1. Yehauvas cia peb ua dabtsi?

YEHAUVAS cia peb xaiv seb peb yuav ua lub neej zoo li cas. Nws qhia kom peb txawj txiav txim siab, thiab thaum peb txiav txim siab ua raws li nws lub siab nyiam ces nws yeej yuav pab peb. (Phau Ntawv Nkauj 119:173) Yog ua raws li tej peb kawm hauv phau Vajlugkub ces peb yuav txawj txiav txim siab zoo.​—Henplais 5:14.

2. Txawm tias peb txawj txiav txim siab los, tej zaud tseem nyuaj rau peb ua dabtsi?

² Txawm tias peb txawj txiav txim siab los, tej zaud tseem nyuaj rau peb ua raws li peb twb tau npaj siab ua lawd. Piv xam li no: Muaj ib tug kwvtij hluas uas txiav txim siab tias nws yuav nyeem phau Vajlugkub kom tag nrho. Thaum xub thawj nws yeej rau siab nyeem tiamsis ob peb lub limtiam tom qab xwb nws cia li muab tso tseg lawm. Ib tug muam xav hais tias nws yuav ua ib tug tho kev tiamsis nws pheej tsis txawj pib tho kev li. Cov txwj laus npaj siab tias lawv yuav mus txhawb cov kwvtij nkauj muam hauv lub koom txoos ntau dua qub tiamsis tau ntau lub hlis los lawv tseem tsis tau mus li. Peb yam uas hais los no nyias yeej txawv nyias tiamsis muaj ib qho uas lawv zoo ib yam. Qhov ntawd yog dabtsi? Lawv tsis ua raws li lawv tau npaj tseg. Cov Khixatia thaum ub uas nyob hauv lub nroog Kauleethaus los kuj ntsib li no thiab. Cia seb peb kawm tau dabtsi ntawm lawv.

3. (1) Cov Khixatia hauv lub nroog Kauleethaus npaj siab yuav ua dabtsi? (2) Tiamsis lawv ua li cas xwb?

³ Kwvlam xyoo 55 tom qab Yexus, cov Khixatia hauv lub nroog Kauleethaus hnov tias lwm cov koom txoos sau nyiaj xa mus pab  cov Khixatia hauv lub nroog Yeluxalees thiab lub xeev Yudas vim lawv raug kev txomnyem. Cov Khixatia hauv Kauleethaus siab dawb siab zoo thiab npaj siab tias lawv yuav pab cov kwvtij. Lawv thiaj nug tus tubtxib Paulus seb lawv yuav pab li cas. Nws thiaj qhia seb lub koom txoos yuav tsum tau ua li cas thiab txib Titus mus pab sau nyiaj. (1 Kauleethaus 16:1; 2 Kauleethaus 8:6) Tiamsis ob peb lub hlis tom qab, Paulus hnov tias cov kwvtij nyob hauv lub nroog Kauleethaus tseem sau tsis tau nyiaj li. Paulus thiaj ntshai tsam lawv npaj tsis txij thaum txog caij yuav nqa cov nyiaj mus rau cov kwvtij hauv Yeluxalees.​—2 Kauleethaus 9:4, 5.

4. Raws li 2 Kauleethaus 8:7, 10, 11, Paulus txhawb kom cov Khixatia hauv Kauleethaus ua dabtsi?

⁴ Qhov uas cov Khixatia hauv Kauleethaus npaj siab pab cov kwvtij yeej zoo kawg li. Paulus thiaj qhuas tias lawv siab dawb siab zoo thiab muaj kev ntseeg ruaj khov. Tiamsis nws txhawb kom lawv rau siab ntso ua lawv tes haujlwm kom tiav. (Nyeem 2 Kauleethaus 8:7, 10, 11.) Peb kawm tau tias txawm cov Khixatia uas muaj kev ntseeg los, yeej tsis yoojyim rau lawv ua raws li lawv tau txiav txim siab.

5. Peb yuav teb 2 lo lus nug twg?

⁵ Ib yam li cov Khixatia hauv Kauleethaus, tej zaum yuav tsis yoojyim rau peb ua raws li peb tau txiav txim siab. Yog vim li cas? Rau qhov peb yog neeg txhaum, tej zaum peb pheej laug sijhawm. Lossis muaj lwm yam los cuam tshuam, peb thiaj ua tsis tau raws li peb tau txiav txim siab. (Loos 7:18; Yakaunpaus 4:14, 15) Ua zoo xyuas seb tej peb txiav txim siab, puas muaj tej yam yuav tau muab hloov. Peb yuav ua zoo xyuas li cas? Thiab yuav ua li cas peb thiaj ua raws li peb tau npaj tseg?

6. Vim li cas muaj tej qho uas peb txiav txim siab ua lawd, peb yuav tau muab hloov?

⁶ Muaj tej yam tseem ceeb uas peb txiav txim siab ua lawd, peb yeej yuav tsis hloov. Xws li thaum peb txiav txim siab teev tiam Yehauvas, peb yeej yuav teev tiam nws tas mus li. Thiab thaum peb txiav txim siab yuav peb tus txij nkawm, peb yuav tau hlub nws mus tas sim neej. (Mathais 16:24; 19:6) Tiamsis muaj tej qho uas peb npaj siab tau tiamsis ho ua tsis tau raws li ntawd. Yog vim li cas? Vim tias muaj qees zaug peb lub neej hloov lawm. Yog li, dabtsi thiaj yuav pab peb txawj txiav txim siab zoo?

7. (1) Peb yuav tau thov kom Yehauvas pub dabtsi rau peb? (2) Yog vim li cas peb yuav tsum tau thov Yehauvas pab?

⁷ Thov Yehauvas pub laj lim tswvyim rau koj. Yehauvas tshoov Yakaunpaus sau cov lus no: “Yog nej leejtwg tsis muaj tswvyim, kom nws cia li thov ntawm Vajtswv, Vajtswv yuav pub tswvyim rau nws, rau qhov Vajtswv yog tus muaj siab dawb siab zoo pub.” (Yakaunpaus 1:5) Muaj qee zaug, peb tag tswvyim. Yog li ntawd peb yuav tau thov Yehauvas pab peb thaum peb yuav txiav txim siab ua ib yam dabtsi thiab thaum peb yuav tsum hloov tej yam uas peb twb txiav txim siab ua lawm. Yog peb thov Yehauvas, nws yeej yuav pab kom peb muaj laj lim tswvyim txawj txiav txim siab zoo.

8. Ua ntej txiav txim siab yuav ua ib yam dabtsi, peb yuav ua tib zoo tshawb nrhiav li cas?

⁸ Ua tib zoo tshawb nrhiav. Koj yuav tshawb nrhiav qhovtwg? Koj tshawb nrhiav tau hauv phau Vajlugkub, nyeem Yehauvas lub koom haum tej ntaub ntawv, thiab nrog cov uas koj tso siab tau tham. (Pajlug 20:18) Yeej tseem ceeb rau koj ua li no ua ntej koj nrhiav ib txoj haujlwm tshiab, khiav mus nyob lwm qhov, lossis mus kawm ntawv qeb siab kom koj tau haujlwm pab koj teev tiam Yehauvas.

9. Vim li cas peb yuav tsum tsis txhob rov dag peb tus kheej?

⁹ Ua tib zoo xav seb yog vim li cas koj thiaj txiav txim siab ua li ntawd. Tej koj xav tseem ceeb heev rau Yehauvas. (Pajlug 16:2) Nws tsis  xav kom peb rov dag peb tus kheej. Yog li ntawd thaum peb yuav txiav txim siab ua ib yam dabtsi ua tib zoo xav seb yog vim li cas peb thiaj txiav txim siab ua li ntawd tiag. Yog peb lub siab tsis nyob ntawd ces yuav nyuaj rau peb ua raws li twb tau npaj tseg. Piv xam li no: Muaj ib tug kwvtij hluas uas txiav txim siab ua ib tug tho kev. Tiamsis ib ntu tom qab xwb, nyuaj heev rau nws tshaj tawm kom tau sijhawm li ib tug tho kev thiab nws tsis muaj siab mus qhia Vajlugkub lawm. Tej zaum nws xav ua ib tug tho kev kom haum Yehauvas siab. Tiamsis puas yog li ntawd tiag? Los yog nws tho kev vim xav ua kom haum nws niam nws txiv siab lossis kom haum lwm tus siab xwb?

10. Yuav ua li cas peb thiaj yuav hloov tau?

¹⁰ Xav txog ib tug uas tabtom kawm Vajlugkub. Nws txiav txim siab tias nws yuav thum luam yeeb. Thaum thawj, nws thum tau li ib ob lub lim tiam, tiamsis nws tseg tsis taus ces rov qab haus dua lawm. Tiamsis nimno nws thum tau lawm! Yog vim li cas? Vim hais tias nws hlub Yehauvas thiab xav ua kom haum Yehauvas siab. Qhov no thiaj pab nws thum tau luam yeeb.​—Kaulauxais 1:10; 3:23.

11. Vim li cas peb yuav tsum paub meej tias peb xav ua dabtsi?

¹¹ Paub meej seb koj xav ua dabtsi. Yog koj paub meej tias koj xav ua dabtsi ces yuav yoojyim dua rau koj ua kom tiav. Xws li, yog koj xav nyeem phau Vajlugkub ntau dua ntxiv tiamsis ho tsis teem sijhawm los nyeem ces tej zaum koj yuav tsis nyeem li. * Lossis yog cov txwj laus hauv ib lub koom txoos txiav txim siab yuav mus txhawb cov kwvtij nkauj muam ntau dua qub tiamsis tseem tsis tau mus li ces zoo rau lawv xav li no: “Peb puas paub tias cov kwvtij nkauj muam twg cheem tsum peb mus txhawb lawv zog? Peb puas tau teem caij mus xyuas lawv?”

12. Muaj tej zaud, peb yuav tau ua li cas? Thiab yog vim li cas?

¹² Npaj li koj muaj peevxwm ua tau xwb. Peb tsis muaj sijhawm, nyiaj txiag, thiab peevxwm ua ib puas tsav yam. Yog li ntawd, peb yuav tsum xav seb peb muaj peevxwm ua dabtsi xwb. Muaj tej zaud thaum peb ua tsis tau raws li twb tau npaj tseg, peb yuav tau muab qhov ntawd hloov mentsis. (Tej Lus Qhia 3:6) Yog koj twb hloov lawd, yuav ua li cas koj thiaj ua tau tiav? Cia peb tham txog 5 yam uas yuav pab koj.

13. Ua cas koj thiaj yuav muaj peevxwm ua tau raws li koj tau npaj tseg?

¹³ Thov Yehauvas pab kom koj muaj peevxwm. Thov Yehauvas pub lub hwj huam dawb huv rau koj muaj peevxwm ua tau raws li koj tau npaj tseg. Yog koj thov Vajtswv, nws yuav pab kom koj ua tau kom tiav. (Filipis 2:13) Yog li ntawd, txawm koj xav tias Yehauvas tsis teb koj li los kavtsij rau siab ntso thov nws tsis tseg. Yexus hais tias: “Nej thov, nej thiaj yuav tau [lub hwj huam dawb huv].”​—Lukas 11:9, 13.

14. Pajlug 21:5 yuav pab koj ua tau raws li twb tau npaj tseg li cas?

¹⁴ Npaj seb koj yuav ua li cas. (Nyeem Pajlug 21:5.) Yog koj xav kom ua tau raws li twb tau npaj tseg, koj yuav tsum ua tib zoo npaj ua ntej. Thiab koj yuav tau ua raws nraim li koj tau npaj lawm. Zoo ib yam li ntawd, thaum koj txiav txim siab ua ib yam dabtsi, koj yuav tau muab sau cia seb koj yuav tsum ua li cas thiaj ua tiav. Muab haujlwm faib kom yoojyim. Thaum koj ua ib qho tiav zuj zus, koj thiaj pom tias ua txog qhovtwg lawm. Paulus qhia cov nyob hauv Kauleethaus kom lawv muab mentsis nyiaj tswj cia thawj thawj hnub ntawm txhua lub lim tiam es tsis txhob tos txog thaum nws tuaj txog mam ua ib teg sau. (1 Kauleethaus  16:2) Yog koj muab haujlwm faib kom yoojyim ces koj yuav kaj siab dua.

15. Yog koj muab tej uas koj npaj siab yuav ua sau cia ces yuav pab tau koj li cas?

¹⁵ Yog koj muab tej uas twb npaj siab yuav ua sau cia ces yuav yoojyim dua rau koj ua kom tiav. (1 Kauleethaus 14:40) Xws li thaum cov txwj laus sib tham, lawv xaiv ib tug txwj laus los sau tej uas lawv txiav txim siab yuav ua, sau seb tus txwj laus twg yuav ua yam twg, thiab thaum twg yuav tsum ua kom tiav. Thaum cov txwj laus ua li no, yuav yoojyim rau lawv ua raws li lawv tau npaj tseg. (1 Kauleethaus 9:26) Koj kuj xyaum ua li no thiab. Sim muab tej uas koj yuav tsum ua sau cia. Muab tej yam tseem ceeb tshaj sau ua ntej. Yog ua li no, yuav pab kom koj ua tau haujlwm tiav ntau dua.

16. (1) Peb yuav tsum ua dabtsi ntxiv? (2) Loos 12:11 pab tau peb li cas?

¹⁶ Rau siab ua kom tiav. Thaum koj pib ua raws li koj tau npaj tseg lawd, koj yuav tsum muab siab ua kom tiav. (Nyeem Loos 12:11.) Paulus hais rau Timautes tias nws yuav tsum “niaj hnub” nyeem Vajtswv txojlus thiab “ua tej ntawd mus” li, nws thiaj txawj qhia. Paulus tej lus no kuj pab tau peb ua Yehauvas tes haujlwm thiab.​—1 Timautes 4:13, 16.

17. Efexus 5:15, 16 yuav pab kom peb ua raws li peb tau npaj tseg li cas?

¹⁷ Siv sijhawm kom muaj nqis. (Nyeem Efexus 5:15, 16.) Teem sijhawm rau tej uas koj npaj tseg yuav ua thiab tsis txhob hloov siab. Tsis txhob tos kom zoo caij nyoog mam li ua. Yog koj tos kom zoo caij zoo nyoog mam li ua ces koj yuav ua tsis tau dabtsi li. (Tej Lus Qhia 11:4) Tsis txhob cia tej uas tsis tseem ceeb los cuam tshuam koj thiaj ua tau tej haujlwm uas tseem ceeb kom tiav. (Filipis 1:10) Nrhiav lub sijhawm uas tsis muaj leejtwg tab kaum tau koj. Qhia rau sawvdaws paub tias lub sijhawm ntawd koj tsis khoom. Koj kuj muab koj lub xov tooj tua thiab tsis txhob saib e-mail lossis tej vej xaij ntaus phoojywg rau lub sijhawm ntawd. *

18, 19. Txawm tias tsis yoojyim los, dabtsi yuav pab kom koj ua tau raws li koj tau npaj tseg lawd?

¹⁸ Xav seb thaum koj ua tiav lawd, yuav zoo npaum li cas. Thaum koj ua ib yam dabtsi tiav lawd zoo yam li thaum koj mus txog ib qho chaw uas koj xav mus. Txawm txojkev uas koj mus kaw lawm los koj yeej yuav lug kev mus kom txog. Ib yam li ntawd, yog koj xav ntsoov tias yuav zoo npaum li cas thaum koj ua tau raws li koj npaj tseg lawd ces txawm yuav nyuaj lossis txawm yuav tau hloov mentsis los koj yeej yuav ua kom tiav xwb xwb li.​—Kalatias 6:9.

¹⁹ Yeej tsis yoojyim rau peb txawj txiav txim siab zoo thiab ua raws li peb twb tau npaj tseg lawm. Tiamsis Yehauvas yuav pab kom peb muaj tswvyim thiab muaj peevxwm ua kom tiav.