1, 2. Henplais 13:4 txhawb kom peb ua li cas?

PEB txhua leej txhua tus yeej hwm Yehauvas. Nws yeej tsim nyog tau meej mom thiab koob meej huvsi. Nws hais tias cov uas hwm nws, nws yuav saib taus lawv. (1 Xamuyee 230; Paj Lug 3:9; Qhia Tshwm 4:11) Nws thiaj hais tias, txawm peb los, nws xav kom peb hwm thiab saib taus lwm tus, xws li tej nom tej tswv. (Loos 12:10; 13:7) Tiamsis muaj ib yam uas peb yuav tsum yimhuab hwm thiab saib taus. Yam ntawd yog txojkev txij nkawm.

² Tus tubtxib Povlauj sau tias: “Nej txhua tus yuav tsum saib taus qhov uas sib yuav, thiab tsis txhob ua qias puas tsuas nej lub cev txij nkawm.” (Henplais 13:4) Povlauj tsis yog lam tham txog kev sib yuav xwb tiamsis twb yog nws qhuab ntuas cov Khixatia tias lawv yuav tsum saib taus txojkev sib yuav thiab pom tias kev sib yuav yog yam uas muaj nqes tshaj plaws. Ua li, koj puas saib txojkev sib yuav rau nqe thiab. Tseem ceeb tshaj, yog koj twb muaj txij muaj nkawm lawm, koj puas saib koj txojkev txij nkawm rau nqe?

3. Yexus qhia li cas txog txojkev sib yuav? (Saib thawj daim duab hauv zaj no.)

³ Yog koj saib kev txij nkawm rau nqe ces twb yog koj xyaum  Yexus tus qauv zoo vim nws hwm kev txij nkawm heev. Thaum cov Falixai nug nws txog kev sib nrauj nws qhia rau lawv tias Vajtswv hais li cas txog thawj nkawm niam txiv. Nws hais tias: “Vim li no tus txivneej yuav ncaim ntawm nws niam nws txiv thiab nrog nws tus pojniam tsheej xeeb ua ke mas ob tug koom ua ib lub cev.” Yexus hais ntxiv tias: “Yam uas Vajtswv muab lo tsheej xeeb ua ke lawm, neeg tsis txhob muab ua kom ncaim.”​—Nyeem Malakau 10:2-12; Chiv Keeb 2:24.

4. Yehauvas lub ntsiab yog kom cov txij nkawm sib yuav ntev npaum li cas?

⁴ Yexus qhia tias vim Vajtswv yog tus tsim txojkev txij nkawm ob niam txiv yuav tsum nyob ua ke mus ib txhis raws li Vajtswv teem tseg. Thaum Vajtswv muab thawj nkawm niam txiv txis ua txij nkawm, nws tsis tau hais tias yog nkawd xav sib nrauj los tau. Tiamsis nws hais rau nkawd tias “ob tug” yuav tsum nyob ua ke mus ib txhis.

5. Ua cas kev tuag thiaj ua rau kev txij nkawm tsis zoo li qub lawm?

⁵ Tiamsis thaum Adas ua txhaum nws ua rau ntau tsav ntau yam tsis zoo li qub lawm. Ib qho yog qhov uas tibneeg txawj tuag. Kev tuag thiaj ua rau tej txij nkawm sib ncaim. Tus tubtxib Povlauj piav tias thaum ob niam txiv Khixatia ib tug tuag lawm ces txojkev txij nkawm xaus rau thaum ntawd thiab kuj tso cai rau tus uas tseem nyob mus yuav dua lwm tus.​—Loos 7:1-3.

6. Mauxe Txoj Kevcai qhia tias Vajtswv saib txojkev txij nkawm zoo li cas?

⁶ Vajtswv txoj Kevcai uas nws muab rau haiv neeg Yixayee qhia ntxaws ntxaws txog kev txij nkawm. Piv txwv li no, cov txivneej Yixayee twb yeej muaj coob tus pojniam lawm ua ntej Vajtswv muab txoj Kevcai rau lawv. Yog vim li ntawd, nws thiaj cia cov txivneej Yixayee yuav  coob tus pojniam. Tiamsis Vajtswv txoj Kevcai tiv thaiv txwv tsis pub tus txiv ua phem lossis ua nruj ua tsiv rau nws cov pojniam menyuam. Yog tias ib tug txivneej Yixayee twg yuav tau ib tug ntxhais qhev los ua pojniam es tom qab ntawd nws ho yuav dua ib tug niam yau, nws yuav tsum saib xyuas tus niam hlob ib yam li qub. Vajtswv hais tias nws yuav tau ua li ntawd kom tas tiam neej. (Khiav Dim 21:9, 10) Niaj hnub no, peb tsis ua li Mauxe Txoj Kevcai lawm. Tiamsis txoj Kevcai ntawd qhia rau peb tias Vajtswv saib txojkev txij nkawm rau nqe heev. Peb yuav tau saib taus txojkev txij nkawm ib yam li ntawd thiab.

7, 8. (1) Txoj Kevcai hais li cas txog kev sib nrauj? (2) Yehauvas xav li cas txog kev sib nrauj?

⁷ Mauxe Txoj Kevcai hais li cas txog kev sib nrauj? Txawm tias Yehauvas tsis xav kom cov niam txiv sib nrauj li los, txoj Kevcai kuj cia cov txivneej Yixayee nrauj nws tus pojniam thiab yog nws “paub tias nws poob koob lawm.” (Nyeem Kevcai 24:1.) Tiamsis txoj Kevcai tsis qhia meej tias qhov “poob koob” ntawd yog dabtsi tiag. Txawm li ntawd los, yuav tsum yog tej yam poob ntsej muag thiab loj dhau lawm, tsis yog tej yam me me xwb. (Kevcai 23:14) Tu siab heev, lub caij Yexus nyob, cov Yudai coob leej ntau tus lam tau lam nrauj lawv tej pojniam ua dog ua dim “yog tim txoj twg kuj xij.” (Mathai 19:3) Peb yeej tsis xav xyaum tus cwj pwm zoo li no li.

⁸ Lub caij tus cev Vajtswv lus Malakhi nyob, tej txivneej niaj hnub nrauj pojniam mus yuav dua tus tshiab. Tej zaum kuj yog mus yuav tus tsis teev tiam Yehauvas, tus mos thiab hluas dua tus niam hlob. Tiamsis Vajtswv yeej nkaw lus meej tias nws xav li cas txog kev sib nrauj. Nws hais tias: “Kuv ntxub qhov uas sib nrauj.” (Malakhi 2:14-16) Thaum chiv keeb Vajtswv hais rau thawj tus txivneej tias yuav tsum “nrog nws tus pojniam tsheej xeeb ua ke mas ob tug koom ua ib lub cev.” (Chiv Keeb 2:24) Vajtswv tseem saib txojkev sib yuav rau nqe li qub. Yexus los kuj xav ib yam li nws Leej Txiv thiab, nws hais tias: “Vim li no yam uas Vajtswv muab lo tsheej xeeb ua ke lawm, neeg tsis txhob muab ua kom ncaim.”​—Mathai 19:6.

9. Yexus cov lus ntawm Malakau 10:11, 12 txhais tau li cas?

⁹ Muaj tej tug yuav nug tias, ‘Thaum twg ib tug Khixatia thiaj nrauj tau nws tus txij nkawm thiab mus yuav dua tus tshiab?’ Cia peb xyuas seb Yexus hais li cas, nws hais tias: “Leejtwg nrauj pojniam es nws mus yuav dua pojniam tshiab, kuj yog ua txhaum kev nkauj kev nraug rau tus pojniam qub, thiab yog tus pojniam nrauj tus txiv es mus yuav dua txiv tshiab, tus pojniam ntawd kuj ua txhaum kev nkauj nraug.” (Malakau 10:11, 12; Luka 16:18) Nqe no qhia meej tias Yexus saib taus kev sib yuav thiab nws kuj xav kom lwm tus ua li thiab. Yog ib tug txivneej twg lam nrauj nws tus pojniam uas tsis tau ua txhaum mus yuav dua tus tshiab ces yeej yog nws ua txhaum kev nkauj kev nraug lawm. Yog ib tug pojniam ho lam nrauj nws tus txiv uas tsis tau ua txhaum los kuj ua txhaum kev nkauj kev nraug thiab. Txawm nkawd sib nrauj lawm los nkawd tseem yog niam txiv. Rau qhov Vajtswv xam tias nkawd tseem yog “ib lub cev.” Yexus kuj hais tias yog ib tug txivneej nrauj nws tus pojniam uas tsis tau ua txhaum ces tej zaum yuav ua rau nws tus pojniam mus ua txhaum thiab. Ua cas Yexus thiaj hais li ntawd? Vim tias nyob rau lub caij ntawd, tus pojniam uas nrauj txiv lawm yuav xav tias yog nws tsis mus yuav dua txiv tshiab ces yuav tsis muaj leejtwg pab nws. Yog nws mus yuav dua txiv tshiab ces nws yuav ua txhaum kev nkauj kev nraug.

10. Thaum twg xwb ib tug Khixatia thiaj nrauj tau nws tus txij nkawm thiab mus yuav dua tus tshiab?

 ¹⁰ Yexus qhia tias tsuas tso cai sib nrauj rau thaum twg xwb? Nws hais tias: “Kuv hais rau nej tias, leejtwg nrauj pojniam tsis yog tim qhov uas deev hluas nraug [lus Kili yog phauni-a] es mus yuav dua pojniam tshiab, kuj yog ua txhaum kev nkauj nraug.” (Mathai 19:9) Thaum Yexus cev zaj lus qhia saum roob los nws kuj hais ib yam nkaus. (Mathai 5:31, 32) Ob zaug no nws tham txog “qhov uas deev hluas nraug” lossis kev ua plees ua yi. Xws li, deev luag poj luag txiv, muag cev, cov uas tsis tau muaj txij nkawm sib deev, txivneej deev txivneej pojniam deev pojniam, thiab tibneeg deev tsiaj txhu. Piv txwv li no, yog tias tus txiv mus ua txhaum kev nkauj kev nraug lawd, tus pojniam yuav tau txiav txim siab seb nws yuav nrauj tus txiv los tsis nrauj. Yog nws nrauj ces Vajtswv yuav xam tias nkawd tsis yog niam txiv lawm.

11. Ua cas tej tug Khixatia ho txiav txim siab tsis nrauj lawv tus txij nkawm uas tau ua txhaum kev nkauj kev nraug?

¹¹ Nco ntsoov, Yexus tsis tau hais tias yog ob niam txiv ib tug mus ua txhaum kev nkauj kev nraug (phauni-a), tus uas tsis txhaum yuav tsum muab tus txhaum nrauj xwb. Tej zaum tus pojniam yuav txiav txim siab tias txawm nws tus txiv ua txhaum los nws tseem xav yuav nws tus txiv. Ua cas nws thiaj xav li ntawd? Tej zaum nws tseem hlub nws tus txiv, xav zam txim rau nws tus txiv, thiab xav tias nws mam li pab nws tus txiv txhim kho nkawd lub neej. Tej zaum nws kuj xav tias yog nkawd sib nrauj es nws tsis muaj txiv lawm ntshe lub neej yuav nyuaj heev. Xws li, kev nrhiav noj nrhiav haus thiab kev koom txaj chaw pw. Tej zaum nws kuj xav tias nyob ib leeg ntshe yuav kho siab heev. Yog nkawd sib nrauj tej menyuam yuav xav li cas? Puas yuav nyuaj rau nws pab lawv los paub qhov tseeb? (1 Khaulee 7:14) Zoo li hais no, yog nws tus txij nkawm ua txhaum es nws muab nrauj los nws lub neej yeej yuav tsis yoojyim.

12, 13. (1) Ua li cas rau Hauxeya txojkev txij nkawm lawm? (2) Vim li cas Hauxeya thiaj rov yuav Kaumaw dua, thiab qhov no qhia peb li cas?

¹² Tus cev Vajtswv lus Hauxeya txojkev txij nkawm kuj qhia tau ntau yam rau peb txog Vajtswv txojkev xav. Vajtswv hais kom Hauxeya mus yuav ib tug pojniam hu ua Kaumaw uas tsis ntev xwb yuav mus ua “ib tug pojniam uas nyiam deev hluas nraug” thiab yuav muaj “tej menyuam hluas nraug.” Kaumaw thiaj yug tau ib tug tub rau Hauxeya. (Hauxeya 1:2, 3) Tom qab ntawd, Kaumaw yug tau ib tug ntxhais thiab ib tug tub ntxiv uas yog menyuam hluas nraug. Txawm Kaumaw mus deev hluas li ntawd ntau zaus los Hauxeya tseem yuav nws. Ntev mus ntev tuaj Kaumaw txawm ciaj qhev lawm. Txawm li ntawd los Hauxeya tseem muab nyiaj mus yuav nws rov los. (Hauxeya 3:1, 2) Yehauvas siv Hauxeya lub neej los ua qauv qhia txog cov Yixayee uas ua tsis ncaj ncees rau Yehauvas thiab kheev mus teev tiam lwm tus vajtswv. Yehauvas zam lawv txim tag los zam thiab. Hauxeya txojkev txij nkawm qhia peb li cas?

¹³ Yog tias ib tug Khixatia tus txij nkawm mus ua txhaum kev plees kev yi lawm, tus Khixatia yuav tau txiav txim siab seb nws yuav ua li cas. Yexus hais tias tus uas tsis txhaum muaj cai nrauj nws tus txij nkawm thiab mus yuav dua lwm tus. Tiamsis yog nws ho txiav txim siab zam txim rau nws tus txij nkawm los kuj tsis txhaum thiab. Thaum Hauxeya coj nws tus pojniam rov los, Hauxeya hais rau nws tias nws yuav tsum tsis txhob mus deev hluas nraug ntxiv lawm. Hauxeya tsis nrog nws tus pojniam pw ua ke tau ib ntus. (Hauxeya 3:3, NW cov lus hauv qab taw qhia.) Tom  qab ntawd, tej zaum Hauxeya kuj rov nrog nws pw ua ke lawm. Yehauvas muab Hauxeya lub neej piv rau qhov uas Nws zoo siab hlo txais yuav cov Yixayee rov los thiab nrog lawv sib raug zoo. (Hauxeya 1:11; 3:3-5) Qhov no qhia li cas rau peb txog txojkev txij nkawm niaj hnub nimno? Yog tus tsis txhaum rov nrog tus uas txhaum pw ua ke ces twb yog nws zam txim rau tus ntawd lawm. (1 Khaulee 7:3, 5) Yog nws ua li no ces nws tsis muaj cai nrauj nws tus txij nkawm lawm. Thaum no nkawd ob niam txiv yuav tsum sib pab txhim kho thiab saib taus nkawd txojkev txij nkawm ib yam li Vajtswv saib.

14. Raws li 1 Khaulee 7:10, 11 tau muaj li cas rau qho nkawm niam txiv?

¹⁴ Txhua tus Khixatia yuav tsum saib taus kev sib yuav ib yam li Yehauvas thiab Yexus nkawd. Tiamsis vim peb txhua tus yog neeg txhaum, ib txhia thiaj tsis ua raws li ntawd. (Loos 7:18-23) Txawm qho nkawm niam txiv Khixatia thaum ub muaj teeb meem loj heev los peb tsis ceeb thiab tsis xav yuam kev. Povlauj sau cia tias “tus pojniam tsis txhob tso tus txiv tseg.” Txawm li ntawd los, tseem muaj cov uas tau ua li ntawd lawm thiab.​—Nyeem 1 Khaulee 7:10, 11.

15, 16. (1) Thaum ob niam txiv muaj teeb meem, nkawd lub hom phiaj yuav tsum yog li cas thiab vim li cas? (2) Yog ib tug txij nkawm tsis teev tiam Yehauvas ne, yuav ua li cas?

¹⁵ Povlauj tsis qhia meej tias yog vim li cas ib txhia txij nkawm thiaj sib cais lawm. Tiamsis peb paub tias tsis yog tim tus txiv mus ua plees ua yi. Tsis li ntawd ces tus pojniam yeej muaj cai nrauj tus txiv mus yuav dua tus tshiab. Povlauj sau tias tus pojniam uas cais ntawm nws tus txiv mus lawm yuav tsum “tsis txhob mus yuav dua txiv tshiab” tiamsis yuav tsum “rov nrog nws tus txiv qub sib haum.” Rau qhov Vajtswv tseem xam tias nkawd yog niam txiv. Povlauj hais tias txawm nkawd ob niam txiv muaj teeb meem dabtsi los, yog nkawd ib tug tsis tau mus ua plees ua yi ces nkawd yuav tsum sib tham kom sib haum, los yog daws nkawd tej teeb meem es nyob twjywm ua ke. Nkawd kuj mus cuag tau cov txwj laus pab thiab. Cov txwj laus paub tias nqe Vajlugkub twg thiaj pab tau nkawd thiab lawv yuav ua tib zoo mloog nkawd piav, tsis tuaj ib tug twg tog.

¹⁶ Tiamsis yog tus Khixatia tus txij nkawm tsis teev tiam Yehauvas ne? Thaum nkawd muaj teeb meem, nkawd sib cais nyias nyob nyias puas tau? Raws li twb tham los lawm, phau Vajlugkub tsuas qhia tias thaum mus ua txhaum kev nkauj kev nraug thiaj sib nrauj tau xwb. Tiamsis phau Vajlugkub tsis qhia tias thaum twg thiaj sib cais tau. Povlauj sau tias: “Yog tus pojniam twg muaj txiv uas tsis ntseeg thiab tus txiv txaus siab nrog nws nyob, nws  tsis txhob muab tus txiv nrauj.” (1 Khaulee 7:12, 13) Niaj hnub no los, peb tseem coj raws li nqe Vajlugkub no.

17, 18. Txawm muaj teeb meem loj los ua cas ib txhia Khixatia ho txiav txim siab nrog lawv tus txij nkawm nyob?

¹⁷ Muaj tej tug “txiv uas tsis ntseeg” ua tau tej yam uas qhia tias nws tsis “txaus siab nrog” nws tus pojniam nyob lawm. Tej zaum nws ua nyaum heev, nws tus pojniam ntshai tsam yuav ua rau tus pojniam raug mob lossis raug tuag. Tej zaum kuj yog tus txiv tsis kam khwv los yug nws tsev neeg, lossis txwv hlo tsis pub nws tus pojniam teev tiam Yehauvas. Thaum zoo li no, txawm tus txiv yuav hais li cas los, tej uas nws ua ntawd ua rau tus pojniam Khixatia txiav txim siab tias tus txiv tsis “txaus siab nrog nws nyob” lawm ces yuav tau sib cais nyias nyob nyias. Kuj muaj ib co Khixatia uas muaj teeb meem ib yam li no tiamsis ho txiav txim siab tias, txawm li cas los, lawv yuav nrog lawv tus txij nkawm nyob xwb. Lawv ua siab ntev thev txhim kho lawv lub neej kom rov zoo. Ua cas lawv thiaj txiav txim siab li ntawd?

¹⁸ Rau qhov txawm sib cais lawm los tseem yog niam txiv ces yuav nyuaj heev li tau hais tas lawm. Tus tubtxib Povlauj kuj hais ntxiv tias, yog vim li cas thiaj zoo rau tej txij nkawm nyob ua ke. Nws sau tias: “Tus txiv uas tsis ntseeg ntawd raug muab cais ua tus dawb huv vim yog nws tus pojniam, thiab tus pojniam uas tsis ntseeg kuj raug muab cais ua tus dawb huv vim yog nws tus txiv. Yog tsis muaj li ntawd, neb cov menyuam kuj qias tsis huv tiamsis nimno neb cov menyuam twb dawb huv lawm.” (1 Khaulee 7:14) Txawm muaj teeb meem loj npaum li cas los, muaj coob tus Khixatia txiav txim siab nrog lawv tus txij nkawm tsis teev tiam Yehauvas nyob ua ke. Lawv zoo siab heev tias lawv ua siab ntev es tom qab no lawv tus txij nkawm ho los ua Yehauvas ib tug timkhawv lawm thiab.​—Nyeem 1 Khaulee 7:16; 1 Petus 3:1, 2.

19. Ua li cas thiaj muaj coob nkawm niam txiv hauv cov koom txoos Khixatia uas ua neej zoo siab xyiv fab hlo?

¹⁹ Yexus qhuab ntuas txog kev sib nrauj hos tus tubtxib Povlauj qhuab ntuas txog kev sib cais. Nkawd ob leeg puavleej xav kom Vajtswv cov tub qhe hwm thiab saib taus txojkev txij nkawm. Niaj hnub nimno, yeej muaj tej niam txiv thoob plaws qab ntuj hauv cov koom txoos Khixatia uas ua neej zoo siab xyiv fab hlo. Tej zaum koj twb pom cov niam txiv zoo li no nyob hauv koj lub koom txoos thiab, tus txiv paub hlub tus niam thiab tus niam paub hwm tus txiv. Lawv tej qauv qhia tias txojkev txij nkawm yeej muaj nqes heev. Peb zoo siab heev uas tsheej txhiab tsheej plhom nkawm niam txiv tau ua pov thawj tias yeej muaj tseeb li Vajtswv hais no: “Vim li no tus txivneej thiaj ncaim ntawm nws niam nws txiv thiab nrog nws tus pojniam tsheej xeeb ua ke mas ob tug yuav koom ua ib lub cev.”​—Efexau 5:31, 33.