TUS muam Di-ana (Diana) muaj 80 tawm xyoo lawm, tau ob peb xyoos no nws ntsib ntau yam kev ceeblaj. Nws tus txiv uas mob Axaimaw (Alzheimer) nyob hauv tsev laus tau tas sim neej. Nws 2 tug tub los tuag tag lawm thiab. Nws los tseem mob kheeb xawm (cancer) hauv mis thiab. Txawm li ntawd los, thaum cov kwvtij nkauj muam pom Di-ana tom kev sib txoos lossis mus qhia Vajlugkub, nws tseem muaj lub ntsej muag luag ntxhi xyiv fab hlo.

Yauhas (John) ua ib tug ncig xyuas cov koom txoos tau tshaj li 43 lub xyoos. Nws nyiam tes haujlwm no heev, tsis muaj ib tes uas nws nyiam tshaj ntawd lawm. Tiamsis vim nws ib tug txheeb ze muaj mob, nws thiaj tawm los tu tus txheeb ze ntawd. Thaum cov kwvtij nkauj muam uas paub nws pom nws tom tej rooj sib txoos, lawv pom tias nws yeej tsis tau hloov li. Nws tseem muaj lub ntsej muag luag ntxhi li qub.

Ua li cas Di-ana thiab Yauhas nkawd tseem muaj taus kev xyiv fab? Ib tug uas muaj kev ceeblaj puas yuav muaj taus kev xyiv fab tiag? Tus neeg uas plam tes haujlwm nws nyiam tshaj plaws lawd yuav muaj tau kev xyiv fab li cas? Phau Vajlugkub qhia tias: “Cov neeg ncaj ncees zoo siab xyiv fab rau hauv [Yehauvas].” (Ntawv Nkauj 64:10) Yuav kom peb to taub lub ntsiab no zoo, peb yuav tsum paub seb dabtsi thiaj ua tau rau peb xyiv fab thiab dabtsi ua tsis tau.

Muaj tej yam yeej ua tau rau tibneeg xyiv fab. Xws li, thaum ob tug hluas nkauj hluas nraug sib sau los ua neej, lossis thaum ob niam txiv yug tau ib tug menyuam. Tus uas tau txais ib tes haujlwm tshiab ua rau Yehauvas kuj muaj kev zoo siab xyiv fab kawg nkaus li thiab. Tej ntawd ua rau peb xyiv fab rau qhov tej ntawd yog tej koob hmoov uas Yehauvas pub rau peb. Nws muab txij muab nkawm, muab metub menyuam, thiab muab haujlwm rau peb ua hauv nws lub koom haum.​—Chiv Keeb 2:18, 22; Ntawv Nkauj 127:3; 1 Timaute 3:1.

Tiamsis tu siab kawg uas tej yam zoo li no tsuas nyob ib vuag dua xwb. Yog vim li cas? Rau qhov tej txij nkawm ib leeg txawj ntxeev siab rau ib leeg lossis ib tug kuj tuag tso ib tug tseg thiab. (Exekhee 24:18; Hauxeya 3:1) Tej metub menyuam txawj tsis mloog niam txiv lossis Vajtswv lus, ib txhia kuj raug  rho tawm lawm thiab. Zoo li Xamuyee ob tug tub uas tsis muaj siab teev tiam Yehauvas tiag tiag. Davi kuj ntsib ntau yam teeb meem hauv nws lub cuab lub yig vim nws ua txhaum nrog Npasenpa. (1 Xamuyee 8:1-3; 2 Xamuyee 12:11) Thaum muaj tej no, yeej tsis muaj kev xyiv fab, tsuas muaj kev nyuaj siab ntxhov plawv xwb.

Tsis tas li ntawd xwb, tej thaud peb kuj yuav tau tso tes haujlwm uas peb ua rau Yehauvas tseg vim peb muaj mob muaj nkeeg lossis yuav tau saib xyuas peb tsev neeg, lossis vim lub koom haum hloov haujlwm. Coob tus uas tau tso lawv tes haujlwm tseg li no hais tias lawv tseem nco ntswb ntsoov thaum lawv tuav lawv tes haujlwm es lawv xyiv fab npaum li cas.

Peb pom tias muaj tej yam tsuas ua rau peb xyiv fab ib vuag dua xwb. Puas muaj ib yam dabtsi uas yuav ua rau peb xyiv fab tas mus li? Yeej muaj, rau qhov txawm Xamuyee, Davi, thiab coob tus tau ntsib kev nyuaj siab ntxhov plawv los lawv tseem muaj taus kev xyiv fab.

Yexus paub zoo tias kev xyiv fab yog li cas tiag. Phau Vajlugkub hais tias ua ntej Yexus los rau hauv ntiajteb, nws “xyiv fab rau ntawm [Yehauvas] xubntiag tsis tu li.” (Paj Lug 8:30) Tiamsis thaum nws los rau hauv ntiajteb no, kuj muaj zaum puav uas nws raug kev nyuaj siab heev. Txawm li ntawd los, nws ua nws Leej Txiv tes haujlwm zoo siab xyiv fab hlo. (Yauhas 4:34) Ua li, thaum nws raug tsim txom hnyav heev ne? Phau Vajlugkub hais tias: “Nws tiv thev tus [ncej] ntoo kom thiaj tau txojkev zoo siab.” (Henplais 12:2) Cia peb kawm seb Yexus hais tias 2 yam twg thiaj ua rau peb muaj kev xyiv fab tiag.

Muaj ib zaug, thaum Yexus 70 tus thwjtim mus tshaj tawm rov los, lawv zoo siab xyiv fab kawg rau txhua yam uas lawv tau ua, xws li ntiab dab tawm. Tiamsis Yexus hais rau lawv tias: “Tsis txhob zoo siab rau qhov uas tej dab nyob hauv nej qab kev tswjhwm. Cia li zoo siab rau qhov uas nej lub npe sau cia rau hauv ntuj ceeb tsheej lawm.” (Luka 10:1-9, 17, 20) Yeej muaj tseeb li Yexus hais ntawd, qhov uas zoo siab xyiv fab vim ua rau Yehauvas zoo siab tseem ceeb dua tej haujlwm uas peb tuav hauv nws lub koom haum.

Muaj dua ib zaug, thaum Yexus tabtom qhia ib pab neeg, ib tug pojniam Yudai uas nyiam Yexus zaj lus qhia los hais rau Yexus tias ntshe nws niam yuav nyob kaj siab lug xyiv fab hlo vim nws muaj ib tug tub tsim txiaj heev. Tiamsis Yexus hais rau nws  tias: “Cov uas hnov Vajtswv tej lus thiab coj raws nraim thiaj yog cov uas tau nyob kaj siab lug.” (Luka 11:27, 28) Thaum peb cov menyuam ua tau zoo yeej ua rau peb kaj siab thiab muaj kev xyiv fab. Tiamsis qhov uas ua tau rau peb xyiv fab tshaj yog qhov uas peb mloog Yehauvas lus thiab muaj ib txojkev sib raug zoo nrog nws.

Thaum peb paub tias Yehauvas pom zoo tej uas peb ua yeej ua rau peb xyiv fab heev. Tej uas peb raug yeej ua rau peb nyuaj siab tiag, tiamsis tej ntawd yeej tshem tsis tau peb txojkev xyiv fab mus. Thaum peb thev dhau tej kev nyuaj siab yimhuab yuav ua rau peb xyiv fab. (Loos 5:3-5) Tsis tas li ntawd xwb, Yehauvas pub nws lub hwj huam rau cov uas tso siab plhuav rau nws, thiab kev xyiv fab yog ib feem ntawm lub hwj huam. (Kalatia 5:22) Qhov no pab tau peb to taub tias yog vim li cas Ntawv Nkauj 64:10 thiaj hais tias: “Cov neeg ncaj ncees zoo siab xyiv fab rau hauv [Yehauvas].”

Twb yog vim li no txawm Di-ana thiab Yauhas nkawd ntsib ntau yam kev nyuaj siab ntxhov plawv los nkawd tseem muaj kev xyiv fab. Di-ana hais tias: “Kuv muab Yehauvas ua kuv lub chaw cawm siav ib yam li tus menyuam muab nws niam nws txiv ua nws lub chaw cawm siav.” Nws hais ntxiv tias: “Kuv ntseeg tias twb yog Yehauvas foom koob hmoov rau kuv es kuv thiaj muaj peevxwm mus tshaj tawm luag ntxhwb ntxhi tsis tu ncua.” Dabtsi ho pab tau Yauhas muaj kev xyiv fab thiab rau siab ntso ua Vajtswv tes haujlwm tom qab nws tsis tau tuav tes haujlwm saib xyuas thaj tsam lawd? Nws hais tias: “Txij xyoo 1998 uas kuv tau qhia txojkev kawm Ministerial Training School los, kuv rau siab kawm Vajlugkub kawg li.” Nws piav tias vim nws thiab nws pojniam nkawd yeej ib txwm zoo siab hlo ua txhua yam uas Yehauvas txib nkawd ua, thaum nkawd lub neej hloov thiaj tsis nyuaj rau nkawd ua luaj twg. Yauhas hais ntxiv tias: “Txhua yam wb ua, wb yeej tsis xav txog lig li.”

Coob tus kuj pom tseeb li Ntawv Nkauj 64:10 hais thiab. Muaj ob niam txiv uas ua haujlwm hauv Npe-ee tshaj li 30 lub xyoos hauv tebchaws U.S.A. raug txib mus ua ob tug tho kev tshwj xeeb rau lwm qhov lawm. Nkawd lees tias: “Yus yeej nyuaj siab heev thaum yus plam tej yam uas yus nyiam,” tiamsis nkawd hais ntxiv tias: “Yus yuav nyuaj siab tas mus li tsis tau.” Thaum nkawd mus txog lub koom txoos tshiab, nkawd txawm pib nrog sawvdaws mus qhia Vajlugkub ua ke. Nkawd hais tias: “Wb thov Vajtswv tsi ntsees txog tej yam uas wb cheem tsum. Thaum wb pom nws teb wb tej lus thov txhawb tau wb zog thiab ua rau wb xyiv fab kawg li. Tsis ntev xwb, ib txhia hauv lub koom txoos kuj pib tho kev, Yehauvas tseem foom koob hmoov rau wb qhia Vajlugkub rau 2 tug uas kawm tau zoo heev thiab.”

Yeej tsis yoojyim xyiv fab tas mus li. Muaj tej lub sijhawm peb yeej yuav ntsib kev nyuaj siab. Tiamsis Yehauvas cog lus tseg rau peb hauv Ntawv Nkauj 64:10 tias txawm peb yuav ntsib kev nyuaj siab dabtsi los yog peb muab siab npuab nws ruaj nreeg, peb yeej yuav “zoo siab xyiv fab rau hauv [Yehauvas].” Xav ntsoov rau thaum Yehauvas cov lus cog tseg txog “lub ntuj tshiab thiab lub ntiajteb tshiab” yuav muaj tiav. Thaum ntawd txhua leej txhua tus yuav zoo tiav log thiab yuav “zoo siab thiab xyiv fab mus ib txhis” rau txhua yam uas Yehauvas yuav ua.​—Yaxaya 65:17, 18.

Lub sijhawm ntawd ntshe yuav zoo siab tshaj plaws li. Peb yuav tsis muaj mob muaj nkeeg thiab txhua tagkis yuav cus plaws xwb. Tej teeb meem uas niaj hnub no peb muaj yuav ploj ntais mus, peb yuav tsis muaj kev nyuaj siab ib zaug ntxiv li lawm. Yehauvas cog lus tias: “Tej uas muaj nyob yav thaum ub los yuav tsis nco thiab tsis xav txog dua li lawm.” Cov peb hlub uas tau tas sim neej lawd los yuav ciaj sawv rov los. Phau Vajlugkub hais tias Yexus tau tsa ib tug mentxhais muaj 12 xyoos ciaj sawv rov los. Thaum ntawd nws niam nws txiv nkawd phimhwj heev. (Malakau 5:42) Peb yuav muaj kev zoo siab xyiv fab ib yam li ntawd. Tshuav tsis ntev xwb, txhua leej txhua tus hauv ntiajteb no yuav ncaj ncees huvsi thiab yuav “zoo siab xyiv fab rau hauv [Yehauvas]” mus ib txhiab ib txhis li.