Thaum Yehauvas sam hwm kom tib neeg “huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb,” twb yog nws xav kom lub ntiaj teb ua ib lub vaj kaj siab. (Chivkeeb 1:28) Cov tib neeg uas yuav nyob mus ib txhis yuav tau coj raws li Yehauvas sam hwm no. Lub vaj Edees tsis muaj nyob tshwm sim rau qhov twg ces thaum thawj lub ntiaj teb yuav tsis zoo li ib lub vaj kaj siab. Tom qab Amankedoos, peb yuav muaj hauj lwm ntau heev ua thiaj tu tau tej thaj tsam uas puas tsuaj puas ntsoog tag lawm.

Tes hauj lwm no ua rau peb nco txog lub sij hawm thaum cov Ixayees rov qab tim Npanpiloos los txhim kho lawv lub teb chaws. Tsis muaj neeg nyob hauv lawv lub teb chaws tau 70 lub xyoos. Tiam sis Yaxayas tau faj lem tias Yehauvas yuav foom koob hmoov ces lawv yuav rov txhim kho tau lawv lub teb chaws kom rov qab zoo nkauj ib yam li qhov qub. Zaj lus faj lem hais li no tias: “Yuav muab lub nroog Yeluxalees tej nras mojsab ua kom zoo li lub Vaj Edees. Yeluxalees tej tiaj  suabpuam yuav zoo li [Yehauvas] lub vaj.” (Yaxayas 51:3) Yehauvas yeej pab cov Ixayees lawm tiag. Zoo ib yam li ntawd, Yehauvas yuav foom koob hmoov rau cov uas yuav tau lub ntiaj teb ua lawv tug, kom tu tau lub ntiaj teb ua ib lub vaj kaj siab. Txawm tam sim no los koj yeej ua tau qho yam qhia tias koj xav tu lub ntiaj teb no.

Ib yam uas koj ua tau ntawd yog tu koj lub tsev thiab tej tog vaj tog tsev kom du lwb lug tab txawm tej neeg zej zog yuav tu los tsis tu. Koj kuj mus pab tu tau lub Tsev Nceeg Vaj thiab lub Tsev Rooj Sib Txoos kom du dais. Yog muaj sij hawm los koj kuj rau npe mus pab thaum muaj xwm txheej. Ua li no qhia tau tias koj yeej txaus siab hlo pab cov kwv tij nkauj muam. Tsis tas li ntawd, koj yuav kawm tau qho yam uas koj yuav siv tau yog tias koj yuav tau lub ntiaj teb ua koj tug.

Tom qab Yexus tsa Yailus tus ntxhais rov los, nws hais tias kom muab mov rau tus me ntxhais noj. (Malakaus 5:42, 43) Tej zaum pub mov rau ib tug ntxhais muaj 12 xyoos xwb ces tsis luaj twg. Tiam sis peb yuav muaj hauj lwm ntau heev ua thaum “cov neeg uas tuag lawm yuav hnov Leej Tub lub suab hu, thiab lawv yuav tawm hauv lawv tej qhov ntxa los.” (Yauhas 5:28, 29) Txawm phau Vajlugkub tsis piav tshab tshab tias yuav ua li cas rau li cas los peb yeej paub tias cov neeg uas sawv rov los yuav tau muaj zaub mov noj, chaw nyob, thiab tsoos tsho hnav. Koj yeej ua tau qho yam qhia tias koj muaj lub siab xav pab. Koj yuav ua tau qho yam no.

Thaum hnov tej lus tshaj tawm tias tus saib xyuas thaj tsam yuav tuaj xyuas koj lub koom txoos, koj puas txaus siab hlo rau npe caw nws mus noj ib pluag mov? Thaum ib tug ua hauj lwm hauv Npe-ee hloov nws tes hauj lwm mus ua ib tug tshaj tawm los sis tus saib xyuas thaj tsam so tsis ua nws tes hauj lwm lawm, koj puas txaus siab hlo pab nrhiav chaw rau lawv nyob? Yog tias muaj lub rooj sib txoos los sis lub rooj sib txoos tshwj xeeb nyob rau ntawm koj thaj tsam, ua li koj puas mus tos txais qhua? Koj puas kam pab tu tsev ua ntej los sis tom qab rooj sib txoos?

Raws li Tes Haujlwm 24:15, peb yeej tos ntsoov tias qas txhiab qas vam leej tib neeg yuav sawv rov qab los muaj sia dua. Muaj coob leej ntau tus tuag ua ntej lawv paub Yehauvas. Tom qab lawv sawv rov los, lawv yuav muaj lub cij fim los paub Yehauvas. a Cov uas teev tiam Yehauvas yuav tau cob qhia lawv. (Yaxayas 11:9) Muaj ib tug muam npe hu ua Solej (Charlotte) tau mus qhia Vajlugkub rau Yus Luv, Amelikas qab teb, thiab Afika tos tsis hnyu yuav qhia lawv. Nws hais tias: “Kuv tos ntsoov yuav qhia cov tib neeg uas sawv rov los muaj sia dua. Thaum kuv nyeem txog tej tug tib neeg uas nyob puag txheej thaum ub, kuv pheej xav li no tias: ‘Yog tus tib neeg no paub Yehauvas ntshe nws lub neej yuav tsis zoo li ntawd.’ Kuv tos ntsoov yuav qhia rau cov tib neeg uas sawv rov los txog Yehauvas thiab lawv lub neej yuav zoo npaum li cas yog lawv teev tiam Yehauvas.”

Txawm cov teev tiam Yehauvas uas nyob ua ntej Yexus los hauv lub ntiaj teb no los lawv yuav tau kawm ntxiv kom thiaj paub Yehauvas. Ntshe peb yuav zoo siab heev thaum peb tau qhia rau Daniyees txog cov faj lem uas nws tau sau tseg seb muaj tiav li cas rau li cas vim lub sij hawm ntawd nws lam sau tiam sis nws tsis nkag siab. (Daniyees 12:8) Tsis tas li ntawd, peb yuav txaus siab hlo qhia rau Luv thiab Na-aumis tias tus Mexiyas los ntawm lawv tsev neeg caj ces los. Lub sij hawm ntawd, peb yuav kaj siab lug tso siab plhuav qhia rau cov tib neeg uas nyob thoob plaws lub ntiaj teb no yeeb vim yog tsis muaj lub qab ntuj neeg phem no los cuam tshuam ntxiv lawm.

Tam sim no koj ua tau yam twg los qhia tias koj yeej npaj txhij yuav qhia rau cov sawv rov qab los? Ib yam yog xyaum kom koj txawj qhia Vajlugkub thiab nquag mus qhia Vajlugkub rau tib neeg. (Mathais 24:14) Txawm koj ua tsis tau npaum lub siab xav yeeb vim yog laus lawm los sis muaj lwm yam cuam tshuam ua tsis tau, los koj yeej muaj peev xwm qhia tau tias koj tos ntsoov yuav qhia cov uas sawv rov qab los yog tias koj ua npaum li koj ua tau los qhia txoj xov zoo rau lub caij no.

Zoo rau peb zaum tsaws xav txog tej lus nug no mus mus los los: Koj puas tos ntsoov yuav tau lub ntiaj teb ua koj tug? Koj puas tos ntsoov yuav txhim kho lub ntiaj teb no, npaj tos cov sawv rov qab los, thiab cob qhia lawv? Qhov uas qhia tau tias koj tos ntsoov yuav nyob mus ib txhis hauv lub ntiaj teb no yog koj ua tej yam muaj ntsis xws li thaum nyob rau hauv lub qab ntuj tshiab.