IB TUG neeg kwv yees huab cua tabtom saib lub twj soj ntsuas (radar) huab cua. Nws pom tias xwm txheej cua daj cua dub hlob heev yuav los raug ib thaj tsam uas muaj neeg coob coob. Nws yuav ua li cas? Vim nws txhawj cov tibneeg heev, nws yuav siv zog ceeb toom sawvdaws kom mus nrhiav chaw nkaum ua ntej cua daj cua dub los txog.

Ib yam li ntawd, Yehauvas tabtom ceeb toom neeg ntiajteb tias yuav muaj xwm txheej “cua daj cua dub” hlob tshaj tej uas lawv pom dua los lawm. Yehauvas ceeb toom tibneeg li cas? Ua li cas peb thiaj paub tias nws yeej ceeb toom ntxov kom sawvdaws thiaj npaj yeej? Yuav kom teb tau 2 lo lus nug no, cia peb mus kawm seb yav tas los Yehauvas tau ceeb toom tibneeg li cas.

Nyob hauv phau Vajlugkub, Yehauvas tau ceeb toom txog tej “cua daj cua dub” uas yog nws tej kev txiav txim rau cov uas tsis kam mloog nws lus. (Pajlug 10:25; Yelemis 30:23) Txhua zaus, Yehauvas yeej ceeb toom tibneeg kom ntxov thiab qhia lawv tias lawv yuav tsum hloov li cas lawv thiaj ua haum nws lub siab. (2 Vajntxwv 17:12-15; Nehemis 9:29, 30) Yehauvas xav pab lawv hloov, nws thiaj txib nws cov tubtxib mus qhia cov tibneeg tias lawv yuav tsum maj nroos ua li nws tau hais tseg.​—Amaus 3:7.

Nau-es yog ib tug uas Yehauvas tau txib mus ceeb toom tibneeg txog nws txojkev txiav txim. Tau ntau xyoo, Nau-es ua siab tawv qhawv mus ceeb toom cov neeg uas nyiam ua plees ua yi thiab nyiam ua nruj ua tsiv tias Vajtswv yuav tso dej los nyab ntiajteb. (Chivkeeb 6:9-13, 17) Nws kuj qhia lawv tias lawv yuav tsum ua li cas lawv thiaj yuav dim. Vim Nau-es rau siab ntso mus tshaj tawm luag thiaj muab nws hu ua “tus uas qhia txojkev ncaj ncees.”​—2 Petus 2:5.

Txawm Nau-es ceeb toom npaum li cas los cov neeg tiam ntawd yeej tsis quav ntsej Vajtswv cov lus li. Lawv lub neej qhia tias lawv tsis muaj kev ntseeg. Thaum kawg, “dej los nyab thiab kuav lawv mus tas huv tibsi” lawv thiaj tsis dim txojsia. (Mathais 24:39; Henplais 11:7) Thaum lawv raug txim tuag lawv thiaj hais tsis tau tias Vajtswv tsis ceeb toom lawv.

Muaj tej thaud, Yehauvas tsis ncua sijhawm ntau los ceeb toom tibneeg ua ntej nws yuav txiav txim rau lawv. Txawm li ntawd los nws yeej ncua sijhawm txaus rau lawv hloov. Xws li 10 qhov xwm txheej uas raug cov neeg Iziv thaum ub. Ua ntej ib qho xwm txheej twg los raug lawv, Yehauvas yeej qhia ua ntej rau lawv tias nws yuav ua dabtsi. Xws li xwm txheej 7 thaum Yehauvas yuav tso lawg hlob heev los raug lawv. Nws txib Mauxes thiab Aloos nkawd mus ceeb toom Falaus thiab nws cov tibneeg 1 hnub ua ntej xwb. Yog li ntawd, Vajtswv puas ncua sijhawm txaus rau lawv mus nrhiav chaw nkaum? Phau Vajlugkub hais tias: “Falaus cov nomtswv qee leej ntshai heev vim tej lus uas tus TSWV [“Yehauvas,” NWT ] hais ntawd, lawv thiaj coj lawv cov qhev los tsev thiab cab lawv tej tsiaj los rau hauv nkuaj. Tiamsis cov neeg uas tsis quavntsej Vajtswv tej lus, lawv tso lawv cov qhev thiab tej tsiaj nws nyob nws rau hauv tej teb.” (Khiav Dim 9:18-21) Qhov no qhia meej rau peb tias Yehauvas yeej ncua sijhawm txaus rau lawv. Cov uas mloog nws lus es maj nroos ua li nws hais, txawm tias lawg los hlob heev los, lawv tsis raug kev puas tsuaj sab npaum li cov uas tsis mloog nws hais.

Ib yam li ntawd, ua ntej xwm txheej 10 los raug sawvdaws, Yehauvas yeej ceeb toom Falaus thiab nws cov tub qhe lawm. Txawm li ntawd los, lawv tsis kam mloog. (Khiav Dim 4:22, 23) Thaum kawg lawv cov tub hlob thiaj tuag tas tus. Yog ib qho tu siab kawg nkaus, puas yog? (Khiav Dim 11:4-10; 12:29) Yog lawv mloog Vajtswv cov lus ceeb toom, ces lawv cov tub hlob yeej tsis tuag li. Mauxe maj nroos mus ceeb toom cov Yixalayees tias xwm  txheej 10 yuav los thiab qhia tias lawv yuav tsum ua li cas lawv tsev neeg thiaj li dim. (Khiav Dim 12:21-28) Pes tsawg leej thiaj li mloog Mauxes tej lus ceeb toom xwb? Cov Yixalayees thiab “lwm haivneeg coob heev” nrog rau cov Iziv ib txhia, mas muaj li 3 plhom leej uas dim thiab khiav tawm tebchaws Iziv.​—Khiav Dim 12:38.

Raws li peb tau kawm no, Yehauvas ib txwm ncua sijhawm txaus rau tibneeg los mloog nws tej lus ceeb toom. (Kevcai 32:4) Vim li cas Vajtswv thiaj ua li ntawd? Tus tubtxib Petus piav tias twb yog Yehauvas “tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg.” (2 Petus 3:9) Yehauvas hlub tibneeg heev. Nws xav kom lawv tso lawv tej kev txhaum tseg ua ntej nws txojkev txiav txim los txog.​—Yaxayas 48:17, 18; Loos 2:4.

Niaj hnub no los, tibneeg thoob ntiajteb yuav tsum mloog Vajtswv cov lus ceeb toom. Thaum Yexus tseem nyob hauv ntiajteb no, nws ceeb toom tias lub sim ceeb no yuav raug puam tsuaj rau lub sijhawm uas “txomnyem kawg nkaus.” (Mathais 24:21) Yexus cov lus faj lem yeej qhia meej tias thaum lub sijhawm txiav txim los yuav txog, cov Khixatia yuav pom thiab raug dabtsi. Tej xwm txheej uas Yexus qhia ntawd, peb yeej pom muaj tshwm sim niaj hnub no lawm ntag.​—Mathais 24:3-12; Lukas 21:10-13.

Vim cov lus faj lem ntawd tabtom muaj tiav, Yehauvas thiaj txhawb kom txhua leej txhua tus los teev tiam nws thiab mloog nws lus. Nws xav kom cov uas mloog nws lus tau lub neej zoo kaj siab tamsim no thiab hauv lub ntiajteb tshiab. (2 Petus 3:13) Yehauvas kuj xav pab kom tibneeg tso siab rau nws cov lus cog tseg. Nws ua li ntawd li cas? Nws muab ib txoj xov zoo uas qhia tias lawv yuav tsum ua li cas lawv thiaj dim lawv txojsia. Txoj xov zoo ntawd hais txog lub Nceeg Vaj. Yexus hais tias txoj xov no yuav raug muab tshaj tawm “thoob qab ntuj thiab ua timkhawv rau txhua haivneeg paub.” (Mathais 24:14) Vajtswv siv cov uas teev tiam nws mus ua “timkhawv” lossis mus tshaj tawm txoj xov zoo rau li 240 lub tebchaws. Nws ua li ntawd vim tias nws xav kom coob leej ntau tus los mloog nws tej lus ceeb toom lawv thiaj yuav dim nws txojkev txiav txim ncaj ncees uas los yuav txog.​—Xefaniyas 1:14, 15; 2:2, 3.

Tej uas peb tau kawm qhia tias txhua zaus Yehauvas yeej ncua sijhawm txaus rau tibneeg los mloog nws tej lus ceeb toom. Tiamsis tseem tshuav lo lus nug no thiab: Tibneeg puas yuav mloog Vajtswv tej lus ceeb toom thaum tseem tshuav sijhawm? Cia peb uas yog Yehauvas Cov Timkhawv rau siab ntso mus qhia tibneeg coob li coob tau lawv thiaj yuav dim lawv txojsia thaum lub sim ceeb no xaus.