1. Tswj peb lub siab yog li cas tiag? (2 Timautes 4:5)

 THAUM muaj ib yam twg ntsawv peb siab, peb txoj kev tso siab rau Yehauvas thiab nws lub koom haum yuav raug sim. Yuav kom peb thev dhau txoj kev sim siab yam li no, peb yuav tau tswj peb lub siab thiab tuav rawv peb txoj kev ntseeg. (Nyeem 2 Timautes 4:5.) Tswj peb lub siab yog ua siab tus, mam xav mam hais, thiab tshuaj ntsuas seb Yehauvas pom zoo li cas. Thaum peb coj yam li no, peb thiaj tsis xav txog lig.

2. Nyob rau hauv zaj kawm no yuav piav txog dab tsi?

² Zaj kawm tag los lawd piav txog peb yam uas tej neeg tsis paub Yehauvas tsub kev nyuaj siab rau peb. Nyob rau hauv zaj kawm no yuav piav txog peb yam kev sim siab uas peb raug hauv lub koom txoos seb peb puas npuab siab rau Yehauvas. Peb yam no yog (1) ib tug ntseeg twg tau ua tsis yog rau peb, (2) thaum peb raug qhuab ntuas, thiab (3) thaum muaj ib yam twg nyuaj rau peb ua raws li lub koom haum qhia. Yuav ua li cas peb thiaj tswj tau peb lub siab thiab tso siab rau Yehauvas thiab nws lub koom haum thaum peb raug tej kev sim siab?

3. Peb yuav coj li cas thaum ib tug ntseeg twg ua tsis yog rau peb?

³ Koj puas tau raug ib tug ntseeg twg ua tsis ncaj rau koj? Tej zaud tus ua tsis ncaj ntawd kuj yog ib tug txwj laus los muaj. Qhov tseeb tiag, tej zaum tus kwv tij ntawd yeej tsis xav ua rau koj tu siab. (Loos 3:23; Yakaunpaus 3:2) Txawm li ntawd los, tej nws ua yeej ua tau rau koj chim kawg li. Ua rau koj nyob tsheej tag hmo pw tsis tsaug zog. Tej zaud koj xav mus xav los tias, ‘Yog ib tug kwv tij coj zoo li no xwb, lub koom haum no  puas yog Vajtswv lub tiag?’ Txoj kev xav no yog raws nkaus li Xatas lub siab nyiam ntag. (2 Kauleethaus 2:11) Yog peb pheej xav ntev xav ntau txog tej no, yuav ua rau peb tsis kam teev tiam Yehauvas thiab tawm ntawm Yehauvas lub koom haum mus. Yog peb xav tias ib tug ntseeg twg ua tsis ncaj rau peb, peb yuav tau tswj peb lub siab thiab tsis txhob xav tej yam uas haum Xatas lub siab li cas?

4. Thaum Yauxej raug kev tsis ncaj ncees, nws tswj nws lub siab li cas thiab peb khaws tau nws tus yam ntxwv li cas? (Chivkeeb 50:19-21)

⁴ Tsis txhob cib nyeej. Thaum Yauxej tiav hluas, nws cov tij laug ua saib tsis taus nws. Lawv ntxub nws thiab muaj ib txhia xav muab nws tua pov tseg. (Chivkeeb 37:4, 18-22) Tom qab no lawv muab nws muag mus ua cev qhev. Yauxej raug kev sim siab tau 13 lub xyoos. Nyob rau ncua sij hawm ntawd, tej zaum Yauxej kuj yuav xav tias Yehauvas tsis hlub tshua nws thiab muab nws tso tseg lawm los kuj muaj. Tiam sis Yauxej tsis cib nyeej. Nws tswj nws lub siab thiab ua lub siab tus tus. Thaum nws muaj caij nyoog pauj kua zaub ntsuab rau nws cov kwv tij los nws tsis ua li ntawd. Nws qhia tias nws hlub tshua lawv kawg li thiab zam txim pub rau lawv. (Chivkeeb 45:4, 5) Tos Yauxej coj zoo li no los vim nws twb muab ua tib zoo xav lawm. Nws tsis xav txog tej uas nws raug nkaus nkaus xwb tiam sis nws xav txog tej yam uas Yehauvas lub siab nyiam. (Nyeem Chivkeeb 50:19-21.) Peb khaws tau zaj no tias thaum raug kev tsis ncaj ncees, tsis txhob cib nyeej rau Yehauvas los sis xav tias nws muab peb tso tseg lawm. Cia peb zaum tsaws xav txog tej yam nws tau pab peb thev dhau peb tej kev sim siab. Tsis tas li ntawd thaum ib tug twg uas tsis ncaj rau peb, nco ntsoov tias kev hlub npog tau txhua yam.​—1 Petus 4:8.

5. Thaum Pov raug kev tsis ncaj ncees, nws tswj nws lub siab li cas?

⁵ Cia peb mus piav txog ib tug txwj laus nyob rau Amelikas qab teb hu ua Pov. b Nws nco txog muaj ib zaug muaj ib co kwv tij tuav hauj lwm hauv Yehauvas lub koom haum tau ua tej yam saib tsis taus nws. Nws hais tias: “Tsis tau muaj ib zaug uas kuv yuav ntxhov siab npaum li no dua li. Kuv pw tsis taus li thiab kuv tsis quaj los, kua muag yeej los vim kuv ua tsis tau dab tsi.” Txawm li ntawd los Pov yeej tswj nws tus kheej thiab tsis pub kom luag tej paub txog nws tej kev nyuaj siab. Nws thov Yehauvas tsis so kom muab lub hwj huam dawb huv los pab nws thev txhua yam. Nws kuj mus nyeem tej ntaub ntawv uas Yehauvas lub koom haum luam tawm los pab nws thiab. Peb khaws tau zaj no tias yog ib tug kwv tij nkauj muam twg ua tsis ncaj rau peb lawm los, cia peb ua siab tus thiab tswj tej yam peb xav tsis zoo hauv nruab siab. Peb tsis paub tias xyov tej tim li cas tus tod thiaj li coj yam li tod rau peb. Qhia txhua yam rau Yehauvas paub thiab thov kom Yehauvas pab peb nkag siab tus tib neeg tod. Yog peb coj yam li no, yuav pab kom peb xav qhov zoo txog tus tod thiab zam txim pub rau nws. (Pajlug 19:11) Nco ntsoov tias Yehauvas yeej pom txhua yam thiab Nws yeej yuav ntxiv dag ntxiv zog kom peb thev taus txhua yam.​—2 Xwmtxheej Vajntxwv 16:9; Tej Lus Qhia 5:8.

6. Vim li cas ho tseem ceeb rau peb nkag siab tias Yehauvas qhuab ntuas peb vim nws hlub peb? (Henplais 12:5, 6, 11)

⁶ Thaum Yehauvas qhuab ntuas peb, tej zaud kuj ua rau peb puas siab puas ntsws tas. Yog peb tsuas xav txog tej yam peb raug xwb  ces peb yuav pib xav tias tej uas peb raug qhuab ntuas ntawd tsis ncaj ncees los sis hais hnyav dhau rau peb lawm. Yog peb xav li ntawd ces peb yuav xam tsis pom tias Yehauvas yog tus qhuab ntuas peb vim nws hlub peb. (Nyeem Henplais 12:5, 6, 11.) Tsis tas li ntawd, cuaj kaum los peb pheej xav mus xav los tias peb raug ntuas tsis ncaj lawm ces yuav qhib tau ib txoj hau kev rau Xatas los tawm tsam peb. Xatas xav kom peb tsis txhob mloog tej lus qhuab ntuas thiab cia li tawm ntawm Yehauvas thiab lub koom txoos mus. Yog hais tias peb raug qhuab ntuas, yuav ua li cas peb thiaj tswj tau peb lub siab?

7. (1) Raws li daim duab, tom qab Petus tau txais tej lus qhuab ntuas tas, Yehauvas siv nws mus ua tej hauj lwm twg? (2) Peb khaws tau li cas los ntawm Petus tus yam ntxwv?

⁷ Mloog lus qhuab ntuas thiab hloov los coj li tau ntuas ntawd. Muaj ntau zaus Yexus yeej tau qhuab ntuas Petus tab meeg lwm cov tub txib. (Malakaus 8:33; Lukas 22:31-34) Tej zaud yeej ua tau rau Petus txaj muag kawg li. Txawm li ntawd los nws lub siab yeej npuab Yexus tas li. Nws yeej txais tej lus qhuab ntuas thiab tseg tsis rov ua dua lawm. Yehauvas thiaj foom koob hmoov rau Petus thiab muab hauj lwm hauv lub koom txoos rau nws tuav. (Yauhas 21:15-17; Tes Haujlwm 10:24-33; 1 Petus 1:1) Peb khaws tau Petus tus yam ntxwv tias thaum peb raug qhuab ntuas, tsis txhob xav txog tias yuav ua rau peb poob ntsej muag tiam sis cia li txais yuav tej lus ntuas ntawd thiab hloov los coj li tau ntuas ntawd. Yog peb coj yam li no ces Yehauvas thiab cov kwv tij ntseeg thiaj yuav siv tau peb.

8-9. Tom qab raug qhuab ntuas tag, Nplooj xav li cas thiab muaj dab tsi ho pab tau nws thim xav?

⁸ Cia peb mus piav txog ib tug kwv tij nyob rau teb chaws Mauxanpij (Mozambique) npe hu ua Nplooj. Nws tsis tau ua ib tug txwj laus lawm. Nplooj xav li cas txog tej no xwb? Nws hais tias, “Kuv chim heev vim kuv tsis nyiam tej lus uas ntuas kuv ntawd.” Nws pheej txhawj nyob tsam cov uas nyob hauv lub koom txoos xav phem txog nws. Nws hais li no ntxiv tias, “Yeej siv nyog li ob peb lub hlis kuv thiaj li rov thim xav thiab tso siab rau Yehauvas thiab nws lub koom haum dua.” Muaj dab tsi pab tau Nplooj thim xav?

⁹ Nplooj thiaj li kho nws tej kev xav. Nws hais tias: “Thaum kuv tseem yog ib tug txwj  laus, kuv siv nqe Vajlugkub ntawm Henplais 12:7 los mus pab lwm tus ua zoo xav txog tej Yehauvas qhuab ntuas. Tam sim no kuv rov nug kuv tus kheej hais tias, ‘Leej twg yuav tau coj yam li nqe Vajlugkub no?’ Tag nrho Yehauvas cov tib neeg thiab kuv.” Yog li ntawd, Nplooj thiaj li hloov nws tus cwj pwm xwv nws thiaj li tso siab rau Yehauvas thiab Yehauvas lub koom haum. Nws nyeem phau Vajlugkub ntau dua qub thiab lauj sij hawm los ua zoo xav txog tej nws nyeem ntawd. Txawm nws txhawj nyob tsam cov kwv tij nkauj muam xav phem txog nws los, nws kub siab lug mus qhia txoj xov zoo thiab tsa tes teb thaum sawv daws tuaj sib txoos ua ke. Ib ntus tom qab no, Nplooj rais rov qab los ua ib tug txwj laus lawm. Yog peb raug ntuas ib yam li Nplooj, tsis txhob xav txog tias yuav ua rau peb poob ntsej muag tiam sis cia li txais yuav tej lus ntuas thiab hloov los coj li tau ntuas ntawd. (Pajlug 8:33; 22:4) Yog peb coj yam li no, Yehauvas yuav foom koob hmoov rau peb.

10. Tej uas Yehauvas hloov sim tau cov txiv neej Ixayees txoj kev npuab siab li cas?

¹⁰ Tej uas hloov nyob hauv lub koom haum kuj sim tau peb txoj kev ntseeg. Yog peb tsis ceev faj, yuav muab peb thiab Yehauvas sib cais. Xws li ua ntej Yehauvas muab nws Txoj Cai rau cov txiv tsev coj, lawv yuav tau coj ib yam li cov pov thawj coj. Lawv yuav tau teeb thaj thiab tua tsiaj xyeem rau Yehauvas. (Chivkeeb 8:20, 21; 12:7; 26:25; 35:1, 6, 7; Yauj 1:5) Thaum Yehauvas muab Mauxes Txoj Kev Cai los hloov txhua yam lawm, cov txiv tsev tsis tau ua li yav tag los lawm. Yehauvas xaiv Aloos tsev neeg los ua cov pov thawj tua tsiaj xyeem. Yog ib tug txiv tsev twg tsis yog Aloos caj ces es cia li mus tua tsiaj xyeem ces nws yuav tau saws lub txim tuag. c (Levis Kevcai 17:3-6, 8, 9) Puas yog vim li no es Kaulas, Dathas, Anpilas, thiab 250 tus thawj coj thiaj sawv tawm tsam Mauxes thiab Aloos nkawd? (Teev Npe 16:1-3) Peb paub tsis tseeb. Txawm li cas los xij peem, peb paub hais tias Kaulas thiab cov txiv neej uas nrog nws tsis npuab siab rau Yehauvas. Yog hais tias muaj tej yam nyob hauv lub koom haum uas Yehauvas hloov es sim peb txoj kev ntseeg, peb yuav ua li cas?

11. Peb khaws tau li cas los ntawm cuab Kauhas?

¹¹ Txhawb nqa tej yam uas tau muab hloov hauv lub koom haum. Lub caij uas cov Ixayees nyob rau ntawm tiaj suab puam, thaum twg lawv yuav tshais chaw mus rau lwm qhov, cuab Kauhas yog cov yuav tau kwv lub phij xab uas ntim Vajtswv tej lus cog tseg ua sawv daws ntej. (Teev Npe 3:29, 31; 10:33; Yausuas 3:2-4) Lawv tau txais ib tes hauj lwm zoo kawg li. Thaum cov Ixayees los txog rau ntawm lub teb chaws uas Vajtswv cog tseg, lawv tsis tau kwv lub phij xab ua luaj twg lawm. Tom qab no thaum Xalaumoos sawv ua vaj ntxwv, ib txhia ntawm cuab Kauhas mus ua cov hu nkauj, ib txhia mus zov rooj loog, thiab ib txhia mus zov tej txhab ntim khoom noj. (1 Xwmtxheej Vajntxwv 6:31-33; 26:1, 24) Tsis muaj ntaub ntawv sau tseg hais tias lawv yuav yws los sis cav hais tias lawv tsim nyog ua tej hauj lwm zoo dua. Peb khaws tau tias cia li txaus siab hlo txhawb nqa tej yam uas Yehauvas lub koom haum hloov. Tej zaum yam uas hloov ntawd kuj yuav raug peb tes hauj lwm los kuj muaj. Kav tsij txaus siab rau tes hauj lwm uas muab cob rau peb. Nco ntsoov tias tsis yog peb  tes hauj lwm, ua rau peb muaj nuj nqis rau Yehauvas tiam sis qhov uas peb mloog Yehauvas lus tseem ceeb dua.​—1 Xamuyees 15:22.

12. Maiv Tooj xav li cas xwb thaum nws tsis tau tes hauj lwm nyob hauv Npe-ee ua lawm?

¹² Cia peb mus piav txog ib tug muam npe hu ua Maiv Tooj. Nws tau ua hauj lwm tshaj li 23 lub xyoos hauv Npe-ee ces nws txawm tau txais ib tes hauj lwm tshiab uas yog qhia Vajlugkub rau tib neeg. Nws hais tias: “Kuv ntseeg tsis tau li thaum kuv tes hauj lwm hloov lawm. Kuv saib yam li kuv twb tsis muaj nuj nqis dab tsi thiab kuv pheej xav tias, ‘Kuv tau ua qhov twg tsis yog?’” Tseem muaj ib txhia hauv lub koom txoos hais rau nws tias: “Yog koj ua hauj lwm zoo, lub koom haum haj tseem yuav koj.” Tau ib ntus ntev loo, Maiv Tooj ntxhov ntxhov siab thiab quaj txhua txhua hmo li. Tiam sis nws xav tias: “Kuv yeej paub tias Yehauvas hlub tshua kuv heev thiab kuv yeej tso siab plhuav rau Yehauvas lub koom haum.” Maiv Tooj tswj tau nws lub siab li cas?

13. Maiv Tooj tau ua li cas xwv nws thiaj tsis xav qhov phem?

¹³ Maiv Tooj mus nyeem tej ntaub ntawv uas lub koom haum luam tawm los pab nws. Xws li nws tshawb tau ib zaj uas hais txog Malakaus tus sau ib phau ntawv hauv phau Vajlugkub. Thaum Malakaus tes hauj lwm hloov, tej zaud nws kuj xav tsis thoob li. Maiv Tooj hais tias, “Nyeem txog Malakaus tus yam ntxwv mas zoo yam li hauv tshuaj kho tau kom kuv tsis txhob qaug zog.” Tsis tas li ntawd, Maiv Tooj kuj niaj hnub nrog cov kwv tij nkauj muam ua ke thiab tsis xav ntev xav ntau txog tej nws tsis tau lawm. Maiv Tooj xaus lus tias Yehauvas yeej siv lub hwj huam dawb huv los pab Yehauvas lub koom haum txiav txim siab thaum ua ib yam twg thiab cov kwv tij uas saib xyuas ntawd yeej hmov tshua nws kawg li. Ntxiv ntawd, nws xam pom tias Yehauvas lub koom haum tsuas ua qhov zoo kom Yehauvas tes hauj lwm tiav xwb.

14. Yam twg nyuaj rau Vaj hloov thiab dab tsi ho pab tau nws?

¹⁴ Muaj ib tug txwj laus hnub nyoog 73 xyoos nyob rau hauv tebchaws Xalauvenia (Slovenia) npe hu ua Vaj. Thaum muab nws lub koom txoos mus xyaw lwm lub koom txoos thiab lub Tsev Nceeg Vaj uas nws ib txwm mus kaw tseg cia lawm, nws hais tias: “Kuv tsis nkag siab vim li cas ho muab tej lub  Tsev Nceeg Vaj zoo zoo nkauj li no kaw tseg cia. Mob kuv siab kawg vim peb nyuam qhuav muab lub tsev no kho dua tshiab. Kuv yog ib tug uas txawj txua rooj tog, kuv thiaj li pab txua ib txhia rooj tog nyob rau hauv. Tsis tas li ntawd, qhov uas yuav mus sib txuam nrog lwm lub koom txoos yeej tsis yooj yim kiag li rau peb cov laus.” Yog li ntawd, thiaj li muaj dab tsi pab tau Vaj thim xav? Nws hais tias: “Yoog tej yam uas Yehauvas lub koom haum hloov yeej tau koob hmoov tiag. Tej no tsuas yog npaj peb rau tej yam uas yuav hloov tom ntej.” Ua li puas nyuaj rau koj hloov thaum koj lub koom txoos mus koom nrog lwm lub los sis koj tes hauj lwm hauv lub koom haum ho hloov lawm? Nco ntsoov tias Yehauvas yeej paub tej uas koj lub siab xav. Thaum koj txhawb nqa tej yam uas tau hloov no, nrog nraim Yehauvas thiab nws koom haum ces koj yuav tau txais koob hmoov.​—Phau Ntawv Nkauj 18:25.

15. Peb yuav tswj peb lub siab li cas thaum raug sim hauv lub koom txoos?

¹⁵ Thaum lub sim ceeb no yuav kawg, peb paub hais tias peb yeej yuav raug sim heev hauv lub koom txoos. Tej no yuav sim tau peb txoj kev ntseeg rau Yehauvas. Yog li ntawd, tswj peb lub siab tiag. Yog ib tug ntseeg twg ua rau peb chim siab, tsis txhob cib nyeej. Yog peb raug qhuab ntuas, tsis txhob txaj muag tiam sis cia li mloog tej lus qhuab ntuas thiab hloov raws li tej lus ntuas ntawd. Yog tias Yehauvas lub koom haum hloov li cas lawm es ho raug rau peb, cia li txaus siab thiab yoog raws li lub koom haum qhia.

16. Yuav ua li cas koj thiaj li tso siab rau Yehauvas thiab nws lub koom haum?

¹⁶ Koj yeej tso siab tau rau Yehauvas thiab nws lub koom haum thaum raug sim. Yuav kom koj ua tau li no, koj yuav tau tswj koj lub siab, ua siab tus, mam xav mam hais, thiab tshuaj ntsuas seb Yehauvas pom zoo li cas. Mus nyeem txog tej tug uas raug ib yam li koj raug hauv phau Vajlugkub thiab ua tib zoo xav txog seb lawv thev dhau li cas. Thov Yehauvas pab koj thiab tsis txhob nyob twm zeej. Yog koj coj li no, Xatas thiaj yuav cais tsis tau koj ntawm Yehauvas thiab Nws lub koom haum.​—Yakaunpaus 4:7.