1-2. (1) Vim li cas ho tsim nyog cov nyuam qhuav sib sau los ua neej yuav tau tso siab plhuav rau Yehauvas? (Phau Ntawv Nkauj 37:3, 4) (2) Piav seb peb yuav kawm dabtsi hauv zaj kawm no.

THAUM muaj ob tug tabtom sib sau los ua neej lossis nyuam qhuav pib nkawv lub neej, nkawv ob lub siab yeej qaug lais los ua ke. Txawm li ntawd los txojke txij nkawm yeej tsis yoojyim thiab muaj ntau yam uas nkawv yuav tau txiav txim siab txog thaum nyuam qhuav pib ua neej. Yog tias nkawv tso siab plhuav rau Yehauvas nrog nkawv ua tus txiav txim, ces nkawv txojkev txij nkawm yuav nyob ruaj khov khwb kho thiab nkawv yuav txawj sib pab ua neej. Tiamsis yog tias nkawv tsis mloog Vajtswv tej lus ces nkawv yuav muaj kev cov nyom.​—Nyeem Phau Ntawv Nkauj 37:3, 4.

² Txawm zaj kawm no yog hais rau cov uas nyuam qhuav sib sau los ua neej xwb los txhua tus txij nkawm yeej kawm tau tib yam nkaus. Peb yuav kawm txog tej yam uas yuav los cuam tshuam tej txij nkawm lub neej thiab yuav kawm ntau tus yam ntxwv nyob hauv phau Vajlugkub los pab peb. Phau Vajlugkub yuav qhia peb ntau ntau yam kom thiaj tsav tau peb lub neej. Tsis tas li ntawd niaj hnub niam no muaj ntau tus yam ntxwv uas peb haj tseem xyaum tau thiab.

3-4. Cov txij nkawm nyuam qhuav sib sau kheev muaj dabtsi los cuam tshuam?

³ Thaum ib khub txij nkawm twg nyuam qhuav sib sau los ua neej tej laus yeej txhob kom xyaum ua lub neej xws luag teb  luag chaw. Xws li muaj metub menyuam kom los puv vaj puv tsev. Lossis kom kavtsij mus yuav vaj yuav tsev thiab tsim kom muaj lauj kaub tais diav puv ntia rau hauv.

⁴ Yog li ntawd nkawv yuav tau rau ncoo pw xav zoo zoo ua ntej nkawv mus lob nuj nqis ntau ntau. Yog tias nkawv lam mus lob nuj nqis li ub li no ces nkawv yuav ua hnub ua hmo khwv los them tej nuj nqis ntawd. Nkawv yuav tsis muaj sijhawm los nyeem Vajlugkub, kawm Vajlugkub ua ib tse neeg, thiab mus tshaj tawm txoj xov zoo. Tej zaum yuav muaj qee zaug nkawv yuav mus tsis tau kev sib txoos vim nkawv yuav tau mus ua haujlwm kom tau nyiaj lossis txhob poob haujlwm. Yog li ntawd nkawv yuav tu ncua ntau yam ua tsis tau rau Yehauvas.

5. Tuam thiab nws tus pojniam nkawv tau hais li cas?

⁵ Muaj coob tus txij nkawm piav tias tej txhiam laj txhiam xws yeej pab tsis tau kom lawv muaj kev zoo siab. Muaj ib tug txivneej hu ua Tuam thiab nws tus pojniam nkawv paub zoo txog tej no. * Thaum nkawv nyuam qhuav pib ua neej nkawv yeej khwv ciaj khwv tuag kom muaj vag muaj tse nyob xws teb xws chaw. Tiamsis nkawv tsuas ntsib txojkev iab kev daw. Tuam hais tias: “Txawm wb muaj nyiaj txhij txhua lawm los zoo li wb twb tsis muaj kev zoo siab li. Muaj ntau yam los tab kaum wb lub neej thiab wb tsis muaj siab ua Yehauvas tes haujlwm li lawm.” Tej zaum peb qho tus xav tib yam nkaus li khub niam txiv no. Tsis txhob rawm maj tag kev cia siab. Yeej muaj ntau tus yam ntxwv zoo uas yuav pab peb xyaum ua peb lub neej. Ua ntej no, cia peb mus kawm seb cov txiv tsev xyaum tau Vajntxwv Yehausafas tus yam ntxwv li cas.

6. Thaum Yehausafas ntsib kev tawm tsam nws ua raws li Pajlug 3:5, 6 li cas?

⁶ Muaj ntau yam cov txiv tsev yuav tau saib xyuas hauv lub cuab lub yig. Yog lawv nyeem txog Vajntxwv Yehausafas tus yam ntxwv ces yuav qhia ntau ntau yam rau lawv. Vajntxwv Yehausafas saib xyuas nws lub teb lub chaw thiab tej pejxeem huv tibsi. Ua li cas nws thiaj saib xyuas tau tagnrho tej no? Yehausafas yeej ua npaum li nws ua tau los tiv thaiv nws lub tebchaws thiab tej pej xeem hauv tebchaws Yudas. Nws tsa tej ntsa yeej los tiv thaiv tej nroog thiab nws tsa muaj tshaj li 1,160,000 leej tub rog. (2 Xwmtxheej Vajntxwv 17:12-19) Tsis ntev tom qab Yehausafas tsa muaj tej no nws txawm ntsib kev tawm tsam loj heev. Ib pab tub rog Amoos, Mau-am, thiab cov uas nyob saum lub roob Xe-i txawm sawv tuaj tua Yehausafas, nws tsev neeg, thiab nws cov pej xeem pov tseg. (2 Xwmtxheej Vajntxwv 20:1, 2) Yehausafas yuav ua zaj twg? Nws txawm thov kiag Yehauvas pab. Yehausafas ua raws nram li hais hauv Pajlug 3:5, 6. (Nyeem.) Nyob hauv 2 Xwmtxheej Vajntxwv 20:5-12, qhia tias Yehausafas txo hwjchim thiab tso  siab plhuav rau Vajtswv Yehauvas. Yog li ntawd Yehauvas hmov tshua thiab teb nws tej lus thov li cas?

7. Yehauvas teb Yehausafas tej lus thov li cas?

⁷ Yehauvas siv Yahaxiyees uas yog ib tug Levis tuaj cev nws lus rau Yehausafas. Yehauvas hais tias: “Mus txum chaw tos xwb; nej yuav pom hais tias [Yehauvas] yuav ua kom nej kovyeej.” (2 Xwmtxheej Vajntxwv 20:13-17) Raws li neeg lub tswvyim, ib pab tub rog txum chaw xwb ces yeej yuav swb rog. Tiamsis lub tswvyim no tsis yog los ntawm neeg los, yog los ntawm Yehauvas ntag. Yehausafas ua raws nraim li Yehauvas tau hais. Nws xaiv ib co txivneej hu nkauj mus ua ntej txawm tias lawv tsis txawj ntaus rog. Thaum kawg Yehauvas tau ua raws li nws cog lus tseg rau Yehausafas thiab kov yeej cov yeeb ncuab lawm.​—2 Xwmtxheej Vajntxwv 20:18-23.

8. Cov txiv tsev xyaum Yehausafas rau txojke twg?

⁸ Txhua tus txiv tsev yeej xyaum tau Yehausafas tus yam ntxwv. Yeej muaj tseeb tiag lawv yeej yog cov ntaus thawj hauv lub cuab lub yig. Muaj ntau zaus lawv xav tias lawv thiaj yog tus kho tau txhua yam teeb meem hauv lub cuab lub yig. Tiamsis tsis txhob xav hais tias koj tib leeg thiaj kho tau lub cuab lub yig xwb. Thaum koj nyob ib leeg ntsiag to nco ntsoov thov Yehauvas pab koj lub neej. Tsis tas li ntawd xwb neb ob niam txiv yuav tau nyob ua ke thov Yehauvas pab neb lub neej. Thaum koj nyeem phau Vajlugkub thiab tej ntaub ntawv uas Yehauvas lub koom haum sau tseg cia, yuav tsav tswvyim pab koj ua neej. Tej zaum tej neeg ob cag yuav hais rau koj tias nyiaj txiag thiaj yog yam uas tiv thaiv tau koj lub cuab lub yig, tsis txhob tso tso siab rau Vajtswv. Txawm li ntawd los nco ntsoov Yehausafas tus yam ntxwv uas hais tias nws tso siab rau Yehauvas. Tus uas xav ua li Yehauvas lub siab nyiam, Nws yeej tsis lam muab tso pov tseg yooj yoojyim. (Phau Ntawv Nkauj 37:28; Henplais 13:5) Yog li ntawd tej txij nkawm yuav tau ua li cas lub neej thiaj nyob kaj siab lug?

9. Peb kawm tau Yaxayas thiab nws tus pojniam nkawv li cas?

⁹ Yaxayas thiab nws pojniam muab txojkev teev tiam Yehauvas tso ua ntej hauv nkawv lub neej. Yaxayas yog ib tug cev Vajtswv lus hos tej zaum nws tus pojniam los kuj tau cev Vajtswv lus tib yam nkaus. (Yaxayas 8:1-4, NWT ) Nkawv yeej teev tiam Yehauvas sib nrawg nroos. Nkawv yeej tso tau ib tug yam ntxwv zoo kawg nkaus rau tej txij nkawm tau xyaum.

10. Tej lus faj lem hauv phau Vajlugkub ho txhawb tau cov txij nkawm kom rau siab ntso teev tiam Yehauvas li cas?

¹⁰ Niaj hnub niam no los tej txij nkawm yeej teev tiam tau Yehauvas sib nrawg nroos tib yam nkaus. Yog nkawv ua tib zoo kawm txog Yehauvas tej lus faj lem muaj tiav ib qho dhau ib qho ces nkawv yuav yimhuab tso siab rau Yehauvas ntxiv. (Titus 1:2) Yog tias nkawv nyob ua ke kawm Vajtswv txojlus li no yuav pab nkawv ras txog tias nkawv yuav tau ua nkawv feem los txhawb nqa tej lus faj lem. Xws li Yexus cov lus faj lem uas hais kom mus tshaj tawm thoob plaws lub ntiajteb ua ntej lub sijhawm kawg los. (Mathais 24:14) Yog nkawv ua tib zoo xav txog tej lus faj lem ces nkawv yeej yuav rau siab ntso teev tiam Yehauvas.

11. Piav seb Paxilas thiab Akilas ua Vajtswv tes haujlwm li cas thiab vim li cas nkawv ho ua.

¹¹ Cov txij nkawm uas tseem muaj zog zis yeej xyaum tau Paxilas thiab Akilas nkawv  tus yam ntxwv. Nkawv nyob hauv lub nroog Loos thiab yog neeg Yudais. Tej zaum nkawv yeej ua tau lub neej xws luag teb luag chaw. Nkawv txawm los ntseeg thaum nkawv hnov Yexus tej lus. Tiamsis tsis ntev tom qab ntawd cov neeg Loos tus Vajntxwv hu ua Khodi Es (Claudius) muab tagnrho cov neeg Yudais ntiab tawm hauv Loos mus lawm. Tib ntsais muag xwb qhov no yeej hloov hlo Akilas thiab Paxilas nkawv lub neej lawm tag nrho. Nkawv thiaj tau mus nyob xyaw pej kum neeg, nrhiav tsev nyob thiab pib dua nkawv txoj lag luam ua tsev ntaub. Nkawv puas cia tej yam zoo li no los cuam tshuam Yehauvas tes haujlwm? Thaum nkawv rov pib nkawv lub neej dua tshiab hauv lub nroog Kauleethaus, Akilas thiab Paxilas yeej txhawb nqa nkawv lub koom txoos kawg nkaus. Thaum Paulus tuaj xyuas los nkawv yeej nrog Paulus dhia haujlwm txij tog txij peg. Tsis ntev tom qab ntawd nkawv txawm mus pab tej lub zos uas tsis muaj cov ntseeg coob pes tsawg. (Tes Haujlwm 18:18-21; Loos 16:3-5) Nkawv yeej khwv los khwv zoo los zoo siab.

12. Vim li cas cov txij nkawm yuav tau npaj hom phiaj ua Yehauvas tes haujlwm?

¹² Niaj hnub niam no cov txij nkawm yeej xyaum tau Paxilas thiab Akilas uas yog muab Vajtswv tes haujlwm tso ua ntej hauv nkawv lub neej. Ua ntej ib khub nkauj nraug twg yuav sib sau los ua neej, nkawv yuav tau lauj sijhawm los tham txog nkawv tej hom phiaj ua Yehauvas tes haujlwm tom qab nkawv sib sau. Thaum nkawv ua raws li nkawv tau npaj tseg ces Yehauvas yuav foom koob hmoov rau nkawv. (Tej Lus Qhia 4:9, 12) Muaj ib tug npe hu ua Laxaum (Russell) thiab nws tus pojniam hu ua Elixanpe (Elizabeth) kuj tau pom Yehauvas txhais tes pab nkawv. Laxaum thiaj hais tias: “Thaum wb tseem yog nkauj nraug, wb ua tib zoo tham seb wb xav ua Yehauvas tes haujlwm li cas.” Elixanpe hais ntxiv tias: “Wb ua tib zoo tham txog tej no seb yog muaj dabtsi los cuam tshuam wb lub neej los wb thiaj tsis cia tej ntawd tab kaum tej wb twb npaj tseg yuav ua rau Yehauvas lawm.” Tom qab no Laxaum nkawv ob niam txiv thiaj tsiv mus nyob hauv tebchaws Maikaunixia (Micronesia) thiab mus tshaj tawm  ntawm no vim tsis muaj cov ntseeg coob pes tsawg.

13. Raws li Phau Ntawv Nkauj 28:7, peb lub neej yuav mus li cas yog tias peb tso siab rau Yehauvas?

¹³ Muaj coob tus txij nkawm tau ua tib yam li Laxaum thiab Elixanpe nkawv. Lawv rau siab ntso lauj lub sijhawm mus ua Yehauvas tes haujlwm. Lawv tsis muab lawv lub neej mus ua tej yam tsis muaj nuj nqis. Yog tias ob niam txiv txiav txim siab muab Yehauvas tes haujlwm tso ua ntej hauv nkawv lub neej thiab rau siab ua tej ntawd, ces Vajtswv yuav foom koob hmoov rau nkawv. Tsis tas li ntawd nkawv yuav tso siab txhua zaus tias Yehauvas yuav cev tes pab nkawv tsis tseg tsis tu thiab nkawv yuav muaj kev zoo siab tiag tiag.​—Nyeem Phau Ntawv Nkauj 28:7.

14. Vim li cas peb ho paub tias tus tubtxib Petus thiab nws pojniam nkawv coj raws nraim tej lus hauv Mathais 6:25, 31-34?

¹⁴ Cov txij nkawm yeej xyaum tau Petus thiab nws pojniam nkawv. Twb tau ib tog xyoos tawm lawm, txij thaum Yexus thiab Petus nkawv sib ntsib thawj zaug. Yexus caw Petus kom nrog nws mus ncig tshaj tawm txoj xov zoo. Yog li ntawd Petus yuav tau txiav txim siab seb nws yuav mus lossis tsis mus. Tej zaum nws kuj ua xyem xyav vim tseem tshuav nws tsevneeg. (Lukas 5:1-11) Tiamsis Petus txawm txiav txim siab nrog Yexus mus tshaj tawm. Nws txiav txim tau zoo kawg li, tsis tas li ntawd ntshe Petus tus pojniam los kuj pom zoo tib yam nkaus. Phau Vajlugkub qhia tias tom qab Vajtswv tsa Yexus sawv rov qab los, muaj tej lub caij Petus pojniam kuj ua nws luag mus xyuas cov ntseeg. (1 Kauleethaus 9:5) Vim Petus pojniam coj tau zoo, Petus thiaj muaj cuab kav ntuas cov txiv tsev thiab niam tsev. (1 Petus 3:1-7) Petus nkawv ob niam txiv yeej tso siab tias Yehauvas yuav saib xyuas nkawv kom muaj noj muaj haus yog nkawv rau siab ntso ua Yehauvas tes haujlwm.​—Nyeem Mathais 6:25, 31-34.

15. Piav seb peb kawm tau Thi As Nkaum thiab Exethaws nkawv li cas.

¹⁵ Yog li ntawd cov txij nkawm uas sib sau ua neej tau ob peb lub xyoos lawm yuav ua li cas thiaj muaj siab ua Yehauvas tes haujlwm kom ntau ntxiv? Lawv kuj xyaum tau lwm khub txij nkawm lub neej. Xws li thaum peb mus nyeem tej ntaub ntawv lossis saib hauv Yehauvas Cov Timkhawv Tshooj TV. Yeej muaj tej zaj ua qhia cov txij nkawm. Xws li nyob hauv tebchaws Nplaxi (Brazil) Kwvtij Thi As Nkaum (Tiago) thiab nws tus pojniam hu ua Exethaws (Esther) xav mus rau lwm thaj chaw uas tsis muaj cov ntseeg coob pes tsawg. Thi As Nkaum hais tias: “Thaum wb nyeem txog tej zaj qhia tias Yehauvas pab nws cov neeg niaj hnub niam no li cas, wb thiaj xav kom Yehauvas cev tes pab wb tib yam nkaus.” Nyob rau xyoo 2014, nkawv txawm tsiv mus nyob hauv tebchaws Palankais (Paraguay), thiab mus tshaj tawm txoj xov zoo rau cov neeg uas txawj hais lus Po Tsu Nkau (Portuguese). Exethaws hais tias: “Nqe Vajlugkub nyob hauv Efexus 3:20 pab tau wb kawg nkaus. Thaum wb ua Yehauvas tes haujlwm li no wb pom muaj raws nraim li nqe Vajlugkub ntawd tiag.” Tsab ntawv Paulus xa mus rau cov ntseeg hauv Efexus, nws sau tseg tias Yehauvas yuav pab peb ntau dua li peb tau thov nws. Vajtswv yeej pab li no ntau ntau zaus lawm tiag.

16. Cov txij nkawm uas tseem muaj zog zis mus cuag tau leej twg kom tsav tswvyim thiaj ncav cuag lawv tej homphiaj?

¹⁶ Yog peb yog cov txij nkawm uas tseem muaj zog zis, peb yeej xyaum tau tej txij  nkawm uas tau ua Yehauvas tes haujlwm ntev loo lawm. Lawv yeej tsav tau tswvyim rau peb seb peb yuav ua li cas peb thiaj ncav cuag peb tej homphiaj. Qhov no qhia tias peb tso siab rau Yehauvas. (Pajlug 22:17, 19) Tsis tas li ntawd cov txwj laus muaj peevxwm pab tau tej txij nkawm uas tseem muaj zog zis kom ncav cuag lawv tej hom phiaj thiab.

17. Tuam thiab Yeeb hais li cas ntxiv, thiab peb kawm tau li cas los ntawm nkawv?

¹⁷ Muaj qee zaug peb lub neej mus tsis raws li lub siab xav. Xws li Tuam thiab Yeeb uas yog ob tug peb tham rau nqe 5. Tom qab nkawv sib yuav tau 3 lub xyoos, nkawv tsiv mus pab ceg Npe-ee hauv tebchaws Filees (Finland). Thaum nkawv hnov hais tias nkawv tsuas nyob 6 hlis xwb ces nkawv txawm mluas mluas. Tiamsis nkawv txawm hnov tias nkawv yuav tau kawm lus Alas. Ces nkawv thiaj tau mus tshaj tawm rau cov neeg hais lus Alas rau lwm lub tebchaws lawm. Nkawv zoo siab tsis txawj tag. Yeeb thiaj tau hais tias: “Thaum muab tej no los ua tib zoo xav mas yeej tsis yoojyim kiag li. Vim hais tias wb tsis tau kawm yam lus no dua. Tes haujlwm no ua rau wb yuav tsum tso siab plhuav rau Yehauvas tiag tiag li. Kuv yeej pom Yehauvas txhais tes pab wb tshaj qhov wb xav tau. Tej no ua rau wb yimhuab tso siab rau Yehauvas ntxiv tuaj.” Nco ntsoov tias yog peb tso siab plhuav rau Yehauvas ces nws yeej yuav foom koob hmoov rau peb tib yam nkaus.

18. Yuav kom cov txij nkawm tso siab rau Yehauvas mus li lawv yuav tau ua li cas?

¹⁸ Txojkev ua txij ua nkawm yeej yog ib yam khoom Yehauvas muab pub rau peb. (Mathais 19:5, 6) Nws xav kom txhua khub txij nkawm sib hlub sib pab mus li. (Pajlug 5:18) Cov txij nkawm uas tseem muaj zog zis, tshuaj nej lub neej seb nej puas ua tau Yehauvas tes haujlwm ntxiv. Nej puas ua npaum li nej ua tau los qhia tias nej txaus siab rau txhua yam Yehauvas tau muab rau nej? Rau siab thov Yehauvas kam tiag. Mus tshawb nrhiav nws Txojlus thiab khaws tej hauv paus ntsiab lus los ua neej. Khaws tej tswvyim uas Yehauvas pub rau nej. Nej yeej tso siab tau tias yog nej muab nej lub neej cob rau Yehauvas, nej yuav ua neej luag ntxhi.