1-2. (1) Peb yuav mus piav txog cov lus nug twg? (2) Muaj dab tsi qhia tias Yehauvas tos nrhw yuav pab peb?

 YEHAUVAS pab peb thev peb tej kev nyuaj siab xwv peb thiaj muaj kev kaj siab thiab muaj siab ua nws tes hauj lwm. Nyob rau hauv zaj kawm no, peb yuav mus piav txog tias: Yehauvas puas muaj lub siab xav pab peb tiag? Yehauvas yuav pab peb rau txoj ke twg? Peb yuav tau ua li cas xwv Yehauvas tej kev pab thiaj pab tau peb?

² Muaj ib lo lus uas tus tub txib Paulus sau hauv nws tsab ntawv xa mus rau cov ntseeg uas yog neeg Henplais, yuav pab kom peb nkag siab tias Yehauvas yeej muaj siab pab peb tiag. Paulus sau tias: “[Yehauvas] yog tus uas pab kuv, kuv yuav tsis ntshai. Leejtwg yuav ua li cas tau rau kuv?” (Henplais 13:6) Muaj ntau phau ntawv uas hais txog phau Vajlugkub hais tias lo lus “tus uas pab” hauv nqe no yog hais txog ib tug neeg uas dhia mus pab ib tug uas quaj taug laws. Yehauvas los yeej tos nrhw yuav pab ib tug muaj kev nyuaj siab thiab nws yeej txaus siab hlo pab. Yog muaj Yehauvas nyob rau peb tog ces peb yuav thev taus txhua yam kev sim siab thiab nyob kaj siab lug.

3. Muaj peb yam Yehauvas pab kom peb thev taus kev sim siab thiab nyob kaj siab lug yog dab tsi?

³ Cia peb mus saib phau ntawv Yaxayas seb Yehauvas tau ua dab tsi los pab peb. Yaxayas tau sau ntau zaj lus faj lem uas yuav pab tau Yehauvas cov tib neeg niaj hnub niam no. Tsis tas li ntawd, Yaxayas siv tej lus yooj yooj yim los piav txog Yehauvas xwv peb thiaj nkag siab. Xws li Yaxayas tshooj 30, nws siv lus piv txwv los mus piav txog qhov uas Yehauvas pab Nws cov tibneeg li cas rau li cas. Yaxayas sau tias qhov uas Yehauvas  pab peb yog (1) nws mloog thiab teb peb tej lus thov, (2) nws qhia seb txoj hau kev twg thiaj zoo, thiab (3) nws foom koob hmoov rau peb tam sim no thiab yav tom ntej. Cia peb ua zoo soj ntsuas peb yam uas Yehauvas pab peb no.

4. (1) Yehauvas piav li cas txog cov Yudais uas nyob rau Yaxayas tiam, thiab nws cia dab tsi muaj tshwm sim? (2) Yehauvas muab txoj kev cia siab twg rau cov mloog nws lus? (Yaxayas 30:18, 19)

⁴ Nyob rau thawj nqe hauv Yaxayas tshooj 30, Yehauvas hu cov neeg Yudais tias cov neeg tawv ncauj, tsuas pom “tsub kev txhaum ntxiv zuj zus.” Nws hais ntxiv tias: “Lawv yog cov neeg ntxeev siab . . . uas tsis mloog [Yehauvas] tej lus qhuab qhia.” (Yaxayas 30:1, 9) Vim lawv txoj ke tsis mloog lus, Yaxayas thiaj tau sau tias Yehauvas yuav cia lawv raug tej sub tawg sub ntsha. (Yaxayas 30:5, 17; Yelemis 25:8-11) Lawv thiaj li poob mus ua cev qhev rau cov neeg Npanpiloos. Tsis tas li ntawd, kuj muaj cov neeg Yudais uas mloog Yehauvas lus. Yaxayas kuj tau hais rau lawv tias ib hnub qab nram lub ntsis Yehauvas yuav cia lawv rov qab los nyob lawv tej qub teb qub chaw. (Nyeem Yaxayas 30:18, 19.) Yehauvas hais tias nws “tos ntev loo yuav foom koob hmoov rau” lawv, vim lawv yuav tau ua qhev 70 xyoo rau Npanpiloos ua ntej nws tso lawv rov qab los nyob hauv Yeluxalees dua. (Yaxayas 10:21; Yelemis 29:10) Thaum lawv rov qab los txog vaj txog tsev, lawv tej kua muag iab kua muag daw ntxeev mus ua tej kua muag luag lis ntxhi.

5. Cov lus nyob hauv Yaxayas 30:19 txhawb tau peb lub zog li cas?

⁵ Niaj hnub niam no, thaum peb hnov cov lus uas hais tias: “Nws hnov koj lub suab quaj quaj,” mas txhawb tau peb lub zog heev. (Yaxayas 30:19) Nqe no, Yaxayas qhia rau peb tias Yehauvas yeej mloog ntsoov thaum peb quaj hu txog nws thiab nws yuav maj ceev nrooj los pab peb. Yaxayas hais ntxiv li no tias: “Nws nyuam qhuav hnov koj, nws yuav teb rau koj sai.” Cov lus no txhawb kom peb nco ntsoov tias peb Txiv Yehauvas yeej txaus siab hlo thiab tos tsis hnyu los mus pab peb thaum peb thov hu txog nws. Qhov uas peb paub li no yuav pab rau peb thev txhua yam thiab nyob kaj siab lug.

6. Raws li Yaxayas cov lus, ua li cas peb ho paub tias Yehauvas mloog ib tug dhau ib tug tej lus thov?

⁶ Yehauvas ua tib zoo mloog peb ib tug dhau ib tug tej lus thov. Vim li cas peb ho hais tau li ntawd? Thawj cov lus uas nyob rau Yaxayas tshooj 30, siv lo lus “lawv” vim Yehauvas hais rau ib pawg tib neeg. Tiam sis nyob rau ntawm nqe 19, Yehauvas siv lo lus “koj” vim nws hais rau ib tug tib neeg dhau ib tug tib neeg. Yaxayas sau tias: “Tsis tas koj yuav quaj ntxiv”; “nws hnov koj lub suab quaj quaj”; “nws yuav teb rau koj sai.” Yehauvas yog ib Leej Txiv uas muaj kev hlub heev, nws yeej yuav tsis hais rau nws ib tug tub los sis ib tug ntxhais uas puas siab puas ntsws tas tias, “Cas koj tsis zoo li koj tus tij laug los sis tus muam?” Tos nws tsis muab ib tug piv dhau ib tug yeeb vim yog nws hlub tshua peb heev thiab nws ua tib zoo mloog peb ib tug dhau ib tug tej lus thov.​—Phau Ntawv Nkauj 116:1; Yaxayas 57:15.

7. Yaxayas thiab Yexus nkawd tau hais li cas xwv peb thiaj paub tias peb yuav tau thov tas zaj tas zog?

⁷ Thaum peb thov Yehauvas txog peb tej kev txhawj xeeb, tej zaud nws yuav pub lub dag lub zog kom peb thev taus. Tiam sis yog peb tej kev txhawj xeeb ntawd tsis tau ploj raws li peb lub siab xav, peb yuav tau thov Yehauvas tas zaj tas zog kom peb thiaj li thev taus. Tsis tas li ntawd, Yehauvas kuj xav kom peb kub siab lug thov nws. Yaxayas thiaj li tau hais tias: “Tsis txhob cia [Yehauvas] so.” (Yaxayas 62:7) Yaxayas tus nru lus yog kom peb thov  tas zaj tas zog yam li peb twb tsis cia Yehauvas tau chaw so. Yaxayas cov lus kuj ua rau peb nco txog Yexus cov lus piv txwv uas hais txog kev thov nyob rau hauv Lukas 11:8-10, 13. Yexus txhawb kom peb “pheej thov tsis paub txajmuag li” thiab yeej meem thov kom Vajtswv muab nws lub hwj huam dawb huv los pab peb. Peb kuj taij thov tau Yehauvas pab kom peb txawj txiav txim siab thaum yuav ua ib yam twg xwv peb thiaj ua tau qhov yog.

8. Cov lus nyob hauv Yaxayas 30:20, 21 muaj tshwm sim li cas puag txheej thaum ub?

⁸ Nyeem Yaxayas 30:20, 21. Thaum cov tub rog Npanpiloos tuaj vij lub nroog Yeluxalees tau ib xyoos ntau, cov neeg Yudais ntxhov siab kawg nkaus li. Tiam sis raws li nqe 20 thiab 21, Yehauvas cog lus rau cov Yudais tias yog lawv tso lawv tej kev txhaum tseg thiab hloov lawv tus cwj pwm ces nws yuav cawm lawv. Yaxayas hais rau cov tib neeg tias Yehauvas uas yog lawv “tus Xibhwb” yuav qhia kom lawv teev tiam tau raws li Nws lub siab nyiam. Cov lus no muaj tiav rau thaum cov Yudais dim txoj kev ua cev qhev. Yehauvas yog lawv tus Xib Hwb thiab nws coj lawv txoj hau kev, nws cov tib neeg thiaj tau rov los teev tiam nws. Peb yeej zoo siab kawg li tias muaj Yehauvas ua peb tus Xib Hwb uas ntse tshaj plaws niaj hnub niam no thiab.

9. Muaj ib txoj hau kev niaj hnub niam no uas Yehauvas coj nws cov tib neeg yog li cas?

⁹ Yaxayas piav tias peb zoo li cov tub ntxhais kawm ntawv uas Yehauvas siv ob txoj hau kev los cob qhia. Thawj txoj hau kev, Yaxayas hais tias: “Nej lub qhovmuag yuav pom nws.” Nyob rau zaj lus piv txwv no, Yaxayas hais tias tus Xib Hwb sawv ntsug ntawm cov tub ntxhais kawm ntawv hauv ntej. Peb txaus siab kawg nkaus li tias Yehauvas yog tus cob qhia peb niaj hnub niam no. Ua li Yehauvas ho cob qhia peb li cas? Nws siv nws lub koom haum los cob qhia peb. Peb ris txiaj ntsig kawg li rau tej lus uas nws lub koom haum tau qhia meej meej tuaj rau peb. Xws li tej lus hais nyob rau hauv lub koom txoos, tej rooj sib txoos, tej ntaub ntawv, Yehauvas Cov Tim Khawv Tshooj TV, thiab lwm yam uas piav tsis txhij tsis txhua, puav leej pab kom peb thev taus txhua yam peb raug thiab muaj kev kaj siab.

10. Peb hnov “lub suab hu tom qab tuaj” tau li cas?

¹⁰ Txoj ob uas Yaxayas hais tias Yehauvas cob qhia peb yog: “Nej yuav hnov nws lub suab hu tom qab tuaj.” Yaxayas piav tias Yehauvas zoo yam nkaus li tus xib hwb uas lawv  nws cov tub ntxhais kawm ntawv qab thiab hais lus qhia tias yuav mus li cas rau li cas thiaj yog. Niaj hnub niam no peb yeej hnov Vajtswv lub suab hu tom peb qub qab tuaj. Nws lub suab hu li cas? Vajtswv cov lus tau muab sau ntev ntev lawm tseg cia rau hauv phau Vajlugkub. Thaum peb nyeem phau Vajlugkub, zoo yam nkaus li peb hnov Vajtswv lub suab hu tom peb qub qab tuaj.​—Yaxayas 51:4.

11. Yuav kom peb thev taus thiab muaj kev kaj siab, peb yuav tau ua li cas thiab vim li cas peb yuav tau ua li ntawd?

¹¹ Yuav kom peb khaws tau tej lus uas Yehauvas lub koom haum thiab nws Txoj Lus qhia, cia peb mus saib ob txog ke uas Yaxayas tau qhia tseg rau peb. Thawj qhov nws hais tias, “txojkev tseeb yog txoj no.” Ces qhov ob nws hais ntxiv tias, “cia li taug txoj no ntag.” (Yaxayas 30:21) Yog peb paub tias txoj kev twg yog “txojkev tseeb” xwb, zoo tsis txaus. Peb yuav tsum tau “taug” kiag txoj kev ntawd. Yehauvas Txoj Lus thiab nws lub koom haum cob qhia tej yam uas Yehauvas xav kom peb ua. Tsis tas li ntawd, peb kuj tau kawm seb yuav tau muab siv li cas rau hauv peb lub neej. Yuav kom peb thev taus thiab muaj kev kaj siab teev tiam Yehauvas, peb yuav tau ua raws li ob yam uas hais tas no. Yog peb coj raws li tej peb tau kawm ces Yehauvas yuav foom koob hmoov rau peb.

12. Raws li Yaxayas 30:23-26, Yehauvas foom koob hmoov rau nws cov tib neeg li cas?

¹² Nyeem Yaxayas 30:23-26. Zaj lus faj lem no muaj xaus li cas rau cov neeg Yudais thaum lawv rov qab tim Npanpiloos los nyob rau lawv qub teb qub chaw? Yehauvas tau muab ntau ntau yam los pab lawv ua neej, xws li nws pub kom lawv muaj noj muaj haus. Tiam sis qhov tseem ceeb tshaj, nws pub kom lawv nrog nws sib raug zoo thiab teev tiam nws li nws lub siab nyiam. Vajtswv cov tib neeg nyob rau tiam ntawd tsis tau pom ib yam zoo npaum li nws pub rau lawv zaum no. Nqe 26 qhia tias Yehauvas pab lawv nkag siab nws Txoj Lus tshaj li yav tag lawm. (Yaxayas 60:2) Yehauvas tej koob hmoov pab tau nws cov tib neeg muaj kev “zoo siab” lawv thiaj li kub siab lug teev tiam nws thiab muaj kev kaj siab.​—Yaxayas 65:14.

13. Zaj lus faj lem uas txhim kho kev teev tiam Yehauvas muaj tshwm sim li cas rau peb niaj hnub no?

¹³ Zaj lus faj lem uas txhim kho kev teev tiam Yehauvas yeej muaj tshwm sim rau peb tib yam nkaus. Txij ntua xyoo 1919 tom qab Yexus yug, muaj qas txhiab qas vam tus tib neeg dim ntawm lub nroog Npanpiloos uas loj tshaj plaws uas yog txhua txoj kev ntseeg cuav. Cov tib neeg no dim plaws los nyob ib qho chaw  zoo tshaj li lub teb chaws Vajtswv cog tseg rau cov Ixayees. Lawv thooj siab koom ntsws teev tiam Yehauvas ua ke yam li lawv nyob rau hauv lub vaj kaj siab ntawm sab kev ntseeg. (Yaxayas 51:3; 66:8) Lub vaj kaj siab ntawm sab kev ntseeg ntawd yog li cas tiag?

14. Lub vaj kaj siab ntawm sab kev ntseeg yog li cas tiag, thiab niam no leej twg thiaj nyob rau hauv? (Mus saib Txhais Tawm.)

¹⁴ Txij ntua xyoo 1919 tom qab Yexus yug, cov xaiv tseg twb nyob rau hauv lub vaj kaj siab ntawm sab kev ntseeg lawm. b Ntev mus ntev tuaj, “muaj dua ib pab yaj” los sis lwm pab yaj uas yog cov muaj kev vam kev cia siab hauv ntiaj teb, kuj tau los nyob rau hauv lub vaj kaj siab ntawm sab kev ntseeg tib yam nkaus thiab lawv tau txais Yehauvas tej koob hmoov.​—Yauhas 10:16; Yaxayas 25:6; 65:13.

15. Lub vaj kaj siab ntawm sab kev ntseeg nyob qhov twg?

¹⁵ Cov uas teev tiam Yehauvas nyob thoob plaws lub ntiaj teb no. Yog li ntawd, lub vaj kaj siab ntawm sab kev ntseeg thiaj li nyob thoob plaws hauv ntiaj teb no. Niaj hnub niam no txawm peb yuav nyob rooj teb twg los xij, yog peb kub siab lug teev tiam Yehauvas ces peb thiaj nyob tau rau hauv lub vaj kaj siab ntawm sab kev ntseeg.

16. Yuav ua li cas peb thiaj pom lub vaj kaj siab ntawm sab kev ntseeg zoo nkauj?

¹⁶ Yuav kom peb nyob rau hauv lub vaj kaj siab ntawm sab kev ntseeg mus li, peb yuav tau ris txiaj ntsig tias peb muaj ib tsoom kwv tij nkauj muam ntseeg nyob thoob plaws hauv ntiaj teb no. Tsis tas li ntawd, peb yuav tau xam pom qhov zoo txog lawv. (Yauhas 17:20, 21) Vim li cas thiaj tseem ceeb rau peb ua li ntawd? Muab zaum tsaws xav li no tias thaum koj mus txog rau ib lub vaj zoo zoo nkauj, koj yeej pom txhua hom ntoo. Zoo tib yam li txhua hom ntoo, nyob rau hauv tej koom txoos los yeej muaj coob leej ntau tus ntseeg nyias zoo txawv nyias lawm ib yam. (Yaxayas 44:4; 61:3) Yog li ntawd, tsis txhob saib ib tug ntoo dhau ib tug ntoo tiam sis saib  ib koog hav zoov nuj txeeg. Peb yuav tau tsis txhob cia peb los sis lwm tus hauv lub koom txoos tej kev txaug kev txhaum plooj peb lub qhov muag txog tej yam zoo zoo ntawm peb ib tsoom kwv tij nkauj muam uas thooj siab koom ntsws teev tiam Yehauvas.

17. Peb ib leeg txhawb tau ib leeg li cas kom muaj kev sib koom siab hauv lub koom txoos?

¹⁷ Yuav kom peb muaj kev sib koom siab yog peb yuav tau muaj kev sib haum xeeb. (Mathais 5:9; Loos 12:18) Cia peb ua tus ntaus thawj hlo nrog lwm tus sib haum xeeb hauv lub koom txoos xwv thiaj ua tau rau lub vaj kaj siab ntawm sab kev ntseeg zoo nkauj. Nco ntsoov tias Yehauvas yog tus rub peb ib tug zuj zus los mus teev tiam nws. (Yauhas 6:44) Tej zaum Yehauvas yuav zoo siab kawg li thaum nws pom peb ib leeg txhawb ib leeg kom sib haum xeeb thiab sib koom siab.​—Yaxayas 26:3; Hakais 2:7.

18. Peb yuav tau zaum tsaws ua tib zoo xav txog dab tsi, thiab vim li cas peb ho yuav tau xav?

¹⁸ Yehauvas muab ntau yam zoo rau nws cov tib neeg. Yuav ua li cas tej ntawd thiaj tsav tau peb lub neej? Thaum peb kawm Vajtswv Txoj Lus thiab kawm tej ntaub ntawv lub koom haum luam tawm, peb yuav tau muab coj los ua tib zoo zaum tsaws xav kom tob tob. Yog peb ua li no, yuav pab kom peb txawj coj ib yam li ib tug ntseeg, ib leeg “hlub ib leeg” thiab “ib leeg hwm ib leeg” hauv lub koom txoos. (Loos 12:10) Yog peb xav txog tej koob hmoov peb tau tam sim no, yuav txhawb tau peb txoj kev sib raug zoo nrog Yehauvas. Tsis tas li ntawd, yog peb ua zoo zaum xav txog tej yam zoo uas Yehauvas cog lus yuav muab rau peb yav tom ntej ces peb yuav rau siab ntso teev tiam Yehauvas mus ib txhiab ib txhis. Txhua yam hais tas no yuav pab kom peb muaj siab kub lug teev tiam Yehauvas niaj hnub niam no.

19. (1) Raws li Yaxayas 30:18, peb paub tseeb li cas? (2) Dab tsi thiaj pab tau peb thev taus thiab muaj kev kaj siab?

¹⁹ Yehauvas yuav “los” pab peb thaum nws muab lub sim ceeb phem no rhuav tshem tawm mus. (Yaxayas 30:18) Peb tso siab plhuav rau Yehauvas uas yog “Vajtswv tus uas ncaj ncees” tias nws yuav tsis cia lub qab ntuj uas Xatas kav no nyob ntev tshaj li tsim nyog. (Yaxayas 25:9) Peb yuav ua siab ntev nrog Yehauvas tos txog hnub nws cawm peb dim. Cheem hnub ntawd tseem tsis tau los txog, cia peb rau siab ntso thov Yehauvas, kawm thiab muab nws Txoj Lus los siv rau hauv peb lub neej, thiab xav txog tej koob hmoov uas peb yuav tau. Yog peb ua li no, Yehauvas yuav pab kom peb thev taus thiab muaj kev zoo siab teev tiam nws.