1. Raws li Mathais 7:13, 14, peb taug nraim txojkev twg?

PEB sawvdaws yeej rau siab ntso peem kom peb mus txog lub qab ntuj tshiab uas Yehauvas yog tus kav. Yog li ntawd, txhua txhua hnub peb yeej taug nraim txojkev uas yuav coj peb mus tau txojsia. Tiamsis zoo li Yexus hais, txojkev ntawd yog ib txojkev nqaim. (Nyeem Mathais 7:13, 14, TT. *) Thiab tej thaud tsis yoojyim rau peb taug txojkev no vim peb yog neeg zoo tsis tiav.​—Kalatias 6:1.

2. Hauv zaj no peb yuav kawm txog dabtsi? (Mus saib lub ntsiab me “ Kev Txo Hwjchim Pab Peb Hloov.”)

² Yog peb xav taug txojkev nqaim uas coj mus tau txojsia, peb yuav tsum zoo siab hlo hloov peb txojkev xav, peb tus cwj pwm, thiab tej uas peb ua. Tus tubtxib Paulus txhawb cov Khixatia hauv Kauleethaus tias lawv yuav tsum “muab siab rau xyaum” hloov lawv tus kheej. (2 Kauleethaus 13:11) Cov lus no kuj yog hais rau peb thiab. Hauv zaj no peb yuav kawm seb phau Vajlugkub yuav pab peb hloov li cas, cov Khixatia uas paub tab yuav pab peb taug rawv txojkev nqaim li cas, thiab thaum twg yuav tsis yoojyim rau peb ua li Yehauvas lub koom haum hais. Yog peb txo hwjchim ces txawm yuav hloov li cas los peb yeej zoo siab hlo teev tiam Yehauvas.

3. Vajtswv Txojlus pab tau peb li cas?

³ Yeej tsis yoojyim rau peb tshuaj peb lub siab vim “tsis muaj ib yam dabtsi uas txawj dag ntxias li neeg lub siab.” (Yelemis 17:9) Thiaj yoojyim heev rau peb rov dag peb tus kheej. (Yakaunpaus  1:22) Vajtswv Txojlus zoo ib yam li lub koob yees duab hluav taws xob uas tsom pom tshab plaws hauv peb nrog cev. Peb thiaj yuav tsum siv Vajtswv Txojlus los tshuaj peb lub siab lub ntsws seb peb xav li cas thiab ntshaw dabtsi tiag. (Henplais 4:12, 13) Tiamsis peb yuav tsum txo hwjchim peb thiaj kam mloog phau Vajlugkub thiab cov uas saib xyuas peb lus.

4. Ua cas peb thiaj paub tias Vajntxwv Xa-ules ua ib tug neeg khav theeb?

⁴ Vajntxwv Xa-ules tus qauv qhia tias yog peb tsis txo hwjchim yuav zoo li cas. Xa-ules khav theeb heev nws thiaj tsis kam txo hwjchim thiab lees tias nws ua txhaum lawm. (Phau Ntawv Nkauj 36:1, 2; Hanpakus 2:4) Yehauvas hais rau Xa-ules tias nws yuav tsum ua li cas thaum nws mus ntaus yeej cov Amalej tiamsis Xa-ules tsis ua li ntawd. Thaum tus cev Vajtswv lus Xamuyees mus nrog Xa-ules tham txog qhov no los nws tsis kam lees tias nws ua txhaum lawm. Nws hais tias tej nws ua ntawd tsis phem luaj twg thiab muab nog rau lwm tus ris xwb. (1 Xamuyees 15:13-24) Zaum no tsis yog thawj zaug uas Xa-ules ua li no. (1 Xamuyees 13:10-14) Tu siab kawg uas Xa-ules tsis txo hwjchim thiab tsis kam hloov nws txojkev xav. Yehauvas thiaj qhuab ntuas nws thiab tsis yuav nws ua Vajntxwv lawm.

5. Peb kawm tau li cas los ntawm Xa-ules?

⁵ Peb tsis xav ua li Xa-ules. Yog li ntawd, peb yuav tau ua zoo xav li no: ‘Thaum kuv nyeem phau Vajlugkub kuv puas xav tias tsis yog hais rau kuv? Kuv puas xav tias tej kuv ua twb tsis phem ua luaj twg? Thaum kuv ua txhaum lawm kuv puas muab liam rau lwm tus?’ Yog peb xav li no dua lawm ces peb yuav tsum tau hloov. Yog peb tsis hloov ces peb yuav ua neeg khav theeb tsis kam txo hwjchim. Thaum ntawd Yehauvas yuav tsis lees yuav peb ua nws tus phoojywg lawm.​—Yakaunpaus 4:6.

6. Vajntxwv Daviv txawv ntawm Vajntxwv Xa-ules li cas?

⁶ Vajntxwv Daviv txawv ntawm Vajntxwv Xa-ules. Daviv “hwm tus TSWV [“Yehauvas,” NWT ] txoj Kevcai.” (Phau Ntawv Nkauj 1:1-3) Daviv cia Vajtswv txoj kevcai hloov nws txojkev xav vim nws paub tias Yehauvas yog tus cawm cov neeg uas txo hwjchim tiamsis nws txo cov neeg uas khav theeb lub hwjchim. (2 Xamuyees 22:28) Daviv hais tias: “Kuv ua tus TSWV [“Yehauvas,” NWT ] tsaug, rau qhov nws coj kuv txoj haukev, thiab hmo ntuj los kuv lub siab pheej ntuas kuv tsis tseg.”​—Phau Ntawv Nkauj 16:7.

7. Yog peb txo hwjchim peb yuav ua li cas?

⁷ Yog peb txo hwjchim ces peb yuav cia Vajtswv Txojlus hloov peb txojkev xav ua ntej peb mus ua txhaum. Thaum peb yuam kev lawm, Vajtswv Txojlus yuav qhia peb tias: “Txojkev tseeb yog txoj no. Cia li taug txoj no ntag.” (Yaxayas 30:21) Yog peb mloog Yehauvas lus yuav pab tau peb. (Yaxayas 48:17) Xws li peb yuav tsis mus ua tej uas yuav raug luag ntuas thiab poob ntsej muag. Thiab peb yuav muaj kev sib raug zoo nrog Yehauvas dua vim peb paub tias nws hlub peb ib yam li ib leej txiv hlub nws tus menyuam.​—Henplais 12:7.

8. Raws li Yakaunpaus 1:22-25, Vajtswv Txojlus zoo li daim tsom iav li cas?

⁸ Vajtswv Txojlus zoo li daim tsom iav. (Nyeem Yakaunpaus 1:22-25.) Peb feem coob yeej saib iav txhua tag kis ua ntej peb tawm mus ib qho twg seb peb yuav kho peb li cas. Zoo ib yam li ntawd, peb yuav tsum nyeem Vajtswv Txojlus txhua hnub peb thiaj paub kho peb txojkev xav thiab hloov peb tus cwj pwm. Muaj ib txhia pom tias yog lawv nyeem phau Niaj Hnub Tshawb Nrhiav Phau Vajlugkub ua ntej lawv tawm rooj pab tau lawv heev. Lawv xav seb lawv yuav ua li tej lawv nyeem hauv Vajtswv Txojlus li cas. Tsis yog li no xwb, yuav kom peb taug nraim txojkev  nqaim uas yuav tau txojsia, peb yuav tsum kawm Vajtswv Txojlus txhua hnub thiab ua zoo xav txog tej peb kawm.

9. Vim li cas koj tus phoojywg thiaj yuav tau ntuas koj?

⁹ Puas tau muaj ib zaug uas koj yuav luag ua rau koj txojkev sib raug zoo nrog Yehauvas plam? (Phau Ntawv Nkauj 73:2, 3) Yog muaj ib tug phoojywg paub tab tsis ntshai los ntuas koj, koj puas mloog nws? Yog koj mloog ces koj yuav zoo siab heev rau qhov uas nws ntuas koj.​—Pajlug 1:5.

10. Koj yuav ua li cas thaum koj ib tug phoojywg ntuas koj?

¹⁰ Vajtswv Txojlus hais tias: “Koj tus phoojywg ua rau koj mob siab tsis txog txij twg.” (Pajlug 27:6) Ua cas thiaj hais li no? Muab piv txwv li no, koj pheej kov koj lub xov tooj tsis saib kev. Koj cia li yuav hla kev tiamsis koj tus phoojywg txawm ntsiab nthos koj caj npab rub rhe koj rov los rau ntawm ntug kev. Nws sib zog heev ua rau koj caj npab doog kiag tau ob peb hnub tiamsis koj tsis raug tsheb tsoo. Koj puas chim rau nws? Koj yeej tsis chim! Tiamsis koj zoo siab uas nws pab koj. Zoo ib yam li ntawd, thaum koj hais lossis ua ib yam tsis raws Vajtswv txoj kevcai es koj tus phoojywg ntuas koj, tej zaum yuav ua rau koj chim siab. Tiamsis tsis txhob chim vim tsuas yog cov neeg tsis paub tab thiaj li chim xwb. (Tej Lus Qhia 7:9) Thaum peb ib tug phoojywg tsis ntshai ntuas peb li ntawd, yeej zoo rau peb ua nws tsaug.

11. Vim li cas ib co neeg thiaj chim thaum lawv cov phoojywg ntuas lawv?

¹¹ Vim li cas ib co neeg thiaj chim thaum lawv cov phoojywg ntuas lawv? Tsuas yog cov neeg khav theeb thiaj chim vim lawv xav mloog ‘tej zaj uas lawv nyiam’ xwb. Lawv “tsis nyiam mloog Vajtswv Txojlus.” (2 Timautes 4:3, 4) Lawv xav hais tias lawv ntse tshaj thiab tseem ceeb tshaj lwm tus, tsis tas lwm tus pheej yuav hais lawv. Tiamsis Paulus hais tias: “Tus uas tsis yog neeg tseemceeb, yog nws lam khav hais tias nws yog tus uas tseemceeb, nws yeej rov dag nws xwb.” (Kalatias 6:3) Vajntxwv Xalumoos hais li no txog tus neeg khav theeb: “Tus hluas pluag uas muaj tswvyim kuj zoo dua tus vajntxwv laus ruam uas cob qhia tsis tau lawm.”​—Tej Lus Qhia 4:13, TT.

12. Peb kawm tau li cas txog Petus tus qauv hauv Kalatias 2:11-14?

¹² Xav seb Petus ua li cas thaum Paulus ntuas nws tab meeg sawvdaws. (Nyeem Kalatias 2:11-14.) Yog Petus pheej xav txog qhov uas Paulus cem nws thiab ntuas nws tab meeg sawvdaws xwb ces yeej tsim nyog nws chim. Tiamsis Petus yog ib tug neeg paub tab nws thiaj tsis cib nyeej. Peb paub li ntawd rau qhov tom qab no, Petus tseem hu Paulus ua “peb tus kwv Paulus uas peb hlub.”​—2 Petus 3:15.

13. Ua ntej peb ntuas lwm tus peb yuav tsum ua tib zoo xav li cas?

¹³ Yog koj xav tias koj yuav tsum tau ntuas koj tus phoojywg, koj yuav tsum ua zoo xav li no ua ntej: ‘Puas yog kuv ua li kuv “ncaj lossis ntse dhau” lawm?’ (Tej Lus Qhia 7:16) Tus neeg uas xav tias nws ntse dua yuav tsis paub hlub lwm leej lwm tus. Nws yuav phua txim rau lwm tus raws li nws lub siab xav xwb, tsis yog raws li Yehauvas txoj kevcai. Thaum koj ua zoo tshuaj xyuas koj tus kheej tas lawm los koj tseem xav tias koj yuav tau ntuas koj tus phoojywg, ua zoo hais rau nws tias vim li cas koj thiaj xav nrog nws tham thiab ua zoo nug nws seb vim li cas nws thiaj ua li ntawd. Yog koj ua li no koj yuav pab nws to taub tias nws ua yuam kev li cas lawm. Nco ntsoov tias tsis yog koj yuav phua txim rau nws tiamsis koj xav pab kom nws paub seb Yehauvas xav li cas txog tej uas nws ua  ntawd. (Loos 14:10) Yog li ntawd, koj yuav tsum siv tej tswvyim hauv Vajtswv Txojlus los ntuas nws xwb. Thaum peb ntuas lwm tus, peb yuav tsum hlub lawv ib yam li Yexus. (Pajlug 3:5; Mathais 12:20) Rau qhov Yehauvas yuav txiav txim rau peb raws li tej uas peb ua rau lwm tus.​—Yakaunpaus 2:13.

14. Vajtswv lub koom haum tau npaj dabtsi los pab peb?

¹⁴ Yehauvas siv nws lub koom haum hauv ntiajteb los coj peb kev kom peb tau txojsia. Yehauvas lub koom haum npaj tau tej yeeb yaj kiab, tej ntaub ntawv, thiab tej kev sib txoos los pab kom peb ua raws li Vajtswv Txojlus qhuab qhia. Peb ntseeg tau tej uas lub koom haum tsim no rau qhov tej no puavleej yog muab hauv Vajtswv Txojlus los xwb. Thaum Pab Uas Ntaus Thawj txiav txim siab seb yuav mus tshaj tawm li cas thiaj zoo dua los, lawv tos Vajtswv lub hwj huam dawb huv coj lawv. Txawm li ntawd los lawv tseem niaj zaus ua zoo xyuas seb puas muaj tej yam lawv yuav tau hloov. Vim li cas? Vim rau qhov txhua yam hauv ntiajteb no yeej hloov tas mus li ces Vajtswv lub koom haum los yuav tau hloov thiab.​—1 Kauleethaus 7:31.

15. Ua cas tej thaud thiaj nyuaj rau ib txhia ua li lub koom haum hais?

¹⁵ Thaum Vajtswv lub koom haum qhia tej yam tshiab rau peb txog peb txojkev ntseeg xws li phau Vajlugkub tej hauv paus ntsiab lus lossis Yehauvas tej kevcai, peb yeej zoo siab hlo hloov. Ua li thaum Vajtswv lub koom haum hloov lwm yam, peb xav li cas xwb? Xws li ob peb xyoos dhau los no, nqi khoom ua vaj ua tsev thiab kho vaj kho tsev kim heev lawm. Yog li ntawd, Pab Uas Ntaus Thawj thiaj hais kom ntau lub koom txoos mus koom ib lub Tsev Nceeg Vaj. Muaj tej lub koom txoos yuav tau mus koom nrog lwm lub thiab yuav tau muab tej lub Tsev Nceeg Vaj muag es coj cov nyiaj ntawd mus ua dua ib lub tshiab rau tej chaw uas tsis muaj Tsev Nceeg Vaj. Yog koj yuav tau mus koom nrog lwm lub koom txoos lossis yuav tau muab lub Tsev Nceeg Vaj uas koj mus muag, tej zaum yuav tsis yoojyim rau koj. Muaj ib txhia kwvtij nkauj muam nimno yuav tau mus kev sib txoos deb dua qub. Muaj ib txhia uas niaj hnub tu lub Tsev Nceeg Vaj yuav tsis to taub tias yog vim li cas thiaj yuav muab lawv lub Tsev Nceeg Vaj muag. Tej zaum lawv yuav xav tias nkim lawv zog thiab sijhawm tu lawv lub Tsev Nceeg Vaj xwb. Txawm li ntawd los lawv yeej ua li lub  koom haum hais. Yeej tsim nyog peb qhuas lawv kawg li.

16. Yog peb ua raws li Kaulauxais 3:23, 24, yuav pab kom peb muaj kev zoo siab li cas?

¹⁶ Peb yuav zoo siab dua yog peb nco ntsoov tias txhua yam uas peb ua yog ua rau Yehauvas xwb thiab nws yog tus coj nws lub koom haum. (Nyeem Kaulauxais 3:23, 24.) Vajntxwv Daviv tso ib tug qauv zoo heev rau peb xyaum. Thaum nws muab nyiaj mus ua lub tuam tsev, nws hais tias: “Kuv haivneeg thiab kuv yeej muab tsis tau ib yam dabtsi pub rau koj li, rau qhov tej ntawd puavleej yog koj li, peb tsuas muab tej uas yog koj li rov rau koj xwb.” (1 Xwmtxheej Vajntxwv 29:14) Thaum peb tso nyiaj siab dawb rau Yehauvas los peb tsuas muab tej uas yog Yehauvas li rov rau nws thiab xwb. Txawm li ntawd los, Yehauvas yeej zoo siab heev thaum peb muab peb lub sijhawm, lub dag lub zog, thiab nyiaj txiag los ua nws tes haujlwm.​—2 Kauleethaus 9:7.

17. Vim li cas peb yuav tsum tsis txhob txhawj txawm hais tias muaj ntau yam peb yuav tau hloov?

¹⁷ Yuav kom peb taug nraim txojkev nqaim uas coj peb mus tau txojsia, peb yuav tsum xyaum Yexus tus qauv. (1 Petus 2:21) Yog koj pom tias muaj tej yam koj yuav tau hloov los tsis txhob txhawj. Qhov uas koj paub tias koj yuav tau hloov qhia tias koj xav ua li Yehauvas hais. Nco ntsoov tias Yehauvas yeej paub tias peb yog neeg zoo tsis tiav ces nws yeej tsis yuam kom peb ua tau ib yam li Yexus.

18. Peb yuav ua li cas peb thiaj tau txojsia ib txhis tsis kawg hauv lub qab ntuj tshiab?

¹⁸ Cia peb sawvdaws ntsia ntsoov rau yav tom hauv ntej thiab rau siab hloov peb txojkev xav, peb tus cwj pwm, thiab tej peb ua. (Pajlug 4:25; Lukas 9:62) Ua neeg txo hwjchim thiab ‘muab siab rau xyaum ua peb lub neej kom zoo kawg nkaus.’ (2 Kauleethaus 13:11) Yog peb ua li no ces “Vajtswv tus uas hlub peb thiab pub rau peb tau zoo nyob kaj siab lug, nws yuav nrog nraim peb” thiab yuav pub txojsia ib txhis tsis kawg rau peb hauv lub qab ntuj tshiab.