1, 2. Ua li cas ho zoo rau koj mloog koj tus Tswv Tsim thaum koj xav seb yuav ua lub neej zoo li cas? (Saib thawj daim duab hauv zaj no.)

YOG koj tseem hluas yeej muaj coob leej ntau tus xav pab koj ntaus tswvyim seb koj yuav ua koj lub neej li cas rau yav tom hauv ntej. Tej zaum tej xibhwb tom tsev kawm ntawv thiab lwm tus yuav hais kom koj mus kawm ntawv qeb siab lossis mus nrhiav ib txoj haujlwm zoo uas them nyiaj ntau. Tiamsis Yehauvas tsis qhia kom koj ua li ntawd. Yehauvas yeej xav kom koj rau siab ntso kawm ntawv xwv koj thiaj khwv tau txaus noj txaus haus. (Khaulauxi 3:23) Tiamsis Yehauvas kuj paub tias thaum koj tseem hluas, koj yuav tau txiav txim siab zoo vim tej koj txiav txim siab ua yuav raug koj lub neej rau yav tom hauv ntej. Vim li no Yehauvas thiaj muab tej hauv paus ntsiab lus los cob qhia koj kom koj paub ua lub neej haum nws siab rau lub caij kawg no.​—Mathai 24:14.

² Nco ntsoov tias Yehauvas paub txhua yam huvsi. Nws paub tej uas yuav muaj tshwm sim tom hauv ntej, thiab nws paub tias hnub kawg rau lub sim ceeb no twb los txog ze npaum li cas lawm. (Yaxaya 46:10; Mathai 24:3, 36) Yehauvas kuj paub koj thiab.  Nws paub tias yam twg yuav ua rau koj zoo siab thiab yam twg yuav ua rau koj nyuaj siab. Tibneeg tej tswvyim yeej tsis phem, tiamsis yog tej tswvyim ntawd tsis mus raws li Vajtswv Txojlus ces yeej tsis yog tej tswvyim zoo tiag.​—Paj Lug 19:21.

3, 4. Thaum Adas thiab Eva mloog lub tswvyim phem ua li cas rau nkawd thiab nkawd tej xeeb leej xeeb ntxwv?

³ Yeej muaj tswvyim phem ntev los lawm. Xatas yog thawj tug uas muab lub tswvyim phem rau tibneeg. Nws hais rau Eva tias yog Adas thiab Eva nkawd txiav txim siab rau nkawd tus kheej ces nkawd yuav muaj kev xyiv fab dua. (Chiv Keeb 3:1-6) Xatas hais li ntawd tsis yog nws xav pab nkawd. Nws lub tswvyim yog kom Adas thiab Eva nkawd thiab nkawd tej xeeb leej xeeb ntxwv mloog nws lus thiab pe hawm nws xwb, tsis yog pe hawm Yehauvas. Nkawd yuav mloog Xatas lus ua dabtsi, nws twb tsis tau ua ib yam rau nkawd li. Yehauvas yog tus Tswv Tsim uas muab nkawd txis ua txij nkawm. Yehauvas kuj tau tsim lub ib lub vaj zoo nkauj kawg li rau nkawd nyob, thiab tsim kom nkawd muaj lub cev thiab tes taw zoo tiav log nyob tau mus ib txhis.

⁴ Tu siab kawg uas Adas thiab Eva nkawd tsis mloog Yehauvas lus. Nkawd txojkev sib raug zoo nrog tus uas muab txojsia rau nkawd thiaj tu lawm. Nkawd thiaj txawj laus txawj tuag ib yam li lub paj uas de ntawm tsob paj lawm uas tsuas muaj ntsws thiab qhuav zuj zus lawm xwb. Peb puavleej yog nkawd cov menyuam peb thiaj txawj laus txawj tuag thiab. (Loos 5:12) Niaj hnub nimno los tibneeg feem coob yeej tsis quav ntsej Vajtswv tej lus li. Lawv tus twg los xav ua li lawv lub siab nyiam. (Efexau 2:1-3) Thaum kawg thiaj zoo li cas lawm? Phau Vajlugkub hais tias “tsis muaj lub tswvyim” thaum tibneeg tsis mloog Yehauvas.​—Paj Lug 21:30.

5. Vajtswv paub tias tseem yuav muaj coob tus zoo li cas, thiab puas muaj li nws hais?

⁵ Yehauvas paub tias tseem yuav muaj coob tus uas xav los paub thiab teev tiam nws, tsis hais cov laus xwb tiamsis cov hluas thiab. (Ntawv Nkauj 103:17, 18; 110:3) Yehauvas saib cov tub ntxhais hluas no muaj nqes kawg li! Yog tias koj yog ib tug hluas koj yeej tau lub neej zoo tiag tiag rau qhov Yehauvas “pub tej yam zoo” rau koj, puag yog? (Nyeem Ntawv Nkauj 103:5; Paj Lug 10:22) Muaj 4 yam uas peb yuav tham txog hauv zaj no. Plaub yam no yog (1) zaub mov ntawm sab kev ntseeg, (2) tej phoojywg zoo, (3) tej hom phiaj zoo, thiab (4) txoj tseem kev ywj pheej.

6. Ua cas koj yuav tsum rau siab kawm kom muaj kev ntseeg, thiab Yehauvas tau muab dabtsi los pab peb?

⁶ Tsiaj txhu tsis muaj qhov uas xav teev tiam Vajtswv thiab tsis muaj qhov uas xav paub lawv tus Tswv Tsim. Tiamsis tibneeg tsis zoo li ntawd. (Mathai 4:4) Thaum peb mloog Vajtswv lus peb muaj kev zoo siab, muaj tswvyim, thiab kev thoob tsib to nrog. Yexus hais tias: “Cov uas paub tias lawv cheem tsum Vajtswv tau nyob kaj siab lug.” (Mathai 5:3, NW) Vajtswv muab phau Vajlugkub thiab txib “tus qhev ncaj thiab ntse” npaj tej ntaub ntawv los pab txhawb peb txojkev ntseeg. (Mathai 24:45) Tej ntaub ntawv ntawd pab yug peb txojkev ntseeg thiab pab kom peb txojkev sib raug zoo nrog Yehauvas nyob ruaj khov. Thiaj muab tej ntaub ntawv no hu ua zaub mov ntawm sab kev ntseeg. Muaj ntau yam zaub mov ntawm sab kev ntseeg nplua mias rau peb noj tsau npo!​—Yaxaya 65:13, 14.

7. Tej zaub mov ntawm sab kev ntseeg uas Vajtswv pub rau peb pab tau koj li cas?

 ⁷ Tej zaub mov ntawm sab kev ntseeg yuav pab kom koj muaj tswvyim thiab kev thoob tsib to nrog, koj thiaj paub tiv thaiv koj tus kheej. (Nyeem Paj Lug 2:10-14.) Yog koj muaj tswvyim thiab kev thoob tsib to nrog, tibneeg yuav dag tsis tau koj. Xws li thaum lawv dag tias tsis muaj tus Tswv Tsim lossis dag tias koj yuav muaj kev zoo siab dua yog koj muaj nyiaj txiag thiab muaj tej qhov txhia chaw nplua mias. Tswvyim thiab kev thoob tsib to nrog kuj yuav pab tau koj zam dhau tej kev ntshaw thiab tej uas yuav ua rau koj raug mob. Yog li ntawd, cia li rau siab ntso ua li koj ua tau kom koj muaj tswvyim thiab kev thoob tsib to nrog. Thaum ntawd koj yuav pom tias Yehauvas hlub koj thiab xav kom koj tau qhov zoo tshaj plaws xwb.​—Ntawv Nkauj 34:8; Yaxaya 48:17, 18.

8. Vim li cas koj yuav tsum txav ze Vajtswv tamsim no, thiab qhov no pab tau koj li cas rau yav tom hauv ntej?

⁸ Tshuav tsis ntev xwb, txhua yam hauv Xatas lub qab ntuj yuav raug puam tsuaj tag. Thaum ntawd, tsuas yog Yehauvas xwb thiaj yuav tiv thaiv tau peb thiab tsom kwm tau peb. Txawm tais nyuag mov los, Yehauvas thiaj pub tau rau peb noj xwb. (Hanpaku 3:2, 12-19) Yog li ntawd, peb yuav tsum txav ze rau Vajtswv thiab tso siab rau nws tamsim no. (2 Petus 2:9) Yog koj ua li no ces txawm yuav muaj xwm dabtsi puag ncig koj los koj yuav tsis ntshai. Koj yuav hais tau ib yam li Davi hais no: “Kuv muab [Yehauvas] tso rau ntawm kuv lub hauv ntej tsis tu li. Vim nws nyob ntawm kuv sab xis kuv thiaj tsis ua zog.”​—Ntawv Nkauj 16:8.

9. (1) Raws li Yauhas 6:44, Yehauvas tau ua li cas? (2) Vim li cas thaum peb ntsib lwm tus Timkhawv peb ho zoo siab ua luaj?

⁹ Thawj zaug koj ntsib ib tug neeg uas tsis paub qhov tseeb, tej zaum koj tsuas paub nws lub npe thiab nws lub ntsej muag xwb. Tiamsis thaum koj ntsib ib tug uas paub qhov tseeb tsis zoo li ntawd. Koj yeej paub tias nws hlub Yehauvas. Twb yog Yehauvas pom nws  muaj ib qho zoo Yehauvas thiaj rub nws los teev tiam Yehauvas. (Nyeem Yauhas 6:44.) Txawm tus neeg ntawd nyob qhovtwg tuaj thiab loj hlob li cas los koj twb paub ntau yam txog nws. Nws los kuj paub ntau yam txog koj thiab!

10, 11. Yehauvas Cov Timkhawv puavleej muaj dabtsi, thiab koj xav li cas xwb?

¹⁰ Thaum koj ntsib ib tug Timkhawv, txawm neb nyias hais nyias ib yam lus los neb ob leeg puavleej muaj “tus nplaig dawb nplaig huv” lossis paub qhov tseeb ib yam nkaus. (Xefaniya 3:9) Neb puavleej ntseeg Yehauvas, coj tib txoj kevcai, thiab muaj tib txojkev vam khom rau yav tom ntej. Vim li no, neb ib leeg thiaj tso siab tau rau ib leeg thiab thiaj muaj tau kev sib raug zoo mus ib txhis.

¹¹ Twb yog li no, koj thiaj hais tau tias koj muaj cov phoojywg zoo tshaj plaws vim koj teev tiam Yehauvas. Koj yeej muaj phoojywg coob thoob plaws qab ntuj uas koj tseem tsis tau ntsib! Xav seb puas muaj dua ib pab neeg twg uas muaj phoojywg coob thiab sib raug zoo npaum li Yehauvas Cov Timkhawv?

12. Koj muaj tau tej hom phiaj zoo twg?

¹² Nyeem Laj Lim Tswvyim 11:9–12:1. Koj puas muaj hom phiaj? Tej zaum koj xav nyeem phau Vajlugkub txhua txhua hnub, xav kom hajyam paub teb lossis cev lus qhuab qhia thaum mus kev sib txoos. Tej zaum koj xav kom hajyam txawj siv phau Vajlugkub thaum mus tshaj tawm. Koj puas zoo siab thaum koj ua tau zoo lossis thaum lwm tus qhuas koj? Koj yeej zoo siab! Vim li cas? Vim tias koj ua raws nraim li Yehauvas xav kom koj ua, ib yam li Yexus ua thiab.​—Ntawv Nkauj 40:8; Paj Lug 27:11.

13. Ua cas kev teev tiam Vajtswv ho zoo tshaj tej hom phiaj hauv lub qab ntuj no?

¹³ Thaum koj tau hau ntsoov ua Yehauvas tes haujlwm, koj yuav muaj kev zoo siab thiab ua tau lub neej muaj qabhau dua. Povlauj hais tias: “Cia li nyob ruaj khov, tsis txhob ywj fab ywj fwj, cia li ua tus Tswv tes haujlwm puv npo txhua lub sijhawm thiab paub tias tej haujlwm uas nej ua rau hauv tus Tswv tsis tag dawb tag do.” (1 Khaulee 15:58) Thaum tibneeg tau hau ntsoov rau tej hom phiaj hauv lub qab ntuj no, xws li khwv nyiaj khwv txiaj lossis ua kom lawv muaj koob nto npe ces txawm tias lawv yuav vam meej npaum li cas los, lawv yeej tsis muaj kev zoo siab tiag tiag. Lawv zoo li lub khauj khaum uas sab hauv du dais thiab qhuav qhawv xwb. (Luka 9:25) Vajntxwv Xalaumoo tus qauv qhia rau peb tias yeej muaj tseeb li no tiag.​—Loos 15:4.

14. Tej uas Xalaumoo ua qhia tau li cas rau peb?

¹⁴ Xalaumoo yog ib tug uas nplua nuj thiab muaj hwjchim tshaj plaws hauv qab ntuj no, nws hais rau nws tus kheej tias: “Cia kuv sim kev lomzem saib yuav zoo siab npaum li cas.” (Laj Lim Tswvyim 2:1-10, TMZ) Nws thiaj ua vaj ua tsev loj, tsim tej vaj thiab vaj paj zoo zoo nkauj, thiab ua txhua yam uas nws lub siab ntshaw. Nws puas txaus siab thiab zoo siab rau tej ntawd? Thaum nws xav txog tej nws tau ua, nws hais tias: “Saib maj, txhua yam kuj qhuav qhawv . . . xwb.” Thiab nws hais ntxiv tias: “Tsis tau qabhau dabtsi li.” (Laj Lim Tswvyim 2:11) Koj twb paub li no lawm, koj puas tseem xav ua li Xalaumoo ua?

15. Raws li Ntawv Nkauj 32:8, vim li cas koj yuav tsum muaj kev ntseeg, thiab kev ntseeg yuav pab tau koj li cas?

¹⁵ Muaj ib txhia tsis pom dej dag ces siab tsis nqeg. Tiamsis Yehauvas tsis xav kom koj raug li cov ntawd. Nws xav kom koj mloog nws lus thiab ua li nws hais. Koj yuav tsum muaj kev  ntseeg koj thiaj ua tau li nws hais. Yog koj mloog Vajtswv lus koj yeej yuav tsis xav txog lig. Thiab Yehauvas yeej yuav nco ntsoov “qhov uas [koj] hlub Vajtswv lub npe.” (Henplais 6: 10) Yog li ntawd, kavtsij rau siab ntso kawm kom koj txojkev ntseeg ruaj khov. Yog koj ua li no, koj yuav paub txiav txim siab zoo thiab koj yuav pom tias koj Leej Txiv uas nyob saum ntuj yeej xav kom koj tau lub neej zoo tiag.​—Nyeem Ntawv Nkauj 32:8.

16. Vim li cas koj yuav tau saib kev ywj pheej kom muaj nuj nqes thiab yog koj muaj tswvyim kev ywj pheej yuav pab tau koj li cas?

¹⁶ Povlauj sau tias: “Yehauvas lub hwj huam nyob qhovtwg, kev ywj pheej nyob qhov ntawd.” (2 Khaulee 3:17, NW) Yehauvas nyiam kev ywj pheej, thiab nws tsim kom koj nyiam kev ywj pheej ib yam li nws. Tiamsis nws xav kom koj muaj tswvyim xwv txojkev ywj pheej thiaj tiv thaiv tau koj. Tej zaum koj tej npoj saib duab liab qab, ua kev nkauj kev nraug, ua si phov siav, haus yeeb haus tshuaj, lossis haus dej haus cawv ntau dhau. Tej zaum thaum thawj yuav zoo li lomzem thiab ntxim siab kawg li. Tiamsis thaum kawg lawv tsuas kis tau kab mob, quav yeeb quav tshuaj, quav dej quav cawv, tseem raug ploj raug tuag los kuj muaj. (Kalatia 6:7, 8) Cov hluas uas mus ua tej no, lawv xav tias lawv muaj kev ywj pheej, tiamsis tsis yog li ntawd.​—Titau 3:3.

17, 18. (1) Ua li cas peb ho muaj kev ywj pheej yog peb mloog Vajtswv lus? (2) Ua cas Adas thiab Eva nkawd tseem nyob ywj pheej tshaj tibneeg niaj hnub nimno?

¹⁷ Yog peb mloog Yehauvas lus ces yeej zoo dua rau peb. Peb yuav tsis muaj mob muaj nkeeg tiamsis yuav tau nyob ywj pheej tiag tiag. (Ntawv Nkauj 19:7-11) Yog koj muaj tswvyim es ua raws nraim li Vajtswv tej kevcai thiab hauv paus ntsiab lus uas zoo kawg nkaus ces Vajtswv thiab koj niam koj txiv yuav pom tias koj yog ib tug neeg paub tab. Koj niam koj txiv yuav tso siab rau koj thiab pub koj muaj kev ywj pheej ntau dua qub. Tsis tas li ntawd xwb, Yehauvas yuav pub txojkev ywj pheej uas zoo kawg nkaus rau nws cov tub qhe ncaj ncees txhua leej txhua tus. Thaum ntawd lawv “yuav los nyob ywj pheej thiab nrog Vajtswv cov menyuam tau koob meej.”​—Loos 8:21.

¹⁸ Thaum Adas thiab Eva nkawd nyob hauv lub vaj Edee, nkawd muaj txojkev ywj pheej zoo li ntawd. Vajtswv tsuas txwv tsis pub nkawd ua ib yam xwb. Vajtswv txwv tsis pub nkawd noj tsob ntoo uas nyob hauv plawv vaj cov txiv kiag li. (Chiv Keeb 2:9, 17) Puas yog Vajtswv ua tsis ncaj thiab nruj dhau lawm? Tsis yog. Sim xav seb niaj hnub no tej nom tej tswv tau rhawv kevcai ntau npaum li cas thiab yuam kom lwm tus coj rawv? Tiamsis Yehauvas tsuas rhawv 1 txoj kevcai rau Adas thiab Eva nkawd xwb.

19. Yehauvas thiab Yexus nkawd tau ua li cas xwv peb thiaj tau nyob ywj pheej?

¹⁹ Tej uas Yehauvas ua pub rau peb qhia tias nws muaj tswvyim heev. Nws tsis tau tsa ntau txoj kevcai rau peb coj tiamsis nws ua siab ntev qhuab qhia kom peb txawj coj txoj kevcai sib hlub. Nws qhia kom peb ua raws li nws tej hauv paus ntsiab lus thiab kom peb ntxub  txojkev limhiam. (Loos 12:9) Thaum nws Leej Tub Yexus cev nws zaj lus qhuab qhia saum roob, nws pab peb to taub tias yog vim li cas tibneeg thiaj ua phem. (Mathai 5:27, 28) Thaum Yexus ua Vajntxwv kav Vajtswv lub Nceeg Vaj lawd, nws tseem yuav qhia ntxiv xwv peb thiaj nyiam qhov zoo es ntxub qhov phem ib yam li nws. (Henplais 1:9) Yexus kuj yuav pab kom peb txojkev xav thiab cev nqaij daim ntawv zoo tiav log. Xav seb peb yuav zoo siab npaum li cas thaum peb lub siab tsis ntxias peb mus ua phem lossis peb tsis raug kev txom nyem vim peb tsis yog neeg txhaum lawm. Thaum ntawd, peb txhua leej txhua tus yuav tau “nyob ywj pheej” li Vajtswv tau cog tseg tiag.

20. (1) Yehauvas muaj kev ywj pheej tiamsis nws coj li cas? (2) Koj yuav xyaum Yehauvas li cas?

²⁰ Thaum peb nyob hauv lub ntiajteb tshiab los, tsis yog peb yuav ua ywj siab. Vim li cas? Rau qhov peb yuav tsum hlub Vajtswv thiab hlub lwm tus es ua kom haum luag siab thiab. Yog peb muaj kev hlub ces peb yuav xyaum tau Yehauvas. Yehauvas yeej muaj kev ywj pheej ua tau ib puas tsav yam li nws lub siab xav, tiamsis nws ua txhua yam raws li txojkev hlub, xws li tej uas nws ua pub rau peb. (1 Yauhas 4:7, 8) Twb yog li no, peb thiaj hais tias yog peb xyaum tau li Vajtswv ces peb yuav muaj kev ywj pheej tiag tiag.

21. (1) Davi xav li cas txog Yehauvas? (2) Zaj tom ntej peb yuav tham txog dabtsi?

²¹ Koj puas ris Yehauvas txiaj ntsig rau ib puas tsav yam zoo uas nws tau muab pub rau koj? Nws tau pub kom koj muaj zaub mov ntawm sab kev ntseeg noj tsau npo, tej phoojywg zoo, tej hom phiaj zoo, txojkev ywj pheej, thiab ntau tsav ntau yam. (Ntawv Nkauj 103:5) Tej zaum koj yuav xav ib yam Davi uas thov Vajtswv hauv Ntawv Nkauj 16:11 tias: “Koj qhia txojkev uas tau txojsia rau kuv paub, muaj kev zoo siab xyiv fab puv npo rau ntawm koj lub xubntiag, muaj kev zoo siab mus ib txhis nyob hauv koj txhais tes xis.” Zaj tom ntej peb yuav tham txog tej lus nyiaj lus kub hauv Ntawv Nkauj 16. Tej no yuav pab kom koj muaj tau lub neej zoo tshaj plaws!