1. Tus tub txib Povlauj xav li cas txog cov tub leg num?

 COV tub leg num ua ib txog hauj lwm tseem ceeb heev hauv tej koom txoos. Tus tub txib Povlauj yeej ris lawv txiaj ntsig kawg nkaus li. Xws li thaum nws sau rau cov Khixatias nyob hauv Filipis, nws kuj hais txog cov tub leg num nrog rau cov txwj laus.​—Filipis 1:1.

2. Kwv Tij Luis xav li cas txog qhov uas nws ua ib tug tub leg num?

² Txawm yuav laus yuav hluas los muaj coob leej ntau tus kwv tij yeej txaus siab ua ib tug tub leg num. Xws li Devees (Devan) ua ib tug tub leg num thaum nws muaj 18 xyoo hos Kwv Tij Lu-is (Luis) muaj 50 tawm xyoo thaum nws tau ua ib tug tub leg num. Kwv Tij Lu-is hais tias: “Kuv saib tam li yog ib qho koob hmoov uas tau los ua ib tug tub leg num. Cov kwv tij nkauj muam hauv lub koom txoos hlub kuv kawg li!”

3. Peb yuav tham txog cov lus nug twg?

³ Yog tias koj yog ib tug kwv tij uas twb ua kev cai raus dej lawm tiam sis tseem tsis tau yog ib tug tub leg num, koj puas npaj siab kom tau ua ib tug? Dab tsi thiaj yuav pab tau kom koj muaj lub siab xav ua? Koj yuav tau coj raws li tej yam twg hauv phau Vajlugkub koj thiaj ua tau ib tug tub leg num? Nyob rau hauv zaj kawm no peb yuav teb cov lus nug no. Cia peb mus tham ua ntej seb ib tug tub leg num tes hauj lwm yog li cas rau li cas.

 IB TUG TUB LEG NUM TES HAUJ LWM

4. Ib tug tub leg num tes hauj lwm yog li cas? (Saib daim duab.)

⁴ Ib tug tub leg num yog ib tug kwv tij uas twb ua kev cai raus dej lawm thiab lub hwj huam dawb huv xaiv nws los pab cov txwj laus tuav hauj lwm hauv lub koom txoos. Cov tub leg num ib txhia saib xyuas kom cov tshaj tawm muaj ntaub ntawv siv thiab muaj tej koog mus qhia. Hos ib txhia pab tu thiab kho lub Tsev Nceeg Vaj. Thaum tuaj sib txoos ua ke, cov tub leg num kuj ua cov tub ncig num, ua cov tso suab thiab yeeb yaj kiab. Cov tub leg num yeej muaj kev ntseeg, hlub Yehauvas thiab ua lub neej raws li Yehauvas tej kev cai. Tsis tas li ntawd, lawv kuj hlub cov kwv tij nkauj muam heev. (Mathais 22:37-39) Yuav ua li cas ib tug kwv tij uas twb ua kev cai raus dej lawm thiaj ua tau ib tug tub leg num?

5. Ib tug kwv tij yuav tau ua li cas xwv nws thiaj ua tau ib tug tub leg num?

⁵ Nyob hauv phau Vajlugkub qhia txog tej yam uas yuav pab kom ib tug kwv tij ua tau ib tug tub leg num. (1 Timautes 3:8-10, 12, 13) Zoo rau koj ua tib zoo kawm cov nqe Vajlugkub ntawd thiab sib zog ntsos muab siv rau hauv koj lub neej. Tiam sis koj yuav tau ua tib zoo xav seb vim li cas koj thiaj xav ua ib tug tub leg num.

VIM LI CAS KOJ HO XAV PAB?

6. Vim li cas koj ho xav pab cov kwv tij nkauj muam? (Mathais 20:28; saib daim duab ntawm lub khaum.)

⁶ Txhua yam uas Yexus ua yog vim nws hlub nws Txiv thiab tib neeg. Txoj kev hlub no ua rau nws sib zog ua hauj lwm thiab nws txaus siab hlo ua tej hauj lwm qis qis. (Nyeem Mathais 20:28; Yauhas 13:5, 14, 15) Zoo tib yam li ntawd, yog koj pab vim koj hlub Yehauvas thiab tib neeg ces Yehauvas yuav foom koob hmoov thiab yuav pab kom koj ua tau ib tug tub leg num.​—1 Kauleethaus 16:14; 1 Petus 5:5.

7. Vim li cas tsis zoo rau ib tug kwv tij xav ua ib tug tub leg num kom lwm tus qhuas nws?

⁷ Tej tib neeg hauv ntiaj teb no tsuas qhuas cov tib neeg uas tuav hauj lwm siab. Tiam sis Yehauvas cov tib neeg tsis coj yam li ntawd. Ib tug kwv tij uas muaj kev hlub yam li Yexus tsis tsav nws lub meej mom, tswj lwm cov los sis xav kom lwm tus saib nws tsim txiaj dua. Yog muab ib tug kwv tij zoo li no tsa los tuav hauj  lwm hauv lub koom txoos ces nws yuav tsis kam txo hwj chim ua tej hauj lwm qis qis vim nws xav tias tej hauj lwm ntawd tsis tsim nyog rau nws ua. (Yauhas 10:12) Yehauvas yuav tsis foom koob hmoov rau tus uas tsav hwj chim los sis saib nws tsim txiaj dua.​—1 Kauleethaus 10:24, 33; 13:4, 5.

8. Yexus ntuas nws cov tub txib li cas?

⁸ Muaj qee zaug Yexus cov phooj ywg xav tau ntsej muag thiab xav tuav hauj lwm siab. Xws li tus tub txib Yakaunpaus thiab Yauhas nkawd xav kom Yexus muab ob qho chaw zoo zoo rau nkawd thaum Yexus kav lub Nceeg Vaj. Yexus tsis qhuas tias nkawd muaj peev xwm los nug nws li ntawd. Tiam sis Yexus hu 12 tug thwj tim los nyob ua ke thiab hais rau lawv tias: “Yog nej leej twg xav ua tus loj, tus ntawd yuav tsum ua nej tus tub txib. Thiab tus uas xav ua nej tus thawj, tus ntawd yuav tsum ua sawv daws tus qhev.” (Malakaus 10:35-37, 43, 44) Yog li ntawd, cov kwv tij uas xav ua tub leg num vim lawv muaj lub siab xav pab lwm tus mas yeej pab tau lawv lub koom txoos tiag tiag li.​—1 Thexalaunikes 2:8.

YUAV UA LI CAS KOJ THIAJ MUAJ LUB SIAB XAV PAB?

9. Yuav ua li cas koj thiaj muaj lub siab xav ua ib tug tub leg num?

⁹ Koj yeej hlub Yehauvas thiab muaj lub siab xav pab lwm tus tiam sis koj ho tsis muaj siab xav ua tes hauj lwm uas ib tug tub leg num ua. Yuav ua li cas koj thiaj muaj lub siab xav pab ua tes hauj lwm no? Ua zoo xav tias thaum koj pab cov kwv tij nkauj muam tag, yuav ua rau koj muaj kev zoo siab heev. Yexus hais tias: “Thaum yus pub rau luag, yus zoo siab dua li thaum luag pub rau yus.” (Tes Hauj Lwm 20:35) Yexus tsis yog lam hais ntawm lub ncauj xwb tiam sis nws yeej ua li nws hais. Nws muaj kev zoo siab heev thaum nws pab lwm tus. Yog koj ua yam li nws ces koj yuav muaj kev zoo siab tib yam nkaus.

10. Yexus ua qhia li cas tias nws txaus siab hlo pab lwm tus? (Malakaus 6:31-34)

¹⁰ Cia peb mus tham txog ib lub sij hawm uas Yexus txaus siab hlo pab lwm tus. (Nyeem Malakaus 6:31-34.) Nyob rau lub caij ntawd, Yexus thiab nws cov tub txib sab sab lim lim. Lawv thiaj mus rau ib qho chaw uas tsis muaj neeg kom lawv thiab tau so me ntsis. Tiam sis txawm siv muaj neeg coob heev tuaj nyob tos lawv ua ntej lawm thiab cia siab tias Yexus yuav muab lus los qhuab qhia lawv. Yog Yexus tsis kam los yeej tau vim Yexus lawv “twb tsis khoom noj mov li.” Los sis yog Yexus xav qhia ib ob qho rau lawv xwb los tau tiam sis vim nws hlub lawv heev, nws “thiaj qhia ntau yam rau lawv mloog.” Nws haj tseem qhia lawv mus txog ntua thaum “twb lig lig lawm.” (Malakaus 6:35) Tsis yog Yexus ua vim nws yuav tsum tau ua tiam sis nws xav qhia lawv vim nws “hlub lawv kawg li.” Qhov uas pab lwm tus ua rau nws zoo siab heev.

11. Yexus pab tib neeg li cas? (Saib daim duab.)

¹¹ Yexus tsis yog qhia Vajtswv rau tib neeg xwb tiam sis nws kuj pab tib neeg rau ntau txoj hau kev. Nws ua txuj ci kom muaj zaub muaj mov ces nws thiaj hais kom nws cov thwj tim coj mus faib rau cov tib neeg. (Malakaus 6:41) Qhov uas nws cia lawv coj mus faib rau sawv daws ntawd cob qhia kom nws cov thwj tim txawj tiam lwm tus thiab nws xav kom lawv paub tias lawv tes hauj lwm tseem ceeb heev. Zoo ib yam li ntawd, cov tub leg num tes hauj lwm los yeej tseem ceeb kawg nkaus li. Thaum ntawd cov tub txib pab Yexus faib zaub faib mov rau cov tib neeg “noj tsau npo” mas ntshe lawv zoo siab kawg nkaus li! (Malakaus 6:42) Zaum no tsis yog thawj zaug uas Yexus pab tib neeg xwb tiam sis nws siv tag  nrho nws lub neej los pab. (Mathais 4:23; 8:16) Yexus txaus siab hlo qhia lwm tus thiab saib kom lawv muaj txawm peem. Koj los yeej yuav muaj kev zoo siab thiab, yog tias koj tau rais los ua ib tug tub leg num.

12. Vim li cas tsis zoo rau peb xav tias peb ua tsis tau dab tsi los pab lub koom txoos?

¹² Yog tias koj xav tias koj tsis txawj dab tsi, tsis txhob rawm maj tag kev cia siab. Koj yeej yuav tsum muaj ib yam uas koj pab tau lub koom txoos. Ua zoo muab Povlauj cov lus hauv 1 Kauleethaus 12:12-30 coj los ua tib zoo xav ces tom qab ntawd thov Yehauvas pab koj muab siv rau hauv koj lub neej. Povlauj yeej hais meej tseeb tias koj muaj nuj nqis heev hauv lub koom txoos. Yog tias koj tseem tsis tau yog ib tug tub leg num vim tseem tshuav qho yam koj yuav tau kawm tso los tsis txhob rawm maj tso tseg. Cia li kav tsij ua npaum li koj ua tau los teev tiam Yehauvas thiab pab cov kwv tij. Cov txwj laus yeej yuav xav txog koj thiab lawv kuj yuav muab tej hauj lwm koj ua tau rau koj ua.​—Loos 12:4-8.

13. Tej yeeb yam uas ib tug tub leg num yuav tsum muaj yog dab tsi?

¹³ Muab ua tib zoo xav li no tias: Tej yeeb yam hauv phau Vajlugkub uas cov tub leg num yuav tsum muaj kuj yog tej yam uas txhua tus Khixatias yuav tsum muaj thiab. Txhua tus Khixatias yuav tsum nrog Yehauvas sib raug zoo, txaus siab pab lwm tus, thiab coj lub neej uas haum Yehauvas siab. Yog koj coj li no ces koj twb coj tau tej yeeb yam uas ib tug tub leg num yuav tau coj lawm. Ua li ib tug kwv tij yuav tau ua dab tsi nws thiaj ua tau ib tug tub leg num?

KOJ YUAV TAU UA DAB TSI?

14. “Muaj tus cwjpwm zoo thiab sawvdaws hwm” yog li cas tiag? (1 Timautes 3:8-10, 12)

¹⁴ Cia peb mus tham txog tej yam cov tub leg num yuav tsum tau ua nyob rau hauv 1 Timautes 3:8-10, 12. (Nyeem.) Ib tug tub leg num yuav tsum “muaj tus cwjpwm zoo thiab sawvdaws hwm.” Qhov no tsis yog hais tias tsis pub yus tso dag tso luag los sis muaj kev lom zem li. (Tej Lus Qhia 3:1, 4) Tiam sis yog leej twg muab ib teg hauj lwm rau koj los koj yuav tau ua kom tiav. Yog tias luag tso siab tau rau koj ces cov uas nyob hauv lub koom txoos yeej yuav hwm koj.

15. “Tsis ntau ncauj” thiab “tsis ntshaw nyiaj” yog li cas tiag?

¹⁵ “Tsis ntau ncauj” yog koj coj ncaj, hais lus  tseeb, thiab tso siab tau rau. Koj hais li cas koj yeej ua li ntawd thiab koj tsis dag lwm tus. (Pajlug 3:32) “Tsis ntshaw nyiaj” yog koj coj ncaj thaum ua lag luam thiab thaum muab nyiaj rau koj ceev cia. Koj tsis siv cov kwv tij nkauj muam hauv lub koom txoos kom tau nyiaj tau txiaj.

16. (1) “Tsis quav cawv” yog li cas tiag? (2) ”Muaj lub siab ncaj ncees” yog li cas tiag?

¹⁶ “Tsis quav cawv” yog koj tsis haus dej caw ntau ntau los sis luag tsis cav txog koj lub moo tias koj yog ib tug neeg haus cawv ntau ntau. “Muaj lub siab ncaj ncees” yog koj coj lub neej raws li Yehauvas tej kev cai. Tab txawm koj yog noob txaug neeg txhaum los vim koj muaj ib txoj kev sib raug zoo nrog Yehauvas, koj muaj lub siab tus.

17. “Yuav tsum xub sim lawv tso” yog li cas tiag? (1 Timautes 3:10; saib daim duab.)

¹⁷ “Yuav tsum xub sim lawv tso” yog cov txwj laus pom hais tias koj yeej ua tej hauj lwm uas lawv muab tso rau koj thiab koj yog ib tug uas tso siab tau rau. Thaum cov txwj laus muab ib tes hauj lwm dab tsi rau koj, ua tib zoo ua raws li lawv qhia thiab coj raws li Yehauvas lub koom haum qhia. Koj yuav tsum nkag siab tej uas lawv muab tso rau koj thiab seb thaum twg koj yuav tau ua kom tiav. Yog koj mob siab ua koj tes hauj lwm ces cov kwv tij nkauj muam yuav pom tias koj yog ib tug neeg ua qhov twg los yeej ua tiav. Cov txwj laus yuav tau nco ntsoov cob qhia cov kwv tij uas twb ua kev cai raus dej lawm. (Nyeem 1 Timautes 3:10.) Nyob hauv koj lub koom txoos, puas muaj cov kwv tij hluas uas twb ua kev cai raus dej lawm? Lawv puas nquag kawm Vajlugkub rau lawv tus kheej thiab npaj rau tej kev sib txoos? Lawv puas nquag teb tom kev sib txoos thiab mus tshaj tawm txoj xov zoo? Yog muaj tej tug zoo yam li no, tsis txhob ua siab deb, muab hauj lwm raws li lawv lub hnub nyoog tso rau lawv ua xwv thiaj yuav “sim lawv tso.” Ces thaum lawv teeb teeb ib tug hluas lawm, lawv thiaj muaj cij fim los ua ib tug tub leg num.

18. Tsis muaj chaw thuam yog li cas tiag?

¹⁸ Nyob hauv cov nqe lus Kilis, 1 Timautes 3:10 qhia tias tsis muaj chaw thuam. Qhov no yog, tsis muaj leej twg iab liam tias koj ua tau tej yam tsis zoo. Tiam sis tej zaud cov Khixatias kuj lam raug iab liam xws li Yexus tau hais tias cov uas raws nws qab kuj yuav raug tsim txom ib yam li nws. (Yauhas 15:20) Yog  tias koj coj koj tus cwj pwm kom zoo zoo ib yam li Yexus ces cov uas nyob hauv lub koom txoos yeej yuav hwm koj.​—Mathais 11:19.

19. “Nws muaj ib tug pojniam xwb” yog li cas tiag?

¹⁹ “Nws muaj ib tug pojniam xwb.” Yog tias muaj poj niam, yuav tau coj Yehauvas txoj kev cai uas muaj ib tug poj niam xwb. (Mathais 19:3-9) Ib tug txiv uas yog Khixatias yuav tau tsis txhob ua kev nkauj kev nraug. (Henplais 13:4) Nws yuav tau coj ncaj rau nws tus poj niam. Tsis txhob mus tawb mus zes lwm tus poj niam.​—Yauj 31:1.

20. Ib tug txiv tsev “txawj tswj hwm nws tsev neeg” li cas?

²⁰ “Nws txawj tswjhwm nws tsev neeg thiab qhuab ntuas nws tej menyuam.” Yog tias koj yog ib tug txiv tsev, koj yuav tau saib xyuas koj lub cuab lub yig. Kawm Vajlugkub nrog koj tsev neeg tsis tu ncua. Nrog koj poj niam me nyuam mus qhia Vajlugkub kom ntau li ntau tau. Pab koj cov me nyuam kom nrog Yehauvas sib raug zoo. (Efexus 6:4) Ib tug txiv tsev uas saib xyuas tau nws tsev neeg qhia tau tias nws kuj saib xyuas tau lub koom txoos thiab.​—Muab piv rau 1 Timautes 3:5.

21. Yog koj tseem tsis tau yog ib tug tub leg num, koj yuav tau ua dab tsi?

²¹ Cov kwv tij, yog tias koj tseem tsis tau yog ib tug tub leg num, txhob ua siab deb, ua tib zoo nyeem zaj kawm no thiab thov Yehauvas pab txog qhov no. Ua tib zoo kawm seb koj yuav ua li cas thiaj ua tau ib tug tub leg num thiab rau siab ntso ua raws li koj kawm ntawd. Zaum tsaws xav seb koj hlub Yehauvas thiab cov kwv tij nkauj muam npaum li cas. Koj yuav tau haj yam hlub cov kwv tij nkauj muam koj thiaj muaj lub siab xav pab lawv. (1 Petus 4:8, 10) Xyaum kam tiag kom koj tau ua ib tug tub leg num ces koj yuav muaj kev zoo siab heev thaum koj ua hauj lwm los mus pab cov nyob hauv lub koom txoos. Thov Yehauvas foom koob hmoov rau koj nplua mias uas koj muaj lub siab xav ua ib tug tub leg num!​—Filipis 2:13.