1, 2. Thaum peb txojkev ntseeg loj hlob zuj zus tuaj, peb yuav to taub txog dabtsi? Piav seb.

KOJ puas tau pom thaum leejtwg muab ib yam dabtsi rau ib tug menyuam yaus? Tej zaum leej niam leej txiv yuav qhia kom nws hais, “Ua tsaug.” Tus menyuam kuj qog nws niam nws txiv. Tiamsis thaum nws hlob lawm nws mam li to taub tias vim li cas nkawd thiaj qhia kom nws hais li ntawd, thiab vim li cas nws yuav tsum nco luag txiaj ntsig. Thaum ntawd, nws mam paub ua luag tsaug tsis tos nws niam nws txiv hais lawm.

² Peb los kuj zoo li ntawd thiab. Thaum peb xub los paub qhov tseeb, peb kawm tias tseem ceeb heev rau peb ua raws li Yehauvas tej kevcai. Tiamsis thaum peb txojkev ntseeg loj hlob zuj zus tuaj, peb kuj yuav to taub txog Yehauvas txojkev xav seb nws nyiam yam twg tsis nyiam yam twg. Thaum peb yoog tau raws li Yehauvas lawd peb yuav muab tau nws txojkev xav los ua peb txoj.

3. Vim li cas tsis yoojyim rau peb yoog raws li Yehauvas?

 ³ Peb yeej nyiam kawm kom peb muaj Yehauvas txojkev xav, tiamsis vim peb yog neeg txhaum muaj qee zaus tsis yoojyim rau peb xav li nws xav. Xws li thaum hais txog tej qhov txhia chaw, kev plees kev yi, kev tshaj tawm, siv ntshav, thiab lwm yam. Peb yeej paub tias Yehauvas xav li cas txog tej no tiamsis peb puas to taub tias yog vim li cas Yehauvas thiaj xav li ntawd. Yuav ua li cas peb thiaj muaj tau Yehauvas txojkev xav? Yog peb muaj Yehauvas txojkev xav, peb tes haujlwm yuav tsum zoo li cas thiab tej peb txiav txim siab ua yav tom hauv ntej yuav tsum zoo li cas?

4. “Hloov dua tshiab” txhais li cas?

⁴ Nyeem Loos 12:2. Nyob rau hauv nqe no, tus tubtxib Povlauj piav tias yuav tsum ua li cas peb thiaj muaj Yehauvas txojkev xav. Nws hais tias peb yuav tsum “tsis txhob yoog raws li tej neeg tiam no ua.” Zoo li peb tau kawm hauv zaj tas los, cov lus no txhais tias peb yuav tsum tawm tsam lub qab ntuj tej tswvyim thiab tej cwj pwm. Tiamsis Povlauj hais ntxiv tias peb “yuav tsum hloov dua tshiab.” Qhov no txhais tias peb yuav tsum kawm Vajtswv Txojlus, to taub nws txojkev xav, ua tib zoo xav txog tej peb kawm, thiab rau siab ntso kom peb muaj Vajtswv txojkev xav.

5. Piav seb nyeem Vajlugkub ho txawv kawm Vajlugkub li cas.

⁵ Kev kawm Vajlugkub tsis yog thaum yus nyeem tsuag tsuag kom tas lossis tsuas kos cov lus teb xwb. Thaum peb kawm Vajlugkub, peb ua tib zoo xav seb tej ntawd qhia li cas txog Yehauvas, nws ua dabtsi, thiab nws xav li cas. Peb ua tib zoo xav seb vim li cas muaj tej yam Yehauvas pub peb ua tiamsis muaj tej yam nws ho tsis pub. Thaum peb kawm Vajlugkub, peb kuj xav seb peb yuav tau hloov peb lub neej li cas, thiab yuav tau hloov peb txojkev xav li cas. Tej zaum thaum peb kawm peb tsuas muab tau 1 qho coj los xav xwb. Txawm li ntawd los, thaum peb kawm zoo rau peb muab lub sijhawm ntawd faib ua 2 ntus. Ib ntus coj los nyeem ib ntus coj los xav.​—Ntawv Nkauj 119:97; 1 Timaute 4:15.

6. Thaum peb ua tib zoo xav txog Vajtswv Txojlus yuav zoo li cas?

⁶ Thaum peb ua tib zoo xav txog Vajtswv Txojlus tsis tseg, peb lub siab yuav qheb plho ces peb yuav paub tias Yehauvas txojkev xav yog txoj zoo kawg nkaus. Peb mam pib to taub Yehauvas txojkev xav thiab mam pom tias nws lub tswvyim yog lub zoo tshaj. Thaum ntawd peb yuav hloov peb txojkev xav dua tshiab thiab yuav pib xav li Yehauvas zuj zus.

7, 8. (1) Yehauvas xav li cas txog tej qhov txhia chaw? (Saib thawj daim duab hauv zaj no.) (2) Yog peb muaj Yehauvas txojkev xav, peb yuav pom tias dabtsi tseem ceeb tshaj?

⁷ Peb xav ntsoov txog yam twg ces peb yuav mus ua yam ntawd. (Malakau 7:21-23; Yakaunpau 2:17) Cia peb kawm txog 3 yam uas yuav pab peb nkag siab lub ntsiab no. Yam 1, seb Yehauvas xav li cas txog tej qhov txhia chaw. Txawm Yauxej thiab Maivliag tsis muaj li luag los Yehauvas tseem xaiv nkawd los ua Yexus niam thiab txiv. (Levi Tej Kevcai 12:8; Luka 2:24) Thaum yug tau  Yexus, Maivliag muab nws “tso pw rau hauv ib lub dab zaub, rau qhov hauv lub tsev so tsis muaj chaw rau ob tug so lawm.” (Luka 2:7) Yog Yehauvas xav kom Yexus yug los rau hauv ib tse neeg muaj muaj los yeej tau. Tiamsis nws xav kom Yexus yug los rau hauv ib tse neeg uas muab Vajtswv txojkev pe hawm tso ua ntej hauv lawv lub neej. Qhov no yog yam tseem ceeb tshaj rau Yehauvas.

⁸ Ib txhia niam txiv xav xav kom lawv tej menyuam muaj tej qhov txhia chaw nplua mias. Lawv thiaj muab tej ntawd saib tseem ceeb dua menyuam txojkev sib raug zoo nrog Yehauvas. Tiamsis tus qauv hais tas no qhia li cas rau peb txog Yehauvas txojkev xav? Yehauvas xam pom tias peb txojkev sib raug zoo nrog nws tseem ceeb dua tej qhov txhia chaw. Koj puas xav li Yehauvas xav thiab? Koj tes haujlwm puas qhia tias koj muaj Yehauvas txojkev xav?​—Nyeem Henplais 13:5.

9, 10. Thaum hais txog ua rau lwm tus dawm, peb yuav tau ua li cas thiaj yog peb muaj Yehauvas txojkev xav?

⁹ Yam 2, Yehauvas xav li cas txog tus neeg uas ua rau lwm tus dawm uas yog ua rau lwm tus ua txhaum lossis tso Yehauvas tseg? Yexus hais tias: “Leejtwg ua rau cov menyuam yaus uas ntseeg kuv no ib tug yuam kev ua txhaum, mas muab ib txhib zeb loj khi rau tus ntawd caj dab thiab muab laim rau hauv hiavtxwv kuj zoo dua.” (Malakau 9:42) Tus uas ua rau lwm tus dawm lub txim loj heev! Vim Yexus muaj Yehauvas txojkev xav, peb paub tias Yehauvas yeej tsis txaus siab rau tus uas ua rau Yexus cov thwjtim ib tug twg dawm.​—Yauhas 14:9.

¹⁰ Thaum hais txog ua rau lwm tus dawm, peb puas xav ib yam li Yehauvas thiab Yexus nkawd thiab? Tej peb ua qhia li cas? Muab ua piv txwv tias peb nyiam hnav ib hom tsoos twg lossis nyiam tu peb lub cev lawm ib yam. Tiamsis yog peb paub tias qhov peb txiav txim siab ua ntawd yuav ua rau lwm tus hauv lub koom txoos xav yuam kev lossis xav txog tej yam tsis zoo, peb yuav ua li cas? Peb puas hlub peb cov kwvtij es tsis txhob ua raws li peb siab nyiam xwb?​—1 Timaute 2:9, 10.

11, 12. Yog peb tswj peb lub siab thiab xyaum ntxub tej uas Yehauvas ntxub, yuav tiv thaiv tau peb li cas?

¹¹ Yam 3 yog li no: Yehauvas ntxub kev phem kev limhiam. (Ntawv Nkauj 5:4) Vajtswv paub tias peb yog neeg txhaum, tej zaum yuav tsis yoojyim rau peb ua qhov zoo. Txawm li ntawd los, nws xav kom peb ntxub qhov phem ib yam li nws ntxub. (Nyeem Ntawv Nkauj 97:10.) Yog peb ua tib zoo xav seb yog vim li cas Yehauvas thiaj ntxub kev phem, peb yuav muaj nws txojkev xav thiab peb yuav tswj tau peb tus kheej tsis mus ua tej yam phem.

¹² Tsis tas li ntawd xwb, yog peb ntxub kev phem ces txawm phau Vajlugkub tsis hais tsi ntsees tias qhov ntawd phem los, peb yeej paub tias txhaum. Xws li niaj hnub no lub qab ntuj nyiam ib hom kev seev cev uas phem qias heev. Ib txhia xav tias tsis yog kev  sib daj sib dee kiag ces tsis txhaum. * (Saib cov lus hauv qab taw qhia.) Tiamsis Yehauvas puas xav li ntawd? Nco ntsoov tias Yehauvas ntxub txhua yam kev phem kev qias. Cia peb txav deb ntawm txhua yam kev phem, tswj peb lub siab es ntxub tej uas Yehauvas ntxub.​—Loos 12:9.

13. Vim li cas peb yuav tau kawm seb Yehauvas txojkev xav yog li cas peb thiaj txawj txiav txim siab zoo?

¹³ Thaum peb kawm Vajlugkub, peb yuav tsum ua tib zoo kawm kom muaj Yehauvas txojkev xav, peb thiaj txawj txiav txim siab. Yog peb ua li no, thaum peb raug sim lossis raug xwm txheej nthawv nthav, peb yuav tsis ntshai. (Paj Lug 22:3) Cia peb kawm ob peb tug qauv hauv phau Vajlugkub uas tau ua li no.

14. Tej uas Yauxej hais rau Pautifa tus pojniam qhia li cas rau peb?

¹⁴ Thaum Pautifa tus pojniam thab Yauxej, Yauxej tso plhuav tes khiav. Vim li cas? Rau qhov Yauxej twb ua tib zoo xav ua ntej lawm tias Yehauvas xav li cas txog kev txij nkawm. (Nyeem Chiv Keeb 39:8, 9.) Yauxej thiaj hais rau Pautifa tus pojniam tias: “Kuv yuav ua qhov phem loj no thiab ua txhaum rau Vajtswv tau li cas.” Qhov no qhia tias nws muab Yehauvas txojkev xav los ua nws txoj. Ua li peb ne? Yog ib tug uas nrog koj ua haujlwm thab koj, koj yuav ua li cas? Lossis yog ib tug xa tej lus dev lus npua lossis tej duab thiab tej yeeb yaj kiab liab qab tuaj rau hauv koj lub xov tooj, koj yuav ua li cas? * (Saib cov lus hauv qab taw qhia.) Yog peb muaj Yehauvas txojkev xav thiab twb txiav txim siab ua ntej lawm tias peb yuav ua li cas ces thaum peb raug sim, peb yuav muab siab npuab Yehauvas.

15. Yuav ua li cas peb thiaj muab siab npuab Yehauvas li 3 tug tub hluas Henplais?

¹⁵ Cia peb kawm txog 3 tug tub hluas Henplais Salab, Mesa, thiab Anpenekau. Thaum Vajntxwv Nenpukhanexa sam hwm kom lawv pe hawm tus dab mlom kub uas nws tau ua, lawv yeej tsis kam li. Qhov lawv ua no qhia tias lawv twb ua tib zoo xav lawm tias yog lawv muab siab npuab Yehauvas yuav zoo li cas. (Khiav Dim 20:4, 5; Daniyee 3:4-6, 12, 16-18) Ua li, niaj hnub nimno ne? Yog koj tus lospav kom koj pab nyiaj rau lawv ua ib lub koob tsheej uas txuam nrog kev ntseeg cuav, koj yuav ua li cas? Txhob tos txog thaum twb muaj li no lawm es koj mam txiav txim siab seb yuav ua li cas. Cia li ua tib zoo xav seb Yehauvas xav li cas txog tej ntawd tamsim no. Thaum tej ntawd los raug koj, koj thiaj yuav teb tau lo yog thiab lo zoo rau luag, ib yam li 3 tug tub hluas Henplais.

16. Yog peb muaj Yehauvas lub tswvyim yuav pab peb npaj rau tej kev kub ntxhov li cas?

¹⁶ Peb yuav tau ua tib zoo xav seb Yehauvas xav li cas txog ntshav xwv thaum peb muaj mob nthawv nthav peb thiaj muab siab  npuab Yehauvas. Peb yeej tsis txais ntshav thiab 4 feem ntshav loj. (Tubtxib Tes Haujlwm 15:28, 29) Tiamsis muaj lwm txojkev kho mob ntsig txog ntshav uas nyias yuav tau txiav txim siab rau nyias tus kheej seb puas hla cov hauv paus ntsiab lus hauv phau Vajlugkub. Thaum twg peb mam li xav txog tej no? Puas yog thaum peb twb pw tom tsev kho mob lawm? Tsis yog. Thaum ntawd tej zaum peb twb mob hnyav heev thiab tej zaum tej kws kho mob yuav kom peb teb sai sai rau lawv. Zoo rau peb tshawb nrhiav txog tej no ua ntej kev kub ntxhov los txog, ua kom muaj ntaub muaj ntawv qhia tias peb tau txiav txim siab li cas, thiab nrog peb tus kws kho mob tham. * (Saib cov lus hauv qab taw qhia.)

17-19. Vim li cas tseem ceeb rau peb kawm kom paub Yehauvas txojkev xav tamsim no? Muab ua lus piv txwv.

¹⁷ Yexus kuj ua qauv zoo kawg li rau peb xyaum. Thaum Petus hais rau Yexus tias: “Tus Tswv, thov kom tsis txhob muaj li ntawd,” Yexus txwv hlo Petus. Ua li cas Yexus thiaj teb hlo tau rau Petus? Vim Yexus niaj hnub xav txog tej uas Vajtswv tau txib nws los ua. Tsis tas li ntawd xwb, Yexus nco ntsoov txog tej lus faj lem uas piav txog nws lub neej thiab nws txojkev tuag. Vim Yexus xav ntsoov txog tej no, nws thiaj muab siab npuab Yehauvas thiab tuaj yeem muab nws txojsia this peb txhua tus.​—Nyeem Mathai 16:21-23.

¹⁸ Niaj hnub no Vajtswv xav kom peb ua nws tus phoojywg thiab kom peb rau siab ntso tshaj tawm txoj xov zoo. (Mathai 6:33; 28:19, 20; Yakaunpau 4:8) Tiamsis ib txhia neeg uas xav zoo rau peb yuav cheem peb ib yam li Petus cheem Yexus. Tej zaum peb tus lospav yuav them nyiaj ntau tshaj rau peb tiamsis yog peb ua txoj haujlwm ntawd peb yuav tau ua haujlwm ntau dua thiab yuav tsis muaj sijhawm mus kev sib txoos lossis mus tshaj tawm txoj xov zoo nrog lub koom txoos lawm. Los puas yog, peb tseem kawm  ntawv es cov xibhwb qhia ntawv hais rau peb tias lawv yuav pab kom peb mus kawm tau ntawv qeb siab rau lwm lub nroog. Peb puas tos txog thaum muaj li ntawd peb mam thov Vajtswv, tshawb fawb ntxiv, thiab nrog peb tsev neeg lossis cov txwj laus tham? Yog peb kawm Yehauvas lub tswvyim tamsim no thiab muab nws txojkev xav los ua peb txoj ces thaum peb ntsib tej kev sim siab yuav tsis nyuaj rau peb zam dhau. Peb paub tias peb yuav tau ua li cas vim peb twb txiav txim siab lawm tias peb yuav teev tiam Yehauvas xwb.

¹⁹ Tej zaum koj twb paub txog tej yam uas los ua kev sim siab rau koj. Peb yeej npaj tsis tau rau txhua yam uas yuav los raug peb. Tiamsis thaum peb kawm Vajlugkub yog peb ua tib zoo xav txog Yehauvas lub tswvyim, peb yuav nco tau tej peb kawm thiab yuav paub muab coj los siv. Yog li ntawd, thaum peb kawm Vajlugkub cia peb ua tib zoo xav txog Yehauvas lub tswvyim, muab nws txojkev xav los ua peb txoj, thiab xav ua ntej seb peb yuav ua li cas thaum kev sim siab thiab kev kub ntxhov los txog.

20, 21. (1) Piav seb thaum txog lub qab ntuj tshiab, peb yuav muaj kev ywj pheej ua dabtsi? (2) Yuav ua li cas peb thiaj muaj kev zoo siab tamsim no?

²⁰ Peb txhua tus yeej tos ntsoov lub qab ntuj tshiab. Peb coob tus vam tias yuav tau nyob hauv lub Vaj Kaj Siab hauv ntiajteb no. Thaum Vajtswv lub Nceeg Vaj kav lawm, peb yuav dim tej kev mob kev nkeeg uas peb muaj nimno. Thaum ntawd peb tseem yuav muaj kev ywj pheej txiav txim siab raws li tej peb nyiam thiab tej uas peb siab ntshaw.

²¹ Tiamsis tsis yog peb ua lub neej ywj siab. Cov uas txo hwjchim yuav txiav txim siab raws li Yehauvas tej kevcai thiab yuav yoog raws li Yehauvas txojkev xav. Yuav muaj kev zoo siab xyiv fab thiab kev thaj yeeb nyab xeeb puv nkaus lub qab ntuj no lawm xwb. (Ntawv Nkauj 37:11) Txawm tsis tau txog lub caij ntawd los yog peb muab Yehauvas txojkev xav los ua peb txoj, peb yuav muaj kev zoo siab xyiv fab tamsim no.