1, 2. Tibneeg xav tias vaj kaj siab zoo li cas?

COOB leej ntau tus kwvtij nkauj muam uas nyob rau ntau lub tebchaws tau mus rooj sib txoos hauv lub nroog Txhauj (Seoul), tebchaws Kaus Lim. Thaum sawvdaws tawm zom zaws rov mus tsev, cov kwvtij nkauj muam Kaus Lim txawm los vij nkaus lawv. Tus twg los tus los kua muag tsis xav sib ncaim li. Lawv ib leeg yoj teg rau ib leeg thiab hais tias: “Peb mam sib ntsib hauv Vaj Kaj Siab!” Koj xav lawv hais txog lub vaj kaj siab twg?

² Niaj hnub nimno lo lus “vaj kaj siab” ua rau tibneeg xav txog ntau yam. Ib txhia hais tias vaj kaj siab ces tsuas yog npau suav xwb. Lwm cov ho hais tias vaj kaj siab yog ib qho chaw zoo kawg nkaus uas muaj kev zoo siab xyiv fab. Koj xav lub Vaj Kaj Siab zoo li cas? Koj puas cia siab tias yuav muaj lub Vaj Kaj Siab tiag?

3. Thawj zaug uas phau Vajlugkub hais txog ib lub vaj kaj siab yog nyob rau qhovtwg?

³ Phau Vajlugkub tham txog ib lub vaj kaj siab uas muaj nyob txheej thaud thiab ib lub uas tseem yuav muaj rau yav tom hauv ntej. Thawj zaug uas peb nyeem txog ib lub vaj kaj siab yog nyob hauv thawj phau ntawv hauv phau Vajlugkub hauv Chiv Keeb 2:8. Nqe no hais txog ‘lub vaj Edee.’ Lo lus Henplais “Edee” txhais tias  “Kaj Siab.” Lub vaj ntawd yeej yog ib qho chaw kaj siab tiag tiag li thiab zoo nkauj tshaj plaws, muaj txiv hmab txiv ntoo nrw niab, neeg thiab tsiaj nyob tau ua ke tso siab plhuav tsis muaj ib tug ua phem rau ib tug.​—Chiv Keeb 1:29-31.

4. Ua li cas peb thiaj hais tias lub vaj Edee yog ib lub vaj kaj siab?

⁴ Lo lus Henplais “vaj” lus Kili muab txhais tias phaladai (pa·raʹdei·sos). Muaj ib phau ntawv tshawb fawb (Cyclopaedia, M’Clintock thiab Strong) hais tias thaum ib tug neeg Kili hnov lo lus phaladai, nws xav txog ib lub vaj loj dav thiab zoo nkauj heev uas tsis muaj ib yam dabtsi ua rau ib tug twg raug mob, muaj txiv hmab txiv ntoo dai ua nrw niab thiab muaj dej ntws ntshiab si, thiab muaj tsiaj nog zaub ua ke ntawm tej ntug dej uas nroj tsuag ntsuab xwb xiab.​—Muab piv rau Chiv Keeb 2:15, 16.

5, 6. Vim li cas Adas thiab Eva nkawd thiaj tsis tau nyob hauv ib lub vaj kaj siab lawm, thiab ib txhia ho xav li cas txog lub Vaj Kaj Siab yav tom hauv ntej?

⁵ Yehauvas muab Adas thiab Eva nkawd tso rau hauv ib lub vaj kaj siab zoo li ntawd. Tiamsis vim nkawd tsis mloog Yehauvas lus, Yehauvas thiaj tsis pub nkawd thiab nkawd cov menyuam nyob hauv lub vaj kaj siab ntawd lawm. (Chiv Keeb 3:23, 24) Txawm tsis muaj tibneeg nyob hauv lub vaj kaj siab ntawd lawm los, zoo li lub vaj ntawd tseem nyob los txog ntua Nau-a tiam thaum dej dag nyab ntiajteb.

⁶ Ib txhia xav tias, ‘Puas yuav rov muaj ib lub vaj kaj siab nyob hauv ntiajteb no dua?’ Puas muaj pov thawj dabtsi qhia tias yuav muaj tiag? Yog koj vam tias ib hnub twg koj yuav tau nrog cov koj hlub nyob hauv lub Vaj Kaj Siab, vim li cas koj thiaj vam li ntawd? Koj piav puas tau tias yog vim li cas peb thiaj paub tias yav tom hauv ntej yuav muaj lub Vaj Kaj Siab tiag?

7, 8. (1) Vajtswv tau cog lus li cas rau Aplahas? (2) Tej zaum Vajtswv cov lus cog tseg yuav ua rau Aplahas xav txog dabtsi?

⁷ Phau Vajlugkub yeej teb tau tej lus nug txog lub Vaj Kaj Siab, rau qhov phau Vajlugkub yog Yehauvas phau thiab nws yog tus uas tsim lub vaj kaj siab puag thaum chiv keeb. Saib seb Vajtswv tau hais li cas rau nws tus phoojywg Aplahas. Vajtswv hais rau Aplahas tias Aplahas yuav muaj tub muaj ki coob “yam li tej xuab zeb ntawm ntug hiavtxwv.” Tom qab ntawd, Yehauvas cog lus tseg rau Aplahas tias: “Ib tsoom tebchaws hauv lub ntiajteb yuav tau koob hmoov ntawm koj caj ces, vim koj mloog kuv tej lus.” (Chiv Keeb 22:17, 18) Tom qab no, Vajtswv kuj tau cog lus ib yam li ntawd rau Aplahas tus tub thiab nws tus xeeb ntxwv.​—Nyeem Chiv Keeb 26:4; 28:14.

⁸ Phau Vajlugkub tsis hais ib zaug li tias Aplahas xav tias nws yuav tau mus nyob ib lub vaj kaj siab saum ntuj. Thaum Vajtswv cog lus tias “ib tsoom tebchaws hauv lub ntiajteb” yuav tau koob hmoov, Aplahas yeej ntseeg tias tej koob hmoov ntawd yog nyob rau hauv ntiajteb. Qhov no yog ib qho pov thawj uas qhia tias yuav muaj lub Vaj Kaj Siab hauv ntiajteb no. Tiamsis puas muaj lwm qhov pov thawj ntxiv hauv phau Vajlugkub?

9, 10. Tej lus cog tseg twg pab tau peb muaj kev ntseeg tias yav tom hauv ntej yuav muaj lub Vaj Kaj Siab?

⁹ Vajtswv tshoov Aplahas tus tub xeeb ntxwv Davi kom sau txog lub sijhawm tom hauv ntej uas “cov neeg limhiam yuav tsis muaj nyob lawm.” (Ntawv Nkauj 37:1, 2, 10) Tiamsis “cov ncaj ncees yuav tau lub [ntiajteb] ua lawv teej lawv tug, thiab tau nyob rau hauv mus ib txhis.” (Ntawv Nkauj 37:11, 29;  2 Xamuyee 23:2) Koj sim xav seb cov lus cog tseg no pab tau cov uas xav ua li Vajtswv lub siab nyiam li cas? Lawv ntseeg tias muaj ib hnub twg tsuas yuav muaj cov uas ncaj ncees nyob rau hauv lub ntiajteb no lawm xwb thiab lub ntiajteb yuav rov ua ib lub vaj kaj siab zoo li lub vaj Edee.

¹⁰ Ntev mus ntev tuaj, cov Yixayee feem coob tsis yuav Yehauvas kav lawv thiab tso tseg tsis coj raws li txojkev pe hawm tseeb lawm. Yehauvas thiaj cia cov Npanpiloo tuaj tawm tsam lawv, muab lawv lub tebchaws ua puam tsuaj tag, thiab coj coob leej mus ua cev qhev. (2 Vaj Keeb Kwm 36:15-21; Yelemi 4:22-27) Tiamsis cov uas cev Vajtswv lus tau cev lus tias tom qab 70 lub xyoos lawv yuav tau rov los rau lawv teb lawv chaw. Tau muaj raws nkaus li cov lus faj lem ntawd. Tiamsis cov lus faj lem ntawd kuj tseem ceeb rau peb tiam no thiab. Thaum peb kawm txog cov lus faj lem ntawd, ua tib zoo kawm seb tej ntawd pab tau peb li cas txog lub Vaj Kaj Siab yav tom hauv ntej.

11. Yaxaya 11:6-9 twb muaj tiav 1 zaug rau thaum twg lawm, tiamsis peb kuj xav paub li cas ntxiv thiab?

¹¹ Nyeem Yaxaya 11:6-9. Vajtswv kom tus cev lus Yaxaya hais rau cov Yixayee tias thaum lawv rov los rau lawv lub qub teb qub chaw, lawv yuav nyob kaj siab lug, tsis muaj ib tug tsiaj los ib tug neeg yuav ua nruj ua tsiv rau lawv. Txhua leej txhua tus, tsis hais tus laus tus hluas yuav nyob tso siab plhuav. Qhov no puas ua rau koj xav txog lub vaj Edee uas tsuas muaj kev thaj yeeb nyab xeeb xwb? (Yaxaya 51:3) Yaxaya kuj cev lus tias tag nrho lub ntiajteb, tsis yog haiv neeg Yixayee xwb, “yuav paub txog [Yehauvas] thoob plaws, ib yam li dej puv nkaus nruab hiavtxwv.” Thaum twg mam muaj li no? Nqe no qhia tias tseem yuav muaj rau yav tom hauv ntej.

12. (1) Cov Yixayee uas rov tim Npanpiloo los tau txais tej koob hmoov twg? (2) Dabtsi qhia rau peb tias Yaxaya 35:5-10 tseem yuav muaj tiav rau yav tom hauv ntej thiab?

¹² Nyeem Yaxaya 35:5-10. Yehauvas kom Yaxaya cev lus ntxiv tias thaum cov Yixayee rov tim Npanpiloo los yuav tsis muaj tsiaj lossis neeg ua nruj ua tsiv rau lawv. Yaxaya hais tias lawv lub tebchaws yuav muaj qoob loo nplua mias rau qhov thaj av yuav muaj dej ywg ib yam li lub vaj Edee. (Chiv Keeb 2:10-14; Yelemi 31:12) Zaj lus faj lem no puas yog muaj tiav rau cov Yixayee tiam xwb? Zaj lus faj lem no hais tias tus dig muag, tus ceg tawv, thiab tus lag ntseg puavleej yuav zoo huvsi. Tej no tsis tau muaj tshwm sim rau thaum cov Yixayee rov tim Npanpiloo los. Yog li ntawd, Vajtswv qhia tias yav tom hauv ntej nws yuav kho txhua yam kev mob kev nkeeg huvsi.

13, 14. Yaxaya 65:21-23 muaj tiav li cas thaum cov Yixayee rov tim Npanpiloo los, tiamsis tseem tshuav dabtsi tsis tau muaj tiav thiab? (Saib thawj daim duab hauv zaj no.)

¹³ Nyeem Yaxaya 65:21-23. Thaum cov Yixayee rov los txog lawv qub teb qub chaw, tsis muaj zoo vaj zoo tsev nyob thiab zoo liaj zoo teb ua. Tiamsis vim Vajtswv foom koob hmoov rau lawv tsis ntev xwb lawv kuj peem tau tag lawm. Ntshe sawvdaws yuav zoo siab xyiv fab heev thaum lawv tau nyob tej vaj tej  tsev uas lawv ua thiab tau noj tej qoob tej loo uas lawv cog!

¹⁴ Raws li zaj lus faj lem no, peb lub “hnub nyoog yuav zoo yam li tej ntoo.” Muaj tej hom ntoo yeej nyob ntev heev, txog ntau txhiab xyoo. Yuav kom tibneeg nyob tau ntev npaum li ntawd, lawv yuav tsum tsis txhob muaj mob muaj nkeeg. Thaum lawv tau nyob kaj siab lug zoo siab hlo hauv ib qho chaw zoo nkauj npaum li Yaxaya cov lus faj lem ces yuav zoo tiag tiag li, yuav yog ib lub vaj kaj siab! Thaum ntawd zaj lus faj lem no mam muaj tiav.

15. Raws li phau Yaxaya, tseem yuav muaj tej koob hmoov twg?

¹⁵ Ua tib zoo xav txog zaj lus faj lem uas peb nyuam qhuav kawm tas los no seb hais li cas txog lub Vaj Kaj Siab yav tom hauv ntej. Lub sijhawm ntawd tsuas yuav muaj cov uas Yehauvas foom koob hmoov rau lawm xwb. Yuav tsis muaj leejtwg ntshai tsam tsiaj lossis neeg ua nruj ua tsiv rau lawv. Yuav tsis muaj leejtwg dig muag, ceg tawv, thiab lag ntseg li lawm. Txhua tus yuav muaj vaj muaj tsev nyob thiab yuav muaj liaj muaj teb ua. Lawv lub hnub nyoog yuav ntev tshaj tej ntoo. Yeej muaj pov thawj hauv phau Vajlugkub tias yuav muaj lub Vaj Kaj Siab tiag. Tiamsis tej zaum ib txhia uas peb ntsib yuav hais tias tej lus faj lem ntawd tsis txhais tias yuav muaj lub Vaj Kaj Siab hauv ntiajteb no. Koj yuav teb li cas? Puas muaj pov thawj dabtsi qhia tias yuav muaj lub Vaj Kaj Siab hauv ntiajteb no tiag? Yexus cov lus ua tau pov thawj tias yeej yuav muaj tiag.

16, 17. Yexus tham txog lub Vaj Kaj Siab rau thaum twg?

¹⁶ Yexus tsis muaj txim dabtsi tiamsis lawv muab nws dai saum tus ncej ntoo nrog ob tug tub sab Yudai, ib tug nyob Yexus ib sab. Nkawd ib tug paub tias Yexus yog ib tug vajntxwv, nws txawm hais rau Yexus tias: “Yexus, thaum koj nkag rau hauv koj lub tebchaws thov koj nco txog kuv.” (Luka 23:39-42) Yexus lo lus cog tseg rau tus tub sab no muaj qabhau rau peb lub neej yav tom hauv ntej. Tau muab Yexus cov lus no sau rau hauv Luka 23:43. Cov neeg tshawb fawb Vajlugkub tus yuav muab nqe no txhais li cas los muaj. Ib txhia muab txhais tias: “Kuv hais tseeb rau koj tias, hnub no koj yeej yuav tau nrog kuv nyob hauv lub Vaj Kaj Siab.” Tiamsis tsis yog txhua tus xav li ntawd. Ua li, thaum Yexus hais tias “hnub no” yog nws hais li cas tiag?

¹⁷ Niaj hnub no ntau yam lus siv tej cim uas qhia tias thaum nyeem ntawv yuav nres li cas lossis muab tej lus hloov chaw kom thaum luag nyeem thiaj nyeem raug lub ntsiab. Tiamsis tej ntaub ntawv Kili txheej thaud tsis tshua siv cim. Yog li ntawd, ib txhia thiaj xav paub tias puas yog Yexus hais tias: “Kuv hais rau koj tias, hnub no koj yeej yuav tau nrog kuv nyob hauv lub Vaj Kaj Siab”? Lossis yog nws hais tias: “Kuv hais rau koj hnub no tias, koj yeej yuav tau nrog kuv nyob hauv lub Vaj Kaj Siab”? Cov txhais Vajlugkub ib txhia tau muab Yexus cov lus txhais raws li lawv xav xwb. Yog koj muab tej Vajlugkub los sib piv koj yuav pom tias ib txhia muab txhais li thawj qhov, ib txhia txhais li qhov tom qab.

18, 19. Dabtsi pab tau peb to taub Yexus cov lus?

¹⁸ Yuav ua li cas peb thiaj to taub Yexus tus nru lus? Cia peb kawm seb Yexus tau hais li cas rau nws cov thwjtim txog nws txojkev tuag. Yexus hais tias: “Neeg leej Tub yuav nyob hauv nruab av peb hnub peb hmos ib yam li ntawd.” Yexus kuj hais tias: “Neeg leej Tub yuav raug muab cob rau hauv neeg txhais tes, thiab lawv yuav muab nws tua pov tseg, mas peb hnub nws yuav raug muab tsa ciaj sawv  rov los.” (Mathai 12:40; 16:21; 17:22, 23; Malakau 10:34) Tus tubtxib Petus ua pov thawj tias yeej tau muaj li ntawd tiag. (Tubtxib Tes Haujlwm 10:39, 40) Yog li ntawd, Yexus tsis tau mus rau hauv lub Vaj Kaj Siab hnub uas Yexus thiab tus tub sab tuag. Phau Vajlugkub hais tias Yexus nyob hauv qhov ntxa tau 3 hnub Vajtswv mam li tsa nws ciaj sawv rov los.​—Tubtxib Tes Haujlwm 2:31, 32. * (Saib cov lus hauv qab taw qhia.)

¹⁹ Yog li no, peb thiaj paub tias thaum Yexus cog lus rau tus tub sab ntawd yog Yexus hais li no: “Kuv hais tseeb rau koj hnub no tias . . .” Txawm nyob rau Mauxe tiam los tibneeg yeej hais lus ib yam li ntawd thiab. Muaj ib zaug Mauxe tau hais tias: “Koj yuav khaws tej lus uas hnub no kuv qhia koj rau hauv koj lub siab.”​—Kevcai 6:6; 7:11; 8:1, 19; 30:15.

20. Puas muaj lwm tus to taub Yexus cov lus li peb thiab?

²⁰ Ib tug yawg txhais Vajlugkub nyob rau sab tebchaws uas thaud Yexus nyob hais tias: “Cov lus Yexus hais mas lo tseem ceeb yog lo ‘hnub no.’ Yexus cov lus yuav tsum muab txhais tias, ‘Kuv hais tseeb rau koj hnub no tias, koj yeej yuav tau nrog kuv nyob hauv lub  Vaj Kaj Siab.’ Yexus cog lus hnub ntawd tiamsis mam muaj tiav rau yav tom hauv ntej.” Tus yawg no kuj hais ntxiv tias cov tibneeg uas nyob rau thaj tsam ntawd ib txwm hais lus li ntawd. Nws hais ntxiv tias: “Hnub no lawv tau cog lus li cas mas lawv yeej yuav ua li ntawd.” Ib phau Vajlugkub Xilias (Syriac) uas sau li 1,600 xyoo dhau los lawd tau muab Yexus cov lus txhais li no: “Amee, kuv hais rau koj hnub no tias koj yuav tau nrog kuv nyob hauv lub Vaj Edee.” Yexus lo lus cog tseg no yeej txhawb tau peb txhua tus lub zog heev.

21. Tus tub sab tsis tau dabtsi, thiab yog vim li cas?

²¹ Thaum Yexus nrog tus tub sab tham txog lub Vaj Kaj Siab, nws tsis yog tham txog ib lub vaj kaj siab nyob saum ntuj. Ua li cas peb thiaj paub li ntawd? Ib qho yog vim tus tub sab ntawd twb tsis paub txog cov lus cog tseg Yexus tau cog rau nws cov tubtxib ncaj ncees tias lawv yuav tau nrog nws ua vajntxwv kav saum ntuj. (Luka 22:29) Tsis tas li ntawd xwb, tus tub sab ntawd twb tsis tau ua kevcai raus dej. (Yauhas 3:3-6, 12) Yog li ntawd, thaum Yexus cog lus rau tus tub sab yuav tsum yog Yexus hais txog ib lub vaj kaj siab hauv ntiajteb no xwb. Tau ntau xyoo tom qab no, tus tubtxib Povlauj ua yog toog pom ib tug txivneej uas “mus puag saum qhovchaw tau zoo nyob kajsiab lug.” (2 Khaulee 12:1-4, VTL) Txawm Povlauj thiab lwm cov tubtxib raug xaiv mus nrog Yexus kav saum ntuj los, Povlauj hais txog ib lub vaj kaj siab rau yav tom hauv ntej. * (Saib cov lus hauv qab taw qhia.) Ua li, lub vaj kaj siab ntawd puas yog nyob rau hauv ntiajteb? Koj puas yuav tau mus nyob rau hauv thiab?

22, 23. Koj cia siab rau dabtsi?

²² Davi hais tias: “Cov ncaj ncees yuav tau lub tebchaws ua lawv teej lawv tug.” (Ntawv Nkauj 37:29; 2 Petus 3:13) Qhov no Davi hais txog thaum txhua tus neeg hauv ntiajteb yuav ua raws li Vajtswv tej hauv paus ntsiab lus ncaj ncees lawm xwb. Yaxaya 65:22 hais tias: “Kuv haiv neeg li hnub nyoog yuav zoo yam li tej ntoo.” Nqe no pab tau peb pom tias cov uas teev tiam Yehauvas hauv lub qab ntuj tshiab yuav nyob txhiab txhiab xyoo xwb. Koj puas xav tias neeg yuav nyob tau ntev npaum li ntawd? Yeej tau, rau qhov Qhia Tshwm 21:1-4 hais tias Vajtswv yuav foom koob hmoov rau noob neej thiab “txojkev tuag yuav tsis muaj dua li lawm.”

²³ Peb paub meej tias phau Vajlugkub qhia li cas txog Vaj Kaj Siab. Adas thiab Eva nkawd muab txojsia nyob mus ib txhis hauv ib lub vaj kaj siab ua poob lawm. Txawm li ntawd los, lub ntiajteb yeej yuav rov ua ib lub vaj kaj siab dua. Zoo li Vajtswv tau cog tseg, nws yuav foom koob hmoov rau tibneeg. Davi hais tias cov siab mos siab muag thiab cov ncaj ncees yuav tau lub ntiajteb ua lawv teej lawv tug thiab yuav tau nyob rau hauv mus ib txhis. Thiab phau Yaxaya kuj pab peb pom tias peb yuav tau nyob kaj siab lug zoo siab hlo hauv lub Vaj Kaj Siab hauv ntiajteb no. Thaum ntawd yuav yog thaum twg? Thaum ntawd yog thaum uas yuav muaj tiav raws li Yexus cov lus cog tseg rau tus tub sab. Koj yeej yuav tau nyob hauv lub Vaj Kaj Siab ntawd thiab. Lub sijhawm ntawd, yuav muaj raws nkaus li cov kwvtij nkauj muam uas mus koom rooj sib txoos hauv tebchaws Kaus Lim tau hais no: “Peb mam sib ntsib hauv Vaj Kaj Siab!”