ZAJ KAWM 40
ZAJ NKAUJ 30 Vajtswv Tsom Kwm Kuv
Yehauvas “Kho Cov Neeg Uas Siab Ntsws Puas Tas”
“Nws kho cov neeg uas siab ntsws puas tas thiab qhwv lawv tej qhov txhab.”—PHAU NTAWV NKAUJ 147:3.
LUB NTSIAB RAU ZAJ NO
Yehauvas yeej hlub tshua txog cov uas puas siab puas ntsws tas. Nyob rau hauv zaj kawm no yuav qhia seb Yehauvas nplig peb li cas rau li cas thaum peb nyuaj siab thiab nws kuj pab kom peb txawj nplig lwm tus.
1. Yehauvas xav li cas txog nws cov tib neeg?
YEHAUVAS paub txhua tsav txhua yam uas nws cov tib neeg raug. Nws yeej pom thaum peb zoo siab thiab peb tu siab. (Phau Ntawv Nkauj 37:18) Yehauvas yeej qhuas peb kawg li thaum nws pom tias peb ua npaum li peb ua tau los teev tiam nws tab txawm peb raug ntau yam kev nyuaj siab! Tsis tas li ntawd, nws yeej tos tsis hnyu yuav pab peb thiab nplig peb.
2. Yehauvas tau ua li cas los pab cov uas siab ntsws puas tas, thiab yuav ua li cas nws thiaj pab tau peb?
2 Phau Ntawv Nkauj 147:3 hais tias Yehauvas qhwv cov uas siab ntsws puas tas tej qhov txhab. Qhov no qhia tau tias Yehauvas ua tib zoo pab cov uas raug kev nyuaj siab ntxhov plawv. Peb yuav tau ua li cas yog tias peb xav kom Yehauvas pab peb? Muab ua piv txwv li no. Ib tug kws tshuaj yeej ua npaum li nws ua tau los kho ib tug neeg raug mob kom zoo. Tiam sis yuav kom tus neeg ntawd zoo taus, nws yuav tau coj raws li tus kwv tshuaj tau qhia. Nyob rau hauv zaj kawm no peb yuav kawm seb Yehauvas tau hais li cas hauv nws Txoj Lus rau cov uas raug kev nyuaj siab ntxhov plawv thiab peb yuav muab nws cov lus siv li cas hauv peb lub neej.
YEHAUVAS SAIB PEB RAU NQI
3. Vim li cas ib txhia ho xav tias lawv tsis muaj nuj nqis dab tsi?
3 Muaj coob leej ntau tus tib neeg hauv ntiaj teb no tsis hlub lwm leej lwm tus. Cov no thiaj tsim txom thiab ua rau lwm tus xav tias lawv tsis muaj nuj nqis. Muaj ib tug muam npe hu ua Huab a hais tias: “Kuv niam thiab kuv txiv nkawd tsis hlub kuv li. Kuv txiv yog ib tug neeg tsiv tsaim thiab niaj hnub cem tias kuv tsis muaj nuj nqis dab tsi.” Tej zaud koj kuj tau raug ib yam li Huab uas lwm tus ua saib tsis taus koj, thuam koj, los sis ua rau koj xav tias koj tsis muaj nuj nqis dab tsi. Ntshe tej no yuav ua rau koj xav tias tsis muaj ib tug twg yuav hlub tau koj tiag tiag.
4. Raws li Phau Ntawv Nkauj 34:18, Yehauvas cog lus yuav ua dab tsi?
4 Txawm lwm tus ua saib tsis taus koj los nco ntsoov tias Yehauvas hlub koj thiab saib koj muaj nuj nqis heev. Yehauvas “nyob ze cov neeg uas tas kev cia siab.” (Nyeem Phau Ntawv Nkauj 34:18.) Yog koj “tas kev cia siab,” nco ntsoov tias Yehauvas yeej pom qhov zoo hauv koj nruab siab, nws thiaj rub koj los paub nws. (Yauhas 6:44) Nws yeej tos tsis hnyu yuav pab koj vim nws hlub koj heev.
5. Peb khaws tau dab tsi los ntawm qhov uas Yexus coj rau cov neeg uas luag saib tsis taus?
5 Yog peb saib Yexus tus yam ntxwv ces peb yuav paub hais tias Yehauvas xav li cas rau li cas. Thaum Yexus tseem nyob hauv ntiaj teb no nws ua zoo heev rau cov neeg uas luag saib tsis taus. (Mathais 9:9-12) Thaum ib tug poj niam uas muaj mob xav kov Yexus lub tw tsho kom nws tus mob zoo, Yexus nplig nws thiab qhuas tias nws muaj kev ntseeg heev. (Malakaus 5:25-34) Yexus yeej coj raws nkaus li nws Txiv. (Yauhas 14:9) Yog li ntawd, tej no qhia tau tias Yehauvas yeej saib koj rau nqi thiab pom tej yeeb yam zoo uas koj muaj xws li koj txoj kev ntseeg thiab koj txoj kev hlub rau nws.
6. Koj yuav ua li cas xwb yog hais tias koj saib koj tus kheej tsis muaj nuj nqis?
6 Koj yuav ua li cas xwb yog koj lub siab pheej nkaug koj tas zog tias koj tsis muaj nuj nqis? Koj yuav tau mus nyeem tej nqe Vajlugkub uas qhia tias Yehauvas saib koj muaj nuj nqis npaum li cas thiab ua tib zoo xav txog tej nqe Vajlugkub ntawd. b (Phau Ntawv Nkauj 94:19) Koj yuav tau tsis txhob muab koj tus kheej piv rau lwm tus thiab tsis txhob xav txog tej yam uas koj ua tsis tau. Yehauvas yeej tsis yuam kom koj ua ib yam dab tsi uas koj ua tsis tau. (Phau Ntawv Nkauj 103:13, 14) Yog koj raug lwm tus ua phem rau koj yav thaum ub, tsis txhob liam txim rau koj tus kheej. Yeej tsis tsim nyog lwm tus ua phem li ntawd rau koj! Nco ntsoov tias Yehauvas tsuas suav txim rau tus ua phem rau lwm tus xwb. (1 Petus 3:12) Ntsa Iab yog ib tug uas raug luag tsim thaum nws tseem yau. Nws hais tias, “Kuv niaj zaug thov Yehauvas pab kom kuv pom kuv tus kheej ib yam li Yehauvas pom.”
7. Tej uas peb raug yav tas los pab tau peb ua Yehauvas tes hauj lwm li cas?
7 Tsis txhob xav tias Yehauvas siv tsis tau koj pab lwm tus. Nws cia koj muaj lub cij fim ua txoj hauj lwm mus tshaj tawm txoj xov zoo nrog nws. (1 Kauleethaus 3:9) Tej uas koj raug hauv koj lub neej yuav ua rau koj txawj mus pab lwm tus uas raug ib yam li koj. Koj yeej ua tau ntau yam los mus pab lwm tus. Huab kuj tau kev pab thiab tam sim no nws kuj mus pab lwm tus. Nws hais tias: “Kuv ib txwm saib kuv tsis muaj nuj nqis tiam sis kuv pom tias Yehauvas hlub kuv heev thiab nws siv kuv mus pab lwm tus.” Huab yog ib tug tho kev.
TXAIS YUAV YEHAUVAS TXOJ KEV ZAM TXIM
8. Yehauvas tau qhia dab tsi hauv Yaxayas 1:18 rau peb?
8 Yehauvas cov tib neeg ib txhia lub siab pheej rov qab nkaug lawv rau tej uas lawv ua txhaum yav tag los lawm, tsis hais ua ntej los sis tom qab lawv ua kev cai raus dej tag. Tiam sis nco ntsoov tias Yehauvas hlub peb kawg nkaus li, nws thiaj li cia nws tus Tub los tuag theej peb lub txhoj. Nws xav kom peb txais yuav nws txoj kev zam txim. Tom qab peb “sib hais” c txog peb zaj nrog nws lawm ces nws twb zam peb lub txim. (Nyeem Yaxayas 1:18.) Peb zoo siab kawg nkaus li uas Yehauvas tsis suav txim rau peb tej kev txhaum ntxiv lawm! Nws tsuas nco ntsoov tej yam peb ua zoo xwb.—Phau Ntawv Nkauj 103:9, 12; Henplais 6:10.
9. Vim li cas zoo rau peb tsis txhob xav txog tej yam tsis zoo peb tau ua yav tag los?
9 Yog tias koj pheej ntxhov siab txog tej yam uas twb dhau los lawm, koj yuav tau xav txog tej yam uas koj ua tau tam sim no thiab yav tom ntej. Xws li tus tub txib Povlauj, nws yeej tu siab tias nws tau tsim txom cov Khixatias hnyav heev tiam sis nws paub hais tias Yehauvas twb zam nws txim lawm. (1 Timautes 1:12-15) Ua li nws puas xav txog tej yam nws tau ua tag los lawd? Nws tsis muab tej ntawd coj los xav ntau ntau, thiab nws kuj tsis khuv xim txog nws lub neej ua ib tug Falixais. (Filipis 3:4-8, 13-15) Povlauj tau hau ntsoov mus qhia txoj xov zoo thiab xav txog tej yam uas yuav muaj yav tom ntej xwb. Zoo ib yam li Povlauj, koj yeej hloov tsis tau yav tas los. Tiam sis niaj hnub nim no koj yeej muaj peev xwm qhuas tau Yehauvas thiab tos rawv tej yam uas Yehauvas twb cog lus rau koj tias yuav muaj yav tom ntej.
10. Koj ua tau dab tsi yog tias koj tau ua rau lwm tus mob siab?
10 Yog tias koj pheej ntxhov siab vim muaj tej yam koj tau ua rau lwm tus mob siab yav tas los lawm, koj yuav ua li cas? Ua npaum li koj ua tau los mus kho qhov teeb meem, xws li mus thov kom tus tod zam txim. (2 Kauleethaus 7:11) Tsis tas li ntawd, thov kom Yehauvas pab tus tod. Yehauvas yeej pab tau koj thiab tus tod kom rau siab ntso teev tiam nws thiab muaj kev sib haum xeeb.
11. Peb khaws tau dab tsi los ntawm Yaunas tus yam ntxwv? (Saib daim duab ntawm lub khaum.)
11 Kawm los ntawm tej yam koj tau ua yav tag los lawm, thiab cia Yehauvas siv koj. Xws li Yaunas tus uas cev Vajtswv lus. Vajtswv sam hwm kom Yaunas mus rau hauv lub nroog Ninaves tiam sis Yaunas mus dua lwm txoj ke lawm. Yehauvas ntuas Yaunas thiab Yaunas kuj mloog. (Yaunas 1:1-4, 15-17; 2:7-10) Yehauvas kuj haj tseem siv Yaunas ua ib tug cev nws lus. Yehauvas txib kom Yaunas rov qab mus rau hauv lub nroog Ninaves dua. Zaum no Yaunas mloog Yehauvas hais lawm thiab txawm sawv tsees mus kiag tam sid. Nws tsis cia tej yam uas nws ua tsis zoo yav tag los lawm txwv tau nws kom tsis txhob ua Yehauvas tes hauj lwm ntxiv.—Yaunas 3:1-3.
Tom qab Yaunas dim hauv tus ntses loj loj lub plab tawm los, Yehauvas hais kom Yaunas rov qab mus tshaj tawm nws txoj xov rau lub nroog Ninaves paub. (Saib nqe 11)
YEHAUVAS MUAB NWS LUB HWJ HUAM LOS NPLIG PEB
12. Thaum muaj ib yam phem heev los raug peb, Yehauvas pub kom peb muaj lub siab tus li cas? (Filipis 4:6, 7)
12 Thaum muaj ib yam phem heev los raug peb, Yehauvas yeej muab nws lub hwj huam los nplig peb. Xws li Txhiaj Xwm thiab Kab nkawd. Nkawd tus tub tau txo nws txoj sia. Nkawd hais tias: “Wb yeej ntsib ntau yam kev nyuaj siab dua los lawm tiam sis zaum no yog zaum nyuaj tshaj plaws txhia zaus. Muaj ntau hmo wb pw tsis tsaug zog ces wb thov Yehauvas pab. Wb thiaj li tau txoj kev siab tus uas hais nyob rau hauv Filipis 4:6, 7.” (Nyeem.) Yog tias koj puas siab puas ntsws vim muaj ib yam phem los raug rau koj, cia li qhia rau Yehauvas paub. Koj xav nrog Yehauvas tham ntev npaum li cas thiab pes tsawg zaus los nyob ntawm koj. (Phau Ntawv Nkauj 86:3; 88:1) Thov Yehauvas tsis so kom muab nws lub hwj huam dawb huv los pab koj. Nws yeej yuav pab koj xwb xwb li.—Lukas 11:9-13.
13. Yehauvas lub hwj huam dawb huv pab kom peb rau siab ntso teev tiam Yehauvas li cas? (Efexus 3:16)
13 Koj puas tau raug ib yam twg uas ua rau koj qaug zog zis? Yehauvas lub hwj huam dawb huv yuav ntxiv dag ntxiv zog rau koj kom koj rau siab ntso teev tiam Yehauvas. (Nyeem Efexus 3:16.) Xws li muaj ib tug muam npe hu ua Pliab. Nws thiab nws tus txiv yog ob tug tub txib tshaj tawm txawv teb chaws tiam sis nws tus txiv txawm mus ua hluas thiaj ua rau nkawd sib nrauj lawm. Pliab hais tias: “Qhov uas nws mus tham lwm tus ua rau kuv puas siab puas ntsws thiab ua tsis tsheej dab tsi li. Kuv thov kom Yehauvas muab nws lub hwj huam dawb huv los pab kuv thev tej no. Thaum thawj zoo li tsis muaj ib yam dab tsi yuav pab tau kuv li tiam sis Yehauvas nplig tau kuv ces kuv thiaj li thev taus.” Pliab xam pom tias Vajtswv pab nws kom tso siab rau Vajtswv thiab nws tso siab tias Yehauvas yuav pab nws thev txhua yam kev sim siab. Pliab hais ntxiv li no tias: “Cov lus nyob hauv Phau Ntawv Nkauj 119:32 hais raug kuv lub siab kawg nkaus li. Nqe ntawd hais tias: ‘Kuv yuav maj nroos ua raws li koj tej lus samhwm, rau qhov koj yuav ua rau kuv totaub tej lus ntawd.’”
14. Peb yuav cia Vajtswv lub hwj huam pab peb li cas?
14 Thaum koj thov Yehauvas kom muab nws lub hwj huam dawb huv los pab koj, koj yuav tau ua dab tsi ntxiv? Koj yuav tau ua tej yam kom Vajtswv thiaj pub nws lub hwj huam rau koj. Xws li mus tej kev sib txoos thiab mus tshaj tawm txoj xov zoo. Koj yuav tau nyeem Vajtswv Txoj Lus txhua txhua hnub xwv koj thiaj muaj Vajtswv txoj kev xav. (Filipis 4:8, 9) Thaum koj tab tom nyeem ntawd, ua zoo xav seb cov nyob hauv phau Vajlugkub raug kev sim siab li cas thiab seb Yehauvas ho pab lawv thev li cas rau li cas. Vim Ntsa Iab raug ntau yam hauv nws lub neej, nws thiaj hais tias: “Zaj uas hais txog Yauxej raug kuv siab heev. Nws tsis cia tej kev sim siab uas nws raug thiab tej kev tsis ncaj ncees rhuav nws txoj kev sib raug zoo nrog Yehauvas.”—Chivkeeb 39:21-23.
YEHAUVAS SIV COV KWV TIJ NKAUJ MUAM LOS NPLIG PEB
15. Leej twg kuj nplig tau peb lub siab, thiab lawv pab peb rau txoj hau kev twg? (Saib daim duab.)
15 Thaum peb raug kev txom nyem, peb cov kwv tij nkauj muam Khixatias yeej txhawb tau peb lub zog. (Kaulauxais 4:11) Lawv yog ib txoj hau kev uas Yehauvas siv los qhia tias nws hlub peb. Lawv yeej nplig tau peb thaum lawv lauj sij hawm los mloog peb piav txog tej uas nyob nraim nkoos hauv peb lub siab, thiab lauj sij hawm nrog peb ua ke. Tej zaud lawv kuj muab ib nqes Vajlugkub los txhawb peb los sis thov Yehauvas nrog peb. d (Loos 15:4) Muaj tej lub sij hawm cov kwv tij nkauj muam yuav pab kom peb xav li Yehauvas xav thiab pab peb rau siab ntso thev kam tiag. Tsis tas li ntawd, lawv pab tau peb xws li nqa tau zaub mov rau peb noj thaum peb muaj kev nyuaj siab.
Cov phooj ywg uas zoo thiab hlub Yehauvas yeej nplig thiab txhawb tau peb (Saib nqe 15)
16. Yuav kom lwm tus pab tau peb, peb yuav tau ua dab tsi?
16 Muaj tej lub sij hawm zoo rau peb thov kom lwm tus pab peb. Peb cov kwv tij nkauj muam yeej hlub peb thiab yeej muaj lub siab xav pab peb. (Pajlug 17:17) Tiam sis tej zaud lawv tsis paub xyov peb yuav xav li cas thiab tsis paub seb peb xav tau kev pab dab tsi. (Pajlug 14:10) Yog koj muaj kev nyuaj siab, tsis txhob ua siab deb, cia li kav tsij mus nrog koj cov phooj ywg uas ntseeg Yehauvas tham thiab qhia rau lawv paub tias koj xav li cas rau li cas. Qhia rau lawv paub tias koj xav tau lawv pab rau seem twg. Tej zaud koj kuj txiav txim siab nrog ib los sis ob tug txwj laus uas koj raug zoo nrog tham. Hos ib txhia nkauj muam kuj qhib siab rau lwm tus nkauj muam uas paub tab.
17. Muaj tej yam twg txwv tau kom peb tsis txhob nrog cov kwv tij nkauj muam ua ke, thiab peb yuav ua li cas peb thiaj peem dhau?
17 Tswj koj tus kheej txhob nyob ib leeg mluas mlob. Yeej muaj qee lub sij hawm ua rau koj chim siab heev tsis xav nrog ib tug twg hlo li. Muaj qee lub sij hawm cov kwv tij nkauj muam yuav tsis to taub koj los sis tej zaud lawv yuav lam tau lam hais tej lo ua rau koj tu siab. (Yakaunpaus 3:2) Tsis txhob cia tej no ua rau koj tsis xav poo tej kwv tij nkauj muam vim Yehauvas yuav siv lawv los mus txhawb koj lub dag lub zog. Muaj ib tug txwj laus npe hu ua Ntxhuav muaj tus kab mob nyuaj siab hais tias: “Muaj ntau zaus kuv tsis xav nrog kuv tej phooj ywg tham los sis ua ke hlo li.” Txawm li ntawd los Ntxhuav ua tiag peem mus nrog nws cov kwv tij Khixatias ua ke mas tom qab ntawd ua rau nws kaj kaj siab tuaj. Muaj ib tug muam npe hu ua Mim hais tias: “Vim tej uas kuv raug tag los lawd, ua rau kuv tsis tso siab rau leej twg li. Tiam sis kuv kuj xyaum hlub thiab tso siab rau cov kwv tij nkauj muam ib yam li Yehauvas tau ua thiab. Qhov kuv ua no mas Yehauvas zoo siab heev thiab kuv kuj zoo siab tib yam nkaus.”
YEHAUVAS TEJ LUS COG TSEG YUAV NPLIG PEB
18. Peb tos tsis hnyu dab tsi yav tom ntej, thiab peb ua tau dab tsi tam sim no?
18 Tshuav tsis ntev Yehauvas yuav muab tej yam uas ua rau peb nyuaj siab thiab puas siab puas ntsws tshem tawm huv tib si mus. (Tshwmsim 21:3, 4) Nyob rau lub sij hawm ntawd, peb “yuav tsis nco txog tej uas twb muaj tas los lawm.” (Yaxayas 65:17) Txawm peb raug kev txom nyem los Yehauvas yeej saib xyuas peb ntshis. Yehauvas twb ua ntau yam los mus nplig thiab pab peb lawm. Peb yuav tau tsis txhob ua siab deb es kav tsij txais yuav nws txoj kev pab. Tsis txhob xav hais tias nyob tsam Yehauvas tsis hlub peb.—1 Petus 5:7.
ZAJ NKAUJ 7 Yehauvas Yog Tus Txhawb Nqa Peb Zog
a Tau muab cov npe hauv zaj no hloov lawm
b Saib lub ntsiab “ Yehauvas Saib Koj Rau Nqi.”
c Thaum peb “sib hais” peb zaj nrog Yehauvas ces yog peb ua qhia tias peb hloov dua siab tshiab los ntawm qhov uas peb thov nws zam peb lub txim thiab hloov peb tus cwj pwm. Yog peb tau ua ib qho txhaum loj lawm, peb yuav tau mus cuag cov txwj laus hauv peb lub koom txoos.—Yakaunpaus 5:14, 15.
d Koj mus saib tau Watchtower Lub Vej Xaij Tshawb Nrhiav Vajlugkub es tshawb nrhiav ob lub ntsiab “Nyuaj Siab” thiab “Nplig.”
