1. Yog ib qho koob hmoov zoo kawg uas Yehauvas cia peb kawm Vajlugkub rau ib tug thiab pab nws los ua kevcai raus dej. Ob Kauleethaus 3:1-3 pab tau peb txog qhov no li cas? (Saib daim duab ntawm lub khaum.)

KOJ puas zoo siab thaum muaj ib tug kawm Vajlugkub nyob hauv koj lub koom txoos ua kevcai raus dej? (Mathais 28:19) Yog koj yog tus qhia Vajlugkub rau nws, koj hajyam yuav zoo siab. (1 Thexalaunikes 2:19, 20) Tus uas nyuam qhuav ua kevcai raus dej qhia tias koj thiab lub koom txoos yeej sib zog pab nws kawg li.​—Nyeem 2 Kauleethaus 3:1-3.

2. (1) Peb yuav tsum xav txog lo lus nug twg thiab yog vim li cas? (2) Thaum twg yog thaum koj qhia Vajlugkub rau ib tug? (Saib cov lus hauv qab taw qhia.)

² Peb zoo siab heev tias 4 xyoos dhau los no thoob plaws ntiajteb muaj li 10 plhom tus kawm Vajlugkub txhua txhua lub hlis. * Thiab rau 4 xyoos ntawd muaj li 280,000 tus ua kevcai raus dej txhua txhua xyoo. Yog li ntawd tseem tshuav coob tus uas kawm Vajlugkub uas tsis tau ua kevcai raus dej. Tshuav sijhawm tsawg tsawg lawm xwb peb yuav tsum ua npaum li peb ua tau tamsim no los pab lawv thaum Yehauvas tseem qhib kev rau lawv los ua nws cov Timkhawv. (1 Kauleethaus 7:29; 1 Petus 4:7) Peb yuav ua li cas peb thiaj pab tau lawv?

3. Hauv zaj no peb yuav tham txog dabtsi?

 ³ Tseem ceeb heev rau peb mus coj neeg los ua Yexus cov thwjtim. Twb yog vim li ntawd Pab Uas Ntaus Thawj thiaj nug tej ceg Npe-ee seb peb yuav ua li cas peb thiaj pab tau cov kawm Vajlugkub los ua kevcai raus dej. Zaj no thiab zaj tom ntej peb yuav kawm ntawm cov tho kev, cov tubtxib tshaj tawm txawv tebchaws, thiab cov saib xyuas thaj tsam seb tus qhia Vajlugkub thiab tus kawm Vajlugkub yuav tsum ua li cas nws thiaj ua tau kevcai raus dej. * (Pajlug 11:14; 15:22) Hauv zaj no peb yuav kawm txog 5 yam uas tus kawm Vajlugkub yuav tsum tau ua.

4. Yog peb tsuas qhia Vajlugkub luv luv xwb, tus kawm Vajlugkub puas yuav los ua kevcai raus dej?

⁴ Muaj cov kwvtij nkauj muam coob tus tsuas qhia Vajlugkub luv luv rau tibneeg ntawm lawv taw rooj lossis lawv tej tog vaj tog tsev xwb. Ua li no los yeej zoo tiamsis peb yuav qhia tsis tau Vajlugkub rau lawv ntev thiab tej zaum yuav tsis tau qhia Vajlugkub rau lawv txhua txhua lub lim tiam. Twb yog vim li ntawd muaj ib txhia kwvtij nkauj muam thiaj nug seb lawv puas kam muab lawv tus xov tooj rau peb. Peb mam li hu lossis ntaus ntawv rau lawv txog tej yam hauv phau Vajlugkub. Tej zaum peb yuav ua li no ib ntus. Tiamsis yog tias peb tsuas qhia Vajlugkub rau lawv li no xwb, lawv puas yuav muab lawv lub neej cob rau Vajtswv thiab ua kevcai raus dej? Tej zaum lawv yuav tsis ua.

5. Cov lus Yexus hais hauv Lukas 14:27-33 pab kom peb paub txhawb cov peb qhia Vajlugkub rau li cas?

⁵ Yexus muab lus piv txwv los qhia tias yog leejtwg xav los ua nws ib tug thwjtim, nws yuav tau ua dabtsi. Nws piav txog ib tug neeg uas xav ua ib lub chaw tsom faj thiab ib tug vajntxwv uas yuav mus ua rog. Yexus hais tias tus uas xav ua lub chaw tsom faj “yuav tsum xub zaum ua tib zoo xav saib yuav siv nyiaj npaum li cas” thiaj li ua tiav. Thiab tus vajntxwv yuav tsum “xub ua tib zoo xav saib” nws cov tub rog puas yuav mus ntaus yeej ntsuj rog. (Nyeem Lukas 14:27-33.) Zoo ib yam li ntawd Yexus hais tias tus uas xav los ua nws ib tug thwjtim yuav tsum ua zoo xav ua ntej seb nws puas yuav ua tau. Yog li ntawd peb yuav tsum tau txhawb cov peb qhia Vajlugkub rau kom lawv rau siab kawm Vajlugkub txhua lub lim tiam. Peb yuav ua li ntawd li cas?

6. Peb yuav ua li cas thiaj pab tau tus kawm Vajlugkub?

 ⁶ Thaum peb qhia Vajlugkub rau ib tug ntawm taw rooj lossis tom tog vaj tog tsev zoo rau peb kawm ntev zuj zus. Thaum peb nrog nws tham tej zaum kuj zoo rau peb tham li ob peb nqi Vajlugkub nrog nws. Thaum peb ua li no tau ib ntus lawm peb kuj nug nws seb puas muaj ib qho chaw zoo rau peb zaum kawm Vajlugkub ua ke. Nws cov lus teb yuav qhia rau peb tias nws xav kawm Vajlugkub npaum li cas. Peb kuj nug nws seb nws puas kam kawm Vajlugkub ib lub lim tiam 2 zaug. Tiamsis peb tseem yuav tau ua ntau tshaj ntawd thiab.

7. Tus qhia Vajlugkub yuav tau npaj ua ntej li cas?

⁷ Yog koj qhia Vajlugkub rau ib tug, koj yuav tsum ua tib zoo npaj ua ntej. Ua tib zoo nyeem thiab to taub zaj koj yuav coj mus qhia kom zoo. Saib cov nqi Vajlugkub. Xav txog zaj kawm ntawd lub ntsiab lus, cov ntsiab lus me, cov lus nug, cov nqi Vajlugkub uas neb yuav tsum tau nyeem, cov duab, thiab tej yeeb yaj kiab ntsig txog lub ntsiab lus ntawd. Ua zoo xav seb koj yuav qhia tus kawm Vajlugkub li cas thiaj yoojyim rau nws to taub thiab coj los siv rau nws lub neej.​—Nehemis 8:8; Pajlug 15:28.

8. Tus tubtxib Paulus cov lus hauv Kaulauxais 1:9, 10 qhia peb tias peb yuav thov Vajtswv li cas rau tus peb kawm Vajlugkub nrog?

⁸ Thaum koj npaj, thov Yehauvas txog tus koj kawm Vajlugkub nrog thiab tej uas nws xav tau kev pab. Thov Yehauvas pab koj qhia Vajlugkub kom raug nws siab. (Nyeem Kaulauxais 1:9, 10.) Ua tib zoo xav seb puas muaj dabtsi uas yuav nyuaj rau nws to taub lossis ntseeg. Nco ntsoov tias koj lub hom phiaj yog pab kom nws los ua kevcai raus dej.

9. Piav seb koj yuav pab tus kawm Vajlugkub npaj zaj uas neb yuav kawm ua ntej li cas.

⁹ Peb vam tias yog peb rau siab kawm Vajlugkub nrog nws, nws yuav ris Yehauvas thiab Yexus txiaj ntsig thiab nws yuav xav kawm ntxiv. (Mathais 5:6) Tiamsis tus kawm Vajlugkub yuav tsum mob siab kawm thiaj pab tau nws. Yog li ntawd thiaj tseem ceeb heev rau koj pab kom nws paub npaj ua ntej neb kawm thiab pab kom nws paub muab tej nws kawm coj los siv rau nws lub neej. Koj yuav pab nws npaj li cas? Nrog nws npaj  zaj uas neb yuav kawm ua ke. * Pab kom nws paub nrhiav lo lus teb rau lo lus nug thiab qhia nws kos lo puav lus tseem ceeb uas yuav pab nws nco lo lus teb. Ces hais kom nws muab ua nws cov lus rov teb rau koj, koj thiaj paub seb nws puas to taub lub ntsiab. Tiamsis tseem tshuav lwm yam uas koj yuav tau txhawb tus kawm Vajlugkub ua thiab.

10. (1) Vim li cas tus kawm Vajlugkub yuav tsum nyeem Vajlugkub txhua txhua hnub? (2) Tus kawm Vajlugkub yuav tsum ua li cas phau Vajlugkub thiaj pab tau nws?

¹⁰ Tsis yog tas rau qhov uas nws kawm Vajlugkub nrog koj xwb tiamsis muaj tej yam uas tus kawm Vajlugkub yuav tsum tau ua thiab. Nws yuav tsum nyeem Vajlugkub thiab thov Yehauvas txhua txhua hnub. (Yausuas 1:8; Phau Ntawv Nkauj 1:1-3) Qhia kom nws paub siv “Daim Kom Tswj Nyeem Vajlugkub” uas nyob hauv jw.org/hmn. * Txhawb kom nws ua tib zoo xav txog tej uas nws nyeem hauv phau Vajlugkub seb tej nws nyeem ntawd qhia nws li cas txog Yehauvas thiab yuav pab tau nws lub neej li cas.​—Tes Haujlwm 17:11; Yakaunpaus 1:25.

11. (1) Peb yuav pab tus kawm Vajlugkub paub thov Vajtswv li cas? (2) Vim li cas thiaj tseem ceeb rau nws niaj hnub thov Vajtswv?

¹¹ Txhawb tus kawm Vajlugkub kom nws thov Vajtswv txhua txhua hnub. Thaum koj thov Vajtswv ua ntej neb kawm Vajlugkub thiab thaum neb xaus, nco ntsoov thov Vajtswv pab nws. Thaum nws hnov koj thov Vajtswv nws yuav xyaum koj thiab nws yuav kawm tau tias nws yuav tsum thov Vajtswv Yehauvas los ntawm Yexus Khetos lub npe. (Mathais 6:9; Yauhas 15:16) Qhov uas nws niaj hnub nyeem Vajlugkub thiab thov Vajtswv yuav pab kom nws nyob ze Yehauvas. (Yakaunpaus 4:8) Yog nws niaj hnub ua li ntawd ces yuav pab tau nws muab nws lub neej cob rau Yehauvas thiab ua kevcai raus dej. Tseem tshuav lwm yam uas nws yuav tau ua thiab.

12. Koj yuav pab tus kawm Vajlugkub ntaus phoojywg nrog Yehauvas li cas?

¹² Peb yeej xav kom tus kawm Vajlugkub los paub Yehauvas. Tiamsis tej uas nws kawm yuav tsum raug nws siab nws thiaj  yuav muab coj los siv. Yexus qhia tibneeg ntau yam thiab lawv nyiam tej nws qhia. Tiamsis lawv los ua nws cov thwjtim vim rau qhov nws txawj qhia raug lawv siab. (Lukas 24:15, 27, 32) Tus kawm Vajlugkub yuav tsum pom Yehauvas zoo li ib tug uas nws yuav ntaus tau phoojywg nrog thiab pom Yehauvas li yog nws Txiv thiab nws tus Vajtswv. (Phau Ntawv Nkauj 25:4, 5) Thaum neb kawm Vajlugkub, txawm neb kawm dabtsi los nco ntsoov qhia nws txog Vajtswv tus yam ntxwv. (Khiav Dim 34:5, 6; 1 Petus 5:6, 7) Qhia nws txog Yehauvas txojkev hlub thiab kev khuvleej. Yexus hais tias lo lus sam hwm uas “tseemceeb dua ntais” yog “hlub tus Tswv [“Yehauvas,” NWT ] uas yog nej tus Vajtswv.” (Mathais 22:37, 38) Yog li ntawd, pab kom tus kawm Vajlugkub muaj kev hlub rau Yehauvas.

13. Piav seb koj yuav ua li cas pab tus kawm Vajlugkub los paub Yehauvas tus yam ntxwv.

¹³ Qhia tus koj kawm Vajlugkub rau tias yog vim li cas koj thiaj li hlub Yehauvas. Thaum koj ua li no tej zaum nws yuav pom tias nws yuav tsum muaj kev sib raug zoo nrog Yehauvas. (Phau Ntawv Nkauj 73:28) Yog koj pom ib yam hauv phau ntawv uas neb kawm lossis tej nqi Vajlugkub uas koj nyiam heev uas qhia txog Yehauvas txojkev hlub, nws lub laj lim tswvyim, nws txojkev ncaj ncees, thiab nws lub hwjchim, koj kuj muab coj los qhia rau nws thiab qhia nws tias qhov no yog ib qho uas ua rau koj hlub Leej Txiv Yehauvas. Tseem tshuav lwm yam ntxiv uas yuav pab tau tus kawm Vajlugkub los ua kevcai raus dej.

14. Henplais 10:24, 25 qhia tias mus kev sib txoos yuav pab tau cov kawm Vajlugkub li cas?

¹⁴ Peb sawvdaws yeej xav kom cov uas peb qhia Vajlugkub rau los ua kevcai raus dej. Koj yuav pab tus kawm Vajlugkub ua tau li ntawd yog koj yaum thiab txhawb kom nws nrog koj mus kev sib txoos. Cov uas txawj qhia Vajlugkub hais tias cov uas pib mus kev sib txoos thaum lawv nyuam qhuav kawm Vajlugkub yog cov uas ua kevcai raus dej sai dua. (Phau Ntawv Nkauj 111:1) Muaj ib txhia qhia rau cov kawm Vajlugkub tias lawv yeej kawm tau ntau yam thaum lawv kawm Vajlugkub ua ke tiamsis muaj ntau yam ntxiv uas lawv kawm tau thaum lawv mus kev sib txoos. Nyeem Henplais 10:24, 25 nrog tus kawm Vajlugkub thiab qhia rau nws tias thaum nws mus kev sib txoos yuav pab tau nws li cas. Tso zaj  yeeb yaj kiab Mus Ua Dabtsi Tom Tsev Nceeg Vaj? rau nws saib. * Thiab pab kom nws tuaj kev sib txoos tsis tseg.

15. Peb yuav ua li cas peb thiaj txhawb tau tus kawm Vajlugkub kom mus kev sib txoos tsis tu ncua?

¹⁵ Yog hais tias tus koj qhia Vajlugkub rau tseem tsis tau tuaj kev sib txoos lossis nws tuaj lawm tiamsis tuaj tsis cuag ncua ces koj kuj qhia nws txog tej yam uas koj kawm tau tom kev sib txoos rau nws. Thaum nws pom tias kev sib txoos tseem ceeb npaum li cas rau koj ces kuj yuav ua rau nws xav mus thiab. Muab Phau Tsom Faj lossis phau Lub Neej Thiab Tes Haujlwm Khixatia uas peb tabtom kawm rau nws. Qhia rau nws tias peb yuav kawm dabtsi rau lub lim tiam ntawd thiab nug nws seb tej peb yuav kawm ntawd puas muaj tej yam uas ntxim nws siab. Thawj zaug uas tus kawm Vajlugkub mus kev sib txoos nws yuav pom tias peb tej kev sib txoos tsis zoo li lwm txojkev ntseeg uas nws mus dua los lawm. (1 Kauleethaus 14:24, 25) Nws yuav ntsib lwm cov uas yuav pab tau nws los ua kevcai raus dej.

16. (1) Peb yuav tsum ua dabtsi thiaj pab tau cov kawm Vajlugkub los ua kevcai raus dej? (2) Zaj tom ntej peb yuav kawm txog dabtsi?

¹⁶ Peb yuav pab cov kawm Vajlugkub los ua kevcai raus dej li cas? Txhawb kom tus kawm Vajlugkub rau siab kawm txhua lub lim tiam thiab ua zoo npaj ua ntej neb kawm. Yog koj ua li no ces nws yuav pom tias qhov uas nws kawm Vajlugkub tseem ceeb npaum li cas. Koj kuj txhawb tus kawm Vajlugkub kom nws nyeem phau Vajlugkub thiab thov Vajtswv txhua txhua hnub, kom nws muaj kev sib raug zoo nrog Yehauvas, thiab yaum nws mus kev sib txoos. (Saib lub ntsiab me “ Cov Kawm Vajlugkub Ua Li Cas Thiaj Ua Tau Kevcai Raus Dej?”) Zaj tom ntej muaj 5 yam ntxiv uas cov qhia Vajlugkub yuav tau ua los pab cov kawm Vajlugkub ua kevcai raus dej.