Koj Yoog Raws Li Leejtwg Txojkev Xav?
“Tsis txhob yoog raws li tej neeg tiam no.”—LOOS 12:2.
1, 2. (1) Thaum Petus hais tias, “thov kom tsis txhob muaj li ntawd,” Yexus teb li cas? (Saib thawj daim duab hauv zaj no.) (2) Ua li cas Yexus thiaj teb Petus li ntawd?
YEXUS ua rau nws cov thwjtim tsis paub xav li cas li. Lawv twb vam tias nws yuav muab lub tebchaws rov rau cov Yixayee kav, ua cas Yexus ho hais tias nws yuav raug tsim txom thiab raug tua? Tus tubtxib Petus thiaj hais rau Yexus tias: “Tus Tswv, thov kom tsis txhob muaj li ntawd. Koj yeej yuav tsis raug li ntawd.” Yexus txawm teb hlo Petus tias: “Xatas, koj cia li khiav rau tom kuv qub qab. Koj ua chaw rau kuv dawm rau qhov koj xav li neeg xwb tsis xav li Vajtswv.”—Mathai 16:21-23; Tubtxib Tes Haujlwm 1:6.
2 Qhov uas Yexus hais no qhia meej tias Yehauvas txojkev xav thiab Xatas lub qab ntuj txojkev xav txawv deb heev. (1 Yauhas 5:19) Petus xav ib yam li lub qab ntuj neeg uas tsuas xam pom lawv tus kheej xwb. Tiamsis Yexus paub tias Yehauvas xav kom nws npaj siab npaj ntsws thev txojkev tsim txom thiab txojkev tuag uas yuav los raug nws. Tej uas Yexus teb rau Petus qhia tias Yexus yuav Yehauvas txojkev xav xwb, tsis yuav lub qab ntuj no txojkev xav.
3. Vim li cas tsis yoojyim rau peb yuav Yehauvas txojkev xav thiab tawm tsam lub qab ntuj no txoj?
3 Ua li peb ne, peb puas xav li Yehauvas los xav li lub qab ntuj no? Peb yog cov Khixatia, peb yeej rau siab ntso ua tej yam uas haum Vajtswv siab xwb. Tiamsis peb txojkev xav puas mus raws nkaus li Vajtswv txoj? Peb puas kub siab kawm kom peb muaj Yehauvas txojkev xav? Peb yuav tsum peem tiag, peb thiaj ua tau li no. Vim li cas? Vim tias lub qab ntuj neeg nyob nrog ncig peb ces yuav yoojyim dua rau peb xav li lawv. (Efexau 2:2) Tsis tas li ntawd xwb, lub qab ntuj no tsuas xam pom lawv tus kheej xwb. Yog peb tsis ceev faj, peb yuav pib xav li lawv thiab. Yeej yoojyim heev rau peb yoog lub qab ntuj no, tiamsis yog peb xav muaj Yehauvas txojkev xav peb yuav tau peem tiag.
4. (1) Yog peb cia lub qab ntuj no txw peb ces peb yuav zoo li cas? (2) Zaj no peb yuav kawm txog dabtsi?
4 Yog peb cia lub qab ntuj no txw tau peb ces peb yuav xam pom peb tus kheej xwb thiab yuav tsis xav kom leejtwg qhia peb tias qhovtwg zoo qhovtwg phem. (Malakau 7:21, 22) Yog li ntawd, tseem ceeb heev rau peb kawm kom peb paub “xav li Vajtswv” es tsis txhob “xav li neeg.” Zaj no yuav pab peb ua tau li ntawd. Peb yuav kawm tias vim li cas Yehauvas txojkev xav yeej tsis nruj tiamsis tsuas zoo rau peb xwb. Peb kuj yuav kawm tias yuav ua li cas peb thiaj tsis yoog raws li lub qab ntuj no txojkev xav. Zaj tom ntej peb yuav kawm seb yuav ua li cas peb thiaj muaj Yehauvas txojkev xav thiab muab nws txojkev xav ua peb txoj.
YEHAUVAS TXOJKEV XAV PAB TAU PEB
5. Ua li cas ib txhia tsis xav kom leejtwg hais lawv li?
5 Ib txhia tsis xav kom leejtwg hais lawv li. Lawv hais tias, “Kuv twb paub lawm.” Qhov no txhais tias lawv xav ua li lawv lub siab nyiam xwb. Lawv xav tias lawv yeej muaj cai ua li ntawd. Lawv tsis xav kom leejtwg tswj lawv thiab tsis xav kom leejtwg yuam lawv ua li lwm tus. * (Saib cov lus hauv qab taw qhia.)
6. (1) Yehauvas cia peb muaj kev ywj pheej ua tej yam twg? (2) Kev ywj pheej puas yog cia ua ywj siab?
6 Peb yeej zoo siab heev uas txawm peb yuav Yehauvas txojkev xav los nws yeej tsis tswj ntshis peb. Phau Vajlugkub hais tias, “Yehauvas lub hwj huam nyob qhovtwg, kev ywj pheej nyob qhov ntawd.” (2 Khaulee 3:17, NW) Yehauvas cia peb muaj kev ywj pheej seb peb yuav ua tus neeg zoo li cas. Nws tsis yuam kom peb coj tib tug cwj pwm lossis nyiam tib yam kev lomzem xwb. Yehauvas tsim tau peb nyias muaj nyias ib tug cwj pwm. Tiamsis qhov no tsis txhais tias peb yuav ua ywj siab. (Nyeem 1 Petus 2:16.) Yehauvas xav kom peb siv nws Txojlus pab peb paub seb qhovtwg zoo qhovtwg phem. Puas yog ua li no nruj dhau lawm lossis zoo dua rau peb?
7, 8. Puas yog Yehauvas txojkev xav nruj dhau lawm? Piav seb.
7 Cia peb muab ua lus piv txwv. Tej niam txiv yeej cob qhia kom menyuam paub
ua neej. Tej zaum lawv yuav qhia menyuam kom coj ncaj, ua neeg nquag, thiab paub hlub lwm tus. Tej no puas yog ua nruj dhau lawm? Tsis yog. Niam txiv cob qhia menyuam kom tsim txiaj xwb. Thaum menyuam nyias mus ua nyias neej lawm, lawv yuav txiav txim siab li cas los nyob ntawm lawv. Tiamsis yog lawv mloog lawv niam lawv txiv lus ces lawv yuav txawj txiav txim siab zoo, yuav zam dhau teeb meem, yuav tsis muaj kev ntxhov siab ntau, thiab yuav tsis xav txog lig.Nws xav kom peb muaj nws txojkev xav thiab coj raws li nws tej kevcai
8 Yehauvas zoo li leej txiv uas hlub tshua nws cov menyuam. Nws xav kom peb tau lub neej zoo tshaj plaws. (Yaxaya 48:17, 18) Nws thiaj qhia kom peb paub ua neej thiab kom peb txawj hlub lwm tus. Nws xav kom peb xyaum nws txojkev xav thiab coj raws li nws tej kevcai. Vajtswv yeej tsis tswj ntshis peb, tiamsis nws pab kom peb txawj xav thiab txawj txiav txim siab zoo. (Ntawv Nkauj 92:5; Paj Lug 2:1-5; Yaxaya 55:9) Peb yuav zoo siab dua vim peb ua tau li peb siab nyiam thiab ua tau li Vajtswv siab nyiam. (Ntawv Nkauj 1:2, 3) Thaum peb muaj Yehauvas txojkev xav yeej pab tau peb heev!
YEHAUVAS TXOJKEV XAV ZOO DUA
9, 10. Muaj pov thawj dabtsi qhia tias Yehauvas txojkev xav zoo dua lub qab ntuj no txoj?
9 Peb kuj xav muaj Yehauvas txojkev xav vim nws txojkev xav zoo dua lub qab ntuj no txoj. Lub qab ntuj no yeej qhia tias yuav coj li cas thiaj zoo, yuav ua li cas tsev neeg thiaj muaj kev zoo siab, yuav ua li cas thiaj tau haujlwm zoo, thiab ntau yam ntxiv. Tiamsis ntau zaus tej tswvyim uas lawv qhia ntawd tsis mus raws li Vajtswv lub. Lawv txhawb kom tibneeg tau hau ntsoov rau tej uas lawv ntshaw thiab kuj qhia tias kev plees kev yi tsis txhaum dabtsi. Ib txhia kuj txhawb kom tej txij nkawm sib cais sib nrauj txawm tej teeb meem twb tsis loj pes tsawg. Tej no tsis mus raws li phau Vajlugkub qhia. Ua li, niaj hnub nimno leejtwg lub tswvyim zoo dua, lub qab ntuj no lub los lub tswvyim hauv phau Vajlugkub?
10 Yexus hais tias: “Tswvyim tes haujlwm qhia tias tswvyim ua raug cai lawm.” (Mathai 11:19) Txawm lub qab ntuj no muaj tswvyim tsim tau ntau yam twj thiab cuab yeej los pab tibneeg los tsis muaj ib tug twg yuav tu tau tej teeb meem uas ua rau tibneeg nyuaj siab ntxhov plawv. Xws li, kev tsov kev rog, kev xaiv ntsej xaiv muag, thiab kev tub sab tub nyiag. Tsis tas li ntawd xwb, lub qab ntuj neeg no suav tias kev plees kev yi tsis txhaum dabtsi. Tiamsis puas muaj tseeb li ntawd? Coob tus pom tias kev plees kev yi tsim tau ntau yam teeb meem, rhuav tau lub cuab lub yig, thiab kis tau kab mob ntau yam. Yehauvas qhia li cas rau peb? Peb pom tias cov Khixatia uas muaj Yehauvas txojkev xav muaj kev noj qab nyob zoo, lawv lub cuab lub yig kaj siab dua, thiab lawv muaj kev sib raug zoo nrog lawv cov kwvtij nkauj muam thoob ntiajteb. (Yaxaya 2:4; Tubtxib Tes Haujlwm 10:34, 35; 1 Khaulee 6:9-11) Tej no ua pov thawj tias Yehauvas txojkev xav yeej zoo dua lub qab ntuj no txoj.
11. Mauxe yoog raws li leejtwg txojkev xav, thiab thaum kawg zoo li cas?
11 Yehauvas cov tibneeg txheej thaud paub tias Yehauvas txojkev xav zoo dua tibneeg txoj. Mauxe tau kawm “cov Iyi txhua yam kev txawj ntse” tiamsis nws pom tias txojkev txawj ntse uas zoo tshaj plaws tsuas yog Yehauvas txoj xwb. (Tubtxib Tes Haujlwm 7:22; Ntawv Nkauj 90:12) Nws thiaj thov Yehauvas tias: “Thov koj qhia koj txojkev rau kuv pom.” (Khiav Dim 33:13) Vim Mauxe yoog raws li Yehauvas txojkev xav, Yehauvas thiaj siv nws ua tej haujlwm uas phimhwj heev. Yehauvas qhuas Mauxe tias nws yog ib tug uas muaj kev ntseeg heev.—Henplais 11:24-27.
12. Povlauj tau txiav txim siab thiab yoog raws li leejtwg?
12 Tus tubtxib Povlauj yog ib tug neeg txawj ntse thiab kawm ntaub kawm ntawv siab. Nws kuj paub lus Henplais thiab lus Kili huvsi. (Tubtxib Tes Haujlwm 5:34; 21:37, 39; 22:2, 3) Tiamsis nws tsis yoog raws li lub qab ntuj no tej kev txawj ntse. Nws txiav txim siab raws li Vajtswv Txojlus qhia. (Nyeem Tubtxib Tes Haujlwm 17:2; 1 Khaulee 2:6, 7, 13.) Twb yog vim li no nws thiaj qhia tau Vajlugkub rau coob tus thiab tos ntsoov hnub uas nws yuav tau txais nqe zog.—2 Timaute 4:8.
13. Puas muaj leejtwg yuam kom peb xav li Yehauvas?
13 Vajtswv txojkev xav zoo dua lub qab ntuj no txoj. Yog peb ua raws li Vajtswv tej kevcai ces peb yuav muaj kev zoo siab thiab tau lub neej vam meej. Tiamsis Yehauvas yeej tsis yuam kom peb xav ib yam li nws. “Tus qhev ncaj thiab ntse” tsis yuam peb, cov txwj laus los kuj tsis yuam peb thiab. (Mathai 24:45; 2 Khaulee 1:24) Peb txhua tus yuav tau txiav txim siab seb peb yuav hloov peb txojkev xav kom raws li Yehauvas txoj los tsis hloov. Peb yuav ua tau li no li cas?
TSIS TXHOB YOOG RAWS LI LUB QAB NTUJ NO
14, 15. (1) Peb yuav tsum xav ntsoov txog dabtsi xwv peb thiaj muaj Yehauvas txojkev xav? (2) Vim li cas peb yuav tsum tsis txhob yoog raws li lub qab ntuj no? Muab ua lus piv txwv.
14 Loos 12:2 hais tias: “Tsis txhob yoog raws li tej neeg tiam no ua. Nej yuav tsum txais kev hloov dua siab nej tej kev xav thiaj hloov dua tshiab. Mas nej yuav paub tias Vajtswv lub siab nyiam li cas thiaj paub tias yam uas zoo thiab yam uas txaus nws siab thiab yam uas zoo kawg nkaus.” Nqe Vajlugkub no qhia tias txawm yav tas los peb yoog leejtwg los nimno peb yeej hloov tau los yoog raws li Vajtswv. Txawm peb yug los muaj tus cwj pwm thiab yam ntxwv tsis haum Vajtswv siab, lossis coj tsis zoo vim peb raug ntau yam kev txom nyem los peb yeej hloov tau. Peb xav ntsoov txog tej twg ces peb yuav yoog raws tej ntawd. Yog peb xav ntsoov txog tej uas haum Yehauvas siab ces peb yuav pom tias nws txojkev xav zoo dua thiab peb yuav xav yoog raws li Yehauvas.
15 Tiamsis yuav kom peb muaj Yehauvas txojkev xav, peb yuav tsum “tsis txhob yoog raws li tej neeg tiam no.” Qhov no txhais tias peb yuav tau tso tseg txhob saib, txhob nyeem, thiab txhob mloog tej uas tawm tsam Vajtswv txojkev xav. Qhov uas peb ua no tseem ceeb npaum li cas? Cia peb muab
ua lus piv txwv. Yog tias ib tug twg xav kom nws lub cev muaj zog tej zaum nws yuav noj zaub mov zoo. Tiamsis yog nws pheej noj tej zaub mov uas twb lwj lawm thiab ces kuj yuav pab tsis tau nws! Ib yam li ntawd, yog peb twb rau siab ntso kawm Yehauvas txojkev xav tiamsis peb ho mus mloog lub qab ntuj txojkev xav thiab ces yuav pab tsis tau peb.16. Peb yuav tau tiv thaiv peb tus kheej ntawm tej yam twg?
16 Peb puas zam tau lub qab ntuj no tej tswvyim txhua lub sijhawm? Peb yeej zam tsis tau vim peb tseem nyob hauv lub qab ntuj no. (1 Khaulee 5:9, 10) Thaum peb mus tshaj tawm yuav muaj tibneeg qhia peb txog lawv tej tswvyim thiab tej uas lawv ntseeg. Txawm li ntawd los, peb tsis tas ntseeg lossis muab coj los xav ntev xav ntau. Peb yuav tsum ua li Yexus es tsis txhob mloog Xatas lub tswvyim hlo li. Tsis tas li ntawd xwb, yog peb tsis txhob lam tau lam mloog lub qab ntuj no tej tswvyim ces peb yuav tiv thaiv tau peb tus kheej.—Nyeem Paj Lug 4:23.
17. Peb yuav ua li cas peb thiaj tiv thaiv tau peb tus kheej ntawm lub qab ntuj tej tswvyim?
17 Peb yuav tau tiv thaiv peb tus kheej es ua tib zoo xaiv peb tej phoojywg. Phau Vajlugkub ceeb toom tias yog peb ntaus phoojywg nrog cov uas tsis teev tiam Yehauvas ces peb yuav pib xav li lawv. (Paj Lug 13:20; 1 Khaulee 15:12, 32, 33) Peb kuj yuav tau ua tib zoo xaiv tej uas peb saib. Yog peb tsis txhob mus saib kev ua nruj ua tsiv, kev ua nkauj ua nraug, lossis tej yam uas txhawb lub tswvyim uas qhia tias txhua yam yog txia los ces peb yuav tiv thaiv tau peb tus kheej ntawm lub qab ntuj tej tswvyim uas “tsis pub kom paub Vajtswv.”—2 Khaulee 10:5.
Peb puas qhia kom peb cov menyuam tsis txhob saib tej yam phem? (Saib nqe 18, 19)
18, 19. (1) Vim li cas peb yuav tau ceev faj tej uas luag saib zoo li tsis phem? (2) Peb yuav tau ua tib zoo xav txog cov lus nug twg?
18 Kuj muaj lwm yam peb yuav tau ceev faj thiab uas peb tsis xav txog, xws li tej xov xwm. Tej zaum luag yuav tshaj tawm kom peb nyiam lossis ntxub ib tug nom tug tswv twg, lossis kom peb qhuas tibneeg tej Mathai 22:36-39) Tsis tas li ntawd xwb, peb kuj yuav tau ceev faj tej dab neeg uas luag sau rau menyuam thiab. Vim li cas? Vim tias ib txhia dab neeg yuav ua rau menyuam xav tias ua nkauj ua nraug ua phem ua qias tsis txhaum.
tswvyim thiab tej peevxwm. Peb kuj yuav tau ceev faj tej yeeb yaj kiab thiab tej ntaub ntawv uas txhawb kom tibneeg xam pom lawv tus kheej lossis lawv tsev neeg ua ntej xwb. Lawv muab tej ntawd ua zoo saib heev thiab muab ua li yog ib lub tswvyim zoo thiab raug cai. Tiamsis txojkev xav no tsis mus raws li phau Vajlugkub qhia. Phau Vajlugkub qhia tias peb thiab peb tsev neeg yuav tsum hlub Yehauvas tshaj txhua yam peb thiaj yuav muaj kev zoo siab. (19 Qhov no puas yog txhais tias peb saib tsis tau ib yam dabtsi li? Tsis yog. Tiamsis peb yuav tau xyuam xim. Ua tib zoo xav tias: ‘Tej uas kuv saib puas mus raws li lub qab ntuj no lub tswvyim? Kuv puas tiv thaiv kuv thiab kuv cov menyuam es zam tej zaj tsis zoo hauv this vis, hauv xov tooj cua, lossis hauv tej ntaub ntawv? Kuv puas pab kuv cov menyuam kom lawv muaj Yehauvas lub tswvyim xwv lawv thiaj tsis qaug rau lub qab ntuj no lub tswvyim?’ Yog peb pom tias Vajtswv txojkev xav txawv ntawm lub qab ntuj no txoj ces peb yuav tsis “yoog raws li tej neeg tiam no.”
KOJ NIAJ HNUB YOOG RAWS LI LEEJTWG?
20. Ua li cas peb thiaj paub tias peb yoog raws li leejtwg lawm?
20 Peb yuav tsum nco ntsoov tias tsuas muaj 2 txojkev xav xwb. Ib txoj yog Yehauvas txoj, ib txoj yog Xatas thiab nws lub qab ntuj txoj. Koj yoog raws li leejtwg txojkev xav? Koj mloog leejtwg ces twb yog koj yoog raws li tus ntawd. Yog peb yuav lub qab ntuj no lub tswvyim ces peb yuav xav thiab coj li lub qab ntuj neeg. Yog li ntawd, tseem ceeb rau peb ua tib zoo xaiv tej peb saib, tej peb nyeem, tej peb mloog, thiab tej peb xav.
21. Zaj tom ntej peb yuav kawm txog dabtsi?
21 Hauv zaj no peb kawm tias yuav kom peb muaj Yehauvas txojkev xav peb yuav tsum zam lub qab ntuj no txoj. Tiamsis peb yuav tau ua tib zoo xav txog Vajtswv lub tswvyim xwv peb thiaj muaj nws txojkev xav. Zaj tom ntej, peb yuav kawm seb peb ua tau li no li cas.
^ nqe 5 Cov neeg uas lawv hais tias lawv txawj ntse heev los yeej yog lawv xyaum lwm tus thiab. Tsis hais tej kev xav ntsig txog ntuj tsim teb raug los yog tej tsoo tsho uas peb hnav, sawvdaws yeej kawm thiab xyaum lwm tus mentsis. Yog li ntawd, peb yuav tau xav seb peb yuav kawm thiab xyaum leejtwg.