawg ntawm lub rooj sib txoos, muaj tshaj li 30,000 tawm leej hnov Kwv Tij Luthafaw cev zaj lus qhuab qhia tias “Amankedoos Tab Tom Yuav Los Raug Txhua Haiv Neeg, Tiam sis Coob Tus Uas Muaj Sia Nyob Tam Sim No Yuav Tsis Tuag Li.” Lawv npaj siab tias yuav muaj tib neeg yuav tuaj ntsawm nkaus, Cov Tub Kawm Vajlugkub thiaj li mus xauj lub tsev loj loj nyob rau hauv lub nroog Lo Eentsulem. Cov kwv tij siv cov paj taub loj loj kom txhua leej txhua tus thiaj li hnov thaum tuaj rau ntawd. Hos ib txhia kuj siv xov tooj cua los mloog.

Nyob rau xyoo 1923, txoj kev tshaj tawm nthuav dav zuj zus mus rau sab Afika (Africa), Yus Luv, Eedias (India) thiab Amelikas qab teb (South America). Nyob rau Eedias, muaj ib tug kwv tij hu ua Es Ntses Ntsauxes (A.J. Joseph) thiab nws tus poj niam nkawd muaj rau leej me nyuam tiam sis nws haj tseem saib xyuas qhov chaw luam ntaub ntawv rau yam lus Hidis (Hindi), Tamis (Tamil), Telunkus (Telugu), thiab Awdus (Urdu).

Nyob rau teb chaws Xiala Li-oo (Sierra Leone), muaj ob tug ntawm Cov Tub Kawm Vajlugkub hu ua Afes Ntsauxes (Alfred Joseph) thiab Li-aunaw Nplamees (Leonard Blackman) sau ib tsab ntawv mus rau lub hauv paus koom haum loj nyob lub xeev Nus Yauj (New York) ntawm lub nroog Npluavlees (Brooklyn) thov kom txib neeg tuaj pab tshaj tawm txoj xov zoo. Nyob rau lub 4 Hlis tim 14 xyoo 1923, lawv thiaj li xa neeg mus raws li nkawd thov. Afes hais tias, “Hnub 6 thaum tsaus ntuj, muaj ib tug txawm hu xov tooj tuaj rau kuv.” Nws hnov tus neeg sab tod hais nrov nrov tias, “Koj puas yog tus tib neeg uas sau ntawv tuaj rau lub hauv paus koom haum loj thov kom muaj neeg tuaj pab tshaj tawm txoj xov zoo?” Afes teb tias, “Yog.” Ces lub suab sab tod hais tias, “Kuv yog tus lawv xa tuaj ntag.” Lub suab ntawd yog Viyees Lolees Npalau (William Roland Brown). Hnub ntawd nkawd ob niam txiv thiab nkawd ob tug me ntxhais tuaj txog. Tib pliag xwb lawv txawm siv ntsib Viyees tsev neeg.

Afes hais ntxiv tias: “Hnub tom qab, kuv thiab Li-aunaw wb tab tom tham Vajlugkub li txhua lub lim tiam wb niaj zaus tham. Ua ciav wb tseem pom ib tug txiv neej siab siab sawv ntsug nyob rau ntawm qhov rooj. Tus txiv neej ntawd yog Kwv Tij Npalau. Nws yog ib tug kub siab lug qhia qhov tseeb mas hnub tom qab xwb nws twb xav cev ib zaj lus qhuab qhia.” Twb  tsis tau muaj ib lub hlis, Kwv Tij Npalau txawm siv tseb tag cov ntaub ntawv nws nqa nrog nws tuaj. Ces nws rov qab txais dua 5,000 phau ntawv ntxiv. Tsis tau ntev xwb cov ntawv ntawd twb tag lawm thiab mas nws haj tseem xav tau ntawv ntxiv los tseb. Txawm nws muag tau tej ntaub ntawv no los luag tsis hu nws tias nws yog ib tug neeg muag ntawv. Tiam sis luag paub hais tias nws yog ib tug kub siab lug teev tiam Yehauvas nyob rau hauv nws lub neej thiab nyob rau hauv nws tej lus qhuab qhia los nws yeej siv Vajtswv Txoj Lus los tham. Yog li ntawd, nws thiaj siav npe hu ua Vajlugkub Npalau.

Nyob rau teb chaws Ntsaws Mes Nis (Germany), cov kwv tij txiav txim siab muab ceg Npe-ee txav tawm hauv lub nroog Npamees (Barmen) vim lub nroog ntawd tsis loj pes tsawg, thiab lawv kuj hnov xov tias cov tub rog Fab Kis yuav tuaj txeeb lub nroog ntawd. Cov Tub Kawm Vajlugkub nrhiav tau ib lub tsev nyob rau lub nroog Madenpaws (Magdeburg) uas tab tom zoo rau lawv ua chaw luam ntaub ntawv rau hauv. Yog li ntawd, lub 6 Hli tim 19, cov kwv tij thiaj li ntsaig cov twj luam ntaub ntawv thiab tej rooj tog mus rau hauv lub tsev Npe-ee tshiab uas yog nyob hauv lub nroog Madenpaws. Hnub tom qab uas lawv hais rau lub hauv paus koom haum loj tias lawv ntsaig txhua yam tiav tag lawm ces lawv hnov tib neeg hais xov xwm tias Fab Kis twb tuaj txeeb tau lub nroog Npamees lawm. Cov kwv tij xam pom tias qhov uas lawv tsiv zaum no yog Yehauvas pab thiab tiv thaiv lawv.

Nyob rau teb chaws Nplaxi (Brazil), muaj ib tug kwv tij npe hu ua Ntsauj Yoos (George Young) ncig mus tshaj tawm txoj xov zoo rau txhua qhov. Ces txawm muaj ib ceg Npe-ee tshiab nyob rau teb chaws ntawd thiab txawm pib txhais Phau Tsom Faj ua lus Po Tsu Nkau (Portugal). Ob peb lub hlis dhau ntawd, kwv tij Ntsauj tseb tawm tau 7,000 tawm daim ntaub ntawv. Muaj ib tug poj niam hu ua Xelas Fenkawxees (Sarah Ferguson) zoo siab heev thaum kwv tij Ntsauj tuaj xyuas lawv tsev neeg. Xelas twb nyeem Phau Tsom Faj txij ntua xyoo 1899 los lawm tiam sis nws tsis tau kam ua kev cai raus dej. Ob peb lub hlis tom qab kwv tij Ntsauj tuaj xyuas lawv, Xelas thiab nws plaub tug me nyuam txawm ua kev cai raus dej.

Thaum xyoo 1923 yuav xaus, nyob rau hauv Phau Tsom Faj lub 12 Hlis tim 15 xyoo 1923 qhia tias muaj ntau yam txawv txav nyob rau tej kev sib txoos, txoj kev mus tshaj tawm, thiab cov rooj sib txoos txhawb tau Cov Tub Kawm Vajlugkub ntau heev. Nyob rau hauv hais tias: “Peb yeej pom tias txhua tus hauv lub koom txoos muaj kev ntseeg heev. . . . Cia peb rau siab ntso ua hauj lwm kom ntau ntxiv zuj zus thiab kub siab lug teev tiam Vajtswv rau xyoo 1924.”

Xyoo 1924 los kuj yog ib xyoos uas muaj kev lom zem xauv npo rau Cov Tub Kawm Vajlugkub. Cov kwv tij nyob rau hauv Npe-ee sib zog ntsos mus hais tau ib thaj av hauv lub zos Xateem Ailees (Staten Island) uas nyob ze ze lub hauv paus koom haum loj hauv lub nroog Npluavlees. Tej tsev uas ua rau thaj av no ua tiav rau thaum nyuam qhuav pib xyoo 1924. Qhov no pab tau cov kwv tij nkauj muam muaj kev sib koom siab thiab mus tshaj tawm txoj xov zoo ntau tshaj li yav tag los lawm.