1. Yehauvas ua tau li cas kom nws lub ntsiab muaj tiav?

YEHAUVAS ua tau ib puas tsav yam kom muaj tiav raws li nws lub ntsiab. Xws li yav tas los nws tau ua tus xibhwb qhia, tus nplig lwm tus siab, thiab tus coj xov zoo mus rau lwm tus. Nws ua tau ntau yam tiamsis tej no tsuas yog yam puav xwb. (Yaxayas 48:17; 2 Kauleethaus 7:6; Kalatias 3:8) Txawm li ntawd los, ntau zaus nws kuj siv tibneeg los ua kom nws lub ntsiab muaj tiav thiab. (Mathais 24:14; 28:19, 20; 2 Kauleethaus 1:3, 4) Yehauvas muab tau laj lim tswvyim thiab peevxwm rau peb kom peb ua tau txhua yam muaj tiav raws li nws lub ntsiab. Cov neeg tshawb fawb phau Vajlugkub pom tias tej no puavleej qhia txog Yehauvas lub npe.

2. (1) Vim li cas ib txhia thiaj xav tias xyov Yehauvas puas siv lawv tiag? (2) Hauv zaj no peb yuav kawm txog dabtsi?

² Peb txhua tus yeej xav kom Yehauvas siv peb ua nws tes haujlwm. Tiamsis ib txhia xav tias xyov Yehauvas puas siv lawv tiag. Yog vim li cas? Vim tias txawm lawv xav ua Yehauvas tes haujlwm ntxiv los, lawv tsis muaj sijhawm, tsis muaj peevxwm, lossis lawv xav tias lawv hluas dhau lossis laus dhau lawm. Muaj ib txhia ho xav tias tej uas lawv niaj hnub ua xwb twb txaus lawm, tsis tas ua ntxiv. Hauv zaj no peb yuav kawm tias Yehauvas yuav pab peb txhua leej txhua tus ua kom nws lub ntsiab muaj tiav li cas. Peb yuav kawm txog cov pojniam thiab txivneej hauv phau Vajlugkub seb Yehauvas tau pab lawv li cas lawv thiaj muaj siab xav ua nws tes haujlwm thiab muaj peevxwm ua tau raws li nws lub siab  nyiam. Tsis tas li ntawd xwb, peb yuav kawm seb peb yuav ua li cas Yehauvas thiaj siv tau peb.

3. Raws li Filipis 2:13, Yehauvas yuav pab kom peb muaj siab xav ua nws tes haujlwm li cas?

³ Nyeem Filipis 2:13. * Yehauvas yuav pab kom peb muaj siab xav ua nws tes haujlwm. Nws yuav ua li no li cas? Tej zaum muaj ib tug kwvtij nkauj muam uas cheem tsum kev pab lossis muaj lwm yam haujlwm yuav tau ua hauv lub koom txoos. Lossis ib tug txwj laus nyeem ib tsab ntawv uas ceg Npe-ee sau tuaj tias muaj lwm qhov chaw uas cheem tsum kev pab. Tej zaum peb yuav xav tias “Puas muaj ib yam uas kuv yuav pab tau lawv?” Lossis tej zaum peb tau ib tes haujlwm uas nyuaj heev, ua rau peb xav tias xyov peb puas ua tau zoo. Lossis tom qab peb nyeem Vajtswv Txojlus, peb xav seb peb yuav siv tej nqe Vajlugkub ntawd los pab lwm tus li cas. Yehauvas yeej tsis yuam peb ua ib yam dabtsi li. Tiamsis thaum Yehauvas pom tias peb muaj siab xav ua nws tes haujlwm ntxiv, nws yuav pab kom peb ua tau li ntawd.

4. Yehauvas yuav pab kom peb muaj peevxwm ua tau nws tes haujlwm li cas?

⁴ Yehauvas kuj pab kom peb muaj peevxwm ua tau nws tes haujlwm thiab. (Yaxayas 40:29) Nws pab kom peb muaj peevxwm peb li cas? Yog peb twb txawj ua ib yam dabtsi lawm, Yehauvas yuav pub nws lub hwj huam dawb huv los pab kom peb hajyam txawj ntxiv. (Khiav Dim 35:30-35) Yehauvas siv tau nws lub koom haum los cob qhia kom peb txawj ua nws tes haujlwm thiab. Yog koj tsis paub ua koj tes haujlwm ces thov kev pab. Tsis tas li ntawd xwb, cia li mus cuag peb Leej Txiv saum ntuj thiab thov kom nws muab nws “lub hwjchim uas loj kawg nkaus” rau koj. (2 Kauleethaus 4:7; Lukas 11:13) Hauv phau Vajlugkub muaj coob tus pojniam txivneej uas Yehauvas tau pab kom lawv muaj peevxwm thiab muaj siab xav ua nws tes haujlwm. Thaum peb kawm txog lawv, ua tib zoo xav seb Yehauvas yuav siv tau koj li cas thiab.

5. Lub sijhawm uas Yehauvas siv Mauxes mus cawm nws haivneeg dim qhia peb li cas?

⁵ Thaum “Mauxes kawm paub cov neeg Iziv tej kev txawj kev ntse huv tibsi” lawm nws xav tias zaum no nws muaj peevxwm mus cawm nws haivneeg dim. (Tes Haujlwm 7:22-25) Tiamsis Yehauvas puas siv Mauxes mus cawm cov Yixalayees dim rau lub sijhawm ntawd? Nws tsis siv. Tom qab Yehauvas pab kom Mauxes ua tau ib tug neeg siab ntev thiab txo hwjchim lawd, Nws mam li siv Mauxes. (Tes Haujlwm 7:30, 34-36) Yehauvas pab kom Mauxes ua siab loj siab tuab mus cuag Iziv tus huabtais loj tshaj plaws. (Khiav Dim 9:13-19) Peb kawm tau li cas? Yehauvas tsuas siv cov uas xyaum coj nws tus cwj pwm thiab tso siab plhuav rau nws xwb.​—Filipis 4:13, TT.

6. Qhov uas Yehauvas siv Npaxilais mus pab Vajntxwv Daviv qhia tau peb li cas?

⁶ Ntau pua xyoo tom qab ntawd, Yehauvas siv Npaxilais nqa zaub nqa mov mus rau Vajntxwv Daviv. Lub sijhawm ntawd Daviv thiab nws cov neeg khiav ntawm nws tus tub Axaloos, lawv “tshaib plab thiab nkees heev.” Txawm Npaxilais twb laus heev lawm los nws tsis ntshai nrog luag coj zaub coj mov mus rau Daviv lawv noj. Nws tsis xav tias nws laus heev lawm ces Yehauvas yuav tsis siv nws. Nws muaj li cas los nws yeej muab tag nrho mus pab Yehauvas cov tub qhe uas cheem tsum kev pab. (2 Xamuyees 17:27-29) Peb kawm tau li cas xwb? Txawm peb laus peb hluas los Yehauvas yeej siv tau peb  mus pab cov kwvtij nkauj muam uas tsis muaj txaus noj txaus haus tsis hais cov nyob deb nyob ze tibsi. (Pajlug 3:27, 28; 19:17) Txawm peb mus pab tsis tau kiag los, peb tso tau nyiaj siab dawb mus txhawb Tes Haujlwm Thoob Qab Ntuj. Lub koom haum yuav siv cov nyiaj ntawd mus pab peb cov kwvtij nkauj muam thaum lawv raug xwm txheej.​—2 Kauleethaus 8:14, 15; 9:11.

7. (1) Yehauvas siv Xime-oos li cas? (2) Qhov no txhawb tau peb lub zog li cas?

⁷ Yehauvas cog lus rau ib tug txivneej laus laus hauv lub nroog Yeluxalees hu ua Xime-oos tias nws yuav pom tus Mexiyas ua ntej nws tuag. Ntshe Yehauvas cov lus cog tseg no cuab tau Xime-oos lub zog kawg li rau qhov nws twb tos tus Mexiyas tau ntau xyoo lawm. Vim Xime-oos muaj kev ntseeg thiab ua siab ntev tos, Yehauvas thiaj cia nws pom tus Mexiyas. Muaj ib hnub, Yehauvas lub hwj huam dawb huv tshoov kom Xime-oos mus rau tom Yehauvas lub tuam tsev. Thaum nws mus txog, nws pom tus metub Yexus. Yehauvas siv Xime-oos cev ib zaj lus faj lem tias tus metub no yuav los ua tus Khetos. (Lukas 2:25-35) Tej zaum Xime-oos twb tuag ua ntej Yexus pib tshaj tawm txoj xov zoo. Txawm li ntawd los, nws zoo siab heev uas Yehauvas tau siv nws cev ib zaj lus faj lem. Thiab yav tom hauv ntej muaj ntau yam zoo nyob tos nws. Nyob rau lub ntiajteb tshiab, Xime-oos yuav pom tias Yexus txojkev kav coj tau koob hmoov nplua mias rau txhua haivneeg thoob ntiajteb. (Chivkeeb 22:18) Txawm Yehauvas yuav siv peb ua tes haujlwm twg los peb yeej zoo siab ua thiab.

8. Yehauvas yuav siv tau peb ib yam li nws siv Npananpas li cas?

⁸ Nyob rau thawj 100 xyoo, muaj ib tug txivneej uas siab dawb siab zoo hu ua Yauxej. Nws zoo siab hlo cia Yehauvas siv nws. (Tes Haujlwm 4:36, 37) Nws txawj nplig lwm tus lub siab heev, cov tubtxib thiaj muab nws hu ua Npananpas uas txhais tias “Tus Uas Txhawb Zog.” Nws nplig lwm tus li cas? Tom qab Xaulus los ua ib tug Khixatia, cov kwvtij coob tus ntshai mus cuag nws vim nws tau tsim txom Yexus cov thwjtim. Tiamsis Npananpas tuaj nplig thiab txhawb Xaulus siab. Nws ua rau Xaulus zoo siab thiab Xaulus nco nws txiaj ntsig kawg li. (Tes Haujlwm 9:21, 26-28) Tsis ntev tom qab ntawd, cov txwj laus hauv lub nroog Yeluxalees xav mus txhawb cov kwvtij hauv lub nroog Ati-aukias uas nyob deb heev. Lawv txawm xa Npananpas mus. Tau muaj li cas xwb? Phau Vajlugkub qhia tias Npananpas “txhawb lawv lub zog kom lawv muab siab npuab tus Tswv thiab ntseeg tiag tiag.” (Tes Haujlwm 11:22-24) Ib yam li ntawd, Yehauvas yeej siv tau peb mus nplig peb cov kwvtij nkauj muam thiab. Tej zaum nws yuav siv peb mus nplig ib tug uas muaj kev quaj ntsuag. Lossis ua kom peb hu xov thooj lossis mus xyuas ib tug uas muaj mob muaj nkeeg, muaj kev nyuaj siab ntxhov plawv. Koj puas cia Yehauvas siv koj ib yam li nws tau siv Npananpas?​—1 Thexalaunikes 5:14.

9. Qhov uas Yehauvas pab tus Kwvtij Vaxilis ua ib tug txwj laus zoo qhia tau peb li cas?

⁹ Yehauvas pab ib tug kwvtij hu ua Vaxilis (Vasily) los ua ib tug txwj laus zoo. Thaum Vaxilis muaj 26 xyoos, lub koom txoos tsa nws ua ib tug txwj laus. Thaum ntawd nws xav tias nws tseem hluas heev tsis muaj tswvyim txaus los pab cov kwvtij nkauj muam thiab hajyam tsis paub pab cov uas muaj kev nyuaj siab. Tiamsis cov txwj laus uas paub tab pab nws lawm ntau. Tsis tas li ntawd xwb, Kev Kawm Rau Cov Kwvtij Tuav Haujlwm kuj pab tau nws thiab. Vaxilis sib zog xyaum kom nws txawj ua ib tug txwj laus zoo. Nws muab tej yam me me uas nws xav ua sau cia. Thaum nws ua tiav ib qho zuj zus, ua rau nws siab loj zuj zus tuaj thiab. Nimno nws hais tias “Tej uas ua rau kuv  ntshai thaum ub, yog tej uas nimno ua rau kuv zoo siab. Thaum Yehauvas pab kuv nrhiav tau ib nqe Vajlugkub los nplig ib tug kwvtij nkauj muam mas ua rau kuv zoo siab tshaj plaws li.” Cov kwvtij, yog nej xyaum Vaxilis es cia Yehauvas siv nej ces Nws yuav pab kom nej muaj peevxwm tuav haujlwm ntau ntxiv hauv lub koom txoos.

10. (1) Anpinkayis tau ua li cas? (2) Nws tus qauv pab tau koj li cas?

¹⁰ Muaj ib zaug Daviv thiab nws cov neeg nyob tom tiaj moj sab qhua tabtom khiav Vajntxwv Xa-ules, lawv tshaib plab heev. Nram tiaj moj sab qhua, ib tug Yixalayees nplua nuj hu ua Nanpas muaj yaj coob heev, Daviv lawv pab tiv thaiv nws pab yaj. Lawv thiaj mus thov zaub mov noj ntawm Nanpas. Tiamsis Nanpas yog ib tug neeg qia dub heev, nws tsis kam pub ib yam dabtsi rau lawv kiag li. Qhov no ua rau Daviv npau taws heev thiab yuav mus muab tag nrho cov txivneej hauv Nanpas tsev neeg tua pov tseg. (1 Xamuyees 25:3-13, 22) Tiamsis Nanpas tus pojniam Anpinkayis yog ib tug txawj xav thiab zoo nkauj heev. Nws ua siab tawv qhawv mus txhos caug ntua ntawm Daviv xubntiag thiab thov kom nws tsis txhob ua txhaum Vajtswv es mus tua Nanpas thiab Nanpas tsev neeg. Nws ua tib zoo hais rau Daviv kom nws tso siab plhuav rau Yehauvas ua tus pab nws. Anpinkayis tus cwj pwm zoo thiab tej lus mos lus muag uas nws hais raug Daviv siab kawg li. Daviv pom tias yeej yuav tsum yog Yehauvas xa Anpinkayis tuaj pab nws xwb. (1 Xamuyees 25:23-28, 32-34) Vim Anpinkayis xyaum coj tus cwj pwm zoo, Yehauvas thiaj siv tau nws. Ib yam li ntawd, cov muam Khixatia uas xyaum coj tus cwj pwm zoo thiab txawj xav, Yehauvas yuav siv tau lawv los txhawb lawv tsev neeg thiab lub koom txoos.​—Pajlug 24:3; Titus 2:3-5.

11. (1) Salumes cov ntxhais tau ua dabtsi? (2) Niaj hnub nimno leejtwg xyaum coj li Salumes cov ntxhais?

¹¹ Ntau pua xyoo tom qab no, Yehauvas siv Salumes cov ntxhais mus pab txhim kho lub nroog Yeluxalees tus ntsa loog. (Nehemis 2:20; 3:12) Txawm tias Salumes yog ib tug kav ib nrab cheeb tsam lub nroog Yeluxalees los, nws cov ntxhais tsis xyeej haujlwm hnyav. (Nehemis 4:15-18) Lawv tsis zoo li Tekau-as cov txivneej tseem ceeb uas tsis kam nqis tes ua txoj haujlwm no. (Nehemis 3:5) Tau 52 hnub nkaus xwb twb kho tau tus ntsa loog tiav lawm. Sim xav seb Salumes cov ntxhais zoo siab npaum li cas. (Nehemis 6:15) Niaj hnub no, muaj cov muam uas zoo siab hlo ua tes haujlwm tshwj xeeb heev rau Vajtswv. Lawv ua vaj ua tsev thiab kho tej tsev uas tau muab cob rau Yehauvas. Yuav kom peb ua tau tej haujlwm no, yuav tsum muaj cov muam mloog lus thiab txawj ua vaj ua tsev zoo siab hlo tuaj pab.

12. Yehauvas siv tau peb li nws siv Tanpithas li cas?

¹² Yehauvas ua kom Tanpithas “niaj hnub ua zoo thiab pab cov neeg txomnyem.” Qhov tseem ceeb tshaj yog qhov uas nws pab cov poj ntsuam. (Tes Haujlwm 9:36) Vim nws siab dawb siab zoo, thaum nws tuag lawd sawvdaws thiaj quaj heev. Tiamsis lawv zoo siab xyiv fab thaum Petus tsa nws ciaj sawv rov los. (Tes Haujlwm 9:39-41) Tanpithas tus qauv qhia tau peb li cas xwb? Qhia tau peb tias txawm peb laus peb hluas, pojniam txivneej los, peb yeej muaj peevxwm pab tau peb cov kwvtij nkauj muam.​—Henplais 13:16.

13. Yehauvas tau siv ib tug muam txaj muag heev hu ua Luv li cas, thiab Luv hais li cas xwb?

¹³ Ib tug muam hu ua Luv (Ruth) txaj muag heev. Txawm li ntawd los, nws xav ua ib tug tshaj tawm txawv tebchaws. Thaum nws tseem hluas nws maj nroos nqa ntawv mus tseb ib lub tsev rau ib lub. Nws hais tias: “Kuv nyiam ua txoj haujlwm no heev.” Tiamsis nyuaj heev rau nws nrog tibneeg tham txog Vajtswv lub Nceeg Vaj.  Txawm Luv yog ib tug neeg txaj muag heev los, thaum nws muaj 18 xyoo nws kuj ua ib tug tho kev. Xyoo 1946, nws mus kawm Kev Kawm Vajlugkub Kile-a nws thiaj tau mus rau Havais (Hawaii) thiab tebchaws Nyiv Pooj. Yehauvas siv nws mus tshaj tawm txoj xov zoo ntau heev rau 2 lub tebchaws ntawd. Tom qab Luv tshaj tawm txoj xov zoo yuav luag 80 xyoo, nws hais tias: “Yehauvas yog tus uas pub dag zog rau kuv. Nws pab kom kuv tsis txhob txaj muag lawm. Kuv ntseeg ruaj nreeg tias Yehauvas yeej siv tau txhua tus uas tso siab plhuav rau nws.”

14. Raws li Efexus 3:16, 17, yog peb xav kom Yehauvas siv peb ces peb yuav tsum ua li cas?

¹⁴ Yehauvas ib txwm siv nws cov tub qhe los ua ntau yam. Yog li, Yehauvas yuav siv koj los ua dabtsi? Qhov ntawd nyob ntawm koj seb koj muaj siab xav ua nws tes haujlwm npaum li cas. (Nyeem Efexus 3:16, 17.) Yog koj zoo siab hlo cia Yehauvas siv koj ces tej zaum nws yuav siv koj los ua ib tug muaj siab mus tshaj tawm, ib tug txawj qhia Vajlugkub, ib tug txawj nplig siab, ib tug txawj ua haujlwm, ib tug phoojywg zoo, lossis lwm yam kom nws lub ntsiab muaj tiav.

15. Raws li 1 Timautes 4:12, 15, cov tub hluas niaj hnub no yuav tsum thov Yehauvas pab lawv ua dabtsi?

¹⁵ Yog koj yog ib tug kwvtij uas tabtom yuav tiav hluas, koj yuav ua li cas? Lub koom txoos muaj haujlwm ntau heev rau cov tub hluas uas muaj zog zis ua. Ntau lub koom txoos muaj cov txwj laus coob dua li cov tub leg num. Cov tub hluas, nej puas kam xyaum kom muaj siab xav nqis tes pab ua haujlwm ntxiv hauv lub koom txoos? Muaj tej thaud, cov kwvtij ib txhia hais tias: “Kuv ua ib tug tshaj tawm xwb los kuv yeej zoo siab lawm.” Koj puas xav li ntawd thiab? Yog koj xav li ntawd, thov Yehauvas pab kom koj muaj siab xav ua ib tug tub leg num thiab kom koj muaj peevxwm ua nws tes haujlwm npaum li koj ua tau. (Tej Lus Qhia 12:1) Peb cheem tsum koj txojkev pab!​—Nyeem 1 Timautes 4:12, 15.

16. Peb yuav thov Yehauvas txog dabtsi, thiab vim li cas?

¹⁶ Yehauvas yeej pab kom koj ua tau txhua yam tiav raws li nws lub ntsiab. Yog li ntawd, thov Yehauvas pab kom koj muaj siab xav ua nws tes haujlwm thiab kom koj muaj peevxwm ua tau. Txawm koj laus koj hluas los, kav tsij siv koj lub sijhawm, dag zog, thiab qhov txia chaw los ua kom Yehauvas tau koob meej tamsim no. (Tej Lus Qhia 9:10) Thaum Yehauvas muab ib tes haujlwm rau koj ua, tsis txhob yig vim koj ntshai tsam koj tsis muaj peevxwm ua. Qhov uas peb ua li peb ua tau kom nws tau koob meej yeej yog ib qho koob hmoov zoo kawg li!