ZAJ KAWM 43
ZAJ NKAUJ 90 Ib Tug Txhawb Tau Ib Tug Lub Zog
Kov Yeej Lub Siab Ua Xyem Xyav
“Nej yuav tsum ua tib zoo saib txhua yam huv tibsi.”—1 THEXALAUNIKES 5:21.
LUB NTSIAB RAU ZAJ NO
Peb yuav kawm seb yuav ua li cas peb thiaj kov yeej lub siab ua xyem xyav xwv peb thiaj muaj siab teev tiam Yehauvas.
1-2. (1) Tej thaud Yehauvas cov tib neeg pheej ua xyem xyav txog dab tsi? (2) Nyob rau hauv zaj kawm no yuav tham txog dab tsi?
PEB txhua tus tsis hais tus laus tus hluas, muaj qee lub sij hawm yeej ua xyem xyav. a Xws li ib tug hluas yuav xav tias Yehauvas puas xam pom muaj nws. Vim nws muaj lub siab xav li no, nws thiaj tsis tau kam ua kev cai raus dej. Los sis muaj ib tug kwv tij uas thaum nws tseem hluas, nws txiav txim siab ua Yehauvas tes hauj lwm dua li mus caum nyiaj txiag. Nws tsev neeg kuj tsis muaj nyiaj txawm peem ces ho ua rau nws xav tias nws puas txiav txim tau yog thaum tseem hluas. Hos muaj dua ib tug muam uas hnub nyoog nchav lawm. Nws tsis muaj zog ua ub ua no ces nws thiaj li tsis tuaj zog vim nws ua tsis tau ntau npaum li thaum tseem hluas. Ua neej nyob koj puas tau xav dua li no: ‘Yehauvas puas xam tias muaj kuv? Tej kuv ua rau Yehauvas puas tsim nyog? Yehauvas puas tseem siv tau kuv ua ub ua no rau nws?’
2 Yog peb tsis mus tshawb nrhiav kom tau cov lus teb rau cov lus nug uas hais tas no ces tej zaum kuj yuav ua rau peb txoj kev ntseeg tsuag thiab tsis muaj siab teev tiam Yehauvas. Nyob rau hauv zaj kawm no peb yuav kawm tej hauv paus ntsiab lus hauv phau Vajlugkub los pab peb thaum peb ua xyem xyav tias (1) Yehauvas tsis xam tias muaj peb, (2) tej peb txiav txim siab yav tas los puas zoo, thiab (3) Yehauvas puas tseem siv tau kuv ua ub ua no rau nws.
THAUM PEB UA XYEM XYAV DAB TSI THIAJ PAB TAU?
3. Peb yuav tau ua dab tsi thaum peb ua xyem xyav?
3 Thaum peb ua xyem xyav, zoo rau peb mus tshawb nrhiav hauv Vajtswv Txoj Lus. Yog peb ua li no ces peb txoj kev sib raug zoo nrog Yehauvas yuav ruaj khov khwb kho thiab peb yuav “muab siab rau ntseeg.”—1 Kauleethaus 16:13.
4. Yuav ua li cas peb thiaj “ua tib zoo saib txhua yam huv tibsi”? (1 Thexalaunikes 5:21)
4 Nyeem 1 Thexalaunikes 5:21. Nyob hauv phau Vajlugkub txhawb kom peb “ua tib zoo saib txhua yam huv tibsi.” Peb ua tau li no li cas? Yog muaj ib yam twg uas peb paub tsis tseeb, peb yuav tau ua tib zoo mus tshawb seb phau Vajlugkub hais li cas. Xws li muaj ib tug hluas xav tias xyov Yehauvas puas xam muaj nws. Puas zoo rau nws cia li xav li ntawd xwb? Tsis zoo. Nws yuav tau “ua tib zoo saib txhua yam huv tibsi” uas yog kawm Vajlugkub kom nws thiaj paub tias Yehauvas xav li cas txog nws tiag tiag.
5. Yuav ua li cas peb thiaj paub tias Yehauvas xav li cas?
5 Thaum peb nyeem Yehauvas Txoj Lus zoo yam nkaus li nws nrog peb tham. Tiam sis yuav kom peb paub Yehauvas txoj kev xav, peb yuav tau ua ntau tshaj li nyeem nws Txoj lus xwb. Peb yuav tau mus tshawb nrhiav thiab kawm seb cov nqe Vajlugkub twg thiaj teb tau peb tej lus nug. Tsis tas li ntawd, peb kuj mus tshawb nrhiav hauv tej ntaub ntawv uas Yehauvas lub koom haum luam tawm. (Pajlug 2:3-6) Peb yuav tau thov Yehauvas pab kom peb nrhiav tau qhov lus teb. Ces tom qab ntawd, peb yuav tau nrhiav phau Vajlugkub tej hauv paus ntsiab lus los pab peb. Peb kuj mus nyeem txog tej zaj nyob hauv phau Vajlugkub txog cov uas tau xav ib yam li peb.
6. Tej kev sib txoos pab tau peb kom tsis txhob ua xyem xyav li cas?
6 Thaum peb mus tej kev sib txoos zoo yam nkaus li Yehauvas nrog peb tham. Yog peb mus tsis tu ncua ces peb yuav hnov ib zaj lus qhuab qhia los sis hnov ib tug twg teb raug qhov uas peb ua xyem xyav txog. (Pajlug 27:17) Cia peb mus tham txuas ntxiv seb yuav ua li cas peb thiaj kho tau lub siab uas ua xyem xyav.
THAUM KOJ UA XYEM XYAV TIAS YEHAUVAS XAM TSIS MUAJ KOJ
7. Ib txhia nug li cas?
7 Koj puas tau xav dua ib zaug tias, ‘Yehauvas puas xam muaj kuv?’ Yog tias koj saib koj tus kheej tsis muaj nuj nqis ces tej zaum koj yuav xav tias koj yeej yuav ua tsis tau tus uas tsim ib puas tsav yam tus phooj ywg. Tej zaum Vaj Ntxwv Daviv kuj xav ib yam li ntawd thiab. Nws xav tsis thoob li tias Yehauvas haj tseem xam pom txog noob neej. Nws thiaj hais tias: “[Yehauvas], neeg yog dabtsi, koj thiaj yuav xam txog nws, neeg yog leejtwg, koj thiaj li ua zoo rau nws ua luaj?” (Phau Ntawv Nkauj 144:3) Yuav ua li cas koj thiaj nrhiav tau qhov lus teb?
8. Raws li 1 Xamuyees 16:6, 7, 10-12, Yehauvas xam pom dab tsi ntawm tib neeg?
8 Nyob hauv phau Vajlugkub hais tias Yehauvas yeej xam pom cov uas lwm tus xam tsis pom. Xws li Yehauvas xa Xamuyees mus rau Yexais lub tsev mus xaiv Yexais cov tub ib tug los ua cov Ixayees tus vaj ntxwv. Yexais muaj yim leej tub tiam sis nws tsuas hu xya tus los cuag Xamuyees xwb. Nws tsis hu Daviv uas yog nws tus tub ntxawg tiam sis Daviv yog tus uas Yehauvas xaiv. b (Nyeem 1 Xamuyees 16:6, 7, 10-12.) Yehauvas pom Daviv lub siab tias Daviv hlub nws heev.
9. Vim li cas koj thiaj paub tseeb tias Yehauvas xam muaj koj? (Saib daim duab.)
9 Yog koj ua tib zoo xav txog ces koj yuav pom tias Yehauvas yeej xam muaj koj. Yehauvas yeej qhia qhov zoo rau koj taug. (Phau Ntawv Nkauj 32:8) Nws yeej paub koj zoo nws thiaj hais tej yam uas pab tau koj lub neej. (Phau Ntawv Nkauj 139:1) Thaum koj coj raws li Yehauvas qhia thiab pom tias yeej pab tau koj lub neej tiag ces koj yeej paub zoo zoo tias Yehauvas xam muaj koj. (1 Xwmtxheej Vajntxwv 28:9; Tes Hauj Lwm 17:26, 27) Yehauvas yeej pom txhua yam koj ua xwv koj thiaj tau teev tiam nws. Nws pom koj tej yeeb yam zoo thiab nws xav nrog koj sib raug zoo. (Yelemis 17:10) Nws yuav zoo siab heev yog tias koj kuj xav nrog nws sib raug zoo thiab.—1 Yauhas 4:19.
“Yog koj mus cuag [Yehauvas], nws yuav zoo siab txais yuav koj.”—1 Xwmtxheej Vajntxwv 28:9 (Saib nqe 9) c
THAUM KOJ UA XYEM XYAV TIAS TEJ KOJ UA TAS LOS PUAS ZOO
10. Thaum peb xav txog peb lub neej yav tas los, tej zaum yuav ua rau peb xav li cas?
10 Muaj qee lub sij hawm tej zaum tej tug yuav xav tias tej lawv txiav txim siab ua yav thaum ub puas yog lawm. Muaj ib txhia kuj tso txoj hauj lwm uas them zoo zoo los sis ho tso ib txoj lag luam tseg kom thiaj ua tau ntau yam rau Yehauvas. Tiam sis ntev mus ntev tuaj lawv ho pom lwm tus uas tsis coj li lawv tau lub neej muaj txiag nplua nuj thiab ua neej tso siab plhuav. Tej no thiaj ua rau lawv xav tias: ‘Tej uas kuv txiav txim siab ua rau Yehauvas puas yog? Yog yav tas los kuv rau siab ntso khwv, kuv puas yuav muaj nyiaj muaj txiaj tam sim no?’
11. Vim li cas tus sau Phau Ntawv Nkauj 73 ho ntxhov siab hnyo?
11 Yog koj tau nug koj tus kheej ib yam li hais tas los ces mus nyeem seb tus sau Phau Ntawv Nkauj 73 ho xav li cas. Nws pom tej tib neeg uas tsis teev tiam Yehauvas noj qab haus huv, muaj txiag nplua nuj, thiab zoo yam li lawv twb tsis muaj teeb meem dab tsi hauv lawv lub neej li. (Phau Ntawv Nkauj 73:3-5, 12) Thaum nws pom lawv lub neej zoo li no ua rau nws xav tias teev tiam Yehauvas ces nkim zog xwb. Tej no thiaj ua rau nws niaj hnub ntxhov siab hnyo. (Phau Ntawv Nkauj 73:13, 14) Ua li nws ho ua li cas thiaj pab tau nws?
12. Raws li Phau Ntawv Nkauj 73:16-18, muaj dab tsi ho pab tau tus sau phau ntawv nkauj?
12 Nyeem Phau Ntawv Nkauj 73:16-18. Tus sau phau ntawv nkauj mus rau ntawm lub chaw pe hawm Yehauvas. Nyob ntawm qhov chaw no muaj Yehauvas cov tib neeg thiab nws thiaj li xav ntxaws ntxaws. Nws thiaj li nkag siab tias txawm ib txhia tau lub neej zoo zoo los lawv tsis muaj kev vam kev cia siab rau yav tom ntej. Thaum nws pib xav li no lawm, nws lub siab thiaj li tus thiab nws xam pom tias teev tiam Yehauvas yog yam zoo tshaj. Yog li ntawd, nws thiaj li sib zog ntsos teev tiam Yehauvas.—Phau Ntawv Nkauj 73:23-28.
13. Yog koj khuv xim txog tej yam koj txiav txim siab thaum ub, dab tsi yuav pab kom koj muaj lub siab tus? (Saib daim duab.)
13 Zoo ib yam li tus sau phau ntawv nkauj, Vajtswv Txoj Lus yuav pab tau kom koj muaj lub siab tus. Vim li cas ho pab tau? Nco ntsoov tej yam zoo uas koj muaj thiab tej koob hmoov uas koj tau los ntawm Yehauvas. Cov uas tsis kam teev tiam Yehauvas twb tsis tau txais tej no. Lawv tsuas tso siab rau tej uas lawv ua tau xwb vim lawv tsis muaj kev vam kev cia siab dab tsi rau yav tom ntej. Tiam sis Yehauvas cog lus tias yav tom ntej nws yuav muab lub neej zoo heev rau koj. (Phau Ntawv Nkauj 145:16) Tsis tas li ntawd, peb yeej tsis paub peb lub neej yuav zoo li cas yog tias yav thaum ub peb ho txiav txim siab txawv. Tiam sis peb paub tseeb tseeb tias yog peb txiav txim siab rau ib yam twg vim peb hlub Yehauvas thiab tej kwv tij zej zog ces peb lub neej yeej yuav zoo siab.
Xav txog tej koob hmoov uas Yehauvas yuav muab yav tom ntej (Saib nqe 13) d
THAUM KOJ UA XYEM XYAV TIAS YEHAUVAS PUAS TSEEM SIV TAU KOJ
14. Muaj ib txhia raug dab tsi, thiab lawv ho hais li cas?
14 Yehauvas cov tib neeg ib txhia ua tsis tau ntau npaum li yav hluas vim lawv hnub nyoog nchav, muaj mob muaj nkeeg, los sis lub cev tsis meej xeeb. Lawv thiaj li xav tias lawv tsis tseem ceeb dab tsi rau Yehauvas lawm. Lawv thiaj li hais tias, ‘Yehauvas puas tseem siv tau kuv?’
15. Tus sau Phau Ntawv Nkauj 71 paub ntsoov txog dab tsi?
15 Tus sau Phau Ntawv Nkauj 71 kuj txhawj xeeb ib yam li ntawd thiab. Nws hais tias: “Tam sim no kuv qaug zog heev los thov koj nco ntsoov kuv.” (Phau Ntawv Nkauj 71:9, 18) Txawm tus sau phau ntawv nkauj qaug zog zis los nws paub ntsoov tias yog nws teev tiam Vajtswv ruaj nreeg ces Vajtswv yeej yuav txhawb nws. Nws paub tias Vajtswv txaus siab rau cov uas ua npaum li lawv ua tau los teev tiam Vajtswv tab txawm lawv tu ncua qho yam.—Phau Ntawv Nkauj 37:23-25.
16. Yehauvas tseem siv tau cov laus ua dab tsi? (Phau Ntawv Nkauj 92:12-15)
16 Yog tias koj yog ib tug laus, ua tib zoo xav txog seb Yehauvas pom li cas txog koj. Nws yeej pab tau koj teev tiam nws tab txawm koj lub zog ib hnub ntaug zuj zus. (Nyeem Phau Ntawv Nkauj 92:12-15.) Tsis txhob xav txog tej yam uas koj ua tsis tau tiam sis cia li xav txog tej yam koj ua tau. Xws li qhov uas koj tuav rawv kev ntseeg thiab xav txog lwm tus yuav txhawb tau coob leej. Koj kuj qhia rau lwm tus txog tej uas Yehauvas tau pab koj tau ntau ntau xyoo los lawm thiab qhia tias koj tab tom tos ntsoov dab tsi yav tom ntej. Tsis tas li ntawd, nco ntsoov tias koj tej lus thov pab tau lwm tus heev. (1 Petus 3:12) Txawm peb yuav zoo li cas los peb haj tseem ua tau ib yam pub rau Yehauvas thiab lwm tus.
17. Vim li cas peb yuav tau tsis txhob muab peb tus kheej piv rau lwm tus?
17 Yog tias koj ntxhov siab vim koj ua tsis tau ntau yam rau Yehauvas los nco ntsoov tias nws yeej zoo siab rau tej koj ua tau rau nws. Tej zaud koj yuav muaj lub siab muab koj tes hauj lwm piv rau lwm tus tes hauj lwm los koj yuav tau tswj lub siab ntawd vim Yehauvas tsis muab koj piv rau ib tug twg. (Kalatias 6:4) Xws li Maivliag muab ib hwj roj tsw qab uas kim heev rau Yexus. (Yauhas 12:3-5) Hos tus poj ntsuam tsuas muab tau ob lub nyuag txiaj toog tso rau hauv lub tuam tsev. (Lukas 21:1-4) Txawm li ntawd los Yexus tsis muab ob tug poj niam ntawd sib piv. Nws xam pom tias nkawd puav leej muaj kev ntseeg heev. Yehauvas yeej saib txhua yam koj ua rau nqi txawm koj saib zoo yam li ib nyuag qhov me me xwb vim Yehauvas xam pom tias koj ua los ntawm lub siab dawb paug thiab koj hlub nws.
18. Dab tsi thiaj pab kom peb tsis txhob ua xyem xyav? (Saib lub ntsiab “ Yehauvas Txoj Lus Pab Tau Kom Koj Tsis Txhob Ua Xyem Xyav.”)
18 Muaj qee lub sij hawm peb yeej ua xyem xyav. Raws li peb tau kawm, phau Vajlugkub yeej pab kom peb kov yeej tau tej no. Cia li kav tsij nrhiav kom tau tej lus teb rau koj cov lus nug xwv koj thiaj li tsis xav ntau ntau. Yehauvas yeej xam pom muaj koj thiab nws yeej ris txiaj ntsig rau tej koj tau ua. Nws cog lus tias nws yuav muab nqi zog rau koj! Yehauvas yeej hlub thiab saib xyuas txhua tus uas teev tiam nws.
ZAJ NKAUJ 111 Peb Txojkev Zoo Siab
a TXHAIS TAWM: Nyob rau hauv zaj kawm yuav piav txog lub siab ua xyem xyav seb peb puas muaj nuj nqis rau Yehauvas los sis tej kev txiav txim siab uas peb tau ua puas zoo. Lub siab ua xyem xyav no tsis yog vim peb tsis muaj kev ntseeg rau Yehauvas thiab nws tej lus cog tseg.
b Txawm phau Vajlugkub hais tsis txog tias Daviv hnub nyoog muaj li cas los thaum Yehauvas xaiv nws, tej zaum nws tab tom tiav hluas.—Mus saib Phau Tsom Faj lub 9 Hlis tim 1 xyoo 2011, sab 29, nqe 2 ua lus Askiv.
