1. Ua cas peb ho paub tias Yehauvas xav nrog peb sib raug zoo?

 YEHAUVAS caw kom peb txav los ze nws. (Yakaunpaus 4:8) Nws xav ua peb tus Vajtswv, peb Txiv thiab nrog peb sib raug zoo. Nws teb peb tej lus thov thiab pab peb rau tej ntwb ntu muaj kev nyuaj siab ntxhov plawv. Tsis tas li ntawd, nws kuj siv nws lub koom haum los cob qhia thiab tiv thaiv peb. Yuav ua li cas peb thiaj nrog tau nws sib raug zoo?

2. Yuav ua li cas peb thiaj nrog tau Yehauvas sib raug zoo?

² Yog peb thov Yehauvas, nyeem nws Txoj Lus thiab muab tej peb nyeem ntawd los ua zoo xav ces yuav pab tau kom peb nrog nws sib raug zoo. Yog peb ua li no lawd, peb yuav nco ntsoov ris nws txiaj ntsig. Tsis tas li ntawd, peb yuav mloog nws lus thiab qhuas nws. (Tshwmsim 4:11) Yog peb yim paub Yehauvas ces peb yim tso siab rau nws thiab lub koom haum nws npaj tseg los mus pab peb.

3. Ntxwg Nyoog xav muab peb thiab Yehauvas sib cais li cas, tiam sis muaj dab tsi yuav pab tau kom peb tsis txhob muab Yehauvas thiab nws lub koom haum tso pov tseg? (Phau Ntawv Nkauj 31:13, 14)

³ Lub caij uas peb raug kev sim siab, yog lub caij uas Ntxwg Nyoog siv los muab peb thiab Yehauvas sib cais. Ib zaug tag ib zaug tuaj, Ntxwg Nyoog maj mam ua rau kom peb tsis txhob tso siab rau Yehauvas thiab nws lub koom haum. Tiam sis peb yeej muaj rab peev xwm peem dhau ntawm tej kev dag ntxias no. Peb yuav tsis tso Yehauvas thiab nws lub koom haum tseg yog tias peb txoj kev ntseeg ruaj khov khwb kho thiab peb tso siab plhuav rau Yehauvas.​—Nyeem Phau Ntawv Nkauj 31:13, 14.

4. Nyob rau hauv zaj kawm no yuav piav txog dab tsi?

⁴ Nyob rau hauv zaj kawm no yuav piav txog peb yam kev sim siab uas kuj ua tau rau peb tsis tso siab rau Yehauvas thiab  nws lub koom haum. Cov kev sim siab no yuav cais peb thiab Yehauvas tau li cas? Thiab peb yuav tau ua li cas peb thiaj kov yeej tej uas Xatas siv los mus dag ntxias peb?

5. Tej teeb meem peb raug ua rau peb tsis tso siab rau Yehauvas thiab nws lub koom haum li cas?

⁵ Muaj qee zaug peb yuav ntsib teeb meem, xws li raug peb tsev neeg tawm tsam los sis peb ho poob hauj lwm. Thaum peb raug tej teeb meem no tau ntev loo lawm, tig rau sab twg los tsuas tsaus ntuj nti xwb, peb thiaj puas siab puas ntsws tas. Thaum Xatas pom peb nyob mluas mlob li no, nws thiaj siv lub sij hawm no los dag ntxias kom peb tsis txhob nco txog Yehauvas txoj kev hlub tshua peb. Xatas xav kom peb liam txim rau Yehauvas thiab Nws lub koom haum rau tej uas peb raug. Thaum cov Ixayees tseem nyob rau tim teb chaws Iyiv, lawv kuj tau raug tej kev sim siab zoo li no tib yam nkaus. Thaum chiv thawj, lawv xav tias Yehauvas tsa Mauxes thiab Aloos nkawd coj lawv tawm hauv teb chaws Iyiv mus. (Khiav Dim 4:29-31) Tiam sis ntev mus ntev tuaj, Falaus ua nyuaj nyuaj rau lawv ces lawv txawm tig los yws nkawd tias: “Neb ua rau Falaus thiab nws cov nomtswv ntxub peb heev. Neb ua li ntawd ib yam nkaus li yog neb muab ntaj cob rau lawv tua peb povtseg ntag.” (Khiav Dim 5:19-21) Tsis txaus ntseeg li uas lawv cia li tig los liam Vajtswv ob tug tub qhe. Yog tias koj raug teeb meem tau ntev loo lawm, koj yuav ua li cas koj thiaj tso siab rau Yehauvas thiab nws lub koom haum?

6. Peb khaws tau dab tsi ntawm Hanpakus xwv peb thiaj thev taus tej kev nyuaj siab peb raug? (Hanpakus 3:17-19)

⁶ Qhib siab lug thov Yehauvas thiab cia nws ua tus pab koj. Hanpakus yeej ntsib ntau yam kev nyuaj siab. Muaj ib zaug nws xav tias xyov Yehauvas puas nco txog nws. Hanpakus thiaj li qhib siab lug thov Yehauvas tias: “[Yehauvas], kuv yuav thov koj ntev npaum li cas koj mam li mloog . . . Ua li cas koj sawv twjywm ntsia tej kev txhaum ntawd xwb?” (Hanpakus 1:2, 3) Yehauvas thiaj li teb Hanpakus tej lus thov. (Hanpakus 2:2, 3) Qhov ua rau Hanpakus rov kaj siab yog nws ua tib zoo xav txog tej uas Yehauvas tau ua los cawm Nws cov tib neeg. Hanpakus thiaj tso siab plhuav rau Yehauvas tias Yehauvas yeej yuav pab nws thev dhau txhua yam kev sim siab. (Nyeem Hanpakus 3:17-19.) Peb khaws tau li cas los ntawm tej no? Thaum koj raug teeb meem, kav tsij thov Yehauvas thiab qhia txhua yam nraim nkoos hauv koj nruab siab rau nws paub thiab cia siab tias nws yuav pab koj. Yog koj tso siab plhuav rau nws lawm, nws yeej yuav txhab ntxiv dag zog kom koj thev taus txhua yam koj raug. Koj txoj kev ntseeg yuav hlob mos nyoos tuaj thaum koj pom tias nws yeej pab koj tiag.

7. Hli cov nruab ze txhob kom nws ua dab tsi, thiab muaj dab tsi pab tau Hli tuav rawv nws txoj kev ntseeg rau Yehauvas?

⁷ Nco ntsoov ua tej yam uas pab koj nrog Yehauvas sib raug zoo. Cia peb mus piav txog ib tug muam ntseeg uas nyob hauv teb chaws Phapua Nus Nkinim (Papua New Guinea) npe hu ua Hli. b Lawv tsev tib neeg txom txom nyem thiab qee lub sij hawm lawv yeej tsis muaj noj muaj haus. Muaj ib tug nruab ze hais tej lus ntsw ntsuav kom nws txhob tso siab rau Yehauvas. Tus nruab ze ntawd hais tias: “Koj hais tias Vajtswv lub hwj huam dawb huv pab koj tiam sis cas tsis pom pab li? Nej tsev neeg txom nyem ntsuav. Koj haj tseem niaj hnub nkim sij hawm mus qhia Vajlugkub.” Hli hais tias: “Thaum kuv hnov li  no, ua rau kuv xav tias: ‘Vajtswv puas hlub tshua peb tsev neeg tiag?’ Tam sim ntawd kuv thov kiag Yehauvas thiab qhia txhua yam hauv kuv nruab siab rau nws paub. Kuv niaj hnub nyeem phau Vajlugkub, nyeem tej ntaub ntawv lub koom haum luam tawm, mus qhia Vajlugkub thiab mus kev sib txoos.” Ntev mus ntev tuaj, Hli txawm pom tias Yehauvas yeej saib xyuas lawv tsev neeg kawg nkaus li vim lawv yeej tsis tshaib nqhis ua luaj twg thiab lawv yeej kaj siab lug. Hli hais tias: “Kuv paub tias Yehauvas yeej mloog kuv tej lus thov.” (1 Timautes 6:6-8) Yog koj niaj hnub ua tej yam los tsav koj txoj kev ntseeg ces txawm koj yuav muaj teeb meem li cas los koj yuav tsis cia tej ntawd cais koj thiab Yehauvas.

8. Muaj qho yam twg los raug cov kwv tij uas saib xyuas Yehauvas lub koom haum?

⁸ Tej tib neeg tsis nyiam Yehauvas cov tib neeg, hais lus dag thiab lus tsis tseeb txog cov kwv tij uas saib xyuas Yehauvas lub koom haum rau saum huab suam cua los sis hauv tej xov xwm. (Phau Ntawv Nkauj 31:13) Muaj ib txhia kwv tij kuj raug ntes coj mus kaw thiab liam txim yam li ib tug neeg phem. Nyob rau thawj 100 xyoo, cov ntseeg kuj raug tib yam li no thaum tus tub txib Paulus tau raug iab liam thiab raug ntes coj mus kaw. Cov ntseeg nyob tiam ntawd ua li cas xwb?

9. Ib txhia ntseeg coj li cas xwb thaum tus tub txib Paulus raug ntes coj mus kaw?

⁹ Nyob rau thawj 100 xyoo, ib txhia ntseeg tsis kam txhawb nqa tus tub txib Paulus thaum nws raug coj mus kaw rau hauv teb chaws Loos. (2 Timautes 1:8, 15) Ntshe lawv txaj muag vim tib neeg ob cag suav Paulus tam li ib tug tub sab los sis ntshe lawv ntshai nyob tsam lawv ho raug tsim txom thiab. (2 Timautes 2:8, 9) Txawm muaj li cas los xij peem, ua zoo xav seb Paulus xav li cas. Nws thev dhau txhua yam kev nyuaj siab thiab peem siav ntshis kom thiaj pab tau lawv. (Tes Haujlwm 20:18-21; 2 Kauleethaus 1:8) Peb tsis txhob coj yam li cov tib neeg uas tsis kam pab Paulus thaum nws xav tau lawv pab.  Thaum ib tug kwv tij saib xyuas raug tsim txom, peb yuav tau nco ntsoov li cas?

10. Thaum cov kwv tij saib xyuas raug tsim txom peb yuav tau nco ntsoov li cas, thiab vim li cas peb yuav tau nco ntsoov li ntawd?

¹⁰ Nco ntsoov tias vim li cas peb raug tsim txom thiab leej twg yog tus tsub kev tsim txom. Nyob rau hauv 2 Timautes 3:12 hais tias: “Cov ntseeg Yexus Khetos txhua tus uas xav ua lub neej kom Vajtswv tau ntsejmuag, lawv yeej raug kev tsimtxom.” Yog li ntawd, thaum cov kwv tij saib xyuas Yehauvas lub koom haum raug tsim txom, peb yeej paub zoo tias Xatas yog tus chiv tej no ntag. Nws xav kom cov kwv tij no tso Yehauvas tseg thiab nws xav hem kom peb ntshai.​—1 Petus 5:8.

11. Peb khaws tau Aunexifaulus tus yam ntxwv li cas? (2 Timautes 1:16-18)

¹¹ Cia li rau siab ntso txhawb cov kwv tij saib xyuas thiab nrog nraim lawv. (Nyeem 2 Timautes 1:16-18.) Nyob rau thaum thawj 100 xyoo, muaj ib tug ntseeg npe hu ua Aunexifaulus coj txawv dua lwm tus thaum paub tias Paulus raug kaw. “Nws tsis txajmuag rau qhov uas [Paulus] raug kaw rau hauv tsev lojcuj li.” Nws nrhiav Paulus rau qhov txhia qhov chaw. Thaum nws nrhiav tau Paulus lawm, nws yeej saib seb Paulus xav tau dab tsi ces nws pab li ntawd. Txawm nws muab nws txoj sia mus this Paulus los nws yeej tsis khuv xim. Peb khaws tau li cas los ntawm tej no? Peb yuav tau txhob ntshai tib neeg los sis cia lawv hem peb kom tsis txhob mus pab cov kwv tij uas raug tsim txom. Txhob ua siab deb, kav tsij cev tes mus pab cov kwv tij no. (Pajlug 17:17) Lawv yeej xav tau peb txoj kev txhawb nqa thiab hlub tshua.

12. Peb khaws tau dab tsi los ntawm cov kwv tij nkauj muam nyob rau Lav Xias teb?

¹² Cov kwv tij nkauj muam ntseeg nyob rau Lav Xias teb, yeej cev tes mus pab cov kwv tij nkauj muam uas raug kaw. Thaum cov uas raug kaw mus hais plaub hais ntug hauv tej tsev txiav txim, cov kwv tij nkauj muam yeej tuaj nyob rau ntawd. Peb khaws tau li cas los ntawm tej no? Thaum cov kwv tij saib xyuas raug iab liam, ntes los sis tsim txom, peb tsis ntaus siab yau. Kav tsij thov Yehauvas pab lawv, pab mus saib xyuas lawv tsev neeg, thiab nrhiav txhua txoj hau kev los mus txhawb nqa lawv.​—Tes Haujlwm 12:5; 2 Kauleethaus 1:10, 11.

13. Thaum raug luag thuam, ho ua tau rau peb tsis tso siab rau Yehauvas thiab nws lub koom haum li cas?

¹³ Tej zaud peb mus qhia txoj xov zoo los sis peb coj raws li Yehauvas tej kev cai, yuav ua rau peb tej nruab ze, cov neeg peb ua hauj lwm nrog los sis kawm ntawv nrog thuam luag peb. (1 Petus 4:4) Muaj qee zaug lawv yuav hais tias: “Kuv nyiam nrog koj tiam sis nej txoj kev ntseeg coj nruj dhau.” Hos muaj dua lwm cov kuj thuam tias peb coj tsis ncaj rau cov uas raug rho tawm. Lawv thuam tias: “Ua li nej puas muaj kev hlub tiag?” Tej lus thuam no kuj yuav ua tau rau peb xav tias Yehauvas tej kev cai puas ncaj ncees tiag. Tej zaud peb yuav pib xav tias: ‘Ntshe Yehauvas yuam kuv ua ntau dhau lawm pob? Tej zaum nws lub koom haum coj nruj dhau lawm pob?’ Yog koj pib xav li no rau hauv nruab siab, yuav ua li cas koj thiaj rov tso siab rau Yehauvas thiab nws lub koom haum?

14. Peb yuav coj li cas thaum raug luag lwm tus thuam? (Phau Ntawv Nkauj 119:50-52)

¹⁴ Kav tsij rau siab ntso ua tej uas Yehauvas hais tias zoo. Txawm Yauj raug lwm tus thuam los nws yeej ua raws li Yehauvas pom zoo. Muaj ib tug txiv neej uas lam ntaus phooj ywg nrog Yauj hais rau Yauj tias Vajtswv yeej tsis paub txawm Yauj yuav ua ncaj los tsis ncaj.  (Yauj 4:17, 18; 22:3) Yauj tsis kam mloog tej lus dag ntawd. Nws yeej paub tias Yehauvas tej kev cai puav leej yog, thiab Yauj yeej yuav ua npaum li nws ua tau kom coj raws li tej kev cai ntawd. (Yauj 27:5, 6) Peb khaws tau li cas los ntawm tej no? Tsis txhob cia luag tej lus thuam ua rau koj xav txawv txog Yehauvas tej kev cai. Zaum tsaws xav txog tej yav tag los lawm uas Yehauvas tau pab koj. Muaj ntau zaug, thaum koj ua raws li Yehauvas hais, koj lub neej yeej zoo lawm hov ntau tuaj puas yog? Cia li kav tsij ua npaum li koj ua tau los txhawb Yehauvas lub koom haum. Yog koj ua li no, txawm tib neeg yuav nyiam thuam npaum li cas los koj yuav tsis tso Yehauvas tseg.​—Nyeem Phau Ntawv Nkauj 119:50-52.

15. Vim li cas Nplias ho raug thuam?

¹⁵ Cia peb mus piav txog ib tug muam ntseeg npe hu ua Nplias nyob hauv teb chaws Idia (India). Tej nruab ze tau thuam nws yeeb vim yog nws txoj kev ntseeg. Tsis ntev tom qab nws ua kev cai raus dej rau xyoo 1997, nws tus txiv txawm poob hauj lwm. Yog li ntawd, nws tus txiv thiaj kom lawv tsiv mus nrog niam pog txiv yawg nyob rau lwm lub nroog. Nplias txoj kev ntseeg raug sim hnyav kawg nkaus li vim nws yuav tau ua hauj lwm los koob lawv lub cuab lub yig. Tsis tas li ntawd, lub koom txoos uas nyob ze lawv deb li 350 kilumev (220 mais) kev. Nws tus txiv tsev neeg tawm tsam nws txoj kev ntseeg kawg nkaus li. Lawv tawm tsam heev heev ua rau Nplias lawv tsev neeg nyob tsis taus ces lawv yuav tau tsiv tawm. Tom qab ntawd, nws tus txiv txawm cia li tag sim neej lawm thiab. Txuas ntxiv ntawd, nws tus me ntxhais uas muaj 12 xyoos los cia li mob kheeb xawm (cancer) thiab kuj tau nruam sim lawm. Tag nrho nws cov kwv tij neej tsa liam tias yog tim Nplias pheej teev tiam Yehauvas es tej kev phem no thiaj li raug lawv tsev tib neeg. Txawm lawv ua nruj ua tsiv li no los Nplias yeej tso siab plhuav rau Yehauvas thiab Nws lub koom haum.

16. Nplias tau txais tej koob hmoov twg vim nws tsis tso Yehauvas thiab Nws lub koom haum tseg?

¹⁶ Tus saib xyuas thaj tsam txhawb kom Nplias mus qhia Vajlugkub thiab qhib tsev rau  sawv daws tuaj sib ntsib vim nws nyob ntuj ncua kev deb ntawm lub koom txoos. Thaum thawj Nplias xav hais tias hauj lwm ntau dhau yog nws ua li no tiam sis nws xav hais tias nws yuav tau mloog tej lus tus kwv tij hais. Nws mus qhia Vajlugkub rau tej neeg zej zog, qhib tsev rau sawv daws tuaj sib ntsib, thiab lauj sij hawm los nrog nws ob tug ntxhais kawm Vajlugkub ua ke. Tom qab no kuj muaj coob tus kawm Vajlugkub nrog Nplias thiab ib txhia kuj ua kev cai raus dej lawm. Nyob rau xyoo 2005, Nplias thiaj rau npe ua ib tug tho kev. Qhov uas nws tso siab rau Yehauvas thiab Yehauvas lub koom haum ua rau nws tau txais ntau yam zoo. Nws ob tug ntxhais kub siab lug teev tiam Yehauvas thiab nyob rau thaj tsam ntawd, kuj muaj ob lub koom txoos lawm thiab. Nplias paub hais tias tos nws ua tau tej no los yog Yehauvas pub dag pub zog rau nws thev txhua yam teeb meem uas nws raug thiab thev taus cov nruab ze tej lus thuam.

17. Peb yuav tau ua dab tsi kam tiag?

¹⁷ Xatas xav kom peb ntseeg tias thaum peb raug kev nyuaj siab, Yehauvas yeej yuav muab peb tso tseg thiab qhov uas peb nrog Yehauvas lub koom haum yuav tsub kev nyuaj siab ntxhov plawv rau peb xwb. Xatas xav kom peb ntshai thaum peb pom ib tug kwv tij twg raug liam, raug tsim txom los sis raug kaw. Tsis tas li ntawd thaum peb raug thuam, Xatas tsis xav kom peb tso siab rau Yehauvas thiab Yehauvas lub koom haum. Vim peb paub tias Xatas coj li no, peb yuav tsis cia nws ntxias tau peb. (2 Kauleethaus 2:11) Peb yuav tau tsis txhob mloog Xatas tej lus dag ntxias tiam sis nrog nraim Yehauvas thiab Nws lub koom haum. Nco ntsoov tias Yehauvas yeej yuav tsis muab peb tso tseg ib zaug li. (Phau Ntawv Nkauj 28:7) Yog li ntawd, tsis txhob cia ib yam dab tsi los cais peb thiab Yehauvas.​—Loos 8:35-39.

18. Zaj kawm txuas ntxiv tom ntej no yuav piav txog dab tsi?

¹⁸ Nyob rau hauv zaj kawm no piav txog tej neeg tsis paub Yehauvas tsub kev nyuaj siab rau peb. Tiam sis qhov uas peb tso siab rau Yehauvas thiab Nws lub koom haum kuj yuav raug sim tib yam nkaus nyob rau hauv lub koom txoos. Nyob rau zaj kawm txuas ntxiv tom ntej no yuav piav txog seb peb yuav ua li cas peb thiaj yuav kov yeej.