1. Yehauvas txhawb nws cov tib neeg txheej thaum ub li cas?

 NYOB hauv Vajtswv Txoj Lus, muaj ntau zaus yeej hais txog tias cov uas teev tiam Yehauvas muaj zog heev. Tiam sis txawm tus muaj zog tshaj los yeej tsis xav tias nws muaj zog. Xws li muaj ib zaug Vaj Ntxwv Daviv xav hais tias nws zoo “yam li lub roob ruaj khov,” tiam sis muaj qee zaug nws “ntshai kawg li.” (Phau Ntawv Nkauj 30:7) Hos Vajtswv pub nws lub hwj huam dawb huv rau Xaxoos, thiab ua rau Xaxoos muaj zog heev. Tiam sis Xaxoos paub hais tias yog tsis muaj Vajtswv lub hwj huam dawb huv ces nws “lub zog yuav ntaug thiab [nws] tsuas muaj zog ib yam li lwm tus lawm xwb.” (Cov Thawjtswj 14:5, 6; 16:17) Yog li ntawd, tos Yehauvas cov tib neeg muaj zog los twb yog muaj Yehauvas ua tus hwj xwm lawv.

2. Vim li cas tus tub txib Povlauj ho hais tias nws qaug zog thiab muaj zog? (2 Kauleethaus 12:9, 10)

² Tus tub txib Povlauj xam pom tias nws yuav tsum tau Yehauvas txoj kev pab. (Nyeem 2 Kauleethaus 12:9, 10.) Povlauj yog ib tug neeg muaj mob muaj nkeeg ib yam li peb. (Kalatias 4:13, 14) Muaj tej thaum yeej nyuaj rau nws ua kom tau qhov zoo qhov yog. (Loos 7:18, 19) Hos muaj tej thaum nws kuj ntshai vim nws tsis paub tias yuav muaj dab tsi los raug nws yav tom ntej. (2 Kauleethaus 1:8, 9) Ua li Povlauj hais tias nws qaug zog tiam sis vim li cas nws ho muaj zog? Twb yog vim muaj Yehauvas ntxiv dag ntxiv zog rau Povlauj, nws thiaj thev taus tej uas nws raug.

3. Nyob rau hauv zaj kawm no yuav teb cov lus nug twg?

³ Yehauvas cog lus tias nws yuav ntxiv dag ntxiv zog kom peb nyiaj taus ib yam nkaus. (1 Petus 5:10) Yog peb tsis kam ua dab tsi ces Yehauvas kuj tsis pom qab pab peb li cas. Zoo ib yam li lub cav tsheb uas muaj peev xwm ua rau lub tsheb ciaj. Peb yuav tau  ua peb feem mus tsuj tus cias roj, peb thiaj tsav tau rau ub rau no. Zoo ib yam li ntawd, Yehauvas yeej xav ntxiv dag ntxiv zog pab peb tiam sis yog peb tsis kam ua dab tsi ces kuj pab tsis tau. Ua li Yehauvas pub dab tsi xwv peb thiaj muaj zog? Peb yuav tau ua dab tsi xwv peb thiaj tau txais Yehauvas txoj kev pab? Peb yuav mus tham txog peb tug yam ntxwv hauv phau Vajlugkub seb Yehauvas tau pab lawv li cas xws li Yaunas uas yog tus cev Vajtswv lus, Maivliag uas yog Yexus niam, thiab tus tub txib Povlauj. Thiab peb yuav kawm ntxiv seb Yehauvas tau pab nws cov tib neeg niaj hnub nim no li cas rau li cas.

4. Yuav ua li cas Yehauvas thiaj muab dag zog kom peb thev taus?

⁴ Yuav kom Yehauvas muab dag zog rau peb thev taus, ib qho peb yuav tau ua yog thov nws. Nws yuav teb peb thiab pub “lub hwjchim uas loj kawg nkaus” los pab peb. (2 Kauleethaus 4:7) Tsis tas li ntawd, ib yam yuav pab tau peb ntxiv yog nyeem nws Txoj Lus thiab xav txog tej peb tau nyeem. (Phau Ntawv Nkauj 86:11) Yehauvas cov lus uas hais nyob rau hauv phau Vajlugkub “muaj txojsia thiab pheej ua haujlwm.” (Henplais 4:12) Thaum peb thov Yehauvas thiab nyeem nws Txoj Lus ces nws yuav ntxiv dag ntxiv zog kom peb thev taus tej yam uas peb raug, muaj ntsej muag luag ntxhi los sis ua taus nws tes hauj lwm. Cia peb mus tham txog seb Yehauvas tau txhawb Yaunas li cas.

5. Vim li cas Yaunas ho xav kom Yehauvas pab nws muaj lub siab tawv?

⁵ Yaunas yuav tau muaj lub siab tawv vim nws khiav es tsis kam ua tes hauj lwm Yehauvas muab tso rau nws ua. Qhov nws khiav li no, ua rau nws thiab cov tib neeg uas nrog nws hauv nkoj yuav luag tuag vim muaj cua daj cua dub los ntsawj. Thaum lawv muab nws pov sab nraum lub nkoj, ib tug ntses loj loj txawm muab nws nqos rau hauv plab. Yaunas ntshai kawg li thaum nws nyob rau hauv ntses plab. Thaum ntawd nws xav li cas xwb? Puas yog nws tos tuag lawm xwb? Puas yog nws xav tias Yehauvas tso nws tseg lawm? Ntshe Yaunas lub siab ua ywj fab ywj fwj.

6. Raws li Yaunas 2:1, 2, 7, muaj dab tsi txhawb tau Yaunas thaum nws nyob hauv ntses plab?

⁶ Thaum Yaunas nyob ib leeg hauv ntses plab, nws ua dab tsi thiaj txhawb tau nws lub zog? Ib yam ntawd yog nws thov Yehauvas pab. (Nyeem Yaunas 2:1, 2, 7.) Tsis tas li ntawd, nws hloov dua siab tshiab thiab tso siab tias Yehauvas yuav mloog nws tej lus thov. Yaunas kuj xav txog Vajtswv Txoj Lus uas nws tau nyeem yav tag los lawm. Tos peb paub li no los nyob rau hauv Yaunas tshooj 2, nws kuj siv cov lus uas zoo thooj nkaus li hauv Phau Ntawv Nkauj. (Xws li muab Yaunas 2:2, 5 piv nrog Phau Ntawv Nkauj 69:1; 86:7.) Yaunas yuav tsum paub Vajtswv Txoj Lus zoo zoo nws thiaj hais tau cov lus no sib thooj thiab cov lus no pab tau Yaunas tso siab tias Yehauvas yuav pab nws. Tom qab no thaum Yaunas tawm los nyob rau nruab nqhuab lawm, nws thiaj li npaj siab mus ua tes hauj lwm Yehauvas muab tso rau nws.​—Yaunas 2:10–3:4.

7-8. Muaj ib tug kwv tij nyob rau Tais Vam muaj kev pab li cas thaum nws raug kev sim siab?

⁷ Thaum peb raug ntau yam kev sim siab, Yaunas tus yam ntxwv yuav pab tau peb. Xws li muaj ib tug kwv tij npe hu ua Tsim Meej b nyob rau teb chaws Tais Vam (Taiwan) muaj mob hnyav heev. Tsis tas li ntawd, nws kuj raug nws tsev neeg tawm tsam heev vim nws ntseeg Yehauvas. Qhov uas cuab tau nws lub zog yog thov Yehauvas thiab kawm Vajlugkub. Nws hais tias, “Muaj qee zaug thaum muaj ib qho teeb meem twg tshwm sim tuaj mas ua rau kuv ntxhov siab hnyo, tsis qab siab kawm  Vajlugkub li.” Txawm li ntawd los Tsim Meej tso siab plhuav rau Yehauvas. Nws hais ntxiv tias, “Kuv xub xub thov Yehauvas ua ntej. Tom qab ntawd kuv looj pob ntseg thiab mloog cov nkauj xyiv fab hlo hu nkauj rau Yehauvas. Muaj qee lub sij hawm kuv hu cov nkauj no yau yau mus txog thaum kuv lub siab tswm lawm ces kuv mam li kawm Vajlugkub.”

⁸ Qhov uas Tsim Meej kawm Vajlugkub nws tus kheej pab tau nws heev. Xws li thaum nws so tom qab phais mob tas. Muaj ib tug ntxhais tu neeg mob hais rau nws tias vim nws cov ntshav liab qes qes, lawv yuav tau txhab ntshav rau nws. Hmo ua ntej Tsim Meej yuav tuaj phais mob ntawd, nws nyeem ib zaj uas hais txog ib tug muam mus phais mob tib yam li nws. Tus muam ntawd cov ntshav liab tseem qes tshaj nws li tiam sis tus muam ntawd tsis kam txhab ntshav thiab nws kuj zoo lawm. Zaj Tsim Meej nyeem no txhawb tau kom nws tuav rawv nws txoj kev ntseeg es tsis txhob txhab ntshav.

9. Yog koj muaj kev txhawj xeeb vim raug kev sim siab, koj ua tau dab tsi? (Saib cov duab.)

⁹ Thaum raug kev sim siab, koj lub siab puas ntxhov txoog thaum thov Yehauvas? Los sis puas ua rau koj lub siab puas tsoj puas tsus kawm tsis taus Vajlugkub koj ib leeg? Nco ntsoov tias Yehauvas yeej paub tej uas koj raug tag lawm. Txawm koj thov tau ob peb nyuag lo xwb los nws yeej paub tej uas koj xav tau hauv nruab siab thiab nws yuav teb huv tib si rau koj. (Efexus 3:20) Yog hais tias koj nyeem tsis tau thiab kawm tsis tau Vajlugkub vim muaj mob, siab puas tsoj puas tsus, los sis ntxhov siab ces koj kuj mloog tau cov suab uas muab kaw tseg txog phau Vajlugkub los sis tej ntaub ntawv Vajlugkub. Tej zaum kuj zoo rau koj mus mloog cov nkauj los sis saib tej yeeb yaj kiab hauv lub vej xaij jw.org. Yehauvas yuav txhawb koj lub dag lub zog yog tias koj thov nws thiab ua tej yam uas nws tau npaj tseg los mus tsav koj txoj kev ntseeg.

10. Peb cov kwv tij nkauj muam txhawb tau peb li cas?

¹⁰ Yehauvas yeej siv tau peb cov kwv tij nkauj muam ntseeg los mus txhawb peb lub dag lub zog. Lawv yuav “txhawb [peb] lub zog” thaum raug kev sim siab los sis thaum peb xav tias peb  ua tsis tau Yehauvas ib tes hauj lwm twg. (Kaulauxais 4:10, 11) “Thaum muaj kev txom nyem” nyuaj siab, peb yuav tsum muaj phooj muaj ywg. (Pajlug 17:17) Peb cov kwv tij nkauj muam yuav pab tau peb yog peb tu ncua ib yam twg, nplig peb, thiab txhawb peb kom teev tiam Yehauvas kam tiag. Cia peb mus tham txog Maivliag uas yog Yexus niam, seb lwm tus ho txhawb tau nws lub zog li cas.

11. Vim li cas Maivliag xav tau kev txhawb zog?

¹¹ Maivliag xav tau kev txhawb zog xwv nws thiaj ua tau Yehauvas tes hauj lwm. Ntshe thaum Maivliag hnov tus tub txib saum ntuj Khali-ees hais rau nws tag, ua rau nws ntxhov siab txoog. Nws tsis tau yuav txij nkawm tiam sis nws cia li xeeb tub. Nws tsis paub tias yuav tu tub tu kiv li cas thiab nws tseem tau tes hauj lwm uas yuav los mus tu tus me tub uas yog tus Mexiyas. Nws haj tseem yog ib tug nkauj xwb, nws yuav ua li cas mus fim Yauxej tus uas qhaib nws lawm tias nws xeeb tub lawm.​—Lukas 1:26-33.

12. Raws li Lukas 1:39-45, Maivliag tau kev txhawb zog li cas?

¹² Maivliag tau kev txhawb zog li cas kom nws thiaj li ua taus tes hauj lwm uas Yehauvas muab tso rau nws ua? Nws kuj txais lwm tus txoj kev pab. Xws li nws nug Khali-ees kom qhia nws seb yuav ua li cas rau li cas ntxiv. (Lukas 1:34) Tsis ntev tom qab ntawd, nws kuj mus rau “ib lub nroog uas nyob saum laj roob” hauv teb chaws Yudas mus cuag Elixanpe uas yog nws ib tug txheeb ze. Qhov uas Maivliag mus xyuas Elixanpe no txhawb tau nws lub zog heev vim Elixanpe qhuas nws thiab Yehauvas tshoov kom Elixanpe hais ib zaj lus faj lem txog tus me nyuam nws tseem yuav yug. (Nyeem Lukas 1:39-45.) Maivliag hais tias Yehauvas tau siv Yehauvas txhais npab uas muaj zog zis los ua ntau yam hauj lwm. (Lukas 1:46-51) Yehauvas siv Khali-ees thiab Elixanpe los txhawb Maivliag.

13. Muaj li cas xwb thaum ib tug muam thov cov kwv tij nkauj muam pab nws?

¹³ Zoo ib yam li Maivliag, cov kwv tij nkauj muam yeej txhawb tau koj lub dag zog. Nyob rau teb chaws Npaulivias (Bolivia), muaj ib tug muam npe hu ua Dawb uas xav tau kev txhawb zog. Dawb yog tus mus zov nws txiv ntawm tsev kho mob thaum nws txiv muaj ib tug mob hnyav heev uas kws tshuaj kho tsis tau lawm. (1 Timautes 5:4) Mus zov li no yeej tsis yooj yim. Nws hais tias, “Tej thaum ua rau kuv zov tsis taus li lawm.” Thaum thawj Dawb tsis kam hais leej twg pab nws. Nws hais tias, “Kuv tsis xav txob cov kwv tij nkauj muam. Kuv xav tias Yehauvas mam li pab kuv xwb tau lawm. Tiam sis ntev mus ntev tuaj, kuv mam li ras tau tias kuv yuav tsum yuav lwm tus pab thiab, vim kuv ua tsis taus kuv ib leeg.” (Pajlug 18:1) Dawb thiaj li sau ntawv rau nws ob peb tug phooj ywg thiab qhia rau lawv paub tias muaj li cas rau li cas. Dawb hais ntxiv li no tias, “Qhov uas cov kwv tij nkauj muam tuaj txhawb kuv lub zog mas piav los yeej piav tsis tag li. Lawv nqa zaub mov tuaj thiab lawv kuj nyeem Vajlugkub los txhawb kuv lub zog. Tej no ua rau kuv sov siab so thiab xam pom tias tsis yog yus ib leeg xwb. Peb yog Yehauvas tsev neeg uas txaus siab hlo sib pab, nrog yus quaj, thiab txhawb kom yus rau siab ntso teev tiam Yehauvas.”

14. Vim li cas zoo rau peb cia cov txwj laus pab peb?

¹⁴ Muaj dua lwm txoj kev uas Yehauvas pab tau peb yog nws siv cov txwj laus los txhawb peb. (Yaxayas 32:1, 2) Thaum twg koj muaj kev nyuaj siab ntxhov plawv, mus cuag cov txwj laus thiab qhia rau lawv paub. Thaum lawv pab koj los tsis txhob yig mus yig los. Yehauvas yuav siv lawv los mus txhawb koj lub zog.

15. Cov ntseeg txoj kev vam kev cia siab yog dab tsi?

¹⁵ Cov lus cog tseg nyob hauv phau Vajlugkub pab kom peb muaj kev vam kev cia siab thiab  rau siab ntso teev tiam Yehauvas mus li. (Loos 4:3, 18-20) Muaj ib txhia ntseeg, muaj txoj kev vam kev cia siab mus nyob saum ntuj ceeb tsheej hos ib txhia txoj kev vam kev cia siab yog nyob mus ib txhis hauv ntiaj teb no. Vim peb muaj txoj kev vam kev cia siab no, pab tau kom peb thev taus tej kev sim siab uas peb raug, mus qhia txoj xov zoo, thiab ua peb tes hauj lwm hauv lub koom txoos. (1 Thexalaunikes 1:3) Txoj kev vam kev cia siab no kuj pab tau tus tub txib Povlauj tib yam nkaus.

16. Vim li cas tus tub txib Povlauj xav tau kev txhawb zog?

¹⁶ Povlauj yuav tsum tau kev txhawb zog. Nyob rau hauv nws tsab ntawv xa mus rau cov ntseeg hauv Kauleethaus, nws muab nws tus kheej piv rau ib lub lauj kaub av. Nws “raug kev nyuaj siab,” “kawg tswvyim,” “raug luag tsimtxom,” thiab raug luag muab “ntaus ntog.” Muaj qee lub sij hawm kuj phom sij heev rau nws. (2 Kauleethaus 4:8-10) Povlauj sau cov lus no thaum nws mus tshaj tawm txoj xov zoo txawv teb chaws zaum peb. Tom qab nws sau cov lus no tag, haj tseem muaj ntau yam los raug nws ntxiv uas nws tsis paub txog. Thaum nws mus qhia txoj xov zoo, nws raug ib pab neeg coob coob ntaus, raug ntes, yuav luag poob deg, thiab raug kaw.

17. Raws li 2 Kauleethaus 4:16-18, muaj dab tsi txhawb tau Povlauj thev taus nws tej kev sim siab?

¹⁷ Qhov uas pab tau Povlauj thev taus nws tej kev sim siab yog xav txog nws txoj kev cia siab. (Nyeem 2 Kauleethaus 4:16-18.) Nws hais rau cov ntseeg tias txawm nws lub cev sab nraud sem zuj zus los nws tsis cia qhov ntawd txo tau nws lub zog. Povlauj tsuas xav ntsoov txog tej yam zoo yav tom ntej xwb. Povlauj saib nws txoj kev vam kev cia siab tseem ceeb thiaj pab tau nws thev taus txhua yam kom nws thiaj tau txais tej koob hmoov ntawd. Qhov uas nws xav txog txoj kev vam kev cia siab no pab tau kom nws “niaj hnub muaj zog ntxiv.”

18. Qhov uas Tuam thiab nws tsev neeg muaj kev vam kev cia siab rau yav tom ntej pab tau lawv li cas?

¹⁸ Nyob hauv teb chaws Npaunkelias (Bulgaria), muaj ib tug kwv tij npe hu ua Tuam uas xav txog nws txoj kev vam kev cia siab tom ntej, thiaj pab tau nws. Tau ob peb xyoos dhau los  lawm, nws tus kwv tau ploj tuag vim muaj tsheb sib tsoo. Qhov no ua rau Tuam mluas heev. Qhov uas pab tau nws thiab nws tsev neeg yog xav txog lub caij thaum Yehauvas tsa cov neeg uas peb hlub sawv rov qab los. Tuam hais tias: “Peb tham ua ke seb peb yuav ntsib nws qhov twg, yuav ua zaub mov li cas rau nws noj, peb yuav caw leej twg tuaj nrog peb tos txais nws, thiab peb yuav qhia nws tias muaj li cas ua ntej Yehauvas hnub los txog.” Tuam hais tias qhov uas lawv xav txog txoj kev vam kev cia siab no pab tau nws tsev neeg thev taus thiab tos ntsoov hnub Yehauvas tsa nws tus kwv sawv rov qab los.

19. Koj ua tau dab tsi los mus tsav tau koj txoj kev vam kev cia siab? (Saib daim duab.)

¹⁹ Yuav kom koj tsav tau koj txoj kev vam kev cia siab, muaj qho yam koj ua tau. Xws li yog koj muaj txoj kev vam kev cia siab nyob hauv lub ntiaj teb, mus nyeem tej nqe Vajlugkub txog lub Vaj Kaj Siab thiab muab tej ntawd ua tib zoo xav. (Yaxayas 25:8; 32:16-18) Xav hais tias thaum txog lub caij ntawd, koj yuav pom leeg twg? Koj yuav hnov tej suab nrov li cas? Koj yuav xav li cas xwb? Yuav kom koj xav tau tej no, mus saib tej ntaub ntawv uas muaj duab txog lub Vaj Kaj Siab los sis saib cov nkauj xws li Nyob Hauv Lub Qab Ntuj Tshiab, Tshuav Tsis Ntev Twb Yuav Txog los sis Tos Ntsoov Lub Ntiajteb Tshiab. Yog koj xav ntsoov txog thaum nyob lub qab ntuj tshiab ces yuav zoo yam li koj tej teeb meem uas koj muaj tsis loj ua luaj twg thiab yuav zoo yam li “ib nyuag ntu” xwb. (2 Kauleethaus 4:17) Txoj kev vam kev cia siab uas Yehauvas muab rau koj yuav pab koj thev taus txhua yam kev sim siab uas koj raug.

20. Yuav ua li cas peb thiaj muaj dag muaj zog thaum peb qaug zog zis?

²⁰ Txawm tias peb qaug zog los, “yog Vajtswv tuaj peb tog peb yuav kovyeej.” (Phau Ntawv Nkauj 108:13) Yehauvas twb npaj tau txhua yam los mus txhawb koj lub zog lawm. Yog li ntawd, thaum koj xav tau kev pab ua koj tes hauj lwm rau Yehauvas, thev ib yam kev sim siab twg los sis yuav kom muaj kev zoo siab mus li, tsis txhob ua siab deb, kav tsij thov Yehauvas pab thiab kawm Vajlugkub koj ib leeg. Thaum muaj cov kwv tij nkauj muam cev tes pab los tsis txhob yig. Lauj sij hawm los xav txog koj lub neej tom ntej hauv lub qab ntuj tshiab. Yog koj ua li no, “Vajtswv tus uas muaj hwjchim txhawb [koj] lub zog kom [koj] muaj zog heev ntxiv, txawm yog [koj] tau zoo thiab txomnyem los [koj] thiaj ua taus siab ntev.”​—Kaulauxais 1:11.