1. Vim li cas peb txhua tus cheem tsum kev nplij siab?

PEB txhua tus cheem tsum kev nplij siab. Peb muaj ntau yam kev nyuaj siab, kev ntxhov siab, lossis tej zaum peb lub neej tsis mus raws li siab xav. Peb ib txhia laus zuj zus, ib txhia niaj hnub nroo mob, thiab ib txhia kuj muaj kev quaj ntsuag. Tsis tas li ntawd, tej zaum peb raug kev limhiam vim niaj hnub no tibneeg ua nruj ua tsiv heev. Lub sijhawm peb nyob no yeej muaj kev “txom nyem nyuaj siab kawg.” Tej no qhia tias peb nyob rau “tiam kawg” lawm tiag. Txhua hnub uas peb nyob, peb pom tias lub qab ntuj tshiab yeej txav los ze zuj zus lawm. (2 Timaute 3:1) Ua li, yog peb twb tos Yehauvas hnub tau ntev heev lawm lossis peb muaj kev nyuaj siab ntau zuj zus tuaj, yuav ua li cas peb thiaj nrhiav tau kev nplij siab?

2, 3. (1) Peb paub li cas txog Hanpaku xwb? (2) Vim li cas peb ho kawm phau Hanpaku?

² Cia peb kawm seb phau Hanpaku yuav teb los lus nug  ntawd li cas. Txawm phau Vajlugkub tsis qhia ntau txog Hanpaku lub neej los, tej uas peb nyeem hauv phau Hanpaku txhawb tau peb zog heev. Tej zaum Hanpaku lub npe txhais tias “Puag Rawv.” Qhov no txhais tau tias Yehauvas puag rawv peb es nplig peb siab. Lossis kuj txhais tau tias peb tuav rawv nws zoo li tus menyuam tuav rawv nws leej txiv. Hanpaku tau nrog Vajtswv sib txuas lus thiab nug nws txog ntau yam. Yehauvas kuj teb Hanpaku thiab hais kom nws muab tej ntawd sau cia. Vim li cas Yehauvas thiaj hais kom nws muab sau cia? Rau qhov Yehauvas paub tias tej ntawd yuav txhawb tau peb niaj hnub nimno.​—Hanpaku 2:2.

³ Phau Vajlugkub tsuas qhia rau peb tias Hanpaku yog ib tug cev Vajtswv lus uas muaj kev nyuaj siab heev thiab tau nug Yehauvas txog tej uas nws pom. Txawm li ntawd los “tej uas sau cia yav thaum ub” hauv phau Hanpaku yog sau los “kom Vajtswv txojlus thiaj ua rau peb muaj lub siab ntev thev taus thiab txhawb peb lub zog peb thiaj muaj siab vam.” (Loos 15:4) Phau Hanpaku pab kom peb pom li cas? Pab kom peb pom tias qhov uas peb tso siab rau Yehauvas yog li cas tiag. Thiab txawm peb muaj kev nyuaj siab ntau yam los Hanpaku tej lus faj lem yuav pab kom peb muaj lub siab tus.

4. Ua li cas Hanpaku ho ntxhov siab ua luaj?

⁴ Nyeem Hanpaku 1:2, 3. Hanpaku ntxhov siab vim lub caij ntawd muaj neeg limhiam coob heev. Nws tig qhovtwg los tsuas pom cov Yixayee ib tug ua phem rau ib tug thiab ib tug coj tsis ncaj rau ib tug xwb. Nws thiaj xav tias: ‘Thaum twg tej kev limhiam no mam li kawg? Ua li cas Yehauvas tsis txawj muab cov neeg phem no rhuav tshem mus?’ Hanpaku ua tsis tau li cas li, nws thiaj taij thov Yehauvas pab. Tej zaum Hanpaku yuav xav tias, ‘Yehauvas puas tseem khuvleej nws cov tibneeg?’ Lossis ‘Ua cas nws yuav cia muaj tej kev phem limhiam no?’ Koj puas tau xav li ntawd ib zaug li?

5. Phau Hanpaku qhia li cas rau peb? (Saib thawj daim duab hauv zaj no.)

⁵ Puas yog Hanpaku tsis tso siab rau Yehauvas thiab nws tej lus cog tseg lawm es nws thiaj nug li ntawd? Tsis yog! Hanpaku thov Yehauvas kom nws ua tau siab loj, nws thiaj muaj kev ntseeg thiab thev taus kev ntxhov siab. Tej no qhia tias Hanpaku yeej tso siab plhuav rau Yehauvas. Hanpaku nyuaj siab thiab tws kev tas. Nws tsis to taub tias yog vim li cas Yehauvas ho ncua sijhawm ntev ua luaj rau cov neeg limhiam, thiab vim li cas Yehauvas ho cia nws raug kev nyuaj siab ntev ua luaj li. Qhov uas Yehauvas tshoov kom Hanpaku muab nws tej kev txhawj xeeb sau cia qhia li cas rau peb? Qhia rau peb tias txawm peb ntaus siab yau thiab muaj kev txhawj xeeb dabtsi los tsis txhob ntshai qhia rau Yehauvas paub. Nws xav kom peb thov nws thiab qhia txhua yam kev nyuaj siab rau nws. (Ntawv Nkauj 50:15; 62:8) Paj Lug 3:5 txhawb peb  tias: “Cia li tso siab plhuav rau [Yehauvas] kawg siab kawg ntsws, koj tsis txhob vam khom koj li kev txawj ntse.” Hanpaku tau ua raws nraim li nqe no.

6. Ua li cas kev thov Vajtswv ho tseem ceeb ua luaj?

⁶ Hanpaku tso siab plhuav rau Yehauvas uas yog nws Leej Txiv thiab nws tus Phoojywg Kwvluag, nws thiaj txav ze rau Yehauvas. Hanpaku tsis muab nws tej teeb meem txhawj dhau thiab tsis tso siab rau nws tus kheej xwb. Tiamsis nws thov Yehauvas thiab qhia txhua yam kev txhawj xeeb rau Yehauvas paub. Hanpaku tso tau ib tug qauv zoo heev rau peb xyaum. Yehauvas uas yog tus mloog peb tej lus thov xav kom peb thov nws thiab qhia txhua yam kev txhawj xeeb rau nws. Yog peb ua li no, yuav qhia tias peb tso siab plhuav rau nws. (Ntawv Nkauj 65:2) Tsis tas li ntawd xwb, peb yuav pom Yehauvas teb peb tej lus thov. Thiab yuav pom tias nws hlub peb, nplig peb siab, thiab coj peb kev. (Ntawv Nkauj 73:23, 24) Txawm peb muaj kev ntxhov siab li cas los, Yehauvas yuav pab kom peb tsis txhob tso siab rau peb tus kheej. Thaum peb thov Yehauvas peb qhia rau nws tias peb tso siab plhuav rau nws.

7. Thaum Hanpaku qhia nws tej kev txhawj xeeb rau Yehauvas tas, Yehauvas ua li cas xwb?

⁷ Nyeem Hanpaku 1:5-7. Tom qab Hanpaku qhia nws tej kev txhawj xeeb rau Yehauvas tas ntshe nws yuav txhawj tsam Yehauvas xav li cas rau nws. Tiamsis Yehauvas zoo li ib leej txiv uas hlub nws cov menyuam heev. Yehauvas yeej paub zoo tias Hanpaku muaj kev nyuaj siab ntxhov plawv nws thiaj taij thov kev pab. Yehauvas tsis cem Hanpaku tiamsis nws hais rau Hanpaku tias tshuav tsis ntev xwb Nws yuav muab cov Yudai uas fav xeeb rhuav tshem huvsi mus. Tej zaum Hanpaku yog thawj tug uas Yehauvas qhia tej no rau.

8. Thaum Yehauvas teb Hanpaku tej lus thov, ua li cas Hanpaku ho xav tsis thoob li?

⁸ Yehauvas hais rau Hanpaku tias nws yuav muab cov neeg Yudai uas limhiam rhuav tshem li cas. Nws yuav rau txim rau lawv. Yehauvas hais tias tej no yuav muaj tiav rau “lub sijhawm uas nej nyob.” Qhov no txhais tias yeej yuav los rau lub sijhawm uas Hanpaku lossis cov neeg Yixayee ntawd nyob ntag. Hanpaku xav li cas txog tej uas Yehauvas hais no? Cov Kheedia lossis Npanpiloo tseem phem tshaj cov Yixayee uas paub Vajtswv tej kevcai lawm thiab. Vim li cas Yehauvas ho siv ib lub tebchaws zoo li no los rau txim rau nws haiv neeg? Yog ua li no ces cov neeg Yudai tsuas yuav hajyam txom nyem xwb. Yog koj yog Hanpaku, koj yuav xav li cas?

9. Hanpaku nug li cas ntxiv?

⁹ Nyeem Hanpaku 1:13, 14, 17. Hanpaku yeej to taub tias Yehauvas tsuas siv cov Npanpiloo los rau txim rau cov uas limhiam xwb tiamsis nws tseem muaj lus nug ntau heev. (Hanpaku 1:12) Txawm li ntawd los, nws txo hwjchim thiab tso siab plhuav rau Yehauvas. Nws thiaj hais tias Yehauvas yog nws “txhib zeb.” (Kevcai 32:4; Yaxaya 26:4) Hanpaku paub tias Vajtswv muaj kev hlub thiab muaj siab dawb siab zoo. Yog li ntawd, nws thiaj tsis ntshai nug ntxiv tias: Vim li cas Yehauvas yuav cia cov Yudai ua phem thiab cia lawv raug kev txom nyem ua luaj? Vim li cas nws ho tsis cawm lawv kiag? Vim li cas tus uas muaj hwjchim loj  kawg nkaus yuav “nyob twjywm” es cia muaj kev limhiam nto ntuj? Yehauvas twb yog tus “Dawb Huv” thiab nws “lub qhov muag dawb huv dhau uas yuav saib qhov phem” los tsis yog?

10. Vim li cas tej zaum peb ho xav li Hanpaku thiab?

¹⁰ Tej zaum peb yuav xav li Hanpaku thiab. Peb yeej tig ntsej mloog Yehauvas. Peb tso siab plhuav rau nws thiab niaj hnub kawm nws Txojlus kom peb thiaj muaj kev vam kev cia siab. Peb kuj paub nws tej lus cog tseg uas nws lub koom haum tau qhia rau peb. Txawm li ntawd los tej zaum peb tseem xav tias, ‘Thaum twg peb tej kev txom nyem mam li ploj mus?’ Cia peb kawm ntxiv txog Hanpaku seb nws tau ua li cas.

11. Hanpaku tau txiav txim siab tuag nthi li cas?

¹¹ Nyeem Hanpaku 2:1. Thaum Hanpaku thov Yehauvas tas, nws kaj siab lawm ntau. Nws thiaj tos rawv Yehauvas txojkev pab. Hanpaku ua siab tawv thiab txiav txim siab tuag nthi tos rawv Yehauvas. Nws thiaj hais tias: “Kuv yuav nyob twjywm tos rawv hnub txom nyem.” (Hanpaku 3:16) Kuj muaj lwm tus tub qhe ncaj ncees uas ua siab ntev tos Yehauvas txojkev pab thiab. Lawv cov qauv kuj yuav txhawb tau peb thiab. Peb yeej ua tau siab ntev tos Yehauvas ib yam li lawv.​—Mikha 7:7; Yakaunpau 5:7, 8.

12. Peb xyaum tau Hanpaku lub siab tawv li cas?

¹² Peb xyaum tau Hanpaku lub siab tawv li cas? (1) Txawm peb muaj kev txhawj xeeb dabtsi los peb yuav tsum thov Yehauvas tsis tseg tsis tu. (2) Peb yuav tsum tig ntsej mloog Yehauvas seb nws Txojlus thiab nws lub koom haum qhia li cas rau peb. Thiab (3) peb yuav tsum ua siab ntev tos Yehauvas thiab tso siab plhuav tias nws yuav pab peb raws li nws lub caij lub nyoog. Yog peb xyaum Hanpaku ces peb yuav ua tau siab tus thiab yuav thev taus. Txawm peb muaj kev txhawj xeeb dabtsi los peb txojkev vam khom yuav pab kom peb muaj kev xyiv fab ua taus siab ntev. Peb paub tias Yehauvas yeej yuav pab peb.​—Loos 12:12.

13. Yehauvas tau nplig Hanpaku siab li cas?

¹³ Nyeem Hanpaku 2:3. Yehauvas zoo siab heev rau Hanpaku vim nws tos rawv Yehauvas. Vajtswv paub Hanpaku tej kev txom nyem, Nws thiaj nplig Hanpaku siab thiab txhawb nws tias tshuav tsis ntev lawm xwb Nws yuav teb Hanpaku tej lus thov thiab daws Hanpaku tej kev txhawj xeeb mus. Cuag li nws hais rau Hanpaku tias: “Cia li ua siab ntev thev thiab tso siab plhuav rau kuv. Txawm zoo li ntev heev los, kuv yeej yuav teb koj tej lus thov.” Yehauvas xav kom Hanpaku nco ntsoov tias Yehauvas twb teem ib lub sijhawm los rhuav tshem cov limhiam lawm. Hanpaku yuav tsum ua siab ntev mus txog hnub ntawd. Yog Hanpaku ua siab ntev thev, nws yeej yuav pom muaj tiav raws li Vajtswv tej lus cog tseg.

14. Thaum peb muaj kev txhawj xeeb peb yuav tau txiav txim siab tuag nthi li cas?

 ¹⁴ Peb yuav tau tos Yehauvas thiab tig ntsej mloog nws tej lus qhia li Hanpaku. Yog peb ua li no ces txawm peb muaj kev txhawj xeeb dabtsi los peb yuav ua tau siab loj thiab muaj lub siab tus yees. Yexus hais tias peb tsis tas yuav txhawj txog “lub caij lub nyoog” uas Leej Txiv tsis tau muab qhia rau peb. (Tubtxib Tes Haujlwm 1:7) Peb yuav tsum tso siab rau Yehauvas tias nws yeej paub lub caij lub nyoog lawm. Yog li ntawd, cia peb txo hwjchim, ua siab ntev, thiab tso siab plhuav rau Vajtswv. Ua ntej Yehauvas hnub tseem tsis tau los txog, cia peb rau siab ntso teev tiam Yehauvas thiab siv peb lub sijhawm kom muaj nuj nqes.​—Malakau 13:35-37; Kalatia 6:9.

15, 16. (1) Phau Hanpaku muaj tej lus cog tseg twg? (2) Tej lus cog tseg no qhia li cas rau peb?

¹⁵ Yehauvas cog lus tseg tias: “Tus uas ncaj ncees yuav muaj txojsia nyob vim nws ntseeg Vajtswv,” thiab “[Yehauvas] lub hwjchim ci ntsa iab yuav puv nkaus hauv lub qab ntuj rau sawvdaws paub.” (Hanpaku 2:4, 14) Yehauvas cog lus tias cov uas ua siab ntev tos thiab tso siab plhuav rau nws yuav tau txojsia ib txhis tsis kawg.

¹⁶ Cov lus cog tseg hauv Hanpaku  2:4 tseem ceeb heev, tus tubtxib Povlauj thiaj muab sau mus rau cov Khixatia nyob thawj 100 xyoo 3 zaug! (Loos 1:17; Kalatia 3:11; Henplais 10:38) Peb ntseeg ruaj nreeg tias, txawm peb muaj kev nyuaj siab dabtsi los yog peb tso siab plhuav rau Yehauvas, peb yeej yuav pom muaj tiav raws li nws tej lus cog tseg. Yehauvas xav kom peb nco ntsoov txog peb txojkev vam kev cia siab rau yav tom hauv ntej.

17. Yehauvas cog lus tias yog peb tso siab plhuav rau nws, nws yuav muab dabtsi rau peb?

¹⁷ Phau Hanpaku qhia tau ntau yam rau cov uas nyob rau lub caij kawg no. Yehauvas cog lus tias cov ncaj ncees uas tso siab plhuav rau nws yuav tau txojsia ib txhis tsis kawg. Yog li ntawd, txawm peb muaj kev txhawj xeeb dabtsi los cia peb yimhuab tso siab rau Vajtswv. Tej uas Yehauvas hais rau Hanpaku qhia tias Nws yeej yuav txhawb peb thiab cawm peb dim. Yehauvas ua tib zoo hais peb tias cia li tso siab plhuav rau nws thiab ua siab ntev tos hnub uas nws teem cia rau nws lub Nceeg Vaj los kav. Thaum ntawd, tsuas yuav muaj cov pe hawm Yehauvas uas muaj siab mos siab muag thiab muaj kev zoo siab lawm xwb.​—Mathai 5:5; Henplais 10:36-39.

18. Yehauvas cov lus txhawb tau Hanpaku li cas?

¹⁸ Nyeem Hanpaku 3:16-19. Tej uas Yehauvas qhia rau Hanpaku txhawb tau nws lub zog heev. Hanpaku ua tib zoo xav txog tej uas Yehauvas tau ua los pab nws haiv neeg yav tas los nws thiaj yimhuab tso siab rau Yehauvas. Nws ntseeg ruaj nreeg tias tshuav tsis ntev lawm xwb Yehauvas twb yuav los muab cov neeg limhiam rhuav tshem! Txawm nws tseem niaj hnub nyiaj kev txom nyem nyuaj siab los tej lus cog tseg ntawd txhawb tau nws lub zog. Nws thiaj tsis ntaus siab yau lawm. Nws tso siab plhuav tias Yehauvas yeej yuav cawm nws xwb. Cov lus Hanpaku hais hauv tshooj 3 nqe 18 qhia tias tsis muaj pes tsawg leej thiaj tso siab rau Yehauvas npaum li nws. Ib txhia neeg tshawb fawb Vajlugkub hais tias nqe Vajlugkub no kuj txhais tau li no: “Kuv yuav dhia cus plaws xyiv fab hlo rau ntawm tus Tswv; Kuv yuav kiv pes lees zoo siab rau ntawm Vajtswv.” Cov nqe Vajlugkub no yeej txhawb tau peb kawg li, puas yog? Yehauvas tsis yog cog lus rau peb xwb, nws kuj qhia rau peb tias tsis ntev xwb nws tej lus cog tseg ntawd yuav muaj tiav.

19. Peb yuav tsum ua li cas Yehauvas thiaj nplig peb li nws nplig Hanpaku?

¹⁹ Phau Hanpaku qhia li cas rau peb? Qhia tias peb yuav tsum tso siab plhuav rau Yehauvas. (Hanpaku 2:4) Yuav kom peb tso siab tau rau Yehauvas, peb txojkev sib raug zoo nrog nws yuav tsum ruaj khov. Yog li ntawd, peb yuav tsum ua li no: (1) Thov Yehauvas tsis tseg thiab qhia txhua yam kev txhawj xeeb rau nws. (2) Tig ntsej mloog tej uas Yehauvas qhia hauv nws Txojlus thiab tej uas nws lub koom haum qhia. (3) Muab siab npuab Yehauvas thiab ua siab ntev tos nws tej lus cog tseg muaj tiav. Hanpaku tau ua 3 yam no. Thaum xub thawj Hanpaku ntxhov siab thiab nyuaj siab heev, tiamsis thaum nws nrog Yehauvas tham tas, nws tuaj zog thiab muaj kev xyiv fab! Yog peb xyaum Hanpaku, peb Leej Txiv Yehauvas yuav muab peb puag ib yam nkaus li leej txiv puag nws tus menyuam. Hauv lub qab ntuj limhiam no yeej tsis muaj ib tug twg yuav nplig tau peb li Vajtswv Yehauvas.